Psa 45 | XteSC | STEP | Mut pena deiyo ngebo karepkamnga tep seku. “Amutda, yuk mut er si Bunga Bakung lelim peramretopu penkamrume,” pepu. Amutda, sun Korah yala nengdi deipi ngebodi seku. Ada peteremna cap, bicau tenedana cap tep seku.

Psalms 45

Nimi deiyo ngebo, er ner dona taru tep, tenpu ngebodi amutda seku

1 Mut pena deiyo ngebo karepkamnga tep seku. “Amutda, yuk mut er si Bunga Bakung lelim peramretopu penkamrume,” pepu.
Amutda, sun Korah yala nengdi deipi ngebodi seku. Ada peteremna cap, bicau tenedana cap tep seku.
2 Ne kange dipru neitamaida, pio telep upu penange akwapmanera tep, amut sekune.
Amutda, nun mutu neitamaida nimi deiyo ngebo, nun Raja gispal dona tep, amut sekra karepkamane.
Ne sipyal deiki di pepkun upuda, ila kael upu sengna ngebodi sengamretopu pepkune.
3 Ne sipyal deiki di pepkun upuda, ila kael upu sengna ngebodi sengamretopu pepkune.
Kandi gekena telep upu pesereme ngeda, pepsemempa, nimi gekepmengedi, kange deipra kunupe.
Telep upu peserume. Ange tep nengeda, Allahdi kan tep telep kweipkerepa, pio teleppu kunkamrume.
4 Kanda pio puto weik ngebo kuruma tep, kandi kurum kecada, nimi yuma gekepmengedi, ‘Uo, erda pio puto weik ngebo kurure,’ tenekenunge. Atep, kan nimi pon parang ya dopra, kan kail deiki getepra kapkotepmemdi ketenepkamrume!
Ada, kanda urasin pio telep kuna cap, puto kuna cap, mambul kuna cap kuruma cadi, nimi yumadi kan tep, ‘Uo, erda pio telepe,’ pepra gispal dokenunge.
5 Atep, kan pio telep kurem utopu, kan pona tep neng damai, adipapu porbenkurume! Aneng yumada tek sisi popra gawal dangkamrume!
Tonda, nun nai bo Allahdi, ‘Ange kunkamrume,’ peseretopu kupra, dumsisi kunange cap, gemena gum di, dipru bouna di kunange cap, nimi tek sisi kuramengtopu telep kupra upu bongdinange capda, ‘Ange yuma gum kupserur’ tenen, mali neng damai porbenkurume!
Tonda, kan dumsisi tara ila puto buru di, ila mambul pel dopmem pangeda, nimi yuma epmengedi, ‘Uo, erdi kure keca yumada, pio mambule,’ penkameng tenen, kan puto deiki di mambul pel donkamrume!
6 Nun nai Rajao, kandi dopkamrem marda, pio yu kurura cadi, nun podan neng tep, sun dipruai popyopda, adipapu depkamenge.
Kandi, yuk mutu nesala yala yuma, sun damai bena popmemnyopda, sunda adipapu tu deiki saka, kan yan damai depkamenge.
7 Uo nun nai Allah, kan puto di akeca-keca yuma talepra, nun nimi deiyo ngebo kurum ngeda, pio akunkamrume. Angeda pio men gum kuptue.
Kanda nimi deiyo kemna tep, emas maca ^{▼▼emas maca – Pumun taruda, nimi deiyo neng, Raja-Raja nengdi, ‘Nimi yumada, ne ila puto ngebo kununada, kael kepkamneng’ tenen, emas maca doupra embarami. Atep, akayat neitamaida, ada ukupmanto upu tep seki. Deiyoda, ‘Allah erda ila puto weik ngebo kurure’ tenena tep aupu seki.} utopu doupmemdi, nun nimi tuai nesala tep, upu bokeipsememdi, ‘Ukunkamrume,’ pepra upu peserem ngeda, pio teleppu kurure.
Nimi upu bongdina tep, kandi, ‘Ne kap’ tenen, mawa di men pepserume. Pio dumsisipu pesememdi, upu bongdiserume.
8 Tonda, Allahdi, ‘Angeda kunkamrume, angeda pio men kunkamrume,’ pepra deiamseu upuda, kandi kange derirume. Tonda, mali kunange yumada, kandi, ‘Ne pio songe,’ tenepra peserume.
Ange tep nengeda, nun nai Rajao, kandi pio dumsisipu kuruma cadi, nun nai Allahdi, ‘Angeboda Israel yala nesala talenkamre’ tenepudi, kan tep konum wepra deipkeupa, nun nimi deiyo ngebo kuserume!
Nun nai Allahdi, kan tep wepra deipkeu taruda, ‘Amutu pio talenkamre’ tenen, ‘Sah’ kemna tep, minyak saitun me gwepra, kan giso deiki di diktapkei. Uda, yuk nimi deiyo neng ton dakurami dinin, kan tep nengeda, sun deiki tara erepra deipkeupa, sunda, kan amutarapu kununge.
9 Tonda, ‘Angeboda ila nimi deiyo ngebo Raja kurure,’ tenen, peten kemna tep, lyom opkal, er si juba, karepkei ngeda, er si juba deiki, ‘Nintong telep penkamre’ tenen, nintong telep minyak cap, minyak gaharu co cap, min-min pena telep co pe, er si kayu manis co cap dopra, nimi deiyo neng kemne opkal er sida juba, kan kenekmumnge deiki likra deipkei.
Nimi deiyo ngebo kuna tep atida, kunumna weik keca, er si gading dopra, ange di ila telep ati domi. Akati neitamai di, bung-bung pena, er sida gitar deiki di mut ton pengepa, kanda kange derirume.
10 Tonda, kanda ila mambul ngebo kuruma tep, yuk-yuk mutu nimi deiyo nengdi, ‘Israel nesala kunge mutu talerur nimi deiyo ngebo tep, nun ner nyapu dopra karepmepepa, er putarur keca tep, melimkamenge’ tenen, sundi, kan tep kareamipa, nerapuda kan damai kununge.
Teka, kandi domum nerda, kan buru dumsisi tara damai tengrure. Er opkal deikida, pio kunumna weik keca, er si emas, pio telep ngeda, Ofir mutu di dopra duyanami ngeda, palepra deiamipa, kenengrure.
11 Nimi deiyo ngebo Rajadi konum domu nerda, nedi amut pena deiki di pepkuken upuda, moupra gekepkurume!
Kan deipkeu ngebo, kan nai sisa cap, kan mutu sisa kunge nesala cap tep, lupronkurume. ‘Uo, sun damai tamupra bena kutene,’ tenen, tupa-tupa tenena pio gume.
12 Teka, kan tara nesala cap, kan mutu cap tep, tupa-tupa men tenepmemyopda, nun mutu ila nimi deiyo ngebo Rajadi, kan tep, ‘Uo, erda pio urasin telep ner kurure,’ tenepredi, pio kange derinkamkerure.
Tonda, nun mutu nimi deiyo ngebo Rajada, erdi kan tep, ‘Ukupkamrume, angeda pio men kupkamrume,’ pepra, talepkeredi, kan upu bongdina deiyo ngebo kukerure. Atep nengeda, kandi er gispal dona tep, gutam tu dipdongopra genepdongoprapmemdi, gispla donkamrume!
13 Uo, nun deiyo ngebo Rajao! Sun Tirus mutu nesalada, pio isomka kunung dinino, amenda taruda, sun dipru neitamai yumadi kan tep, ‘Kange deipsetudi, melimkamser’ tenen, pio telep keca dopra, kan damai kareryakankamenge.
14 Nun deiyo ngebo Rajadi dopkure nerda, kan karena tep, kunumna weik keca yala-yala yuma talepra yankamare!
Tonda, nimi deiyo ngebo Rajadi dopkur nerda, er man ati pumbon bukredi, ‘Ketenepkun’ tenen, er lyom opkal, er si juba deiki di, kunumna weik keca er si emas di, opkal wina tep ketenepra deiamu tapu di, er opkal deikida konum wipra deiami.
15 Tonda, er lyom opkal kenekmarada, ware kuprap do, warnya weik kenengmardi, nimi deiyo ngebo Raja damai yakanmare.
Raja dopkur ner, er mepra yakanmarepa, er tep melimkameng kaber nerapu yumada, er amnyo tara ton amenda yakanmange.
16 Nimi deiyo ngebo, er amutara deiyo-deiyo nengdi, anerapu yuma dopra duyangedi, anerapu cap, aneng cap yumadi, kange deipra kunmange.
Raja ngebo melimna nengdi, anerapu yuma, dopra mepra yangepa, sun anerapu yuma dopra yangepa, sun anerapu yuma amnyo tarapu yakanmange. Sun yumada, nimi deiyo ngebo Raja, er ila telep ati pumbon wengyakankunge.
17 Nun nai Rajao, kan apu yapudi, Israel nesala yuma taleramidi, nun nimi deiyo neng kuramitopu, kandi deipmempa, dadeipdanen bankameng nengdi, kan yo punupmengedi, amutu talepra Raja neng kunkamsenge.
Kandi deipmempa dadeipdanen bankameng nyapu wepra ereipmempa, sundi, tuai mutu ban-ban yuma talepmengedi, nimi deiyo neng kunkameng ja!
18 Tonda, amazmur upu sekra karepmakena deiki di, kandi dipdongopra, amenda dorkunkameng neng peda, kan si tep, ila di kael kepmengedi, tupa-tupa tenenapu kunkamenge.
Ange tep nengeda, tuai mutu ban-ban yuma neitamai kunkameng nesala yumada, kan tep tenepmengedi, ‘Uo, erda pio telep kuramu ngebo,’ tenen, gispal donkamkenge.