Psa 46 | XteSC | STEP | Mut pena tep deiyo ngeboda, Daud gonga kepnepa, sun Korah deipgerek neng yumada, Allah tep mut pepra gudirami.

Psalms 46

Allahdi nimi tep teneseredi melimserur upu

1 Mut pena tep deiyo ngeboda, Daud gonga kepnepa, sun Korah deipgerek neng yumada, Allah tep mut pepra gudirami.
2 Nun ikin kusere taru yumada, nun nai Allah kandi melimsememdi puto kareserume. Allah kandi lelimdongomserume. Allah kanda nimi kange mun kupserenge melimserum ngebo.
3 Atep nengeda, longna emberedi, ila-ila mutu dup bukua yuma toprapredi, ila laut mokon neitamai taikre taru peda, nunda kange mun kange doupra, kware men kupkamsere.
4 Tonda, ila laut mokon lelim weik pepredi, welya-kwerya kepra peda, kware men dakamepe. Tonda, ila mutu longna kupredi, mutu dup yuma long-long pepya peda, kware men dakamepe. Konuma pena tep, Sela ^{▼▼Sela perami ngeda, Ibrani upu deiki di, ‘Selah’ sekami. Aupu deiyoda, ‘Apepmap upuda, mambul weik cadi, moupra tenipkurume’ tenen, ‘Selah’ sengami.} pepne.
5 Dinino, Allahdi ketenepra deipu mutu, er kunaida, pio telep me amutu neitamai poembeu. Ukupudi, me teru kwakudi, dan-dana embeu me yumada, amutu kunkameng nesala epmengedi, kange derinkamenge.
Amutuda, pio lek mutu cadi, akeca-keca yuma talepra, pio deiki tara kuredi, Ila Puto Eremna Ngebo kurya deiyo ngebo Allahda, amutu kurure. ^{▼▼kurure – Acada, Ibrani upu deiki di, Allah er si tep, ‘Allah Elyon’ pepra seki. Aupu deiyoda, sun kael kemna tep, angeda konum jenek kupra sekmepu.}
6 Allah ila puto ngeboda, amutu neitamai pio akunkamra tep, amutuda pio men gum kupkamre. Apio kapkamre. Ada berengdongon taru peda, Allahdi amutu tupa melimkamre.
7 Tuai mutu ban-ban yuma kunge nesaladi, mar podangedi, ila lelim peprepa, ngolongamengtopu kupra ngolongnunge. Ton tamna nesaladi, yuk tamna nesala tep, popbisipmengepa, gum kurure.
Allahdi tenere taru konum kupyopda, er upu ila di peprepa, tuai mutu yuma yawa popra gum kupkamre.
8 Dinin, nun nai Allah Yahwehda, akeca-keca yuma taleredi, im deiki jen talen malaikat yuma, sun ila deiyo ngebo kurure. Allahda, Ila Eremna Ngebo kuredi, nun cap kikiman kunupe.
Ada, Yakubdi deipupa, dadeipdanen, yakarami nesala, pio kalekra meliamutopu, tupa melimserure. Ikin keca nun damai yakaserur taruda, Allah kandi tupa lelimdongomserume. Konuma pena tep, Selah pepne.
9 Atep nengeda, tuai nesala yumadi, Allah er si Yahweh puto di pel doamu ngeda, diryarume. Allahdi tenere taru konum kupyopda, tuai mutu yuma gum kupra derirure.
10 Nimi tulum deiki di mar podaramenge ngeda, Allahdi, ‘Konuma,’ tenepre taruda, upu sengrure. Tonda, nimi sun podan mar yuma gakra tamrure.
Tonda nimi pona tep, betamdinung co takke yuma gangtamrure. Tonda, ‘Mar dopmengepa, ne nongai yan marapnenun’ tenen, lelimdongomna keca peda, uku dongomrure. Allahda, ila puto weik ngebo kurura tepa.
11 Allah Yahwehdi, nimi tuai nesala yuma tep upeserure. Sundi, ngolokra mali perumnge yumada, dimpepkurume. Neda Allah Yahweh kununa tep, ne sipu kael kepneso.
Ware nesala do, mutu ban-ban yuma dakunung nesala yumadi, ne sipu kael kepnemumdi, ne sipu eremkamnerume. Tonda, ban-ban yuma kurum nesaladi, ne sipu erepra gispal donkamnerume.
12 Nun nai Allah Yahwehda, akeca-keca yuma taleredi, im deiki jen talen malaikat yuma, sun ila deiyo ngebo kurure. Allahda, Ila Eremna Ngebo kuredi, nun cap kikiman kunupe.
Ada, Yakubdi deipupa, dadeipdanen yakarami nesala, pio kalekra meliamutopu, tupa melimserure. Ikin keca nun damai yakaserur taruda, Allah kandi tupa lelimdongomserume.
Konuma pena tep, Selah pepne. Dauddi pepu.