Psa 47 | XteSC | STEP | Korah yala nesaladi mut deiki di pepi.

Psalms 47

Allahda nimi cap, yuma keca yuma cap, deiyo ngebo kurur upu

1 Korah yala nesaladi mut deiki di pepi.
2 Tuai mutu ban-ban yuma kurum nesala yumada, kange deipra buru bongomumdi, Allah tepapu si eremkamrume.
3 Allah er si Yahwehda, akeca-keca yuma talepra, deiki tara kuredi, Ila Puto Eremna Ngebo kurure. Allahdi, mutu ban-ban yuma kunge nesala talepra, ila nimi deiyo ngebo, Raja kurure. Allahda ila mambul weik ngebo kurure.
4 Allahdi nun Israel nesala tep, wepra deipseudi, weika di meliamseua deiki di, yuk yala nesala yumada, bisbisa kapmepupa, nun amutarapu kununge. Ada, nun nai Allah meliamseua deiki di, yuk yala nesala yuma, nun amutamna deipseue.
5 Allahdi, ‘Israel nesala ne mawa nesala kunkameng’ tenen, er nyapu keipseudi, nun kunkamep mutu peda, ketenepra deipseue. Nun apu bo Yakubdi deipupa, dadeipdanen yakarami nesala yumada, Allahdi ketenepra deipseu mutu tupa talepra kunupe. Amutu neitamaida, kange deipra kunupe. Akonuma tenena tep, selah pepne.
6 Nun nai Allahdi ila mambul mutu welepu taruda, nun nimi yumadi ila kange deipra, ila upu deiki di er si erepra gudinmapu. Nun nai bo Allah, er si Yahwehda, ila mambul mutu welepu taruda, lyom bung-bung pena, er si terompet dopra pung pepmepudi, er si erepra gudinmapu.
7 Atep nengeda, nun nai bo Allah tepapu gudipedi, kange lon mut penkamepe. Ada, Allahda nun ila nimi deiyo ngebo, Raja kuseredi, taleserura tep, er tepapu, “Nai kanda ila telep kurume,” pepra, er si erepmepedi, kange lon mut penkamepe.
8 Ada tali tep gume. Allahda, tuai mutu ban-ban yuma kunge nesala yala-yala yumada, sun ila nimi deiyo ngebo Rajada, Allah er tenpu kurure. Allahdi ban-ban yuma kunup nesala taleserura cadi, er tepapu, “Nai kanda ila telep kurume,” pepra, gudipedi, kange lon mut penkamepe. Pio er tepapu gudipedi, er si eremkamepe.
9 Allahda im deiki kuredi, ila nimi deiyo ngebo mambul bungna keca deiki bukredi, nimi yala-yala yuma tep talerure. Pio lekai bungredi, tuai mutu ban-ban yuma kunge nesala yumada, talepra kuserure.
10 Nimi tuai mutu talepra kunung deiyo-deiyo neng yumada, tenpu kange doupra dukdongopmengedi, bulupra yakanunge. Nunda Allahdi wepra deipseudi, er nyapu keipseu nesala cap, yuk nesala yala-yala yuma cap kikiman kunmape.
Nun apu bo Abraham tep, pio kalekra meliamu ngebo Allah tepapu, yuk yala nesala yuma cap, nun cap kikiman gudipedi, er sipu eremkamepe. Ada mesum tep gume. Ware mutu do yuma, ban-ban yuma kunge ila deiyo neng yumada, nun nai bo Allah, er dipapu adeiyo neng yuma talerure.
Ila Raja ngeboda, Allah er tenpua tep, yuk deiyo neng yumada, er amutarapu kununge. Nun co puna neng si erepyakarami Allahda, nimi deiyo neng ban-ban yuma cap, nun capdi, er sipu eremnupe. Allahda ila eremna deiyo ngebo kurura tep, yuk keca yumada er amutarapu kurure. Dauddi pepu.