Psalms 48

Allah er kange derirur tuai mutu ila ati arumda, Sion mutu tep pepu upu


1Allah upu mut pena tep nengeda, sun Korah yala nengdi deiami nyapu, sun dipapu Allah upu mutda sengami.
2Nun nai Allah Yahwehda, akeca-keca yuma talepra, deiki tara kuredi, ila puto weik ngebo kurure.
Ange tep nengeda, nun yumadi er tepapu, ‘Uo, kanda pio teleppu kurume,’ pepra, er sipu pio eremkamepe.
Ada, Allah er kange derirur ila ati arum neitamaida, Yerusalem mutu neitamai di, er sipu eremkamepe.
Akati arumda, Allahdi, ‘Ne mawa mutu’ tenen, weiamu mutu dupai ukutaru peda tupa akurure. Amutuda, pio telep lekaipu kurure.
3Akati arum Yerusalem mutuda, mutu buma deiki dopra deiamya cadi, er urasinda pio telep kurure.
Tonda, akati arum tep, nimi ban-ban yuma neitamai kunge nesaladi amutu tenepmenge taruda, kange deipra kununge.
Sion mutuda, Israel tara neitamai kurur dinin, dapu tara (arah utarapu) kurure.
Akati arumda, nun tep taleserur ila nimi deiyo ngebo, nun Raja Allahdi, amutu talerure.
4Yerusalem mutu neitamaida, ila lyom gel di deipra ati ton dorami.
Tonda, Allahdi, ‘Akati arum yuma cap, amutu ila lyom gel ati capda, ne dipapu kalengkamne,’ men taru di konum tenepka cadi, ange yumada, peteremserepa kael kemnupe.
5Ange yumada, nundi konum kael keamepu. Ada, menop taru di, yuk mutu ila nimi deiyo nengdi, ‘Yerusalem mutu popra, gum kupra deipmepedi, urupra daktapkamep’ tenen, yakaramami.
ARaja-Raja neng yuma, kikiman bulupra yakarami dinin, Yerusalem mutu ila ati arum doramyai konum epi dingeda, adipapu sun yumadi, ‘Uo’ tenen, lolopmaipa, kware kunmai. 6Ukupra ila kware weik kunmai pangeda, ‘Uo, ware kupkuser do?’ tenen, tenimtonapu kunmaidi, amutu tapra, bura tara sepdaro bendopi.
7Teka, sun anesala yumadi, kware weik kupupa, sundi, ‘Uo, uo,’ tenen, sun nong yuma moropsemnapu kurami.
Ukunmaidi, kange mun kange doupya deiki di, nerapudi mi deiyo pu jerepa, ila di engepra ngolongamengtopu kunmaipa, gekeprapidi sepdaro bendopi.
8ARaja-Raja neng cap, sun jen talena neng capdi, ‘Lyepdankamep’ tenen, sepra bendopi dinin, nun nai Allah, kandi aneng yuma tep, popra gawal dakmume. Ukupmanto ngeda, ake.
Ada, Keteng yakaramre tara di, ila puto kumanya yaredi, Tarsis mutu ila gapung co, er si kapal laut, laut mokon deiki puto di pung peprepa, agapung co yuma dakra sikke bungtamamretopu, kupmume. Ada, sun yuk-yuk mutu Raja neng cap, sun jen neng cap popra gawal dakmuma tepa.
9Atep, menop taru yuk nengdi nun tep, upu deiki di lap peiamseipa gekerameputopu, ukutaruda, nun pe asuru di konum epra kael kepmape.
Ada, nun nai bo Allah Yahweh, erdi kange derirur ila ati arum Yerusalem mutu neitamai di epra kael kepmepu. Yahwehda, im deiki kunge jen talena malaikat yumada, sun deiyo ngebo kurura cadi, akeca-keca yuma taleredi, erda ila puto weik ngebo kurure.
Erda, nun Israel yala nesaladi si eremnup Allah tepa.
Allahdi, akati arum Yerusalemda, ‘Pio akunkamre’ tenen, amutu konum puto keipka cadi, pio akunkamre.
10Nun nai Allaho, kan si eremna ati pumbon kunmapu taruda, kan tep pio moupra tenenmapu. Ada, kan pedina upu deiki di, ‘Nedi sun tep, pio telep kupra derinkamsene,’ peiamsemum ngeda, ange yumada pio tep kupbankamseruma cadi, teleppu kudinkamserum ngeda, moupra tenenupe.
11Nun nai Allaho, nimi tuai nesala ban-ban yumada, kan si konum kael keamitopu, kan tep konum kael keamkei nesala yumadi, kan sipu eremengedi, ‘Kanda pio-pio telepe,’ pepra, kan tep gispal dokenunge.
Tonda, kan dumsisi tara ila puto buru di, akeca-keca talepra, pio dumsisi kupra kurume. Kandi talepra kurum keca yumada, mali kuna pio gum dipapu, pio telep kupra pel dorume.
12Ange tep nengeda, Sion mutu kunge nesala yumada, kange deipra kunkamenge.
Tonda, Yehuda tara neitamai kunge nesala yumada, kange deipra, ‘Telepe,’ penkamenge.
Ada tali tep gum dinin, deiyoda ake. Sundi, kan pio telep kupra kurum keca yuma tep, moupra tenepetepmengedi, ‘Uo, Allahda, erdi, ‘Angeda kunkamrume, angeda pio men kunkamrume,’ pepra deiamseu upu utopu kupra kurure,’ tenepmengedi, kan tep kange derinkamenge.
13Ange tep nengeda, sun Israel yala nesala yumadi, Sion mutu dana-dana tara cap, neitamai capda, epra embenkamrume!
Yerusalem mutu neitamai deipra domi lyom gel ati yumada, ‘Ware kupra kurur do?’ tenen, nungkamrume.
14Tonda, akati arum neitamai donunga dana-dana tara, ongopgenepra wiami lyom gel beilyada, dipetepkurume.
Tonda, sun Yerusalem mutu nengdi, ‘Nun pona tep nengdi yana popsenung’ tenen, domi gel ati yuma peda, moupra epmumdi, dirbenkurume.
Ange yuma kupkamruma deiyoda ake. Ada, sun ataru kurum nesaladi, amenda taru kunkameng nyapu, sundi deiprumupa, dadeipdanen bankameng nyapu tep, akeca yuma lap penkamrume.
15Sundi upenkamrume. “Nun nai bo Allahdi, ‘Yu nengdi, ne mawa nesala poryanung’ tenen, nun cap, akati arum cap tep, pio kalekra melimserure.
Allahda, er sipu pio tep eremkamepe. Tonda, er dipapu nun tep pio kalekra melimkamsere.
Tonda, erdi nun tep, ‘Telep kuna ngeda, ake. Abisipu benkamrume. Tonda, ange yuma ukunkamrume,’ pepra, melipra peteremkamsere.”
Copyright information for XteSC