Psalms 49

‘Isomka keca dipapu nun melipra lyepsetue. Akeca akapyopda, ikin keca nun damai men yasetue’ tenen, sun kange akeca deiki deipmenge nengda, bicaue sunda mesumpu kunkamenge, pepu upu

1Sun Korah yala nengdi deipi ngeboda amazmur upu mut seku. Ada, Allah upu mut pena deiyo ngebo karena tep seku.
2Sun tuai mutu ban-ban yuma neitamai kurum nesala yala-yala yumada, apepkusen upu moupra gekepkurume! Teka tuai mutu nesala yumada, moupra gekepso!
3Ada, ila nimi deiyo neng pe, tali amutarapu kunge neng peda gekepneso! Tonda, sun isomka kurum neng pe, sun tali kan-kan kurum neng peda moupra gekepneso!
4Nedi pepkusen upuda, ila kael kemna deiki di pepkusene. Ada, ne kange dipru neitamai di moupra tenepsi ngeda, pepsenepa gekepmumnyopda, sun peda ila kael neng kunkamrume.
5Neda, ila kael nengdi penung upuda, moupra gekenune. Aupuda, kanam kange douptepedi nong neitamai ngeda, men gekeptepe dinin, gitar utopu keca, er sida kecapi lelim deiki di mut pepsenedi, lap pepsenyopda, ila kael upu nong neitamainge moupra tenepkamrume.
6Yu nengdi, ne tep, ‘Angeboda, nun songe,’ tenenenung nengdi, mali kupnengedi, ne nong deiki ikin keca deipnenge taruda, ware keca deiyo tep, sun tep kwar kupkamner do? Gume, kware men kunkamnere.
7Bung keca cap, co bo cap weika di talenung nengdi, sun kange dipruda, abung keca deiki derinunge. Tonda, sun isomka kununga cadi, ‘Nunda pio telepe,’ tenedangedi, salnong-nong kamnunge. Dinino, ange utopu kunge nesalada, ne kwar men kunkamnere.
8Tek sisi pepsene. Ware nesala do yuma, sundi sun kankan, tenpu ngebo tep, er gam kuna deiyo ngeda, co bo deiki di dopra men kunuptenge. Bung keca pe, co bo pe, isomka keca peda, nimidi ange yuma dopra Allah tep karepeteptenga peda, sun gam kuna deiyo ngeda co bo di men kunuptenge. Angeda men kupmanto.
9Akeca-keca yuma kareptenga peda, nimi gam kuna deiyo ngeda, men kunupmanto keca tepa. Nimi sun gam kuna deiyo ngeda, men kunupmanto keca kurure.
10Sundi, ‘Nunda, gam pio kunkamepe’ tenen, bung keca pio weika di karepeteptenga peda, sun gam kuna deiyo ngeda, men kunuptenge. Amenda taruda, tek sisi depkameng ja! Sundi, ‘Gume, nunda men depkamepa cadi, amenda taru yuk nengdi depmepepa, tu men palipkamsenge,’ tenepmengedi, tali upu penung dinin, ada men kupmantonge tenenunge.
11Sun yuma moupra tenepetepso! Wareto nesala do yuma, ila kael keami neng yuma peda denunge. Sun walwal neng pe, akeca-keca yuma tep moupra men tenenung neng peda, depmengepa gum kurure. Nimi tuai nesala yumada, konum depmengopda, sun talerami bung keca yumada, yuk nengdi doronunge.
12Tuai nesala yumada, konum depmengepa, tu palipmengopda, acapu pio tep dakunkamenge. Depmenge taru di dipra, amenda dorkunkamre taru yumada, sun tu paliamengaida, acapu pio dakunkamenge. Ware nesala do yuma, pumun taruda, co bo di tu weika di kunupra taleramidi, amutu deiki sun si sekra deiami neng peda, amenda taru dadepkameng ja!
13Uda, tuai mutu neitamai kunge nesala yumada, isomka weik kupmengedi, salnong-nong kapra, pio telep kupra kurameng neng peda, gam pio men kunkamenge. Sun peda depkamenge. Ukupmantoda, bura tara tali gam kure keca yala-yala yuma deramengtopu, sun isomka neng peda, amenda taru utopu depkamenge.
14Ange utopu, ton nengdi, ‘Nunda pio telep neng kunupe,’ tenepdangedi, walwal di mali kun keca tali lupra kunge neng peda, depnapu kupkamenge. Ange utopu, ton neng dingeda, ‘Nun pedi nun pe tep tenenup keca yumada, pio ila kael kemna deiki dia,’ tenenupe. ‘Nunda pio telepe,’ tenedangedi, kange deipra gemengedi penung dinin, bura tara tali gam kure keca yuma deramengtopu, sun peda utopu, amenda depkamenge.
15Ukupmantoda, ‘Tali domba bisam depkur’ tenen, denaipu dipra popmengepa, adipapu deramengtopu, tuai mutu kungedi, salnong-nong kunge nesala yuma peda, tek sisi depkamenge. Dena deiyo kecadi, sun dopra dubenkamre.
Ukupmantoda, domba bisam peina deiyo ngebodi, menepra embarepa, er domba bisamdi er amnyo tara dombaramengtopu, sun isomka neng pe, salnong-nong kapra gemenung neng peda, konum depmengopda, tu palipkamenge. Tu palipmengepa, sun nong tu pumbon dakuamrepanen, amenda taruda, sun nong cap, sun tu cap yumada, adipapu gum kupbankamre ja! Ukupredi tali tupu dankamre. Konum deami nesala kunungaida, er si Sheol mutu neitamaipu, dakunkamenge.
16Dinino, ne kaele, ne nong depkamre dinin, ne nai bo Allahdi, ne sambala gam kepman dopropkamnera cadi, sun konum deami nesala kunungaida, ne ton men bena kunkamne. Deiyoda, Allahdi ne sambala gam kepman dopropneredi, er damaipu deipnerepa, acapu kunkamne.
17Ange tep nengeda, nimi tenpu isomka kun keca epra dopropredi, isomka weik kure ngebo ton eprumudi, angebo tep, ‘Uo’ tenen, kwar men dangkamrume. Ange utopu, sun isomka nengdi, pio telep ati dopmenga tep, eprumudi, ‘Uo’ tenen, kware men kunkamrume.
18Deiyoda ake. Sun isomka weik kunge nesala peda, konum depmengopda, sun talerami bung keca cap, co bo capda, men dopra dubenkamenge. Gume, sun konum depmenge taruda, tu palipmengepa, dabena kunkamengaida, sundi talerami kunumna weik keca yala-yala yuma cap, dopra men dubenkamenge. Ange yumada, gum kupkamre ja!
19Ange utopu, sun isomka weik nengda, sun gam tupa kunge taru neitamai di, ‘E, nunda pio telep kupra kunupe. Nunda pio telep neng pua,’ tenedanung dinin, sun peda tali dadepkameng ja!
Teka, tuai mutu neitamai tupa gam kunge taruda, yuk nengdi sun tep, ‘Uo, sunda ila kael kemrumudi, telep pel dopra bung keca pio weika di dororuma deiki di, pio telep kurume,’ pepra, sun aneng tep, epra si erepmengedi, telep upu penkamenge.
20Dinino, sun isomka neng peda, konum depmengopda, konuma. Sun apu yapu yuma deramipa, gum kupbaramitopu, sun peda depmengepa, gum kupkamenge. Aneng yuma konum depmengepa, tu palipmengepa, kunungna neitamai pio kungepa, yuk nesaladi aneng tep, kange di ton cap pio men epkamenge.
21Moupra tenepetepso! Tuai mutu kunge nesala yumada, isomka weik kupmenga peda, gam pio men kunkamenge. Isomka neng pe, yuk tali dakunge neng peda, depnapu kupkamenge. Ukupmantoda, bura tara tali gam kure keca daderamengtopu, tuai mutu kunge nesala yuma peda, utopu depkamenge. Tenpu ngebo peda, pio gam ton men kunkamenge.