Psa 5 | XteSC | STEP | Allah upu mut pena deiyo ngebo tep, Dauddi aMazmur seku. Amazmur mut pen taruda, mut pen keca er sida suling doupra, ange deiki di amut penkamrume.

Psalms 5

‘Allahdi melipra kalengkamser’ tenen, morona upu

1 Allah upu mut pena deiyo ngebo tep, Dauddi aMazmur seku. Amazmur mut pen taruda, mut pen keca er sida suling doupra, ange deiki di amut penkamrume.
2 Ne nai Allah Yahweh, nedi kan tep moropkuken upuda, moupra gekepkunerume. Ne kange dipru buluksakmanera tep, nedi, ‘Uo, ware kuptene do?’ tenen, ikin kange doununada, kandi moupra tenepkunerume.
3 Ne nai Allah, nedi engepra penman upuda, ‘Moupra gekepkunerum’ tenen, moropkene. Kanda, ne deiyo ngebo Raja kunerume.
Tonda, kanda ne si eremnun Allah kurume. Atep nengeda, nedi, ‘Melipneo,’ pepra, moronun ngeboda, kan pua.
4 Uo ne nai Allah Yahweh, ipna taru di, ne morokenun upuda, kandi tupa gekenerume. Ipna taru yumada, kan morona tep, telep karen keca keteneipnedi, kan tep kareryakanune. Akeca konum karepkenyopda, ‘Allah Yahwehdi ware upu pepkuner do?’ tenen, dina cap, moupra gekena cap kunune.
5 Ne nai Allah, ne kaele. Kanda pio mali kun keca tep nengeda, kandi ange epra kange men derirume. ‘Akecada ne dabale,’ tenerume. Allah kan cap, mali kunge neng cap, kikiman pio men kunkamrume.
6 Ange utopu, sun salnong-nong kapmengedi, gemenapu kunge nesalada, kan damai yana, pio men tekamenge. Deiyoda, sun pio mali kecapu talepra kunge nesala tep, kandi, ‘Anengda ne dabale,’ teneruma tepa.
7 Sun mok upupu penge nesalada, kandi wenepra popmemdi, gawal dangrume. Kanda Allah Yahwehdi, sun yuk neng poramenge neng cap, tali upu penge neng capda, kandi, ‘Anengda ne pio songe,’ tenerume.
8 Dinino, kandi, “Ukupkamsene,” pepra, pedina upu deiki peiamsemumnge cap, ila di bicau tenesememnya deiki di, kandi lyemnerume.
Atep, nedi, kan si eremna tep domi ati pumbon wengyakankamne. Kan si eremna ati pumbon, Pio Telep Lengna Ati kupkai tarada, atara epnedi, kan gispal dona tep, kan damaida, ne urasin tu deiki deipkamne.
Ukupkamna deiyoda, nedi kan tep, ‘Uo Allahda, pio-pio telep kurure’ tenen, kware kupnerepa, kan sipu eremkamkene.
9 Ne nai Allah Yahweh, kandi, ‘Dumsisi bisipu bena kunkamre,’ tenemem ngeda, neda, ‘Abisipu benkamne,’ tenen, pio putanerura cadi, kandi peipnemum upu deiki di abisi peteremkamnerume.
Ada, ne tep, ‘Angeboda nun songe,’ tenen, ne podan neng kununga cadi, ‘Dumsisi kuna bisipu peteremkamnerum’ tenen, moropkene naio.
Ukupmantoda, nimidi telep bisi paliprapmengedi, pio kwiryepu kuramretopu, neda, ‘Kandi melipnememnya deiki di, tek sisi dumsisi bisi deiki di bena kunkamne’ tenen, morokenune.
10 Ada tali tep gum dinin, sun mali kunge nesalada, sun kange dipru neitamaida, tek sisi upu pio men kurura cadi, anengdi penge upuda, ‘Teka’ men teneptepe. Tonda, sun kange dipru neitamaida, ‘Yuk nesala tep, pio ikin keca sun nong deiki deipmepedi, aneng poptapkamepe,’ tenenapu kununge.
Ukupmantoda, nimi peina tep, tu palipmanga pumbonda, katawaipu kuptapmangopda, yuk nesala mangkau di embangepa, atu pumbon saka podanung utopu, amali kunge nesalada, sun kange dipru neitamai kure keca yumada, pio mali kuna ngepu kurura cadi, yuk nesala yuma tep, mali kudinunge.
Tonda, sun mali kecapu talepra kunge nengdi, yuk neng tep, ‘Sunda nun tep kange deipkuseng’ tenen, ‘Sunda telepe. Nundi kange deipsepe,’ pepra, mawa dipapu tali upu penung dinin, tek sisi ngeda, sun kange neitamai di, ‘Anengda nun songe,’ tenenunge.
11 Atep nengeda, nun nai Allah, anesalada tek sisi pio malipu kununga cadi, ‘Kandi aneng tep, puto di wenepra popkamrum’ tenen, moropkene. Tonda, sun pe kange dipapu, ‘Malingepu kunkamepe,’ tenenge keca deiki di, sakmengedi, malipu kweipdankameng’ tenen, moropkene naio.
Tonda, kandi peserum upu yanipmengedi, sundi pio mali kun keca weika di kununga cadi, kandi anesala tep, ‘Enepra dokotepmemdi, wenepkamrum’ tenen, moropkene naio.
Anesala wenepkamruma deiyoda, sunda kandi, “Angeda kunkamrume, angeda pio men kunkamrume,” pepra, deiamsemum upu yumada, sundi yanitamnapu kununga cadi, anesala wenepkamrume.
12 Dinino, ware nesala do yuma, sundi, ‘Gume, Allah er damaipu kupmepepa, er dipapu melipra kalengkamsere’ tenen, kan damai tupa kunge nesalada, ‘Kandi melipmemnya deiki di, kange deipra kunkameng’ tenen, moropkene.
Kan damaipu kunge nesalada, ‘Sunda pio tep, kange lon mut pepmengedi, pio teleppu kange deipra kunkameng’ tenen, moropkene. Allah kan damaipu kunge nesalada, kandi, ‘Pio melipra kalengkamrum’ tenen, moropkene.
Ukupra melipsemem pangeda, ware nesala do, kan tep kange deipmengedi, kan damaipu kunge nesaladi kan Allah tep, ‘Uo, nun nai Allahda, pio teleppu kurure,’ tenengedi, kan sipu tupa-tupa eremkengedi, kan tep, pingping kange doupra kunkamenge.
13 Ange deiyoda ake. Ada, kandi, “Angeda kunkamrume, angeda pio men kunkamrume,” pepra deipsemum upu yuma tep, sun dumsisipu kunge nesala yumadi, angepu talepra kununga tep, kanda nun nai Allah Yahwehdi, anesala tep, pio telep kupra derirume. Sunda, pio teleppu kununge.
Ukupmantoda, sun jen talena nengdi, ‘Yuk nengdi mar pepra popsenung’ tenen, sun nong lelimna tep keca, er si perisai, doupmengedi, embaramengtopu, kandi sun dumsisi kecapu talepra kunge nesala tep, pio melipra kalengrumdi, aneng tep pio telep kudirume.