Psa 50 | XteSC | STEP | Nimi si Asafdi amazmur mut upu seku. Asafdi seku upuda ake. Akeca-keca yuma talepra, deiki tara erepra, ila puto weik ngebo, Allah , er si Yahweh, erdi tuai mutu ban-ban yuma neitamai kunge nesala yuma tep, “Ne damaipu yarume,” pepra, kong perure. Ada, keteng yakan tara di dipra, dortara keteng dangbaramre tara neitamai yuma peda, nimi tuai nesala yuma tep, “Ne damaipu yarume,” pepra, kong perure.

Psalms 50

‘Allah Yahwehdi, tuai nesala yuma tep, upu bokeipseredi, wenepkamsere,’ pepu upu

1 Nimi si Asafdi amazmur mut upu seku. Asafdi seku upuda ake.
Akeca-keca yuma talepra, deiki tara erepra, ila puto weik ngebo, Allah ^{▼▼Allah – Ibrani upu deiki di, ayat 1 neitamaida, Allah er si tep, Allah ‘Shadday’ pepra seki. ‘Shadday’ sekinge nong deiyoda, katuai di sekmupu.}, er si Yahweh, erdi tuai mutu ban-ban yuma neitamai kunge nesala yuma tep, “Ne damaipu yarume,” pepra, kong perure.
Ada, keteng yakan tara di dipra, dortara keteng dangbaramre tara neitamai yuma peda, nimi tuai nesala yuma tep, “Ne damaipu yarume,” pepra, kong perure.
2 Tuai mutu neitamaida, ila ati arum weik domipa, urasin yambul telep kuramu dinin, urasin pio telep kuramngaida, Sion mutu neitamai di, Allah er lengna dirinda, katuai kupra yakarure.
3 Nun nai bo Allahda, tali dim peprapu men kuredi, tali lupra yakanapu kurure.
Er yakare taru yumada, ila uku bupu jerure. Tonda, er yakare taruda, menmenada ila puto kumanya cap, mo cemna cap, ila dua cap, yarepanen, erda amenda tarapu yakarure.
4 Allahdi im deiki cap, tuai mutu yuma cap kong pepredi, “Nedi ‘Ne mawa’ tenen, weamsi nesala yumada, ‘Telep kunung do, gum do?’ tenen, dipetepnedi, wenemna upu wenepra bokeipkamsena tep, “Ne damai yarume,” pepra, kong perure.
5 Tonda, Allahdi uperure. “Nedi, ‘Angeda kunkamrume, angeda pio men kunkamrume,’ pepra, deiamsi upu yuma moupra talengedi, teka tenepnengedi, dumsisipu kunge nesala yumada, ne damai yankamenge.
Anesala yumadi, ne karena tep, gam keca popra duyangedi, uku neitamai dongorami. Menop taru ukuramya deiyoda, ‘Allah cap, nun cap telep kupra kikiman kunkamep’ tenen, “Erdi peserur upupu moupra talenkamepe,” pepra, pedina upu deiki di pepi.
6 Im neitamai cap, im deiki cap kure keca yumadi, Allah tep lap penunge. Ada, “Allah er dipapu nimi tuai nesala yuma tep, ‘Telep kunung nesalada, ake. Mali kunung nesalada ake,’ pepra, upu bokra derina deiyo ngeboda, er tenpu kurure,” pepra, lap penunge.
7 Tonda, Allah er pe dipapu uperure. “Sun Israel yala nesala yumada, nedi pepkamsen upuda, moupra gekepkurume. Nedi, ‘Sun Israel yala nesalada ne mawa nesala kunkameng’ tenen, ayala nesala yuma wepra deiamsisi.
Atep, neda sun nai bo Allah kunune. Atep nengeda, sundi ne sipu eremnerume. Atep nengeda, sundi mali-mali weik kurumu kecada, nedi katuaipu kepra deipsenedi, lap pepra sun tep wenepkamsene.
8 Uda, sundi ne karena tep, gam keca popra uku neitamai yana dongorum nge cap, ne damai duyana derirum nge capda, tupa dinune. Akarenerum keca yuma tep, men wenepkamsene.
9 Neda akeca-keca yuma ketekepra deipsidi, akeca yumada, ne dipapu konum talenune. Ange yumada, nengepu kurure.
Atep nengeda, sun yala neng cap, sun tara neng capdi, sapi bisam do, kambing bisam, do, akeca dopra yana karepterepnemumnya peda, akeca men dopropkamne. Ukupnedi akeca yuma tep nengeda, kange pio men derinkamsene.
10 Akeca men dopropkamna deiyoda, katuai di lap pepkusene. Ange deiyoda ake. Ware keca do yuma, bura tara neitamai gam kure keca yala-yala yumada, nengepu konum kurure.
Ange utopu, nimidi peinung sapi bisam yuma peda, nengepu kurure. Mutu buma denge pio weik, men nukmanto, amutu deiki sapi bisam pio weik akururnge cap, awa tu cap peda, angeda nengepu kurure.
11 Tonda, im neitamai lakra embarameng ma yala-yala yumada, nengepu kurura cadi, ama yala-yala yuma ne konum kael keamsi. Ange utopu, bura tara neitamai kure gam keca yala-yala yuma cap, nimidi peinung keca yuma peda, akeca yala-yala yumada, nengepu konum kurure.
12 Neda, jen keca men putanerur dinin, jen keca putapnetua peda, sun tuai nesala yuma tep, men lap pepra moropsetene. Deiyoda, ware keca do yala-yala yumada, nengepu konum kurura tepa.
Ada tuai mutu ban-ban yuma cap, tuai mutu neitamai kure keca yala-yala yuma capda, nengepu konum kurure. Akeca-keca yumada, pio men putanerure.
13 Sunda moupra tenepetepso! Neda Allah kununa cadi, nedi sapi bisam tu cap, kambing bisam yapi cap, pio men jenune. Gume, akeca-keca yumada, pio men putanerure.
14 Ange tep nengeda, sun yumadi ne Allah karena tep nengeda, sundi, “Uo, nun nai bo Allahda, kan tep pio telepe pekenupe!” pepra, ne sipu eremkamnerume. Gam keca popnedi, karenerumnge yumada, ne putana gum cadi, sundi ne tep, ‘Telepe’ pena ngeda, akonuma. Angepu karenkamnerume.
Tonda, ne Allahda, ^{▼▼Allahda – Acada, Ibrani upu deiki di, Allah er si tep, ‘Allah Elyon’ pepra seki. Aupu deiyoda, sun kael kemna tep, angeda konum jenek kupra sekmepu.} akeca-keca yuma talepra, pio deiki tara, Ila Puto Eremna Ngebo kunune. Sundi ne tep, ‘Naio, kan gispal dona tep nengeda, ukupra-ukupra kunkamepe,’ pepra, pedina upu deiki di pepnerum keca yumada, tek sisi angepu kunkamrume. Apeipnerum upu yumada, tali ‘Dakwapye’ tenen, men tapkamrume.
15 Tonda, ne Allahdi pepsene. “Ikin weik kupsere taruda, sundi ne tep, ‘Naio melipra lyepropseo!’ pepra, moropnemumnyopda, tek sisi nedi yana, lyepropkamsene. Konum lyepsenyopda, sundi ne gispal dona tep, “Nun nai Allahda, pio telep kurure,” pepra, yuk neng gekenaida, katuai di lap penkamrume.
16 Dinino, Allahdi sun mali weik kunge nesala tep uperure. “Sunda pio malipu kuruma cadi, ware keca deiyo tep, nedi, ‘Angeda kunkamrume, angeda pio men kunkamrume,’ pepra, deiamsisi upu dopra peptum do?
Ange utopu, sun mali kun kecapu talepra kurum nesaladi, ware keca deiyo tep, nedi, ‘Sundi ukupra telep kupmumpa, nedi pio telep kudinkamsene’ pepra, pedina upu deiki di peiamsisi upu dopra, sun sipyal deiki peptum do? Gume, aupuda sundi men pepkurume!
17 Angeda, tali tep men pepsene. Deiyoda ake. Sundi ne pesenun upu yuma tep, ‘Aupuda tali upupu kurura cadi, dakwapye’ tenen, yanitamumdi, aupu dopra dokotemnapu kurume.
Tonda, sun mali kupmumnyopda, nedi, ‘Angeda pio men kunkamrume,’ peipsisi ngeda, konum kuruma tep, wenepkamsene,” pepra, pepnyopda, sundi, ‘Angeda nun pio dabale,’ pepra tamrume.
18 Tonda, sundi upula dona neng epmumnyopda, sundi, ‘E, anengda, nun kayapu sisa kununge,’ pepra, sun cap kikiman kurume.
Tonda, ange utopu, ton nengdi sun konum nimi domenge nerapu tapmenge nengda, sun mali kurumu nesaladi ‘E, dakwapye, nun cap, aneng cap, nun kikimanpu kunkamepe,’ perume.
19 Tonda, sundi, ‘Pio mali upu penkamepe,’ tenepmum dingeda, adipapu tali lupra aupu perume.
Teka, sundi, ‘Nun lyemu deiki di mali upu cap, tali upu cap, penkamepa cadi, yuk nengdi, ‘Angeda meme,’ pepra, upu men seksetenge,’ tenepmum dingeda, amali upu tali lupra penapu kurume.
20 Tonda, sun du yapu sisa cap, sun weit yapu neng sisa cap tep, pio mali upu pepra sun deiki derirume. Ada, sun nin yapu sisadi deiami nyapu, sun yala neng sisa tep, mali upu perumudi, sun nong deikida, ikin keca derirume.
21 Sundi amali-mali kuna ngeda, tali lupra kurumupa, ataru neitamaida, nedi sun tep wenemna upu ton cap tapakra kapul men pepsisi.
Sundi ne tep utenenerume. ‘Gume, Allahda, nun kuramep utopunge cap, nun tenenup utopunge cap ngeboda, kurura cadi, men wenepkamsere,’ tenenerume.
Ukupra tenenerum dinin, ukutaruda, ne ila di wenepkamsene. Tonda, sundi mali weik kurumnge tep, konum katuai di pepmasene.
22 Sundi ne Allah tep, ‘Erda dakwapye, er tep men tenenkamepe’ tenen, pio lupronerum nesala yumada, moupra gekepneso!
Nedi konum pepsisi upu cap, ukutaru di pepsen upu cap, moupra men gekepmumdi, angepu talepra men kunkamrum nesala yumada, wenepra popsenedi, sikke buktapkamsene! Ukupnyopda, yuk ngebo tenpu peda, sun melimna tep, yana men lyepsetenge.
23 Ne Allahdi pepsene. Ware nesala do yuma, ne Allah tep, “Naio kanda pio teleppu kurume,” pepra, ne tep gispal donenung nesalada, nedi sun tep kange derinkamne. Ukupmantoda, men di ne gispal dona tep, gam keca popra, uku dongopnedi kareramneitopu, ukutaruda, nedi pepsene. Sundi ne tep, “Telepe,” pepnemumnyopda, akonuma.
Tonda, ware nesala do yuma, telep dumsisi kuna tep, nedi, “Telep kuna ngeda, ake. Atep, angepu sunda talepra kunkamrume,” pepra, konum lap peipsisi ngeda, tek sisi kupmenge pangeda, ne Allahdi, sun tep tek sisi lyepropkamsene.