Psa 51 | XteSC | STEP | Raja Dauddi, mut pena deiyo ngebo Kor tep, amut pepu.

Psalms 51

Dauddi, “Ne mali kupsi kecada, ne nai Allah kandi kaukepkamnereme,” pepra moropu upu

1 Raja Dauddi, mut pena deiyo ngebo Kor tep, amut pepu.
2 Raja Dauddi, nimi er sida Uria, erdi domu ner er si Batsyeba upula nyakupa, Allah er upu lap peramu ngebo, nabi Natandi Daud tep, “Kandi Uria domu ner dopmuma deiki di, ila mali kupmume,” pepra wenepupa, Dauddi, ‘Ne mali kupsi’ tenen, amut deiki pepu. Dauddi pepu.
3 Teka ne nai Allah, ne mali kupsinge tep, adipapu wenepra poptamnetum dinin, kanda pio tamna gum dipapu, bicau tenesemem ngebo kuruma cadi, kandi ne tep bicau tenenememdi, ne mali kupsi ngeda, ‘Lyepra kaukepkamnerum’ tenen, moropkene.
Kandi nun tuai nesala yuma tep, ila di bicau tenesememnya deiki di, ‘Ne mali kupsi ngeda, kaukepnememdi, gum kupra deipkamnerum’ tenen, moropkene.
4 Ukupmanto ngeda, nimidi dereng kuamre opkal, me kupmengepa, pio telep kuramretopu, ne nai Allah, kandi ne mali kupsinge yuma tep, kiliptapnememdi, gum kupra derinkamnerume. Tonda, ne dipru neitamai mali kupsi ngeda, kandi kilipra wepropnememdi, teleppu kudinkamnerume.
5 Ne pepmaken upuda, tali tep men pepne. Ne mali kupsi kecada, ne pedi konum kael kepmana tep, katuai di lap pepkene.
Tonda, ne mali kunun kecada, pio tupa tenenapu kununa cadi, mambul kange dounune.
6 Ne nai Allah, ne mali kupsi keca yumada, kan damai mali kupsidi, kan tepapu yanipkesi. Kandi, ‘Angeda ukuna meme,’ peiamsemum dinin, amali tenemem kecapu, nedi tali lupra kupsi.
Atep nengeda, kandi ne tep, “Pio mali kupmume,” pepra wenepnememdi, popnutuma peda, kanda pio dumsisipu kurume. Ne tek sisi mali kupsa tep, nedi ware upu tamupra pepketene do? Gume, kandi, “Angeda malinge, angeda telepnge,” pepra, upu lepsisikra bongdina deiyo ngebo kurume. Kanda, pio dumsisi ngebo kuruma tep, wenepnetuma peda, kanda tek sisipu kurume, pepkene.
7 Tek sisi nanin mundu douamneu taru di, ne dipru neitamai kwamneu mali kecada, pio akwamneu. Ange tupa paleamneutopu, nanindi ne deipneu taru di dipra, daneitamai yuma peda, mali keca tupa talepra kunune. Neda dipru mali ngebo kununa tepa.
8 Dinino, ne nai Allah, kandi ne tep tenenememnyada, ‘Tupa mali kukerya peda, nong bol deikingepu telep kun keca telepe pua,’ tenena gume.
Dinino, ‘Nimi dipru neitamai di, pio dumsisi kun kecapu tenepra putaprepa, pio teleppu kunkamre,’ tenenerume. Utenenememdi, ‘Ila kael kemna deiyo kecapu kunkamre,’ tenenememtopu, akecapu ne dipru neitamai karepnemempa, moupra kael kemnedi, teleppu kunkamne.
9 Tonda ne mali kunun keca yumada, Allah kandi hisop co teru ^{▼▼hisop co – Pumun taruda, Allahdi Israel nesala tep, peipu. Sun mali kun keca daemna tep nengeda, tenpu co teru er si hisop yambulnge dopra, gam kun keca popmumdi yapi wipra, ‘Nun mali keca daepkamser’ tenen, gege penkamrume. Upepka tep, Dauddi, aupu pepu.} yambulnge dopropra, lyepra kiliptapnemempa, pio dumsisipu kunkamne.
Ukupnemem pangeda, ne nongda pio mali kunerenge yumada, telep kupra deipkamnereme. Ukupmantoda, pio kurun keca, er si kapas lengamretopu, ne mali kunun keca yuma, gum kupra deipnemempa, ne pio teleppu kunkamnere.
10 Ukupra, kandi telep kupra deipnememnyopda, kange di ton cap kange deipra kunkamne. Tonda ne mali kupsipa, kandi kael kepnemumdi, ‘Erda mali kupu ngebo,’ tenepra wenepnemumdi, ila ikin keca karepnemumnya deiki di, kange mun kange doupra kunun dinin, ‘Kandi aikin keca dopra lyepropnememdi, gum kupra deipnemempa, ka di ton cap telep kunkamne’ tenen, moropkene.
11 Ne nai Allah kandi, ‘Ne mali kunun keca yuma tep, pio tenenapu men kunkamnerum’ tenen, moropkene. Tonda, ne mali kupsi ngeda, kandi angepu pio men tenenkamnerume. ‘Ne mali kune keca yumada, kan dipapu kiliptapnememdi, kaukepkamnerum’ tenen, moropkene.
12 Ukupnemem dingeda, ne nai Allah kan dipapu ne dipru neitamai mali kwamner keca gum kupra deipnememdi, dipru ukupungepu punupra karepkamnerume.
Tonda, kandi puto karepnemempa, ne kange tenenange cap, ne nong neitamai cap yumada, puto keipnemempa, aputo deiki di, kange di ton cap, dumsisi kun keca men tamkamne. Pio kanpu talepra kunedi, telep kangepu doupra kunkamne.
13 Uo ne nai Allah, ne mali kunun keca wenemna tep, ne nai Allah kan damai di doprapnememdi, men dokotepkamnerume.
Tonda, kan Lek Sambala, ne nong neitamai karepnemumpa, kunerur ngeda, ‘Allah kandi aLek Sambala kange di tamupra men dopropkamnerum’ tenen, moropkene.
14 Pumun taru Allah kandi ne tep lyepromnemumpa, ne kange deipra kuramsitopu, ‘Ukutaru peda, kange di ton cap, dipru kwa dipnememdi, telep kupra deipnetumpa, kange deipra kunkamne’ tenen, moropkene.
Kandi ne pingping keca karepnemempa, dopropnyopda, ne dipru bouna di dakra kunedi, ‘Ne nai Allah tepapu talepra kunkamne’ tenen, kan tep men tamkamkene. Ukunedi, kan pedinememtopu dukdongopra kunkamne.
15 Ukunkamne taruda, Allah kandi, “Ukupra kunkamrume, atelep bisi bankamrume,” pepra pedinemem upu yumada, nedi aupu dopra, sun mali kunge nesala tep peterepnepa, gekepmengedi, sun mali kunge keca yuma tapmengopda, ka tamupra kan tarapu kemdongonkamkenge.
16 Teka ne nai Allah, nedi pio mali kupsipa, ne podan nengdi ne kabo Uria popipa depka tep, er yapida, ne deiki kunerure. Angebo popya deiyo ngeboda, nepu kunune. Atep kandi ne lyemdonkamnerume.
Lyepropnememnyopda, kandi dumsisi kupra kumemnge tepapu, nedi kan gispal dona tep, “Ne lyemdonerur Allahda dumsisipu kurure,” pepra, mut pena deiki di, kan sipu eremkamkene.
17 Teka ne nai Allah, ^{▼▼Allah – Akayat neitamaida, Allah er si tep, Ibrani upu deiki di ‘Adonay’ pepra seki. Sun kael kemna tep, aupu deiyoda jenek kupra sekmepu.} kanda, akeca-keca yuma talememdi, ila puto weik ngebo kurume. Kanda, ne Ila Deiyo Ngebo kuneruma cadi, kandi ne sipyal cap, ne pene upu cap yuma talenememdi, telep kupra deipnemempa, ne upu telep kunerya deiki di, upu telep kupra penedi, kan sipu eremnedi, mut pepra gispal donkamkene.
18 Nimidi kan gispal dona tep, tumi-tumi yuma yapi keca popra, kan tep karekenung ngeda, men putakerure. ‘Gam keca popra, ne damai dekankamnerume,’ peipnetumpa, akeca popra duyaketene dinin, ange men peipnemuma tep, gam keca cap, yuk telep keca cap, men duyankamkene.
Ange utopu, nun mali keca daemna tep, gam keca popra, uku dongomyakanup ngeda, men putakerure. Atep ne peda yapi keca popra, kan si eremna tep, uku men dongomyankamkene. Angeda, Allah kan men putakerura cadi, akeca dopra karepketenya peda, kandi, ‘Angeda telepe’ tenen, kange deipra men doronkamrume.
19 Ne nai Allah, tek sisi kan putakere ngeda, nesala ban-ban yuma, sun mali kupmengedi, ‘Uo, nun mali kunupe,’ tenepmengedi, ‘Dipru amutara kepdangedi, ikin kange doungetopu doupra, ne damai duyakankamnenge’ tenen, putakerure.
Dinino, nimi dipru eremna deiki di, sal nong-nong kamengedi, kan damai yakanung ngeda, kan men putakerure. Dinino, ware nesala do yumadi, ‘Ne dipru neitamai lyunerenge yuma lyepkamner’ tenen, kan damai yana lap pepmenge pangeda, kandi, ‘Erda mali kurur ngebo’ tenen, men tamkamrume. Dipru boun kupra kure ngebo tep, kange deipmemdi, angebo tep lyepmemdi, telep kupra derinkamrume.
20 Teka ne nai Allah, kandi, ‘Sion mutu tep, ila kange deipne’ tenen, pio telep kupra derinkamserume. Ukupmempa, Yerusalem mutu ila lyom gel beilya ongopgenepra wiami ngeda, yuk mutu nesaladi uruptapi dinin, ‘Kandi melimsemempa, ka di tamupra lepsisikra winkamep’ tenen, moropkene.
21 Yerusalem mutu ila lyom gel beilya lepsisikra wipmepe dingeda, Allah kan si eremna tep, yapi keca popra duyakankamkepe. Ada dumsisi kuna tep, gam keca popra, uku dongoryakankamep ngeda, ‘Pio telepe’ tenen, kandi kange deipra doronkamrume.
Akareryakankamkep keca yumada, poprapmepedi nong yuma sekmepedi, uku dongomna cap, uda nong kepman yuma cap, doupra kareryakankamkepe.
Tonda, sapi bisam jemnge poprapmepedi, Allah kan si eremna tep, men di gel yakra deiamidi, keteneiamyai du yapedi, uku dongonkamepe.