Psa 52 | XteSC | STEP | Raja Dauddi, ‘Israel nesala yuma tep peterepkamne’ tenen, Allah upu mut seku. Ukupu dingeda, Allah upu mut pena deiyo ngebo karepkamenga tep, aupu Mazmurda seku.

Psalms 52

“Allahdi, sun tali upupu penge nesala tep, wenepkamre ja,” pepu upu

1 Raja Dauddi, ‘Israel nesala yuma tep peterepkamne’ tenen, Allah upu mut seku. Ukupu dingeda, Allah upu mut pena deiyo ngebo karepkamenga tep, aupu Mazmurda seku.
2 Edom mutu ngebo, er si Doegdi, Raja Saul damai yaudi, “Naio, Daudda, Ahimelek er ati damai konum inipra yana akunmare,” pepu taruda, Dauddi aupu Mazmur seku.
3 Dauddi, aupu pepu. “Uo, kanda puto weik kurum ngebo, kanda warya tep salnong-nong kamemdi, ila upu pepra gemerum do?”
Ware keca deiyo tep, dumsisi kurur ngebo tep, ‘Angebo poptapkupe,’ pepra dombarumdi warengmarum do? Angebo Daudda, Allahdi, ‘Angeda kunkamrume, angeda pio men kunkamrume,’ pepra deipseu upu, moupra taleredi, pel dorura tepa.
4 Dinino, kandi, ‘Angebo poptapkup’ tenen, yuk neng cap mali kunangepu upu talenmarume.
Ato upu perum taruda, kan lemuda, pio ya tema utopu kukerure.
Tonda, kanda pio mali kunange tep, tali upu pepmemdi, ‘Angebo popkupe,’ pepra nimi pona tep upu talerume.
5 Kanda, ila mali kun keca tep, ‘Angeda telepe pua,’ tenerum dinin, telep kunange tep, ‘Ne dabale,’ tenerume.
Ange utopu, kanda, mok upu tali pertamna tep, ‘Angeda telepe’ tenen, kange derirum dinin, tek sisi upu pena ngeda, ‘Ne dabale,’ tenen, mali kange dourume.
6 Nimidi mali-mali upu penga deiki di, yuk neng tep ikin kupra derinunge, dinino, kandi, ‘Angeda telepe pua’ tenen, kange derirume.
Uo, tek sisi, kandi perum upu yumada, tali-tali upupu perume.
7 Dinino, nun nai Allahdi, kan tep, mali kweipkeredi, wenepra popkeryopda, kange di ton cap bukra, telep men kunkamrume. Tonda yuk nesaladi, kan tep, ‘Erda telep ngebo kuramu,’ men tenenkamkenge.
Allahdi kan tep, puto di talepkeredi, kan kunmarumai neitamai di dubena, bura deiptapkamkere!
Teka, tuai mutu neitamai dinin, gam tupa kunge nesala neitamai di, tomopra dubena deiptapkamkere. Ada, Allahdi kan konum popkeryopda, sun konum deami nesala kungaida, kan peda dubena deiptapkamkere.
8 Allahdi kan tep wenepra popkeryopda, sun dumsisi kunge nesala kan tep epkengedi, ‘Uo’ tenen, mambul kange dopra kware pio weik kunkamenge.
Tonda, kanda, mali kuna deiyo ngebo tep, epkengedi autupra nyek-nyek penkamkenge.
9 Ada sundi, “Uo, sun yumadi angeboda diso! Er dingeda, ‘Gume, ware ngebodi melipra lyepkamner’ tenen, neda Allah er damai bena men kunkamne. Allahda dakwapye,” pepra peramu.
Dinino, angebodi, ‘Gume neda konum pio isomka ngebo kununa cadi, akeca-keca yuma weika di talenun bung keca di melipra lyepropkamnere,’ teneramudi, gemepra peramu.
10 Angebodi mali weik kuramu dinin, ne dingeda pio yuk kunune. Ukupmantoda, zaitun co du mouramre coda, tupa telep kuredi, er co boda embekpu douramretopu, ne ton ukunune.
Ada, Allah er si eremna ati pumbonda, zaitun co koupmengepa, embek pio telep kupra tengamre utopu kunune.
Ada tali tep gume. Deiyoda, nedi, Allah tep, pio tep teka tenenunge. Gume, Allahdi nun tep, ‘Ukupra telep kweipkamsene,’ pepra, pedina upu deiki peipseu ngeda, tamna gum dipapu, Allahdi bicau tenepseredi, pio telep kudinkamsere’ tenen, ne kange dipruda, Allah deikipu derinune. Er tepapu teka tenenune.
11 Atep, ne nai bo Allah, kan tep, ‘Erda pio telepe,’ pepra, tamna gum di, pio tep kan sipu eremkamkene.
Ada tali tep gum dinin, kandi akeca-keca yuma pio mambul pel dorumnge tep, ‘Kanda pio telep pua,’ pepra, kan si pio eremkamkene!
Tonda, Allahdi, ‘Anesala tep nengeda, bicau tenepnedi, pio tep melimkamsene’ tenen, wepra deiamseu nesala, sun gekenai bena, nedi Allah kan si tep pio eremkamkene. Tonda, kandi kurum kecada lap pepra peteremkamne.
Ada, kan cap, kandi kurum keca cap yumada, pio-pio teleppu kurura cadi, kan sipu eremkamkene pepne.