Psa 53 | XteSC | STEP | Raja Dauddi, ‘Israel nesala kael kepkameng’ tenen, amazmur mut upu sekra deipu. Seku dingeda, ‘Allah upu mut pena deiyo ngebo karenkameng’ tenen, sekra deipu. Tonda, ‘Yuk Allah upu mut, er sida Mahalat lelim peramretopu, amut peda alelim deiki di penkamenge,’ tenepudi, Dauddi sekra deipu upuda, ake.

Psalms 53

Allahdi sun pio mali kunge nesala tep, ila di wenepra popkamra tep, ‘Sunda kware pio weika di kunkamenge,’ pepu upu

1 Raja Dauddi, ‘Israel nesala kael kepkameng’ tenen, amazmur mut upu sekra deipu.
Seku dingeda, ‘Allah upu mut pena deiyo ngebo karenkameng’ tenen, sekra deipu. Tonda, ‘Yuk Allah upu mut, er sida Mahalat lelim peramretopu, amut peda alelim deiki di penkamenge,’ tenepudi, Dauddi sekra deipu upuda, ake.
2 Allah tep teka men tenenung neng dingeda, ‘Allahda tek sisi men kurure,’ penunge. Upenung dinin, aupu penge nesalada, sun pio walwal nengdi penunge.
Adeiki sundi kunge keca yala-yala yumada, mali kecapu kununge. Ada, Allahdi, aneng tep ‘Sundi pio mali weik kunge kecada, ne pio songe. Anengda, sun kange dipru yumada, pio malipu kurura cadi, sundi kunge kecada, pio men kuptenge keca kununge’ tenerure.
Sun aneng Kankan neitamaida tenpu ngebo peda, telep men kurure. Sun yumada, malipu kununge.
3 Allah er si Yahweh, im deiki di, nimi tuai mutu kunung nesala tep, ‘Dumsisi telep kupra kunung do, gum do?’ tenen, moupra diserure.
Tonda, Allahdi, ‘Ne kune keca cap, nedi pene upu cap yumada, betapra kael kemengedi, ila kael kemnung neng kunung do?’ tenen, dirpeteserure.
Tonda, ‘Nun nai bo Allahdi peserur upuda, angepu talepra kunkamep’ tenen, ne tepapu enenung do? Utenepredi, nun tuai nesala tep moupra diserure.
4 Dinin, mutu ban-ban yuma kunge nesala yumada, pio dumsisi kupra, telep ton men kununge. Allahdi peserur upu yumada, konum yanitamnapu kungedi, yuk tali kecapu talepra dombanunge.
Tuai mutu kunge nesala yumada, sun kange dipru yuma pio mali weik kurure. Nimi men kuptenge keca dinin, tali lupra pio mali keca kununge.
Tenpu ngebo peda, telep pio men kununge. Nesala yumada, mali kecapu tenepra pel donunge.
5 Nimi mali kecapu talepra kunung neng yumada, pio men kael keami utopu, telep kuna ngeda men kael kemnung do?
Mali kecapu talepra kunge nengdi, jen keca er si roti menmena jepmengedi, gawal dangamengtopu, ne Allahda, ne nyapu sisa sun yuma tep nengeda, menmena di popra gawal dangnunge.
Tonda, neda Allah, ne si Yahweh tep, ‘Naio ware upu pepsemempa, angepu talepra kunkamep do?’ tenen, ne tep men moronenunge.
6 Mali kecapu talepra kunung nesala yumada, amenda taru pio ila di kwar weik kunkamenge. Lyeproprepa, sun kan-kanpu kunkamre dinin, Allah tep teka men tenenung nesalada, ila kwar dangkamenge.
Ada menop taruda, yambulanun kware kurami dinin, amenda kunkamre taruda, ila di pio kware weik, men tenepmantonge kunkamre.
Deiyoda, Allah tep teka tenepra dumsisipu men kunung nesala tep, Allahdi anesala yuma popra sikke buktapre dingeda, sun nong pumbon yo yuma dopra, yuk-yuk mutu dana-dana tara dokotepkamre.
Allahdi amali kunge nesala wenepra popyopda, ali weika di dakamenge.
Ada tali tep gum dinin, Allahdi amali kunge nesala yuma popra tapkamre. Erdi sun tep, ‘Ne damai ton pio men yana kunkamenge,’ konum tenepu.
7 Uo, nun putaserur ngeda, ‘Allahdi Sion mutu neitamai di yana, melipra lyepropsetuopda, pio kange derinkamepe,’ tenenupe. Atep, nun Israel yala nesala yumadi, ‘Uo, Allahdi menmena yana lyepropsetue’ tenen, pio moronupe.
Ukutaruda, nun Israel yala nesala yumada, ikinpu kunup dinin, Allah Yahwehdi, kange di tamupra, nun keca yuma telep kupra deipsere pangeda, nun Israel yala nesala yumadi pio kange deipra kunkamepe.
Ataruda, nun apu bo Yakubdi deipupa dadeipdanen, yakaramupu nesala yumadi, kange pio deipra teleppu kunkamepe. Ada, nun Israel yala nesala yumadi, kange deipra, pio teleppu kunkamepa tep pepne.