Psa 54 | XteSC | STEP | Amazmurda, Allah upu mut pena deiyo ngebo karena tep, seku. Amazmur upu mut penkameng taruda, bung-bung pena, gitar utopu keca er si kecapi di amazmur upu mut penkamenge. Dauddi, ‘Israel yala nesala peteremkamne’ tenen, amazmur upu mut seku.

Psalms 54

Dauddi, Allah melipnetupa, yuk neng yumadi, ‘E, tek sisi Daudda mali men kupu,’ tenen, ‘Kael kepkamneng’ tenen, Allah tep moropu.

1 Amazmurda, Allah upu mut pena deiyo ngebo karena tep, seku.
Amazmur upu mut penkameng taruda, bung-bung pena, gitar utopu keca er si kecapi di amazmur upu mut penkamenge.
Dauddi, ‘Israel yala nesala peteremkamne’ tenen, amazmur upu mut seku.
2 AMazmur seku taruda, sun Zipite nengdi, Raja Saul damai bena, lap pepi. ^{▼▼pepi – Aupu deiyo kael kemnada, 1Sam. 23:19 cap, 26:1 capda, dinkurume.} Sundi, Saul tep pepi ngeda, ake. ‘Naio, kandi erterenmarem ngeboda, nun mutu neitamaida yana, inipra kunmare,’ pepi.
3 Dauddi Allah tep pepu ngeda, ake. ‘Uo, ne nai Allaho, kan puto si deiki di, melipra lyepnetum’ tenen, moropkene.
Tonda, kan puto di melipnememnya deiki di, yuk neng epmengedi, ‘E, ukuda nun tenepmepe. Tek sisi Daudda, mali men kuramu,’ tenen, konum kael kepmepe. ‘Ukupra tenepkamneng,’ tenena tep moropkene naio.
4 Atep, uo ne nai Allah, kanda akeca-keca yuma talememdi, ila puto weik ngebo kuruma cadi, nedi kan tep, ‘Melipneo,’ pepra, morokenun kecada, ‘Gekepmemdi, melipkamnerem’ tenen, morokenune naio.
Atep, ne sipyal di pepkene upu, moropkenyopda, ‘Kandi moupra gekenkamnerem’ tenen, moropkene naio.
5 Deiyoda, sun balila weik kungedi, salnong-nong kamenge nengdi, ne tep, ‘Angebo popkupe,’ tenepnengedi, ne damai yana warengmanenga tep upepra moropkene.
Teka, yu weik kuprepa, pio puto di nimi pona tep nengdi, ‘Angebo Daudda, adipapu poptapkupe’ tenen, enmanenge naio.
Sun ato nengda, kan Allah tep, pio moupra men tenekenunge. Kan Allahdi, ‘Ukunkamrume,’ peserum upu yumada, yanitamnapu kununga tep pepne.
6 Dinino, ne konum kael keamsi. Allahda, pio tek sisi ne Melimna Deiyo Ngebo kunerure.
Teka, nun nai bo Allah Yahwehda, tek sisi melipra lyemdonerura cadi, tupa gam kunkamne.
7 Ne pona tep nengdi, pio mali kun keca weika di kununga cadi, Allahdi tek sisi sun tep popredi, kwang dangkamre ja!
Teka ne nai Allah, kandi, ‘Ukupkamne,’ pepra, pesemem upu yuma, tek sisi kuruma cadi, amali kuna neng yuma tep, popmemdi gum kupra deipkamrume.
8 Ange tep nengeda, ne pe dipru kange tenena deiki dipu, Allah tep, telep karen keca karenkamne. Ada, ne peinun gam keca ton dopra popnedi, kan gispal dona tep, uku dongopkamne.
Tonda, ne nai Allah Yahweh, kan pio telep si tep nengeda, “Allah er sida pio telepe,” pepra, kan tep si eremkamakene. Allah Yahweh tep, ‘Telepe,’ penupada, nedi pio telepe pepne.
9 Ange deiyoda ake. Ada, wareto ikin keca yumada, ne damai yaryopda, Allahdi melipra lopneredi, kange di telep kudinerure.
Tonda, ne pona tep nengdi, yana men popnei ngeda, nedi sun tep, bisbisa kapra popsipa, sunda ne amutarapu kupmaiya tep, nedi dinmasi.