Psalms 55

Ikin keca karenenung neng tep, ‘Allahdi melipra kalengkamner’ tenen, moropu upu

1Raja Dauddi aMazmur upu mut seku. Ada ‘Israel nesala peteremna tep, Allah upu mut pena deiyo ngebo tep sekudi karepu. Amutda, gitar utopu keca, er si kecapi deiki di penkamenge.
2Uo, ne nai bo Allah, nedi moropkuken kecada, gekepnetumdi, melipnetum’ tenen, moropkukene.
Nedi kan tep, ‘Melipneo,’ pepra, moropkuken ngeda, ‘Kaukemna gum dinin, moupra gekepkunerum’ tenen, moropkene naio.
3Atep, ‘Kandi moupra gekepnememdi, ne moropkuken keca melipra karepnememdi, lyepkamnerem’ tenen, moropkukene.
Uo, ne nai Allah. Ne ikin kunerur keca tep, ‘Ware kuptene do?’ tenen, tenipetepne pangeda, ikin kange doupra tenimtonapu kunerure.
Ne ikin kunerur keca tep, dipru bulungsangnerpa, kange mun kange doupra kunune.
4Ne deiki ila ikin keca dopra, derinenge nengda, sundi ila upu deiki di mali penenunge.
Sunda mali keca talepra kunge nengdi, ne tep kange mun ikin keca derinengedi, ila upu deiki di mali penenunge.
Sundi ila ikin keca dopra ne nong deiki derinengepa, mambul kange dounune.
Sun dipru neitamaida, ne tep ila yu kuprepa, ‘Angeboda nun pio song cadi, er tep popkupe,’ tenenenunge.
5Ange tep nengeda, kware kunerepa, ne dipru bulungsangnerure.
Tonda, ‘Sundi popnengepa, dadepkamne,’ tenen, kware weik kunerure.
6Kware weik kunerura cadi, ne nong yumada moropsemnapu kunerure.
Ukupmantoda, ila me opredi, akeca-keca yuma dubaramretopu, ila kwar kunerura deiki di, yuk keca yumada men tenepmanto kunune.
7Kange mun kange doupra kununa cadi, nedi, ‘Uo, ukupmantoda, yal ma pol utopunge kupnetupa, adipapu lakra bendoptene’ tenen, putanerure.
‘Yal ma pol utopu kupnetuopda, menmena di lakra, nesala kuna gumai betenedi, beipe peingtene,’ tenenune.
8Teka, neda yal ma pol utopunge deiki di, lakra bendoptenyopda, pio karen mutu betene.
Pio karen mutu sepdara betene dingeda, nimi pio kuna gum, katawai mutu neitamai, nimi pio men kunungaipu, inipra kutene,’ tenen, putanerure.
9Ukupmantoda, ila kumanya cap, mo cap, kulman cap yakarepa, kware kuseretopu, ‘Yu nengdi popnenung’ tenen, ‘Menmena sepdaro bendoptenedi, iniprotenyopda, telepe pua,’ tenenune.
10Teka ne nai Allah, kanda akeca-keca yuma talememdi, ila puto weik ngebo kurume. Kanda, ne deiyo ngebo kurume. Atep, nedi kan tep moropkene. Sun yu nengdi penge upu yumada, ‘Kandi sun upu gum kupra deipkurum’ tenen, moropkene.
Deiyoda, ne kune ila ati arum neitamaida, sun yu nengdi yuk neng tep pona cap, mali pena cap, mali kudina cap, kange mun kange kunange capda, weika di kupmengepa dinune. Atep, ‘Kandi sun aneng kunge keca yuma gum kupra deipkurume’ tenen, moropkene naio.
11Sun yu nengdi, keteng komni taru pe, lukunda neitam taru peda, akati arum dana-dana tara domi gel beilya deiki tara embangedi, ‘Wareto mali kunange kuptepe do?’ tenen, dipra embanunge.
Ayu nengdi, sun mali kunange tep nengeda, nun ila ati arum neitamaida, mali kun keca cap, nimi pona cap, upu di pangdana cap, kange mun kange doupra kunange capda, pio weik akurure.
12Nun ila arum neitamaida, nimi cap, akeca-keca yuma capda, pio mali weik konum kupbarure.
Tonda, nun ila ati arum neitamaida, nimidi akeca-keca yuma kunumnungai, er si pasarda, mali nengdi yuk neng yuma tep yanipmengedi, mok upu weik penunga deiki di, yuk neng yuma tep, ikin keca weik derinunge.
13Dinino, ne pona tep neng, sun dipu, nyek-nyek pepnengedi mali men kunenunge.
Ne pona tep neng dipapu, yanipnengedi, mali kupnetenga peda, nedi, ‘Dakwapye,’ teneptene.
Dinino, tali dakunge yu neng dipapu, ‘Angebo nun song’ tenen, salnong-nong kupra mali kweipnengedi, men yaninenunge.
‘Yu nengdi yanipnengedi, ikin keca derinkamnenge,’ tenepnyopda, sun men epnetengai bena iniptene.
14Dinino, ukutaruda, kanda ne utopu ngebo, ne kap sisa kurum ngebodi, ikin keca derinerume.
Tonda, kan cap, ne cap keteng tamun weika di konum kange deipdana, telep kupra kikiman kuramnemu.
15Teka kan cap, ne cap, teleppu upu talepdaramnemudi, tali dim peprapu kikiman kuramnemu.
Tonda, ne cap, kan cap, nun Israel yala nesala cap weika di tapakra, Allah er si eremna ati bena, Allah er si tep kikiman eremamepu.
16Dinino ne nai Allah, ‘Ikin keca weik, ne nong deiki derinenung neng, sun wenemna tep nengeda, kandi dena deiyonge dopra sun deiki deipkurum’ tenen, moropkene naio.
Kandi sun tep wenepmemnyopda, depmengepa, adipapu konum deami nesala kunung mutu, er sida Sheol mutu neitamai bena, dakunkameng’ tenen, moropkene.
Angeda, tali tep gum dinin, deiyoda, sun kange dipru neitamai cap, sun ati neitamai capda, pio mali kunangepu akurura tep, kandi aneng tep wenepkamrume naio.
17Aneng tep wenepra popkamrum dinino, ne ikin weik kunere taru yumada, nedi kan tep, ‘Uo, ne nai Allah, kandi melipra lyepnerume,’ pepra moronkamken ja!
Ne kaele, moropnyopda, Allah Yahwehdi, ne tep, tek sisi lyepropkamnere.
18Teka, wareto taru yumada, ipna taru pe, keteng dukduk pe, lukunda peda, nedi, ne kange mun keca tep, engepnedi, ngoloknyopda, ne kaele, ne nai bo Allahdi ne moronun upu gekepneredi, tek sisi melipra lyepropkamner ja!
19Ada, ne pona tep neng damai di lyepneryopda, adingeda telep kupra deipneryopda, tali kange deipra teleppu kunkamne.
Yu neng weika di bulupra, ne tep yanipnengedi, ikin keca weik ne nong deiki derinenunga tep, ‘Aneng tep bisbisa kapkamne’ tenen, pio pe deipra piripetenune.
Ange yuma neitamaida, Allahdi melipra lyepropkamner ja!
20Allahda, pumun taru dordi akeca-keca deiki tara erepra kuramudi, ila puto weik ngebo kuredi, akeca-keca yuma talerure.
Allahda, ne moronun keca gekepneredi, ne tep ikin kemnenung neng tep, wenepredi, aneng dopra, pio amutarapu dadeipkamre ja!
Deiyoda, sun ayu nengdi, sun mali tenenung keca cap, mali kunge keca cap tep, ‘Uo, nun mali kunupa cadi, Allahdi kaukepsetudi, ange yuma daepsetu’ tenen, men moronunge.
Tonda, ayu nengdi, Allah tep, ‘Nun mali kunup keca tep wenepra popserur’ tenen, kware pio men kununge.
21Ne kap sisada, ne cap, er cap, yuk neng capdi, ‘Podana gum di, tali kange deipra teleppu kikiman kunkamepe,’ pepra pedina upu deiki di pepdanamepu.
Dinino, erdi ne tep, ‘Dyo ukupkamneme,’ pepra pedina upu deiki di pepdanemu ngeda, konum tapudi, mali kemdinerure.
22Angebodi gekena pio telep upu penerur dinino, er kange dipru neitamaida, ‘Nedi angebo tep, mar porbenyopda, angebo poptapkamne,’ tenerure.
Teka, angebodi, pio boun upu deiki di, telep upu penerur dinino, erdi penerur upuda, tek sisi nimi pona tep parang ya utopu kurure. Mawa dipapu tali upupu penerure.
23Ne kayapu nesala, sun yumada gekepneso! Sun ikin kuserur keca yuma dopra, nun nai bo Allah Yahweh er deiki di deipkamrume!
Ukupmumnyopda, bicau tenepseredi, er puto deiki di melipra lyemdonkamsere.
Pio tek sisi pepsene. Allahdi, ‘Angeda kunkamrume, angeda pio men kunkamrume,’ pepra pesere upu talepmengedi, pio dumsisi kupra kunge nesalada, pio men tamkamsere. Erdi melimserya deiki di, nundi er tep, ‘Teka,’ tenenup ngeda, men gum kupsetue. Tupa teka tenenapu kunkamepe.
24Dinino, nun nai bo Allahda, sun mali kunge nesala tep nengeda, wenepredi, pio amutarapu deipkamre.
Ada, aneng tep wenepra popre dingeda, sun dopra ila tu pumbon, nimi wenemrura neitamai dokoteprepa, dakunkamenge. Ato mali neng tep nengeda, wenepra popkamre dinin, nepuda, Allah Yahweh tep, pio teka tenepnedi, ne kange dipru er deikipu derinkamne.
Ada, sun yu nengdi, ‘Yuk neng poptapkupe,’ tenenge neng cap, ‘Yuk nesala tep, mali kudinkamepe,’ tenenge neng cap tep, wenepredi poptapkamre ja!
Ukupyopda, sun anengda keteng tamun weikanun ton gam kunkamenge dinin, sun gam kunkameng taru neitamaida, menmena wenepredi poptaprepa, denapu kupkamenge.