Psa 56 | XteSC | STEP | Raja Dauddi aMazmur upu mut seku. Sekudi, Allah upu mut pena deiyo ngebo tep karepudi, “Amutda yuk mut, er si ‘Yal mada ila co, er si Tarbatin, deiki bungmar’ perameng mut lelimda utopu kupra penkamrume,” pepu. Sun Filistin jen talena nengdi, Gat mutu neitamaida, Daud tomopi taruda, Dauddi amut seku.

Psalms 56

Ikin weik kuserur taru neitamaida, Allah tep, tupa teka tenenkamepe

1 Raja Dauddi aMazmur upu mut seku. Sekudi, Allah upu mut pena deiyo ngebo tep karepudi, “Amutda yuk mut, er si ‘Yal mada ila co, er si Tarbatin, deiki bungmar’ perameng mut lelimda utopu kupra penkamrume,” pepu.
Sun Filistin ^{▼▼Filistin – Filistin nengdi Daud tomopi taru kael kemna tep, abuku neitamaida dinkurume. Ada, 1 Samuel 21.10–15, dinkurume. Tonda, 27.1–4 dinkurume.} jen talena nengdi, Gat mutu neitamaida, Daud tomopi taruda, Dauddi amut seku.
2 Ataruda, Dauddi pepu upuda ake. “Uo, ne nai bo Allah, bicau tenepnetumdi, melipnetume’ tenen, moropkene.”
Deiyoda, nimi ware kuprap do, ne tep, yaninengedi, ikin keca ne nong deiki derinenunge.
Ipna taru di dipra, keteng komuni cap, idona cap aneitamai yumada, yaninengedi, ikin keca ne deiki derinenunge.
3 Teka ne naio, tumi-tumi yumada, ne pona tep nengdi, yaninengedi, ikin keca dopra ne deiki derinenunge.
Nimi denge weika di, ‘Angeboda popkup’ tenen, warengnenunga cadi, kanda, akeca-keca yuma talepra, deiki tara kumemdi, ila puto weik ngebo kuruma cadi, kan adipapu melipra lyepkamnerem’ tenen, moropkene.
4 Kware weik kunere taruda, nedi kan tep, ‘Er dipapu lyepkamner’ tenen, teka tenepkenedi, ne kange dipru, kan deikipu derikenune.
5 Uo ne nai Allah, kandi peserem upu tep, ‘Aupuda pio telepe,’ penune.
Tonda, kan Allah tepapu, teka tenepnedi, ne kange dipru, kan deikipu derikenune.
Allah tep, teka tenenuna cadi, tali tuai nesaladi, ware keca kupnetenge do? ‘Gume ikin men kweipnetenge,’ tenepne.
6 Ne pona tep nengdi, ipna taru di dipra, idona taru yumada, ‘Angebo mali kweipkamape’ tenen, ne kune keca cap, ne pene upu capda, yaninapu kunenunge.
Sundi ne tep, ‘Angebo tep, kange mun keca karenkamepe’ tenen, tupa-tupa tenenenunge.
7 Inipmengedi, sun cap, yuk neng capdi, ne tep, ‘Ikin keca dopra er deiki derinkamep’ tenen, upu talenunge.
Tonda, ne embanunai yumada, ‘Ware kupkur do? Dan cei benkamar do?’ tenen, moupra epnengedi warengnenunge.
Ukunungada, tali tep guma. Deiyoda, sundi, ‘Angebo poptapkup’ tenepmengedi, putarura cadi, pio tenenapu kununge.
8 Ange tep nengeda, ne nai Allah, sundi ne tep, yu kuprepa, ikin keca ne nong deiki derinenunga tep nengeda, kandi aneng tep wenepra popkamrume naio!
Angetopu, kan ila yu deiki di, kan tep teka men tenekenung nesala, yala-yala yumada, ‘Wenepmemdi, puto dipu amutarapu derinkamrum’ tenen, moropkene naio.
9 Kandi dineruma cadi, ne ikin kunere keca yuma, kan dipapu nukmemdi, tupa teneruma cadi, ne ikin kupnerepa, ne men mapmanto kupne taru yumada, kan dipapu ne ikin kunerurnge nukmemdi, tenenapu kunerume.
Tonda ne nai Allah, ne ikin kupnerepa, engepnedi, ne asi me sakneryopda, kandi ne asi me dopropmemdi, metek me mau, er si botol neitamai dingdongorume.
Teka, kandi, ‘Angebo ikin kunmaupa, er asi me sangmaunge yumada, tupa tenepkamne’ tenen, kan buku neitamai dipu, sengrumdi, tupa tenerume.
10 Tenpu kecada, pio tek sisi konum kael keamsi. Ada, ne nai Allahdi, ne tep, ‘Angebo pio melimnuna deiki di, telep kudinkamne,’ tupa tenerurada, ne konum kael keamsi. Atep, dan taru do yuma, nedi, ‘Allah melipneo,’ pepra moronun taru yumada, Allah er adipapu, yana melimnerure.
11 Allahdi perur upu yuma tep nengeda, nedi, ‘Aupuda pio telepe,’ pepra, er tep gispal donune.
Angetopu, ne nai Allah Yahwehdi, ‘Ukupkamne,’ perur upu yuma tep, ‘Angeda pio telepe,’ pernune.
12 Allah tep, teka tenepnedi, ne kange dipru yuma, er deikipu derinune.
Neda, Allah tep, teka tenenuna cadi, tali tuai nesaladi, wareto mali keca kupneteng do? Gume tenepne.
13 Uo, ne nai Allah, nedi, ‘Kan tep ukupkamkene. Kan tep, telep karen keca karenkamkene,’ pepra, pedina upu deiki di peramsinge yumada, tek sisi kupkamne ja!
Tonda, nedi kan tep, “Naio kanda pio Telepe pepkene,’ pepra, kan si eremkamkene.
14 Deiyoda ake. Ada, neda depmanto konum kunmasipanen, kan dipapu ne damai yana, melipra lyepropnemume.
Tonda, ne pona tep nengdi, ne tep, bisbisa kapra popmanto kupnei dinin, kandi melipra lyepropnemuma cadi, “Kanda pio Telepe,” pepkene.
Ne nai Allah, kandi lyepropnemuma deiyoda ake. Ada, ‘Angeboda, ne Allah damai kunkamre. Ne damai kuramrepanen, ne dirine weik karepnyopda, erdi, ‘E, dumsisi kuna tep bisiaida, ake,’ tenepre dingeda, abisipu dombankamre’ tenen, konum lyepnemumdi telep kweipnemume.