Psa 57 | XteSC | STEP | Raja Dauddi aMazmur upu mutda seku. Ada Israel nesala peteremna tep, sekudi Allah upu mut pena deiyo ngebo tep karepu. Amazmur upu mut, er lelimda, yuk mut er sida, ‘Popra gawal dangna gume,’ akonum penupa utopu kupra penkamepe. Dauddi amazmur upu mut seku taruda, ada Raja Sauldi, ‘Daud popkamne’ tenen, epra domembaramupa, Dauddi, sepdara ila gel imir pumbon wekra, inipra kunmau taru neitamai di seku.

Psalms 57

‘Allah melipkamner’ tenen, moropu upu

1 Raja Dauddi aMazmur upu mutda seku. Ada Israel nesala peteremna tep, sekudi Allah upu mut pena deiyo ngebo tep karepu. Amazmur upu mut, er lelimda, yuk mut er sida, ‘Popra gawal dangna gume,’ akonum penupa utopu kupra penkamepe.
Dauddi amazmur upu mut seku taruda, ada Raja Sauldi, ‘Daud popkamne’ tenen, epra domembaramupa, Dauddi, sepdara ila gel imir pumbon wekra, inipra kunmau taru neitamai di seku.
2 Dauddi pepu ngeda ake.
Uo, ne nai bo Allah, bicau tenepnetumdi, ne tep melipra lyepneo!
Deiyoda ake. Ada, ‘Allahdi melipra kalengkamner’ tenen, kan damaipu yana kunune.
Ukupmantoda, ayam ma nerngedi, er nyapu yuma deipredi, er pol amutara deipredi, kalengamretopu, ‘Allah, kan damai yanyopda, kandi pio melipra kalengkamnerum’ tenen, moropkene.
‘Yu nengdi, popnenung’ tenen, Allah kan damaipu inipnedi, dakunmanyanen, ne podan neng konum bendopmengopda, tali kange deipra kunkamne. Ukupmantoda, ‘Ila kumanya yaredi pirinmaryanen, dimperamretopu kuptene,’ tenepne.
3 Nedi upekenune. Allah ^{▼▼Allah – Acada, Ibrani upu deiki di, Allah er si tep, ‘Allah Elyon’ pepra seki. Aupu deiyoda, sun kael kemna tep, angeda konum jenek kupra sekmepu.} kanda, akeca-keca yuma talepra deiki tara kumemdi, Ila Puto Eremna Ngebo kuruma cadi, nedi kan tep, ‘Uo, bicau tenepnememdi, melipra lyepropneo!’ pepra morokenune.
Kanda Allahdi ne tep, ‘Angeboda, ukupra melipkamne,’ tenenerume. ‘Melipnemempa, kandi ange ton ange ton, kupkamne,’ tenenemem utopu kupra, tek sisi kunerume. Kandi, ‘Ukupkamne,’ tenemem keca yumada, ange utopu tek sisi kuruma tepa.
4 Ange tep nengeda, Allah kanda, im deiki kurumai di, ne melimna tep keca dokotepkamnerume. Tonda, kandi ne melipra lyepropkamnerume.
Yu nengdi, ne tep, ‘Angebo popkup’ tenen, warengnenung neng yumada, kanda Allahdi, aneng yuma wenepmemdi, popra gawal dakamrume. Ukupmemnyopda, sun yuma ali dangkamenge.
Allahdi, ‘Ukupkamne,’ teneseredi, peseretopu, tamna gum di, angepu tek sisi kurure. Atep, ne nai bo Allahdi, ‘Ukupra pio bicau tenekenuna cadi, pio telep kweipkamkene,’ pepra, pedina upu deiki di peipneunge yumada, pio ne tep, tek sisi melimkamre.
5 Pio yu nengdi, ‘Angebo popkupa tep, dan mutu kurur do?’ tenen, konum erterenenunge. Ukupmantoda, bura tara gam kuramre keca, er sida ila yu singa pusdi, ‘Nimi popra jepkun’ teneretopu, sun yu nengdi, ne pona tep nengda, utopu kupra kununge.
Ne pona tep nengda, ukupmanto aneng sun sida, sun si takkeda, nimi pon mar cap, nimi pon balena cap, utopu kurure.
Tonda, ayu nengdi sun lyemu deiki di penung upu yumada, nimi pon parang ya, er sida, ila di yu weik kuramretopu kununge.
6 Uo, ne nai Allah, kan pio puto weik kuruma cap, pio-pio telep kuruma capda, men nukmanto, im deiki utopu kurura cadi, kandi ange yuma jenek kupra benbenepsemempa, nimi yumadi, lukdangedi, ‘Uo Allahda, tek sisi pio telep kurure,’ tenepmengedi, kan si eremkamkenge. ‘Nimi yumadi, ukupkameng’ tenen, moropkene naio.
Angetopu, Allah kan pio puto weik kuruma cap, pio-pio telep kurema capda, ‘Tuai mutu neitamai kunge nesala ban-ban yumadi, kael keptengedi, kan sipu pio eremkameng’ tenen, moropkene naio.
7 Ne pona tep nengdi, ‘Angebo tomopmepedi, er nong deiki ikin keca deipmepedi, popkamep’ tenen, warengnenunge.
Ayu nengdi, ikin keca pio weik, ne deiki derinenunga cadi, ne dipru pu jeneredi, pio puto bounpu kunerure.
Nimi pon nengdi, ‘Bura tara gam kure keca popkup’ tenen, tu pumbon palipmengedi, co takke lupra, atu pumbon ikra deriramengtopu, sundi ne embane bisida, nimidi tu kumupra deipidi co takke lupra atu pumbon ikra ketenepra deiami.
Ukurami dinin, sundi, ‘Yuk ngebo popkup’ tenen, ketenepra deiami keca pumbonda, sun peda aketeneiami keca pumbonpu saka dourbeidi, popdai.
8 Uo ne nai Allah, ne kange dipruda, tenimtonada pio men kunerur dinin, pio puto di tupa teka tenekenune. Angeda pio men tamnune.
Teka ne naio, ne kange dipru neitamai yumada, pio dim peprappu kunerure. ‘Uo ware kuptene do?’ tenen, pio men tenimtonune. Kan tep pio teka tenekenune.
Atep nengeda, ne kange dipru neitamaida, mut pepnedi, kan si tep pio eremkenune.
9 Teka, ne kange dipru neitamai yumada konum ketenepkune. Ne mut pena taru lelim pen keca, er sida, bung-bung pena gambus cap, kecapi cap, ketenepnedi, mut penkamne.
Neda, mapmanyanen, berekrepa, bungdongone taruda, keteng kapul men yare taru di, ne mut pena tep ketenepkamne ja!
10 Deiyoda, ne ila deiyo ngebo Allah tep, kanda akeca-keca yuma talememdi, ila puto weik ngebo kuruma cadi, yuk neng gekenai di, ‘Telepe,’ pepra, Allah kan si pio eremkamne!
Teka, sun dana-dana tara kunge nesala, yala-yala yuma kunge mutu neitamaida, Allah kan tep, si eremkenedi, ‘Allahda pio telepe,’ pepra mut penkamne.
11 Ada tali tep guma. Deiyoda, ake. Allah kandi nun tep, ‘Ila di bicau tenepsenedi, pio telep kweipkamsene,’ pepra, pedina upu deiki di peipsemum upu yumada, tek sisi kunkamserume. Tuai mutu di, im deiki tara men nukmanto kuretopu, kandi ila di bicau tenesememdi, telep kudiseremnge peda, men nukmanto kurure.
Ange utopu, tuai mutu deiki tara, dua kururai men nukmanto kuretopu, kanda tamna gum dipapu, pio melipra lyemdoserumada, men nukmanto kurure. Kandi, ‘Ukupkamne,’ peseremetopu, angepu tek sisi kuruma tep pepkene.
12 Uo, ne nai Allah, kan pio puto weik kuruma cap, pio-pio telep kuruma capda, men nukmanto, im deiki utopu kurura cadi, kandi ange yuma jenek kupra benbenepsemempa, nimi yumadi, lukdangedi, ‘Uo Allahda, tek sisi pio telep kurure,’ tenepmengedi, kan si eremkamkenge. ‘Nimi yumadi, ukupkameng’ tenen, moropkene naio.
Angetopu, Allah kan pio puto weik kuruma cap, pio-pio telep kuruma capda, ‘Tuai mutu neitamai kunge nesala ban-ban yumadi, kael keptengedi, kan sipu pio eremkameng’ tenen, moropkene naio.