Psa 58 | XteSC | STEP | Raja Dauddi, Israel nesala peteremna tep, amazmur upu mut sekudi, Allah upu mut pena deiyo ngebo tep karepu. Karepudi, ‘Amazmur upu mutda yuk mut, er sida, ‘Wenepra popmemdi, gawal dangkamrume’ perameng mut, er lelim peramretopu aupu deiki amutpu penkamrume.

Psalms 58

‘Allahdi sun mali kunge nesala tep, ila di wenepra popkamre’ tenen, moropu upu

1 Raja Dauddi, Israel nesala peteremna tep, amazmur upu mut sekudi, Allah upu mut pena deiyo ngebo tep karepu. Karepudi, ‘Amazmur upu mutda yuk mut, er sida, ‘Wenepra popmemdi, gawal dangkamrume’ perameng mut, er lelim peramretopu aupu deiki amutpu penkamrume.
2 Uo sun ila deiyo neng tep asipetepsene. Sundi nimi upu bongdina taruda, dumsisi kupra, tek sisi upu deiki di, yuk neng tep upu bokeiprum do, gum do? Tonda, nimidi kuramenge kecada, sun kungetopu moupra dipeteprumudi, upu dumsisikra bokeiprum do, gum do?
3 Gume, ne kaele. Sunda, Allahdi pesere upuda, yaniptaprumudi, sun kange dipru neitamai mali tenerumutopu kupra, yuk neng tep upu bokeiprumudi, mali kurume. Sun dingeda, nun Israel nesala kunup mutu neitamai yumada, ikin keca deipsemumdi, mali kudiserume.
4 Sun ila deiyo nengdi, mali-mali kupra kurumudi, Allahdi peserur upu yanirtamnapu kurume. Ada, sun nin yapudi deiamsei taru di dipra, sun gam kurumu taru neitamai yuma peda, mali kunangepu kurume. Teka, sun nin yapudi ukupu deiamsei taru di, tupa-tupa mali kunangepu kurumudi, mok upupu perume.
5 Atep nengeda, sun ila deiyo-deiyo nengda, nimi pon bal utopu kununge. Ada, sun mali kunge keca deiki di, yuk neng yuma tep, kange mun keca karenunge. Ukupmantoda, nimidi, nimi pon bal dopropnedi, ‘Telep kupra deipnyopda, abal boun kuprepa, kange di telep kupkamre’ tenen, piripeteptenga peda, men kupmanto kurure. Ange utopu, sun mali kunge nimi deiyo nengda, yuk nengdi moroptenga peda, pio men gekenunge.
6 Teka, sunda pio malipu kununga cadi, ila kael nengdi, ‘Ukupkurum-ukupkurum,’ pepeteptenga peda, anengdi pio men gekenunge. Teka, ila kael nengdi, upu pepmengepa, balda telep kupra derinung dinin, amali kuna deiyonge, ila kael nengdi, ‘Ukupkurume,’ pepra, peptenga peda, pio men gekenunge.
7 Atep ne nai Allah, kandi sun wenemna tep, popmemdi, amutarapu deiptumopda, tupa mali men kuptenge. ‘Kandi sun sipyal popmempa, sun si yuma lukra saktu,’ tenen, pepne. Uo, nun nai Yahweh, ukupmantoda, ila yu pus, er si singada, yambul ukupu nenmarengepu tomopra, er sida eku tengamre ngeda, lukra tamna utopu kupra, ‘Amali kuna deiyo neng tep, kandi wenepra popmemnyopda, sundi tupa mali men kweipsetenge,’ tenen, moropkene naio.
8 Tonda, dou maramre taru neitamaida, mo cemna gum di, me yuma cepra, gelal semredi, gum kuramretopu, ‘Kandi amali kuna deiyo neng tep, gum kupra deipkurum’ tenen, moropkene. Tonda, ukupmanto ngeda, nimi embaramengedi, betei yaniramengepa, gelal semredi, gum kupbaramretopu, ‘Sun mali kuna deiyo neng tep, gum kupra deipkurum’ tenen, moropkene.
9 Tonda, sun anesala tep ukupmanto ngeda, ake. Nimidi yapi jeramre keca, ipi dopra, bupu gel deiptapmengopda, agel bupu di ipi ngeda, gum kupkamre utopu, amali kunung nesalada, ‘Kandi autopu nesalada, wenepra popmemdi, gum kupra deipkamrem’ tenen, moropkene. Tonda, nerapudi mundu doamenganen, amenda taru nyapu kapul men deipmenge taru, anyapuda, mundu pumbonpu depmengepa, tali derirtamamengtopu, ‘Allah kandi sun mali kuna deiyo nengda, sun mali kuna ngeda, kapul men kuptenge taru dipapu, wenepra popmemdi, gum kupra deipkamrem’ tenen, moropkene naio.
10 Tonda ukupmantoda, metek gamne memauda, ila uku jeramya deiki deipmengepa, pio menmena bupu kuramretopu, ‘Kandi amali kuna deiyo neng tep, menmena di popra sikke buktapkamrem’ tenen, moropkene naio. Tonda, ila uku di, manmaning yuma menmena di jeproprepa, gum kuramretopu, ‘Kandi amali kuna deiyo neng tep, menmena di wenepra popmemnyopda, gum kupkameng’ tenen, moropkene naio.
11 Kan Allahdi mali kunge nesala wenepmemdi, gum kupra deipmem pangeda, dumsisipu kunge nesaladi ange epmengopda, pio kange deipra kunkamenge. Ada, kanda Allahdi, ‘Ange kunkamrume, angeda pio men kunkamrume,’ pepra deipsemum upuda, angepu talepra kunge nesala tep pepne. Ukupmantoda, kan Allahdi, sun mali kunge neng tep, denge pio weik popmempa, sun yapi weik tu deiki saktudi, ila di weleptuopda, kan upu talepra dumsisipu kunge nesaladi, ayapi yanipmengepa, sun yan yumada, yapipu bapkamre.
12 Kandi sun mali kunge nesala wenepra sikke buktapmemnyopda, yuk nesala yuma ange epmengedi, upenkamenge. Ada, ‘E, ukutaruda, sun dumsisipu kunge nengda, menenga utopu keca konum dopropmang adano,’ penkamenge. Tonda, “Tek sisi Allahdi, tuai mutu ban-ban yuma neitamai di, mali kunange gum kupra deipredi, kange di ton cap telep kweipkamsere. Ada, mali nengdi kuramengtopu kupra, erdi sun tep wenepra menenga keca karerya deiki di, kange di ton cap akeca yuma, telep kudiserure,” penkamenge.