Psa 59 | XteSC | STEP | Raja Dauddi, aMazmur upu mut seku. Ada, ‘Allah upu mut pena deiyo ngebo karepkameng’ tenen, karepu. “Amutda, yuk mut er sida, ‘Nun pona tep neng popra gawal daksenung’ tenen, morona upu,’ penup mutda, amut lelim utopu kupra penkamepe,” pepra seku. Tonda, ‘Israel nesala yumadi ange kael kepkameng’ tenen, Dauddi aMazmur upu mut seku. Amut seku taruda, Israel nesala talepra nimi deiyo kuramu ngebo, er sida Saul, er jen talena neng tep, “Sunda ne ati moupra kalengkamrume. Ada, Daud eprumudi, tomopkurume,” pepu taruda, Dauddi amut seku. Dauddi sekudi pepu upuda ake.

Psalms 59

Dauddi, ‘Ne pona tep nengdi popnenung tenen, Allahdi lyepnetu’ tenen, moropu upu

1 Raja Dauddi, aMazmur upu mut seku. Ada, ‘Allah upu mut pena deiyo ngebo karepkameng’ tenen, karepu. “Amutda, yuk mut er sida, ‘Nun pona tep neng popra gawal daksenung’ tenen, morona upu,’ penup mutda, amut lelim utopu kupra penkamepe,” pepra seku.
Tonda, ‘Israel nesala yumadi ange kael kepkameng’ tenen, Dauddi aMazmur upu mut seku. Amut seku taruda, Israel nesala talepra nimi deiyo kuramu ngebo, er sida Saul, er jen talena neng tep, “Sunda ne ati moupra kalengkamrume. Ada, Daud eprumudi, tomopkurume,” pepu taruda, Dauddi amut seku. Dauddi sekudi pepu upuda ake.
2 Uo, ne nai Allah, kan sipu eremkenuna cadi, ‘Ne pona tep nengdi popnenung’ tenen, ‘Kandi lyepropkamnerem’ tenen, moropkene. Ukupmantoda, kandi nimi ton dopra, ila mutu dup deiki deriramumtopu, ‘Angebo poptapkup,’ tenenenung nengdi ‘Popnenung’ tenen, ne nai bo Allah ‘Kandi, adipapu menmena melipra kalengkamnerum’ tenen, moropkene, naio.
3 Tonda, sun kange dipru pio mali kunge nengdi, yuk neng tep ikin keca weik derinung nengda, sundi popnenung’ tenen, ‘Kandi loptapnememdi, lyepropkamnerum’ tenen, moropkene naio. Ada, sundi, ‘Nimi ton poptaptepe’ tenen, putaprepa, ‘Ne damai poryakanenung nengdi popnenung’ tenen, “Kandi melipra lyepneo,” pepra, moropkene.
4 Ukutaru peda, sun amali kunung nengdi, ‘Angebo poptapkup,’ tenepmengedi, inipmanga di, ‘Dan cei kunmar do?’ tenen, erterenenunge. Teka, sun puto weik kunge nengda, yu weik kuprepa, yuk tali dakunge nesala tep, ‘Sun cap bulupmepedi, angebo porbenkamepe,’ pepmenga deiki di, yuk nesala peda, ‘Angebo popkup,’ tenenenunge. Atep uo, ne nai Allah Yahweh, nedi, mali kun keca tenpunge peda, ton men kupsa tep, deiyo pio men kupmarepapu, anengdi, ‘Angebo popkup,’ tenenenunge.
5 Teka, neda mali kun keca tenpunge peda ton men kupsi dinin, sun anengdi ne tep, “Angebo popmeko!” pepra, erterenenunge. Ange tep nengeda, ne nai Allah, kanda bukropmemdi, ne damai yana dinememdi, ne tep melipra, lyepropneo naio!
6 Uo ne nai Allah, ^{▼▼Allah – Ibrani upu deiki di, ‘Elohim’ pepra seki.} ne konum kael keamkesi. Nun Israel ^{▼▼Israel – Ibrani upu deiki di, ‘Elohim Israel’ pepra sekinge deiyoda ake. Ada, Israel nesaladi Allah tep, ‘Elohim’ pepra, si eremnunge. Tonda, Allahdi sun tep kalekra melimrure.} yala nesaladi, kan si tepapu pio eremkenupe. Tonda, kanda, im deiki jen talena malaikat ^{▼▼malaikat – Ibrani upu deiki di, ‘Allah Sebaot’ pepra seki. ‘Sebaot’ sekinge upu deiyoda, nundi katuai dipapu sekmepu. Ada, ‘Sun kael kepkamrum’ tenen, ange yumada, katuai dipapu sekmepu.} yuma, sun deiyo ngebo kurume. Ange utopu, nai kanda Allah Yahweh ^{▼▼Yahweh – Ibrani upu deiki di, Allah er si sisa tep nengeda, ‘Yahweh’ pepra seki.} kurume.
Tonda nun nai Allah, ‘Kanda, adipapu bukropmemdi, sun Israel yala gum nesala, yuk mutu nesala yala-yala yumada, sun mali kunge keca yuma tep, wenepra popkamrum’ tenen, moropkene.
Ada, yuk yala nesala wenepkamrum taruda, kandi, ‘Uo, sun anesalada bicaue, sun pio mali weik kunge kecada, tali lupra kaukepnedi, men wenepkamne,’ tenena gume naio. Deiyoda, sun anengdi, ‘Yuk nesala, sun nong deiki ila kange mun keca derinkamepe,’ tenepmengedi, upu talenunga tepa.
7 Ne mutu neitamaida, konum ipkure taruda, sun amali kunge nengdi, tamupra yakanunge.
Yange dingeda, bura tara yu kamdi, ‘Ware gam kure keca popra jepkun’ tenen, ila upu di yu peramretopu, amali kuna neng peda, Yerusalem mutu dana-dana tara yumada, lyom gel di deipra, wiami beilya deiki tara yanipra embangedi, ‘Amutu nesalada, ware kupra poptaptepe do?’ tenenunge.
8 Naio, kandi gekepmemdi moupra dinkurume! Sun tamna gum dipapu, ila upu deiki di mali pepra ngolongnunge.
Ukupmantoda, nimi pona tep parang yada, er si pio yu weik kuramretopu, sun anengdi penge upuda, pio kange mun upu, nimi pona tep upu pesenunge. Sundi mali upu pesenunga deiyoda, ‘Gume, ware deiyo ngebo gekeptudi, nun tep wenepsetu do? Atep, angeda tonda men kupmare,’ tenenunga tep, tali lupra pio yu upu sisingnunge.
9 Mali upupu penung dinin, nun nai bo Allah Yahweh kanda, sun aneng tep auturume.
Tek sisi ngeda, yuk mutu nesala yala-yala yumadi, “Angeda ukupkamepe, Ukupkamepe,” pepra, balila di mali upupu penung dinin, kan Allahdi sun yuma tep, ‘Dakwapye’ tenen, auturume.
10 Uo naio, kanda ne puto kemdinerur ngebo kuruma cadi, ‘Ware taru di melipra lyepkamner do?’ tenen, kan tep pio dinapu kunkamne.
Deiyoda, Allah kan damaida, yu nengdi men popnetenga cadi, ila gel ati utopu kunerure.
11 Allahdi pio bicau tenenerura deiki di, “Ukupra teleppu kudinkamkene,” pepra, pedina upu deiki peipneua cadi, er dipapu mepra embarepa, er amnyo tarapu dombankamne.
Atep, ne nai Allahdi, ne tep melimkamnera deiki di, ne pona tep nengda yuma, adipapu popra sikke buktapre dingeda, sun depmengepa, erdi dinkamre.
12 Dinino, ne nai Allah, kanda akeca-keca yuma talememdi, ila puto weik ngebo kuruma cadi, ne pona tep neng yuma popra, gum kupra deipmemnyopda, nedi talenun nesala, sun Israel yala nesala yumada, adipapu ange yuma lumdongonunge.
Atep ne nai bo Allaho, kan ila puto deiki di, nun pona tep nengda, amutara kepra deipkamrume’ tenen, moropkepe.
Jen talena nengdi, ‘Yuk jen nengda, sun mar di popsenung’ tenen, sun nong lelimna keca, er sida perisai kemameng utopu, ne nai Allah, kanda nun Israel nesala tep, melipra kalengserume.
13 – 14 Tonda, sun sipyal cap, sun lyemu cap deiki di, pio mali upu cap, widongon upu cap penunge. Ukupmantoda, nimidi tali bura tara gam kure keca lupra tomoramengtopu, sunda salnong-nong kamengedi, gemenunga cadi, ange tep nengeda, kandi sun anesala yuma tep wenepra popkamrume.
Tonda, sundi yuk neng tep, ‘Dadepnung’ tenen, nimi ker don pel dona cap, tali-tali upu pena cap, kununga tep nengeda, kan ila yu kupkerepa, anesala tep adipapu popra sikke buktapkamrume naio!
Ada, sun amali kunge nesala kankan di, tenpu ngebo peda tamna gum di, sun yumada popra gawal dakamrume.
Ukupmumnyopda, nimi tuai nesala ban-ban yuma, im sirik mutu sirik dana-dana tara mutu yuk dakunungai peda, ange gekepmengedi kael kepkamenge.
Ada, nimi tuai nesala yumadi, ‘Uo, tek sisi Allahdi sun Israel nesala ^{▼▼Israel nesala – Ibrani upu deiki di, ‘Yakub’ seki dinin, aupu deiyo neitamai ngeda, Yakubdi deiamupa, dadeipdanen yakarami nesala, sun Israel nesala tenepidi, sun apu bo Yakub, er si seki.} yuma taleredi kalengrure’ tenen, Allah tep kael kepkameng ja!
15 Nun mutu neitamaida, konum ipkure taruda, sun amali kunge nengdi, tamupra yakanunge.
Yange dingeda, bura tara yu kamdi, ‘Tali gam kure keca popra jepkun’ tenen, ila upu deiki di, yu peramretopu, amali kuna neng peda, Yerusalem mutu dana-dana tara yuma, lyom gel di deipra wiami beilya deiki tara embangedi, ‘Amutu nesalada, ware kupra poptaptepe do?’ tenenunge.
16 Sun amali kunge nengdi, ‘Ware jen keca ton upula doproptepedi, jen jeptepe,’ tenen, nun mutu neitamai dana-dana tara epra, amutu yumada embanunge.
Jen keca epmengedi, dopra jenung dinin, pio men boupredi, tupa putapyopda, yu upu deiki di ngur-ngur pengedi jenunge.
17 Sun mali kunge yu nengdi, ukusenung dinin, ne dingeda, kanda pio ila puto kurum ngebo tep, mut pena deiki di penkamne.
Tonda, tumi-tumi yuma, konum berekyopda, kan si eremna tep, kange lon mut penkamne. Ada, kanda, ila di bicau tenesememdi, kandi, ‘Ukupra pio teleppu kudinkamsene,’ pepra, pedina upu deiki di peiamsemum ngeda, ange tenepra, mut deiki di penkamne.
Amutda tali tep men penkamne. Deiyoda, kan ila puto deiki di konum pio melipra kalengamnemuma tep, mut penkamne. Ukupmantoda, ‘Nun pona tep nengdi popsenung’ tenen, nimidi ila gel di deipra donung gel ati utopu konum kuramnemuma tep, mut penkamne.
Tonda, ‘Yu nengdi popnenung’ tenen, kange mun kange doupra kune taruda, iniptenepa, yu nengdi men popnetengai utopu konum kuneruma tep, amutda penkamne.
18 Uo ne nai Allah, kanda ne puto kemdinerur deiyo ngebo kunerume. Atep nengeda, kan sipu erepnedi, “Kanda pio telepe,” pepra, kange lon mut penkamkene.
Deiyoda, ake. Ada, ukupmantoda, ‘Nun podan nengdi popsenung’ tenen, nimidi ila gel di donung gel ati utopu konum kuramnemuma tep, kan si eremna tep, mut pena deiki di penkamne.
Ada, kan tep mutpu penkamkene. Deiyoda, kanda ila di bicau tenenememdi, kandi, ‘Ukupra pio teleppu kudinkamkene,’ pepra, pedina upu deiki di konum peiamnemumnge yumada, tupa-tupa kuneruma cadi, ange tenepnedi, mut pena deiki di, ‘Telepe,’ penkamkene.