Psa 61 | XteSC | STEP | Mut pena deiyo ngebo Daud, erdi bung-bung pena keca, er si kecapi doupra, Allah tep si eremaudi mut penmau.

Psalms 61

Allahdi akeca-keca yuma yamupra kareserurnge tep, Dauddi telepe pepra, Allah er si erepra mut penmau upu

1 Mut pena deiyo ngebo Daud, erdi bung-bung pena keca, er si kecapi doupra, Allah tep si eremaudi mut penmau. 2 Ne nai Allah ne moronmaken nge yumada, kandi moupra gekepnerume. Tonda kandi epnememdi, moupra kael kepnerume.
3 Ne nai Allah, nedi kan tep “Melipnerume,” pepra morokene ngeda, kan damai di men morokenune. Pio karenai di morokenune. Ukununa cadi, kandi ne morokenenge men gekepnemem pangeda, ‘Ware keca deiyo tep men gekenerur do?’ tenen, tenimtonapu kunedi, mali kange dounune. Ne dipru boun kunerure. Tonda, Allah kandi ne doupra, yuk mutu bena deipnemempa, dimpepra kunkamne. Ada abena kunkamne mutuda, ‘Ila di erepra buku mutu, pio telepaipu bena dopra deipkamnerume’ tenen, moropkene.
4 Ange tep nengeda, Allah kan puto di kalekra melimnemempa, kan amutara kunune. Adeiki di, ‘Ne podan nengdi popnenung’ tenen, ukupmanto ngeda, kandi pio gat gel ati wipra keteneipnememdi, lelim dongopkamnerume. Ukupnemempa, dimpepra kan amutara kunkamne. 5 Kan puto di kalekra melipnemempa, ne gam kunkamne taru yumada, ukunepa ne nai Allah kan puto di kemdongonememya deiki di, teleppu dimpepra kunedi, kan pol amutarapu pio akunkamne’ tenen, moropkene. ‘Angeda tek sisi nong kupkamre’ tenena tep, Selah pepne.
6 Ange tep nengeda, ne nai Allah kan tep, “Ukunkamkene,” pepra, nedi pedina upu kan damai konum peiamkesi ngeda, gekepnemume. Ange gekepnemem dingeda, pio telep keca karenkamnerume. Ada, ware nesala do yuma, sundi kan Allah tep, ‘Erda ila mambule’ tenen, teka tenepmengedi, Allah tep kware kurur nesala tep, kandi telep keca karenkamrem utopu, ne peda utopu kupra konum karenerume. 7 Atep nengeda, neda Israel yala nesala tep, ila nimi deiyo talepra Raja kunun ngeboda, ne gam kuna tep go weika di karepnemempa, ‘Ne dipapu dordeipdanen, bankameng nesala yuma talenkamne’ tenen, moropkene.
8 Tonda, ukupnedi amutu yumada, ‘Ne dipapu pio tep talenkamne’ tenen, moropkene. Ada Allah kandi ne tep, ‘Erda Israel nesala talepra kunkamre nimi deiyo ngebo,’ teneramnemuma tep, wepra deipnemempa, nedi, ‘Kan damai nimi deiyo ngebo, pio kunkamne’ tenen, moropkene. Allah kandi bicau tenepnememdi, erepra deipnemempa, neda kan amutara pio bouna di kunkamne. Ukupnemempa, ‘Ne podan nesaladi, men yana popnetenge’ tenen, moropkene.
9 Ukupnemem pangeda, nedi Allah kan gispal dona tep, mut telep-telep penedi, pio kanpu si eremkamkene. Adeiki di, atumi-atumi yuma, kan si erepra gispal donkamkene. Ukunedi kan tep, “Ukunkamkene,” pepra, pedina upu deiki peamkesinge yumada, ne dipapu kunkamne. Nedi, tamna gum dipapu, angepu kunkamne. Dauddi pepu.