Psa 62 | XteSC | STEP | Raja Dauddi aMazmur upu mut seku. Ada, ‘Allah upu mut er si Yedutun lelim peramretopu penkamenge’ tenen, sekudi, Allah upu mut pena deiyo ngebo tep karepu.

Psalms 62

‘Allah er dipapu nun tep melipra lyemdoserure,’ pepra mut pena tep pepu upu

1 Raja Dauddi aMazmur upu mut seku. Ada, ‘Allah upu mut er si Yedutun lelim peramretopu penkamenge’ tenen, sekudi, Allah upu mut pena deiyo ngebo tep karepu.
2 Ne kange dipru neitamai di, ‘Ne nai Allah dipapu lyepkamnere’ tenepnedi, kwar tenena gum di, tali kange doupra dinapu kunune.
Ada, ne nai Allah er dipapu melipra lyepkamnera cadi, er tepapu teka tenenune.
3 Ukupmantoda, ila gel bukwa damai inipnepa, ne pona tep nengdi, men yana popnetenga utopu, Allahda, er ila puto deiki di ne tep melipra lyemdonerure. Yuk ngebodi pio gume. Teka, Allah erda, pio puto di melipra kalengnerura cadi, ne kware pio men kunkamnere. Tonda, kwar tep, ne nong yuma men moropsepkamnere.
4 Dinino, sun yu nengda, ware kuprap taru deiki di, yuk neng tep, popetepkamrum do?
Ukupmantoda, nimidi bisam beilya konum peamengepanen, pun di daksakmanto konum kupyopda, nimidi abeilya co yuma dakra urumtamameng utopu, sundi ‘Nun song,’ tenerum neng tep, tupa-tupa ponapu kunkamrum do?
5 Sun yu weik nengda, ‘E, yuk nengdi animi deiyo neng tep, ‘Telepe,’ pepra gispal donunga cadi, angeda nun songe, atep telep nengpu popkamepe,’ tenepmengedi, pio tenenapu kungedi, upu talenunge. Tonda, tali mawa di pena upu deiki di sundi, ‘Angeda telepe pua,’ tenepmengedi, kange deipra pingping kange donunge. Sun sipyal di penge upuda, mawa di gekena telep upu pertamnung dinin, tek sisi sun kange dipru neitamaida, ‘Anengda, nun pio songe,’ tenengedi, wina upu penunge.
6 Ukunung dinin, neda ngeda, ‘Ne nai Allah, er dipapu lyepkamner’ tenen, upu pena gum di, tali kange deipra, dim penapu kunune.
Deiyoda, nedi, ‘Gume, Allah er dipapu melipra lyepkamnere,’ tenepnedi, er deikipu deipnedi, ne kange dipru er tep teka pio tenenune.
7 Allah erda ila gel bukwa mutu utopu kurura cadi, er dipapu ne tep, kalekneredi, lyemdonkamnere.
Er Allah damaipu kunyopda, kalengnerepa, neda teleppu kunkamne. Atep, kware men kupkamnere.
8 Nimi tuai nengdi gum dinin, ne nai Allah dipapu, ikin keca neitamai di lopneredi, lyemdoneredi, telep kupra erepra derinerepa, yuk nengdi ne tep, gispal donenunge.
Allahda, er dipapu melipra kalengnerure. Ware ikin keca do yuma, er damai men yana poponetua cadi, er damaida, ne teleppu kunune. Erda ila puto gel ati utopu, tonda ila mutu bungne gel utopu ngebo kurure.
9 Ange tep nengeda, uo, sun tuai mutu neitamai kurum nesala ban-ban yumada, Allah tepapu, teka tenepra, er deikipu sun kange dipru derinkamrume.
Tonda, sun kange dipru neitamai, ikin kuserur keca yumada, er tepapu lap penkamrume.
Teka, Allahda, nun kunup taru yuma, Lyemdona Deiyo Ngebo kuserure. Er dipapu nun kupe keca yuma melipra kalengkamsere.
10 Puto gum nesala yuma peda, ukupmanto, tenpu isinpu kununga cadi, sundi pio men lyepsetenge.
Angetopu, sun ila mambul nesala peda, sundi men lyepsetenga cadi, sun peda ken deiki di diramep keca utopu kununge.
Tali kankan nesala pe, ila nesala peda, sun yumada mambul neng gume. Ukupmantoda, bung keca dopra deipmengedi, ‘Er ikinda ware kuprap kilo do?’ tenen, timbangan deiki deipmepyopda, sun ikinda pio metekpu kurure. Sun tuai nesalada ila mambul nesala guma tepa.
Teka, tali kankan nesala pe, ila isomka nesala peda, sun yumada mambul gum tep, ukupmantoda, ‘Ikin kurur do?’ tenen, timbangan deiki deiptepya peda, sun ikinda pio gume. Sun yumada, tenpu isin utopu kununga cadi, sundi men melipra lyepsetenge.
11 Tonda, ‘Ware keca di melipnetu do?’ tenen, ‘Yuk neng tep, ikin keca sun nong deiki deipnyopda, sundi nimi dena tep, bul kemne co bo weik karepnetenga deiki di, ange melipkamnere,’ tenena gume.
Angetopu, ‘E, yuk nesala sun bung keca mawa derinungai di, weknedi, ange yuma upula dopropnyopda, ange yumadi melipkamnere,’ tenena gume.
Tonda, ange utopu, amenda taru sun bung keca weik kupbarepa, isomka kupmumnyopda, ‘E, ne co bo cap, bung keca cap, weik akunerepa talenuna deiki di, isomka ngebo konum kununa cadi, ange di melipra lyemdonkamnere’ tenena pio gume.
12 Nun nai bo Allahda, ue tenpu taru di konum peipseu. Tonda, ue butene cap, kange di weika di ton cap konum peipseupa, ne ton gekeramsi.
Allahdi peipseuada ake. “Tek sisi ila puto kunange yumada, ne Allah dipapu talenune. Yuk keca yumada, puto men kurure,” pepra, peiamseupa gekeramsi.
13 Tonda, ne nai Allah, ne konum kael kepsi. Kan Allahda, akeca-keca yuma talememdi, ila puto weik ngebo kuruma cadi, kandi konum peipsemume. “Neda ila bicau tenesenedi, sun tep, ‘Ukupra pio telep kweipkamsene,” pepra, pedina upu deiki peiamsemumnge yumada, tek sisi pio kunkamserume. Pio men tamkamserume.
Tonda, ware nesala do yuma, sundi kuramengtopu, kandi ange dipeteprumdi, nun kuramepetopu, menenga keca kareserume.
Ada, telep kunge nesala tep, telep kudiserume. Mali kunge nesala tep, wenepra ikin keca kareserume.