Psa 63 | XteSC | STEP | Mut pena deiyo ngebo Daud, Yehuda tara neitamai dinin, nimi ton men kuramyai, katuai mutu kuramudi, Allah tep, “Melipnerume,” pepra mororamudi amut peramu. Ne nai Allah, kan tepapu si eremkenune. Yuk keca tep, ‘Ne nai,’ pepra men talenune. Kanda ne nai bo Allah tenpu kuneruma cadi, nedi kan tep putanerepa, ipna taru yuma, ‘Ware pepkuner do?’ tenen, gekepra ekenune. Ukupmantoda, bupu weik mutu, me men kurepa, nimidi me pio putaramengtopu, kan tep pio putanerure. Tonda, gelal seamre tu di, ‘Mo poipnetue,’ teneramretopu, Allah kan tep nedi pio putanmanerpa, puto boun kunune. Ne kange dipru cap, nong cap yumadi, kan tep putanerepa, kan tep pio tenekenune.

Psalms 63

“Allah tepapu pio tupa tenepedi er sipu pio eremkamepe,” pepu upu

Mut pena deiyo ngebo Daud, Yehuda tara neitamai dinin, nimi ton men kuramyai, katuai mutu kuramudi, Allah tep, “Melipnerume,” pepra mororamudi amut peramu.
1 Ne nai Allah, kan tepapu si eremkenune. Yuk keca tep, ‘Ne nai,’ pepra men talenune. Kanda ne nai bo Allah tenpu kuneruma cadi, nedi kan tep putanerepa, ipna taru yuma, ‘Ware pepkuner do?’ tenen, gekepra ekenune. Ukupmantoda, bupu weik mutu, me men kurepa, nimidi me pio putaramengtopu, kan tep pio putanerure. Tonda, gelal seamre tu di, ‘Mo poipnetue,’ teneramretopu, Allah kan tep nedi pio putanmanerpa, puto boun kunune. Ne kange dipru cap, nong cap yumadi, kan tep putanerepa, kan tep pio tenekenune.
2 Ne nai Allah, kan si eremna ati pumbon bena kunmasi taruda, kan ila puto cap, ila erepra pio telep kurumnge cap, peteremnemumpa, epra kael keamsi. 3 Ne nai Allah, kandi ne tep bicau tenenememdi, melimnerum ngeda ila mambule. Dinino, ne gam kunada yambul mambul pua. Atep ngeda nedi kan tep, “Allahda pio teleppu kurure, erda ila mambule,” pepra, kan sipu pio eremkamkene. 4 Ne gam kunkamne taru yumada, Allah kan tepapu telepe penkamkene. Kan tep moronkamkene taru yumada, ne buru kan damai erepra deipnedi, kan si deiki di moronkamkene.
5 Kan tepapu ila kange deipnedi, pingping kupnerepa, gispal donkamkene. Ada kandi ne dipru neitamai tenene ngeda, pio telep kun ngepu karepnemempa, telepngepu tenenuna tep pepne. Ukupmantoda, nimidi, pio telep jen keca kalepra jepmengedi, jena tepmengepa bouramra deiki di, pio kange deipra telep kuramengtopu, kandi melimnememnya deiki di, pio kange deipra kunune. 6 Ne mapne taru peda, kan tepapu tupa tenenkamkene. Tonda lukunda taru neitamai yuma peda, pio kan tepapu tupa tenekenune.
7 Ada, Allah kanda, ne putanerur keca yuma tep nengeda, kandi tupa melimneruma tep, kan amutarapu kunkamne. Ukupmantoda, madi er walau dopra, er pol amutara deipredi, kalengdoramretopu, Allah kan erepra im deiki tara kumemdi, kan damai kepdongopnemumdi, kalengnemempa, kan amutara kunedi, kan tep kange lon mut penedi gispal donkamkene. 8 Ne kange dipru cap, nong cap di, kan Allah tep pio moupra talenkamkene. Ukupkenepa, kan dumsisi tara buru di, ‘Teleppu kunkamre’ tenen, talepnurupkamnerume.
9 Dinino yuk nengdi ne tep, ‘Angeboda nun song cadi, er popkamepe’ tenen, dombanenung neng, sun yumada, kandi anesala tep wenepra poptapkamrume. Popmemnyopda, amali kecapu talepra kunung nesalada, tuai nesala depmangepa, bena kunkamengai, aneng peda dopra deipkamrume. 10 Kandi sun wenemna tep, go karepmempa, sun anesalada mar podanmangai di, popmengepa depkamenge. Adepkameng nengda, bura tara tali gam kunge keca, dumre kam utopu keca yunge di yana, sun depmange nesala nong dopra, jepropkamenge.
11 Sunda ukunkameng dinin, neda ila nimi deiyo ngebo Rajadi, ne nai bo Allah kan tep, kange deipra kan si pio eremkamkene. Sun mok upu penung nesalada, Allahdi sun sipyal dekdongoprepa, upu men pepmanto kunkamenge. Dinino, ware nesala do yuma, “Nun ukupra kunkamepe,” pepra pedina upu penkameng taruda, upenkamenge. “Allah er si deiki di pedina upu penupa cadi, tek sisi teka tenenkamserume,” penkamenge. Allah tepapu teka tenepmengedi, pingping kuprepa, telep kange deipra, Allah er si pio eremkamenge.