Psa 64 | XteSC | STEP | Amazmur upu mutda, Raja Dauddi seku. Ada, Allah upu mut pena deiyo ngebo karena tep sekra karepu. Dauddi seku upuda ake.

Psalms 64

‘Ikin keca ne nong deiki derinenung neng tep, Allahdi melipra lyepkamner’ tenen, morona upu

1 Amazmur upu mutda, Raja Dauddi seku.
Ada, Allah upu mut pena deiyo ngebo karena tep sekra karepu. Dauddi seku upuda ake.
2 Uo, ne nai Allah, nedi engepra moropkuken upuda gekepneo!
‘Ne pona tep yu nengdi yana popnenung’ tenen, kware weik kupmanera cadi, ‘Kandi melipra kaleknemempa, anengdi men popnetengepa, gampu kunkamne’ tenen, moropkene naio.
3 Tonda, sun mali weik kunge yu nengdi, ‘Angebo popkup’ tenen, inipmengedi mur-mur pena upu deiki di, ne pona tep upu talenunge.
Atep, sundi ne tep, ‘Angebo adipapu poptapkupa tep, ukupkamepe’ tenen, upu talepmengedi, ne pona tep ketenemenge nge tep, ‘Kandi, melipra lyepkamnerem’ tenen, moropkene naio.
4 Nimidi, sun nimi pon parang ya, ‘Yu weik kupkur’ tenen, keteramengtopu, sun lemu deiki di pengepa, nimi dipru pu weik jerure.
Tonda, ukupmanto, nimi podan taru di, ‘Nun songe, tenepe neng popkup’ tenen, sun mar takke lupra ketenemdiramengtopu, ayu nengdi ne tep, pio mali upu penenunge.
5 Yuk nengdi mali kun keca men kupmangedi, deiyo men kupmarepapu, sun yu nengdi, ‘Aneng popkup’ tenen, inipmengai di, tali minina upu deiki di mar dopmengedi, ponunge.
Tonda, sun mar donung nengdi, ‘Ware kupkamser do?’ tenena cap, kwar kuna cap, gum dipapu, yuk neng tep mar donunge.
6 Sundi, ‘Yuk telep neng tep, ukupra-ukupra kupmepedi, pio ikin keca sun nong deiki derinkamepe,’ tenengedi, ato tenena ngeda, pio men tamnunge. Pio tenenapu kununge.
Ukupmenge dingeda, ‘Aneng popkup’ tenen, nimi pona tep keca ketenepra derinunge.
Ukupmenge taruda, sundi, ‘Gume ware nengdi ton epkamseng do? Nun mali weik kunmap ngeda, yuk nengdi ton pio men epkamsenga cadi, tali lupra mali kupmeko,’ tenenunge.
7 Sun yu nengdi, ‘Telep neng pona tep, ukupra-ukupra kupkamepe,’ tenenunge. Deiyo men kwapmarepapu, ‘Atelep neng popkupe’ tenen, pio moupra tenepmengedi, upu talenunge.
Yuk neng, sun kange dipru neitamaipu pio moupra tenenung kecada, nun yuk nesaladi, pio men tenepmanto kunupa cadi, sun tenenge kecada, ware kupra kael keptepe do? Gume, men kael keptepe.
8 Dinino, Allah er dipapu, er kael cadi, erdi sun wenemna tep, ikin keca sun nong deiki di deipkamre ja!
Ukupmantoda, ton tara nengdi men tenepmenge taruda, ton tara nengdi menmena mar dopmengepa, aneng popmengopda, dato-dato di sun susu dila kwapkamre. Angetopu, sun mali kunge neng men tenepmenge taru dipapu, Allahdi sun tep wenepra popkamre ja!
9 Deiyoda, sun mali kunge nengdi, pio mali upu penunga deiki di, Allahdi ayu neng tep, wenepredi popra gawal dakamre ja!
Konum popyopda, yuk neng epmengedi, kange lopyopda, ‘Uo, uo, Allahdi aneng popmarada, ila mambule,’ tenepmengedi, kware weik kunkamre.
10 Atep, Allahdi sun mali kunge nesala tep, konum wenepra popyopda, yuk-yuk nesala yuma, ange epra kael kepmengopda, kwar weik kupkamenge.
Kware weik kupyopda, sun yumadi, ‘Uo, Allahdi amali kun nesala wenepra popmarada, ukupra-ukupra kupmara deiki di, sun yu neng konum wenepra popmar adano,’ pepra yuk mutu nesala tep lap perbenkamenge.
Tonda, Allahdi amali kunge nesala popmarenge tep, pio moupra tenepetepmengedi, kael kepkamenge.
11 Dinino, ware neng do yuma, Allahdi, ‘Ange kunkamrume, angeda pio men kunkamrume,’ pepra deiamseu upu moupra talepmengedi, dumsisipu kunge nesala yumada, nun nai Allah Yahweh tep, ‘Uo, erda pio telepe,’ tenen, pingping kange doupra kunkamenge.
Tonda, sundi, ‘Mali keca nun damai yakaserura cadi, Allah dipapu melipra lyemdonkamser’ tenen, Allah er damaipu bena, pio tep akunkamenge.
Tonda, nun kange dipru neitamai pio teleppu kunup nesala yumada, dumsisipu kupedi, nun nai bo Allah tep, ‘Kanda pio telepe,’ pepra, er sipu eremkamepe.