Psa 65 | XteSC | STEP | Mut pena tep gonga kemna ngebo Daud erdi mut pepu.

Psalms 65

Allah tep gispal dopedi, telepe penkamep upu

1 Mut pena tep gonga kemna ngebo Daud erdi mut pepu.
2 Nun yumadi, “Nun nai Allah kan tepapu, nun deiyo ngebo pio telep kurume,” pepra, Sion mutu neitamai di, kan sipu pio eremkamkepe. Tonda nundi kan tep, “Nun nai bo Allah, er sipu erepmepedi, er upu gekepra kunkamepe. Er amutara kupedi, er pelpu donkamepe,” pepra, pedina upu deiki di pepmeputopu, tek sisi angepu talepra kunkamepe.
3 Ada tali tep gume. Allah kan dipapu, nimi tuai nesaladi moronup upu yumada, gekepra makuserume. Ange tep nengeda, tuai mutu neitamai kunge nesala yumadi, kan tep, ‘Allah er dipapu lyemdoseredi, pio melimkamsere’ tenen, nun nai bo Allah, kan damaipu yakankamepe.
4 Nun mali kuramepu keca yumada, pio weik kuramseupa, nun kange mun kange doupra kuramepudi, ‘Uo, ware kuptepe do? Ware ngebodi, melipra lyepsetu do?’ teneramepu dinino, Allah kandi nun mali kuramepu keca yuma, kaukepsememdi, ange yuma daepra lyemdoserume.
5 Atep nengeda, Allah kandi, ‘Ne si eremna ati damai yakankameng’ tenen, wepra deipsemum nesala yumada, pio ila di kange deipra kunkamenge. ‘Ne damai yangedi, ne sipu erepra kunkameng’ tenen, konum wepra deriserum nesala yuma, nun kan damai yapedi, akeca-keca yuma ketenepra deipsemumngepu, talepra kupedi, ila kange deipra kunkamepe.
Ada, Allah kan si eremna ati, kan kumemyai pio telep lengnai, yana kunkamepe. Atep nun yumadi, pingping kange doupra kunkamepe.
6 Allah kandi pio men tamserume. Nundi, ‘Nun nai bo Allah melimkamser’ tenen, moronup upu yumada, kandi gekepra melimserume. Kandi nun tep, ‘Dakwapye’ tenen, pio men tamserume. Kanda, tek sisi nun Lyemna Deiyo Ngebo kurume.
Tonda, Allah kan dipapu, nimidi men kupmanto pel domemdi, nun tep lyemdoserume. Tonda, ware nesala do yuma, meneng damai kunge nesala pe, pio karen mutu neitamai dakunge nesala yuma peda, ‘Allah er dipapu melipra lyemdonkamsere,’ tenekenunge.
Ada mutu sirik, im sirik dakunge nesala pe, ila laut mokon deiki, kapal laut deiki bukra embarameng nesala yuma peda, angepu tenekenunge.
7 Allah, kanda ila puto deiki di, mutu ban-ban yuma cap, mutu buma cap, ketekepra deipmumpa buku.
Ada, ‘Er ila puto talepra kurura deiki di, ila mutu yuma ketekepra deipupa, buku’ tenen, nimidi ace tenepra epmengedi, kael kemkamenge.
8 Kan dipapu ila laut mokon longteng-longteng perenge cap, me kait ila di weleramrenge capda, kan puto deiki di, amokon puto boun kupra derirume.
Ange utopu, tonda ware mutu kunge nesala do yuma, Allah kan dipapu, nesala ban-ban yuma dakungedi, ‘Podanapu kutepe,’ tenenung dinin, kandi anesala yuma puto boun kweipmempa, dimpeprappu kununge.
9 Ukupra kandi ila mambul pel, nimi men kupmanto pel domempa, mutu ban-ban yuma dakunge nesala yumadi, ‘E, tek sisi Allah er dipapu apel donmasere’ tenen, kan tepapu kwar kurepa, kan sipu eremengedi gudikenunge.
Ada, kandi sun damai nimi men kupmantonge kumempa, sun anesala yuma epmengedi, ‘Uo,’ tenen, kan tepapu gispal dopra gudikenunge.
Tonda mutu sirik, im sirik dakunung nesala yuma, kandi ila mambul pel domempa epmengedi, Allah kan tepapu si eremkenunge.
Ada keteng yakare tara cap, keteng dangbare tara cap, amutu ban-ban yuma daneitamai kunge nesala yumadi, kan tep, ‘Uo’ tenen, kan gispal dona tep, ila upu pepra, kan si eremkenunge.
10 Allah kan dipapu tu yumada, moupra kalengmemdi, ‘Gelal seprur’ tenen, mo karemempa cemredi, tu telep kurepa, nimidi wa pepra kourameng keca, yala-yala yuma bongorure. Ukupra bongopredi, jen keca yala-yala yuma nong pio weik kurure.
Tonda me embarya peda, Allah kandi karemempa, me weika di embaredi ourure. Allah kandi karesemem me yumada, pio tek sisi men cepropkamre. Kandi me telep kupra karesemempa, nimidi wa pepra kourameng keca yala-yala yumada, telep kupra bongorure. Ange yuma peda, Allah kan dipapu, “Ukunkamre,” pepra derirsememtopu kurure.
11 ‘Nimidi wa peamenge tu gelal seprur’ tenen, Allah kandi telep kupra derirume. Tonda, tu bum gelal serenge yumada, boun kemna tep mo karemempa mo cepra me dingdirume.
Tonda, nimidi tu deiki wa pepra yal keca yala-yala yuma gwekmengepa, bolongrur keca tep nengeda, yaten karemempa telep kupra bongorure. ‘Nimidi kourameng keca yuma, telep kupra bongonkamre’ tenen, mo karemempa, telep kupra ila di bongorepa, nimi weika di kinunge.
12 Angeda, Allah kan kange telep deiki di, ‘Aketeng tamun, aketeng tamun yuma, nimidi wa pepra koupmengedi, kipra jenkameng’ tenen, ketenepra deriserume. Mutu-mutu yuma kunung nesala tep, Allah kan dipapu dimemdi, akeca-keca yuma yamupra karerume.
Kan dipapu melimsemempa, gat tu kururai peda, nimidi wa pepra kourameng keca, yala-yala yuma telep kupra bongorure.
13 Tonda, Allah kan dipapu pio katuai mutu dinin, domba bisam cap, tonda, kambing bisam cap yuma tep, mutmuta batu pio weika di karemempa, kange deipra jenunge. Ukusememnya deiki di, amutu gon yumada teleppu kurepa, nimidi kange deipra ila upu di, kan tep “Telepe,” pepra gispal dokenunge.
14 Mutmuta batu paramre mutu yumada, domba bisam cap, kambing bisam capdi, pio weika di kununge. Tonda, ila mutu ban neitamai yumada, jagung utopu keca, er sida gandum pio weik kurure.
Ukurepa, akeca yumadi ila di kange depra mut penunge. Raja Daud mut pena deiki di pepu.