Psa 66 | XteSC | STEP | Allah er gispal dona tep, Mazmur upu mut seku. Ada, mut pena deiyo ngebo karepkamenga tep seku. Apepu upuda ake. Uo, sun tuai mutu neitamai kumum nesala yumadi, Allah tep kange deipra ila upu deiki di mut penkamrume!

Psalms 66

‘Allahdi Israel yala nesala tep, pio telep kemdiserure’ tenen, mut upu pepra seku

1 Allah er gispal dona tep, Mazmur upu mut seku. Ada, mut pena deiyo ngebo karepkamenga tep seku. Apepu upuda ake.
Uo, sun tuai mutu neitamai kumum nesala yumadi, Allah tep kange deipra ila upu deiki di mut penkamrume!
2 Ada, ‘Allah cap, er si cap, er puto di pel dorurnge cap yumada, pio teleppu kurure,’ pepra, er si erepra, kange lon mut penkamrume.
Upenkamruma deiki di, ‘Allahda, pio puto cap, pio telep cap kurure!’ pepra, pio telep upu deiki di, mut penkamrume.
3 Tonda, sundi Allah tep, ‘Allah kandi pio kunupsek pen pel dopmemnyopda, nun tuai mutu neitamai kunup nesala yumadi, kange lopserepa, kware kunupe,’ pepra, mut penkamrume.
Tonda, kan ila puto weik ngebo kuruma cadi, kan tep, ‘Nun songe,’ tenekenung nesala yumada, ‘Uo, Allahdi nun mali kunup keca tep, wenepra popserur’ tenen, kware weik kuprepa, inimbanunge.
4 Teka, sirya taruda, tuai mutu neitamai kunge nesala ban-ban yumadi, kan tep, kware weik kuprepa, kan damaida, gutam tu deiki deipdongopmengedi, sun giso genepdongopkamenge.
Ukupmengedi, ‘Uo, teka Allahda, ila puto weik kurur ngebo,’ pepmengedi, kan si eremengedi, kan gispal dona tep, mut penkamenge.
Teka, mut pena tep lelim peramre keca doupmengedi, “Uo, Allah cap, er si capda, pio teleppu kurur ngebo,” pepra, kan si eremengedi, mut penkamkenge.
5 Atep nengeda, sun tuai mutu kurum nesala yuma yana, Allahdi er konum pel doramunge tep, epmumdi, kael kepkamrume!
Allahdi, tuai mutu kunge nesala kankan di, nimi men kupmanto pel doramre taruda, nimi yumadi, ‘Uo,’ tenen, kange loprepa, kware pio weik kununge.
6 Ukupmanto ngeda, ake. Ada, menop taruda, ila laut mokon deiamupa, akwamu dinin, Allah er dipapu, amokon dana-dana bokrapudi, alaut mokon ^{▼▼mokon – Aupu deiyo kael kemna tep, Keluaran 14:21-22 ngeda, dinkamrume.} me yuma tekropupa, cepropu. Konum cepka, daneitamaida nun apu yapu yumadi, tali lupra laut deiamngai goupra ortara bei.
Ton taruda, ila me embaramu dinin, Allahdi ame cepropupa, kalkal tu ^{▼▼kalkal tu – Aupu deiyo kael kemna tep nengeda, Yoshua 3:14-17 dinkurume.} katawai kupupa, nun apu yapu, Israel nengdi, atu deiki yanipidi, ame goupra, ortara mutu beidi, amutu neitamai embarami.
Atep, ataruda, nun apu yapu yumadi, ‘Uo, ukutaruda, Allah cap, nun cap, kikiman kunmape’ tenen, pio telep kange deipra kurami.
7 Teka, nun si eremnup Allahda, er ila puto weik kurya deiki di, akeca-keca yuma pio tep talenkamre.
Allah er pe asuru di, sun yuk-yuk mutu kunge nesala yala-yala yumada, ‘Ware keca kunkameng do? Tonda, ‘Mali kupnung’ tenen, pio moupra diredi kalengrure.
Atep, ware yala nesala do yuma, balila keprumudi, sundi, ‘Gume Allahda dakwapye. Erda nun songe’ tenen, sun pedi, sun pe tepapu dipru men eremdankamrume!
8 Uo, sun yuk mutu kurumu nesala yala-yala yumada, sun peda nun Israel nesaladi si eremnup Allah tep, ‘Kanda pio telepe,’ pepra, er sipu eremkamrume.
Er sipu eremepedi, “Nun nai Allah, kanda pio telepe,” pepra, mut pepmepe pangeda, tuai mutu ban-ban yuma kunge nesala yumadi, gekenkamenge.
9 Nun pona tep nengdi, popsetengepa, nunda, konum depmatepe neng kunup dinin, Allah er dipapu, nun tep, kalengamseua deiki, tupa gampu kunupe.
Tonda, erdi nun tep, pio tamna gum di, tupa kalengserura tep, nun damaida, pio ila ikin keca ton, men yakaserure.
10 Deiyoda, Allah kandi nun yuma tep, ‘Sun dipruda, tek sisi dumsisipu kunung do, gum do?’ tenen, moupra diseredi, pirirtereserure.
Teka, nun nai Allah, kan dipapu nun yuma tep, ‘Mali kupkameng do, telep kupkameng do?’ tenen, disememdi pirirpeteserume.
11 Allah kan dipapu nun mali kuramupunge tep, ikin keca weik kareramsemume. Ukupmantoda, nimidi, ‘Mokon pumbonda, mekina tamopkup’ tenen, ila alen utopu keca, er sida jaring dopra, mokon pumbon dongoramengtopu, kandi konum kupsemume.
Tonda, nun mali kuramepu keca yuma wenemna tep, kan dipapu ila ikin keca dopra, nun nong deiki deiamsemumpa, ikinpu kuramupu.
12 Tonda, ‘Ne nyapu sisa, Israel neng kael kepkameng’ tenen, go karepmumpa, nun pona tep nengdi, yana popra gawal dakmanto kemamseipa, kange mun kange doupra kuramepu.
Yu nesaladi ila ikin keca deriramsei, ukupmantoda, ila uku jeramna pumbon neitamai kuna utopunge cap, ila kaurye mokon neitamai kuna utopunge capda, ikin weik kuramepu.
Kandi ukupra pio wenemamsemum dinin, ukutaruda, kandi nun dopra kange di tamupra, telepaipu, ikin men kupmaraipu konum deipmasemume!
13 Ange tep nengeda, ukutaruda, gam keca popnedi, akeca doupra, kan si eremna ati damai yanyopda, kan gispal dona cap, karena cap tep, akeca yuma dopra, uku neitamai dongopkamne!
Tonda, menop taru nedi kan tep, ‘Naio, kan pel dona tep, angeda ukupra-ukupra kunkamne,’ pepra, pedina upu deiki peipkesinge yumada, ukutaruda, tek sisi angepu kunkamne!
14 Ada, neda ila ikin keca weik ne damai yanamneupa, kange mun kange doupra kuramsi taruda, ‘Allahdi lyepnetu’ tenen, ‘Lyepnememnyopda, ukupra-ukupra, kan amnyo tara kepnedi, kan telep pelpu donkamkene,’ pepra, moropkesinge yumada, tek sisi donkamne ja!
Tonda, kange mun kange doupra kuramsi taru neitamaida, ne sipyal deiki di, ‘Uo, naio, kandi lyepnetumpa, ukupra-ukupra kupkamne,’ pepra, pemsinge yumada, tek sisi angepu talepra kunkamne ja!
15 Ada, kan si eremna ati damai yanedi, kan si eremna tep, gam kure keca dinin, er nong galemna weik kuprenge popnedi, kan karena tep uku dongopkamne ja!
Ada, ila jem sapi bisam cap, ila jem kambing bisam cap, yuk kambing bisam cap dopra, popne dingeda, kan si eremna cap, kan karena cap tep, doupra yanedi, mesba deiki deipra, uku dongopnepa, ukudi jepyopda, ketda kan damai welepkamre.
16 Ware mutu nesala do yuma, Allah tep kware teneramrumdi kuramrum nesala yumada, sun peda ne amut penman ngebo damai yamumdi, gekenkamrume. “Allahdi ne makuna tep, mambul pel melipra doramneu ngeda, adano,” pepra nuknedi, lap penkamne. Atep sun yumada, ne damai yamumdi gekepneso!
17 Ikin keca ne damai pio weik kuramneu taruda, ‘Allah er dipapu melipra lyepnetu’ tenen, ila upu deiki di, er tepapu mororamsi.
Nedi peramsi upu deiki di, Allah tep, gispal dopra, er si tep eremamsidi, “Kanda pio telepe,” pepra, mut pena deiki di peramsi.
18 Dinino, ataru neitamai yumada, ne kange dipru neitamai, ‘Mali kun keca tupa kunkamne ja. Ange yumada men tapkamne’ tenen, teneamtene teptoda, akeca-keca yuma talerur ila puto weik deiyo ngebo Allahdi, ne moropsi upu men gekemnetue.
19 Dinino, ange yumada pio men kuramsa tep, nedi moromsi keca yumada, Allahdi konum gekeramu.
Teka, nedi mororamsi upu yumada, Allah erdi konum gekeramneudi, ne mororamsitopu, erdi melipra lyemdoramneu.
20 Ange tep nengeda, nun tuai mutu neitamai kunup nesala yumadi, Allah er tepapu, ‘Uo naio, kanda pio teleppu kurume,’ pepra, er sipu eremkamepe.
Deiyoda, nedi, Allah tep, ‘Melipra lyepnetu’ tenen, mororamsi upu yumada, Allahdi konum gekeramneudi, lyemdoramneua cadi, er tep, ‘Kanda pio teleppu kurume,’ pepra, mut upu penkamne.
Tonda, Allahdi ne tep, ‘Ila di bicau tenepnedi, pio tep telep kudinkamkene,’ pepra, pedina upu deiki peiamneunge yumada, pio men tamneu. Ukupra kuramneua cadi, er tep, ‘Allah kanda pio telepe,’ pepra, er sipu eremkamne.