Psa 67 | XteSC | STEP | Mut pena deiyo ngebo Dauddi, bung-bung pena pen keca, er si kecapi doupra, Allah tep si eremamudi mut peramu.

Psalms 67

Allahdi akeca-keca yuma yamupra kareserura tep, er si eremna mut pepi upu

1 Mut pena deiyo ngebo Dauddi, bung-bung pena pen keca, er si kecapi doupra, Allah tep si eremamudi mut peramu.
2 Nun mali kunup keca yuma tep, Allah adipapu wenepra popsetu dinin, ‘Allah dipapu nun tep bicau teneseredi, akeca-keca yuma yamupra karenkamser’ tenen, moronupe.
Ange tep nengeda, ‘Nun nai bo Allahdi nun tep, telep tenepra weika di melimkamser’ tenen, moronupe. Allahdi telep tenepseryopda, nun telep kange doun keca yuma, Allah dipapu nun tep kareserure.
3 Ne nai Allah kandi, “Ange kunkamrume, angeda men kunkamrume,” pepra peiamsemum upu cap, kandi mambul pel dorumnge yuma cap, ‘Mutu ban-ban yuma dakunge nesala kael kemkamenge’ tenen, moronupe.
Tonda, kan puto damutu ban-ban yuma kunge nesala tep, tupa lyemdoserume. ‘Ukupra kumempa, nimi yumadi epra kael kemengedi, kan si pio eremkamkenge’ tenen, moronupe.
4 Ukupra kan puto di lyemsemempa, mutu ban-ban yuma kunge nesala epra kael kemengedi, Allah kan tep, “Nun nai Allah pio telep kurure,” pepra, ‘Kan sipu eremkamkenge’ tenen, moronupe.
Teka, mutu ban-ban dakunge nesala yumadi, kan tepapu, “Nun nai Allah pio teleppu kurure,” pepra kan si eremkamkenge.
5 Mutu ban-ban yuma dakunge nesala yumadi kan tep, “Telepe,” pepra, kan si eremengedi, kan tepapu ila kange deipra mut pengedi gispal donkamkenge. Ada tali tep gume. Allah kandi, mutu ban-ban kunge nesala yuma tep, dumsisi kupra kumemdi, nimi upu bongdiserume.
Tonda, nun nai Allah kanda tuai mutu ban-ban yuma kunge nesala, sundi talepra kunge keca yuma, moupra disememdi, ‘Ukunkamenge,’ teneserumtopu, telep kupra kudiserume.
Ange yumada, nun nai bo Allah kandi, ‘Ukunkamenge,’ tenesememtopu kunupe. Atep nengeda, mutu ban-ban yuma dakunge nesaladi, kan tepapu pio kange derikengedi, ila kange deipra mut pengedi, gispal donkamkenge.
6 Mutu ban-ban yuma kunge nesala yumadi, epra kael kemengedi, kan tepapu pio si eremkamkenge. Ukupra sundi, “Uo, nun nai Allah pio telep kurure,” pepra, ‘Kan tepapu si eremkamkenge’ tenen, moronupe.
Teka, mutu ban-ban yuma kunge nesaladi, kan tepapu, “Nun nai Allah, erda pio teleppu kurur ngebo,” pepra, kan sipu eremkamkenge.
7 Mutu ban-ban yuma kunge nesala yumadi, kan tepapu, “Telepe,” pepra, kan si eremengedi, kange deipra mut pengedi, gispal donkamkenge. Ukupra kumengopda, nun nai bo Allah kange deriseredi, tupa melimserepa, nimi kouameng keca yala-yala yuma, pio telep kupra bongonkamre.
Nimidi wa pepra kouamenge keca yuma, telep kupra bongonkamrada, tali tep gume. Deiyoda, nun nai bo Allahdi nun tep, bicau tenesememdi, akeca-keca yuma yamupra kareserumpa, akeca yuma weika di kinupe.
8 Nun nai Allahdi nun tep, ‘Bicau teneseredi, telep kupra melimserya deiki di, akeca-keca yuma yamupra karenkamser’ tenen, moronupe. Ukupra akeca-keca yuma weika di kareseryopda, mutu ban-ban dakunge nesalada, kandi pel domemnge tep, epra kael kemengedi, kan tepapu gispal donkamkepe.
Tonda, mutu ban-ban dakunge nesala yumadi, nun nai bo Allah tep, kware tenepra kunkamenge. Raja Dauddi upepra, mut pena deiki di moropu.