Psa 68 | XteSC | STEP | Ada, aMazmur upu mutda, Raja Dauddi seku. Ada, ‘Allah upu mut pena deiyo ngebo karenkameng’ tenen, amut sekra karepu.

Psalms 68

“Allah tep, ‘Nun song’ tenen, kunge nesala yumada, Allahdi popra gawal dangrure,” pena tep mut pepu upu

1 Ada, aMazmur upu mutda, Raja Dauddi seku. Ada, ‘Allah upu mut pena deiyo ngebo karenkameng’ tenen, amut sekra karepu.
2 Allah tep, ‘Nun songe,’ tenenge nesala yumada, kware kuprepa, dana-dana yuma sepdaro bendopkameng’ tenen, Allah tep moronupe.
Teka, Allah tep, ‘Nun songe, er tep nun dabale,’ tenenge neng yumada, ‘Allah tep kware kuprepa, sepdaro bendopmengepa, erdi sun dombankamre’ tenen, moropkepe naio!
3 Ukupmantoda, nimidi uku sekmengepa, ket welepre dinin, kumanya yaredi puprepa, aket yumada, dubendoprepa, gum kupbaramretopu, Allah kan tep, ‘Nun dabale,’ tenekenung neng yuma peda, ‘Kandi aneng tep, gum kupra deipkamruma’ tenen, moropkepe.
Sun pio mali kun kecapu talepra, mali-mali weik kunge nesala yumada, Allah damai yangopda, erdi sun tep wenepredi, gum kupra deipkamre’ tenen, moropkepe naio.
4 Dinino, Allahdi, “Ange kunkamrume, angeda pio men kunkamrume,” pepra deiamseu upu, moupra talepmengedi, ‘Dumsisipu kunge nesalada, kange deipkameng’ tenen, moropkepe naio.
Tonda, sun teleppu kunge nesala kange deipmengedi, Allah er damaida, kange deipra pingpina kunkameng’ tenen, moropkepe naio!
‘Teka sun anengda, kange deipmengedi, teleppu kunkameng’ tenen, moropkepe.
5 Sun Israel yala nesala yumada, Allah tep, “Kanda pio telep kurume,” pepra, mut deiki di er sipu eremkamrume.
Ada, im neitamai di, dua deiki bukra embaramre ngebo, nun nai bo Allah tep, kange lon mut peprumudi, er sipu eremkamrume!
Nun nai bo Allah, er pe sida, Yahweh kurure. Atep, Allah Yahweh er damai yamum dingeda, kange deiprappu kunkamrume.
6 Sun nin yapu cap, sun nai yapu cap yuma konum deami nyapu, alyan nyapu yuma tep nengeda, Allahdi, ‘Anyapuda, ne nyapu sisa utopu kununge. Neda sun nai bo kunune,’ tenerure. Tonda, sun solu nerapu tep, Allahdi, ‘Sun tep pio melipra kalengkamne,’ tenerure.
Allahda, er Pio Telep Lengnaipu, im deiki tupa akurure.
7 Sun pe yuk kungedi, ikin kange dounung nesalada, Allah erdi, anesala dopra, yuk nesala sun nyapsilip neitamaipu deiprepa, aneng cap kikiman pio akunkamenge.
Tonda, sun wenemna ati pumbon tupa kunge nesala tep, Allahdi aneng tep bicau tenepredi, aneng loptapra dubarepa, sun anengdi er amnyo tarapu domyangedi, kange deipra mut penunge.
Dinino, Allah tep, ‘Nun songe,’ tenengedi, erdi perur upu pio men gekenge nesalada, Allahdi anesala sun wenemna tep, pio ikin dopra sun deiki derirure. Ukupmantoda, me pio gumai, keteng bupu pio weik kure mutu neitamaipu kunkamenge.
8 Uo, nun nai bo Allah, kandi nun Israel nesala tep, ‘Ne mawa neng kunkameng’ tenen, weiamsemum nesalada, ‘Anesala melimkamne’ tenen, pio katuai mutu neitamai dubenamsemum taruda, kandi menmena mepra embaramumpa, nunda, kan amnyo tarapu domyakaramepu.
9 Kanda amutu neitamai embaramu taruda, tuai mutu yuma long-long peramupa, im neitamai di, ila mo ton cemamu.
Ukupka deiyoda ake. Ada, ila puto weik Allah, Sinai mutu deiki yana, mambul upu peiamsemum Allah kuruma cadi, kandi katuai mutu neitamai yanamum taruda, mutu yuma longnapu kupu.
Teka, ada Israel yala nesala yuma tep, melipra kalengserum Allah, kandi katuai mutu yanmumpa, mutu yuma longamu.
10 Ataru neitamaida, me putaramseupa, kan puto deiki di kareamsemumpa, mo weik cemamu.
Ukupra meliamsemuma deiki di, kan talesememdi, pio tep dopropkamserum nesalada, puto bounpu kuramepu dinin, kandi kange di telep kupra deiamsemume.
11 Tonda, ukupmantoda, kandi peirum domba bisamda, nun Israel yala nesalada, telep kweipsemumpa, amutu neitamaida, ‘Nun pio kunkamep mutuda aca’ tenen, konum epra talepmepu.
Angepu gum dinin, tonda, Allah kandi akeca-keca yala-yala yuma taleruma neitamai di, nun tali kan-kan nesala kuramepupa, akeca yuma putanapu kuramseu dinin, akeca yuma weika di kareamsemume.
12 Allah Yahweh kanda, akeca-keca yuma talepra, ila puto deiyo ngebo kuruma cadi, kan dipapu, meliamsemumpa, nun pona tep neng, konum popra gawal dakmupu taru yumada, kandi aupu lap peiamumpa, nun tara nesala yuma gekerami.
Allah kandi, “Israel nesalada, sun podan neng yuma konum popra gawal dakmange,” pepmumpa, nimi weika di gekepidi, aupu dopra lap perembaramipa, nimi weik gekerami.
13 Kandi peipmumpa, nimidi gekepra lap perbarami upuda ake. “Sun gekepso! Israel nesaladi, yuk-yuk mutu talepra deiyo-deiyo kemami nengda, konum popra tapidi, gawal daki.
Sun yuk mutu jen talena nengda, konum popra gawal dakya cadi, sun amutu nengdi talerami keca dalupra dopropidi, tamupra amutu duyana karepsei pangeda, nun mutu urasin telep nerapudi, sun ati pumbonda, yuk-yuk akeca-keca yuma bokra karedanunge.
14 Tonda, Israel nengdi, yuk mutu neng porbenami taru neitamaida, sun nerapudi, sun pe mutu neitamaipu domba bisam peirami nerapu peda, nun jen nengdi tamupra duyanami bung keca ton bokra kareamipa, anerapuda sundi kunumna weik keca ton doprami.
Sun anerapu doprami keca kan-kanda, yal ma urasin utopu kupra, patung petupra deiami keca dinin, er nong deikida, kunumna weik keca er si perak ton palepra deiaminge ton doprami.
Ayal ma urasin utopu keca, patung ketkeiami ngeda, er pol deikida, kunumna weik keca, er sida emas dopra, ama pol deiki palepra deipi. Aemasda pio telep, dirin weik kwamunge palepra deipipa, pio telep kupu.
15 Allahda, akeca-keca yuma talepra, deiki tara erepra, Ila Puto Weik Deiyo Ngebodi, sun yuk-yuk mutu talepra kurami nimi deiyo neng tep popropupa, sunda bura saka, dana-dana tara yuma sepdara bendopi.
Ukupmanto ngeda, ila lyom mutu er si Zalmon mutu dup deiki, es me er sida salju, sakredi, tuai yuma singidongoramretopu, sun yuk-yuk mutu jen talen neng yumada, sepdara bendopi taruda, ange utopu kupi.
16 Ila lyom mutu er sida, Basan mutu, amutu neitamaida, ila lyom mutu dup pio telep, weik mutu akurure.
17 Sun ila lyom mutu dup deiki kurum nesalada, ware keca deiyo tep, Sion mutu eprumudi, ‘Uo, warya tep, Allahdi nun pe mutu men weipu do?’ teneprumudi, mali kange douprum do?
Ada, sundi, Allah er si Yahwehdi, ‘Sion mutu neitamaida, amutu konum kange deipmana cadi, neda amutu neitamai pio-pio akunkamne,’ tenepudi, konum wepka cadi, nun dabale,’ teneprum do?
18 Allahda, akeca-keca yuma talerura cadi, er ila puto pio weik kuredi, ukupmantoda, nimi porbana tep, kuda bisamdi gipra tu deiki embaramre keca, er sida kereta perangda, denge pio weik ribuan akurura cadi, nundi men nuktepe.
Akereta perang cap, Allah cap, Sinai mutu di tapra, Yerusalem mutu neitamai dinin, er pio telep lengna kunkamre ati damaida, konum yanmare. Allahda akeca-keca yuma talepra, ila puto weik kurya deiyo ngebo ^{▼▼deiyo ngebo – Ayat 18 neitamaida, Allah er si tep, Ibrani upu deiki di, ‘Adonai’ pepra seki. Aupu ‘Adonai’ penga deiyoda, ake. Ada, ‘Akeca-keca yuma taleredi, ila puto weik ngebo kurura cadi, er teneretopu kurure’ tenen, seki. Tonda, ayat 20, 21, 23 neitamai ton, asi ‘Adonai’ ton cap seki. Atep nengeda, sun kael kemna tep, aupu deiyongepu katuai di sekmepu. Indonesia Allah upu buku neitamaida, ‘Tuhan’ pepra sengnunge. Ange peda telep dinin, aupu ‘Adonai’ pepra sekipa, tek sisi deiyo akapu ngeda, sun kael kemna tep, nundi konum katuai di sekmupu.} kurure.
19 Nun nai Allah, kandi lyom mutu deiki welepmum taruda, nimidi yuk neng tomopra, ateng koupdongopi nesala weika di, kan Allahdi, anesala dopra Yerusalem mutu duyamume.
Tonda, nimidi kan tep, kange deipidi, telep karen keca weika di duyana kan gispal dona tep karepkei.
Ton nengda, men di kan Allah tep, ‘Allahda, nun songe’ tenen, kan upu yanirami neng peda, ataru di kan gispal dona tep, telep karen keca dopra karepkei.
Ukutaruda, kan Allah Yahwehdi, Yerusalem mutu neitamai kunkamrume.
20 Nun yumadi, nun nai Allah, akeca-keca yuma talepra, ila puto weik kurya deiyo ngebo kurure. Tonda, nun podana nengdi, ‘Popsenung’ tenen, Allahdi nun yuma tep, loptapra lyemdoserure. Atep nengeda, Allah Yahweh tep, “Naio kanda pio teleppu kurume,” pepra, er sipu eremkamepe.
Tonda, Allahdi atumi-atumi yuma, nun ikin kuserur keca tep, erepseredi, meliserure.
21 Nun pona tep nengdi, ‘Israel nesala popkup’ tenen, poryakasenung taru yumada, nun nai Allah Yahweh ^{▼▼Allah Yahweh – Akayat neitamaida, Ibrani upu deiki di Allah er si tep, ‘Yahweh’ pepra seiki. Tonda, ‘Adonay’ pepra seki. Aupu deiyoda ake. ‘Allah Yahweh’ penungada, ada Allah er pe si sisa tep penunge. ‘Adonay’ seki ngeda, ada ‘Kanda Allah, akeca-keca yuma talememdi, ila puto weik ngebo kurume!’ tenena tep pepi.} dipapu lyemdoserure.
Nun pona tep nengdi, tali lupra popra gawal daksetenge dinin, nun nai Allah Yahwehda, akeca-keca yuma taleredi, ila puto weik kurya deiyo ngebo kurura cadi, er dipapu lyemserepa, men denupe.
22 Atep nun kaele. Allahdi, er tep, ‘Nun songe,’ tenenge neng yumada, sun giso deiki taikra popnyopda, depmengepa, yawa popra gawal dakamre.
Teka, sun mali kun kecapu tupa talengedi, mali-mali tupa kunge neng yumada, Allahdi aneng popra gawal dakamre!
23 Uo, Allahda, akeca-keca yuma taleredi, ila puto weik kurya deiyo ngebo kurura cadi, erdi upepu. “Ne tep, ‘Nun songe,’ teneramnei neng, konum poptapsi nengda, sun nong dopra, Basan mutu di tamupra Yerusalem mutu duyankamne.
Tonda, yuk neng ton popsipa depidi, ila laut mokon pumbon neitamai konum wengami nesalada, sun nong ton dopra, Yerusalem mutu tamupra duyankamne.
24 Ukupkamna deiyoda, sun Yerusalem mutu nesalada, nedi yuk mutu nesala konum poptapsi neng, sun yapi yanipkamruma tepa.
Apoptapsi neng, sun yapi yanipmumnyopda, sundi peirum kam, sun lyemu di, aneng sun yapi ton lulangmengedi jenkamenge.
25 Uo, nun nai Allah, kan cap, kan kikiman yakanmang neng cap, damai konum yanmarumpa, dinmape.
Ada, nun nimi deiyo ngebo Allah, kandi nun yuma taleserume. Kan cap, kan melipra yakanmang neng capda, kan si eremna ati damai konum yanmarume.
26 Allah kan cap yakanmang nengda ake. Menmena mepra yanmang nengda, sun Allah upu mut pena kael neng yanmange. Sirikaida, mut pena tep, gitar utopu keca, er sida kecapi dopra, ati dam utara kecapi deiki di mut pena tep neng ton yanmange.
Aneng damai dinin, ayakanmang neng neitamaida, nerapu ton, nimi kapul men domidi, kanampu kurami nerapudi, lelim peramre keca, er sida rebana doupra, sun buru di ponmangdi yakanmange.
27 Nun Israel nesala yumada, nesala denge weik bulupra yapedi, nun nai bo Allah tep, “Kanda pio teleppu kurume,” pepra, er si erepra, gisal donkamepe.
Gispal dopedi, nun apu bo Yakubdi deipupa, dadeipdanen yakaramrum Israel nesalada, sun peda Israel yala nesala sisa kuruma cadi, sun pedi, nun nai Yahweh tep, “Kanda pio teleppu kurume,” pepra, er si eremkamrume.
28 Allah kan si eremna ati damai yakanmap nesala neitamaida, metek yala neng, sun yala sida Benyamin, ayala neng menmena mepra yakanmange.
Nun denge pio weik yakanmap nesala neitamaida, sun Yehuda ^{▼▼Yehuda – Pumun taruda, Israel yala nesalada, bokrapidi, gung butene kurami. Sun yumada kange men deipdana kurami. Ton tara nengda sun Israel tara mutu dinin, iknapi dam tara bena kurami. Ton nengda bokra dapu tara bena kurami.} yala neng ton kikiman yanmange.
Tonda, Zebulun yala neng cap, Naftali yala neng cap, sun deiyo-deiyo neng cap kikiman yanmange.
29 Uo, nun nai bo Allah, bukromemdi, kan ila puto kukerurada, yana benbenepsemempa, epkamepe.
Teka nun nai Allah, kan menop taruda, kan puto di melipra lyepropsemumtopu, kange di ton cap, ataru peda, kan ila puto deiki melipserume naio!
30 Nun nai Allah, kan si eremna atida, pio telep kurura cadi, yuk-yuk mutu nimi deiyo-deiyo nengdi, pio telep karen keca dopra yangedi, kan Allah si eremna tep ati, Yerusalem mutu neitamaipu kareryakankamkenge.
31 Allah kandi, sun pio yu weik neng tep, wenepra popkamrume. Ukupmantoda, sunda bura tara kuramre gam kecada, ila putonge, lyom manmaneng neitamai di inimamrenge utopu kununge.
Kan Allah tep, ‘Nun song’ tenenge nengda, ila yu weik kununge. Ukupmantoda, ila jem sapi ^{▼▼jem sapi bisam – Aupuda, domon upu utopunge di seku. Aupu nong neitamai ngeda, ake. Ada, ila puto jem sapi bisam pepra seku ngeda, ada Mesir mutu nesala tenena tep seku. Tonda, sapi nyapu seku ngeda, ada Israel yala nesala tep seku. Mesir mutu nengda, Israel yala neng, sun pona tep neng kurami. Tonda, ayat 32 dirume.} bisamdi, sapi bisam nyapu kankan neitamai yangepa, metek sapi bisam kware weik kuramengtopu, ayu nengda puto weik kununga cadi, nun damai yangopda, nun Israel yala neng kware weik kuserure.
Atep, nun nai Allah, kandi ayu neng wenepmemdi, pio amutarapu deipmemnyopda, sundi ali dakmengedi, kan gispal dona tep, kunumna weik telep karen keca, er sida perak dopra, kan tep kareryakankamkenge.
Teka, nun nai bo Allahdi, nimi podana tep, kange deipra ila di kael kemne nesalada, kandi wenepmemdi, enepra dokotepmempa, sun pe mutu sisa tapra, yuk-yuk mutupu bendopkamenge.
32 Nun putapser ngeda, ake. Ada, kan Allahdi, Mesir mutu puto weik neng tep, wenepra popmemdi, amutara keipmemnyopda, sundi kan gispal dona tep, kunumna weik gat keca, er sida tembaga dopra, kan damai kareryakankamkenge.
Tonda, Etiopia ^{▼▼Etiopia – Amutuda, Mesir mutu damai kwamu. Ukutaruda, amutu si tep, Sudan mutu penupe. Menop taruda, sun cap, Mesir mutu neng cap, Israel yala nesala yuma tep, ‘Popra gawal dakamep’ tenen, poryakarami.} mutu kunge nengda, sun ton Allah kan damai yangedi, ‘Allahdi kaukepsetudi, men wenepra popkamser’ tenen, sun buri erepmengedi, kan Allah tep moropkamkenge. Nundi ‘Ukupkameng’ tenen, moropkepe naio!
33 Sun yuk-yuk mutu ban-ban yuma talepra kurami ila nimi deiyo neng yumada, buluprumudi, Allah tep, “Kanda pio teleppu kurume!” pepra, er si eremkamrume.
Teka, akeca-keca yuma talepra, ila puto weik kurya deiyo ^{▼▼puto weik ngebo – Ayat 33 neitamaida, Allah tep, Ibrani upu deiki di, ‘Adonai’ pepra seki. Atep nengeda, sun kael kemna tep, aupu deiyo neitamai ngeda, nundi katuai sekeipmupu.} ngebo kurura cadi, nun yumadi Allah tep, “Kanda pio teleppu kurume!” pepra, er si eremkamepe.
34 Allahdi pumun taru, im neitamai kuramre keca yuma ketekepra deiamupa, tupa akurure. Erdi ketekeiamu kecada, im neitamai dapu embarure.
Tonda, Allah Yahweh er ila upu di peprepa, im neitamai kure keca kulman ila di lelim peramretopu perure.
35 Nun yumadi, ‘Yuk nesala gekenkameng’ tenen, “Allahda ila puto weik ngebo kurure,” pepra, lap perembankamepe.
Tonda, ‘Allahda er pio telep kururnge cap, er puto kururnge cap, kurura deiki di, nun Israel yala nesala yuma taleserure.
Tuai di dipra, im neitamai pio deiki tara kurepa, men nukmanto kuramretopu, tonda, Allah er ila putoda, pio men nukmanto kurure.
36 Allah kan pio telep si eremna ati kurumai di yamempa epkepyopda, ‘Uo, nun nai Allahda, pio puto weik, ila mambul ngebo kurure,’ tenepmepedi kan tep nunda, kwar pio weik kuserepa, ‘Uo’ tenenupe.
Tonda, Allah kandi, nun Israel yala nesala tep, ‘Sunda ne mawa neng kunkameng’ tenen, konum weiamsemuma cadi, kandi puto karesememnya deiki di, teleppu kunupe.
Atep nengeda, nun Israel yala nesala yumadi, Allah tep, “Kanda pio teleppu kurume,” pepra, er sipu eremkamepe.