Psa 69 | XteSC | STEP | Mut pena deiyo ngebo Dauddi, kait telep kupra popredi, laramre bunga er si bakung, amut peraminge deiki di, Kor tep pepu.

Psalms 69

‘Ikin keca dopropmepe taru Allahdi lyepropkamser’ tenen, Allah moropu upu

1 Mut pena deiyo ngebo Dauddi, kait telep kupra popredi, laramre bunga er si bakung, amut peraminge deiki di, Kor tep pepu.
2 Ne nai Allah nedi kan tep moropkene. Ada, ne pio ikin weik kunerure. Ukupmantoda, ila mokon neitamai weksipa, ne kum damai welepra deipudi jepmanto kupnere. Atep, ne nai Allah, ‘Kandi lyepropneo’ tenen, moropkene. 3 Tonda, ne ila bental mutu neitamai dongorbenera tep, ne yanipra tekmantoai ton, pio men kapnere. Tonda, ila karu mokon deiamre mutu neitamai wekne taruda, me kaitda puto di welepra, mokon numnuma neitamai doupra dongombanerure.
4 Ukunere taruda, nedi, “Ne nai Allah kandi ne yana melipneo,” pepra moronmanepa, ne koukna pio sekra boun kunerure. Tonda, ‘Ne nai Allah dan taru di, ne yana melipkamaner do?’ tenen, ataruda dinapu kunmanepa, ne asuru pio pu weik jenerure.
5 Ne deiyo gum dipapu, ne tep, ‘Poptepe’ tenen, yu tenenenung nengda, dengeda pio weik kununge. Ukupmantoda, ne giso deiki potong papneu ngeda, utopu kununge. ‘Deiyoda ake,’ tenena gum dipapu, sunda ila puto neng kununga cadi, ne tep, ‘Angebo popra gum kweiptepe,’ tenenenung nesala yuma, pio men nukmanto kununge.
Tonda, sun keca ton nedi upula dorona gum dinin, “Tamupra karepseo,” penenunge. Upepnengepa, ne kecapu tali dopra, sun aneng tep tali karenune.
6 Angeda ne nai Allah kan kaele. Ne mali kunun keca yumada, kan damai ton pio men inimtamnune. Tonda, ne mali kunun keca yumada, ne nai Allah kandi dinapu kunerume. Atep men inipra kuptene.
7 Ne nai Allah Yahweh, ^{▼▼Yahweh – Allah er pe si, tek sisi ngeda, ‘Yahweh’ kurure (Keluaran 3:14).} yuk nesala kan tep teka tenenung neng, ‘Ne mali kupsinge epmengedi, ange tep, sun ali daknung’ tenen, moropkene. Ada, sundi Allah kan tepapu, ‘Melimkamser ja,’ tenepra kunung nesala yumada, ne mali kunun keca tep, ‘Ali daknung’ tenen, moropkene.
Tonda, kanda ne nai Allah ^{▼▼Allah – Akayat neitamaida, Allah er si tep, Ibrani upu deiki di ‘Adonay’ pepra seki. Sun kael kemna tep, aupu deiyoda, jenek kupra sekmepu.} kurume. Kanda, akeca-keca yuma deiki tara talepra kumemdi, ila puto eremna ngebo kurume. Tonda, im deiki jen talen malaikat ^{▼▼malaikat – Ibrani upu deiki di, Allah er si tep, ‘Yahweh Sebaot’ pepra seki. Aupu ‘Sebaot’ deiyoda, ‘Im deiki jen talena malaikat yuma taleredi, sun deiyo ngebo kurure’ tenena tep, seki. Atep nengeda, sun kael kemna tep, aupu deiyongepu katuai di sekmepu.} yuma, sun ila deiyo ngebo kurume. Allah kanda, nun Israel nesala tep, pio kalekra melimamsemum ngebo tep morokenune.
8 Ne nai Allah, kan si eremnenge tep, sun mali nengdi ne tep, yap-yap pepra, mali penenunge. Tonda, kan tepapu tenepra kunepane, mali nengdi ne tep, nalemnengepa, ali pio weik dangnune.
9 Neda ikin weik kunerepa, ne urasinda tamupneua cadi, ne du yapu cap, ne weit yapu cap yuma, akunung dinin, ‘Nun kabo Daud akunmare,’ men tenenenunge. Adeiki yuk mutu di tengyakan neng utopu kupra kunune. Tonda, sundi ne tep, ‘Bura tara ngebo kurur do?’ tenenenunge.
10 Utenenenung dinino, nedi Allah kan si eremna ati tep, ‘Ila mambule,’ tenenuna cadi, pio mambul kange doupra kunune. Yuk nengdi, Allah kan tep, mali pepra nalemkenunge. Ukupra, ne nai bo Allah, kan tep nalemkenunga utopu, sun anesala yumadi, ne peda nalepra yap-yap penenunge.
11 Neda, Allah kan tepapu jen jena gum deiki di, engenapu kunedi kan si eremnapu kunune. Dinino, ukune taruda, sun mali kunge nesala yumadi, “Angeboda war keca tep kurur do?” pepra, tarudonenunge.
12 Tonda, ange utopu, mali kun keca yuma tep, nedi mali kange doupnedi, kan morona tep, mali opkal di, nong kepdongopra, kan si eremanepa, sun amali kun keca tepapu talepra kunge nengdi, “Ware keca tep kunmar do?” pepra tarudonenunge.
13 Sun ila kota kepra ati arum domidi, buplan wengbana tep, potokeiami bisi buplan damai bungmenge nengdi, ne tep yap-yap pepra nalemnenunge.
Tonda, sun nimi kange yawaramne me jen neng yumadi, sun mut pena deiki di, ne tep mali pepra nalemnenunge.
14 Dinino, ne nai Allah Yahweh kan tep moropkene. Ada, Allah kandi tenepra, ‘Atumida melipkune,’ tenepmemnyopda, ‘Melipra lyepropkamnerem,’ tenena tep, ne nai bo kan tep moropkene.
Tonda, ne nai Allah, kandi ila di bicau tenepnememdi, melimkamnereme. Ada kandi, ‘Ataru melipkune,’ tenepnemem taruda, pio men tamkamnereme. Tek sisi tumi-tumi yuma lyemdonkamnerume.
15 Atep nengeda, ne ila bental mokon neitamai dongorbenkamner taruda, ne yanipra tekmantoai ton, men kupkamnera tep, kandi lyepropkamnerume.
Tonda, ila karu mokon deiamya neitamai wekne taruda, ‘Me kait puto di welepredi, ne doupra ila mokon deipka numnuma neitamai dongorbenerur’ tenen, “Lyepropnerume,” pepra moropkene.
Ne tep yu kuprepa, mar penenung nengdi, ‘Popkupe,’ tenepnenge taruda, Allah kandi ne men tamkamnerume. ‘Adipapu lyemdonkamnerume’ tenen, ne nai bo Allah tep moropkene.
16 Ukupmantoda, ‘Mo cepredi me deipra opbaredi, singipdongopra, doua baramretopu, ne peda utopu kupra popnerur’ tenen, moropkene. Ne tapnemempa, ila me kait puto welepredi, ne doupra, ila laut mokon deipka numnuma neitamai dongopnerepa, ‘Amokon amu dadepnun’ tenen, moropkene.
Tonda, ‘Nimi yuk nengdi, ila karu tu pumbon palipra ne dokotepnengedi, deiki tu di singipdongopnenung’ tenen, ne nai bo Allah, kan tep moropkene.
17 Ne nai Allah Yahweh, kandi ila bicau tenenememnya deiki di, amoropnenge yuma gekepra melipneo. Kanda pio teleppu kumemdi, nimi tep ila di dipru karekerepa, bicau tenepra melimrum ngebo kuruma tep, ‘Ne ton lyepkamnerum’ tenen, moropkene.
18 Ange tep nengeda, kange mun keca ne damai konum yanmanera tep, Allah kandi epra men kaukepkunerume. Ataru dipapu epra, ne damai yamemdi epra lyepropkunerume. Ada, Allah kan dipapu nimi tep nengeda, dipru karekerepa, ila bicau kukerur ngebo tep moropkene.
19 Mali kun kecapu talepra kunung neng, ne podan nengdi popnenung cadi, kan adipapu yamemdi, ne yana lyepropnerume.
20 Allah kandi ne tep kael kemnerume. Ada ne podan neng yumadi ne tep, ‘Angebo popra gum kupra deipkamepe,’ tenenengedi ne tep yap-yap pepra, tarudonenung nesala yumada, kandi konum kael kemrume.
21 “Erda mali kurur ngebo,” penenga deiki di neda, ‘Ware keca ton kupsipa penenung do?’ tenen, tenimtonedi, ne dipru neitamaida pu pio weik jenerure. Ukupnerepa, ‘Ne tep bicau tenen, ne dipru kwa dimna nengdi melipnetenge,’ tenen, enun dinino, pio men ton epsi. Atep, ne dipru kwa dimna neng ton men kungedi, “Ne cap kikiman kupra men melimnenunga tepa,” pepra moropu.
22 Tonda, ne jen keca putapnerepa, jen keca cap, me cap karenenge yumada, ne dena tep, yu keca wipra karenenunge. Ange utopu, jen me putanerepa, ‘Me jeptene,’ tenepne taruda, yuk nengdi buya me gwepra karenenunge.
23 Ne tep, ‘Angebo nun songe,’ tenenenung neng, sun jen keca derinung ngeda, pio telep-telep ngepu ketenepra derinunge. Ukunung dinino, nedi Allah tep moropne pangeda, sun atelep jena ketenem dinung ngeda, sun pe atenenenga deiki di, kange mun kun keca sun damai yakarure.
Anengda, ‘Nun konum teleppu kunupe’ tenen, pio kange deridanung dinin, sun ajen keca ketenem dinunga deiki di, sun pe nongpu, pena pepmangai kapang mangkau kange doupra, barepa youramretopu, mali kudidanunge.
24 Ne nai Allah, kan tep moropken ngeda, sun mali kunung nengda, ‘Sun asuru pun keca karepmempa, telep kupra men dinkameng’ tenen, moropkene.
Tonda sun amali kunung nengda, Allah kandi ikin keca sun nong deiki deipmempa, ikine di men embenmanto kupmengedi, ‘Amnyo ku geipdongopra embankamenge’ tenen, moropkene.
25 Ne nai Allah, kan yu tenemem ngeda, anesala sun nong deiki deipmempa, weika di ila uku jeramretopu kunkamre.
26 Ukupmempa, anesala sun ati dopra kunge mutu yumada, walangpu kupredi, dimbulung pepkamre. Amutu neitamaida, ati cap, nimi cap ton, pio men kunkamenge.
27 Ne nai Allah, angeda tali tep men pepkene. Deiyoda, kan nyapu teka tenepmenge neng tep, “Mali kupmare,” pepra, nun nong deiki ikin keca depsengedi, nalepra autusenung nengda, sun wenemna tep, ikin keca derirume.
Tonda, kan nyapu wenepmempa, sun nong deiki ikin keca kurenge tep, amali kunge nengdi autupra mali pesenunga tep, ‘Anesalada, ila di wenepkamrem’ tenen, moropkene.
28 Sun mali kunung keca yumada, kaukepra tapmempa, sunda pio tep mali-malipu kupbangepa, weik kupbana telepe. ‘Sun amali kunge nengda, mali kun kecapu, ton cap tapakmempa, pio tep mali kupbanapu kunkamenge’ tenen, moropkene.
Sun anesala tep, ka di tamupra lyepropmemdi, telep kupra men derinkamrume. Yuk nengda lyepropkamrum dinin, sun anengpuda men lyepropkamrume. Atep, nedi ne nai Allah kan tep moropkene.
29 Allah kandi, anesala sun si ton Gam Buku deiki men sengdinkamrume. ‘Amali nesala sun sida kiliptapkamrume’ tenen, moropkene. Allah kan tep teka tenepra dumsisipu kunge nesala, sun si sengdirum buku neitamaida, amali kunge nesala, sun si ton men sengdinkamrume.
30 Sun amali kunge nengdi, ne nong deiki, ila ikin derinenga deiki di, pu jenerepa kange mun kunerure. Atep nengeda, ‘Ne nai Allah kandi lyepropnememdi, erepra deipkamnerume’ tenen, moropkene.
31 Ukupra ereipnemempa, ne mut pena deiki di, kan sipu eremkamkene. Tonda, ne mut penkamna deiki di, kan tep, ‘Erda pio ila ngebo kurure,’ tenepra, kan sipu erepra, ila di telepe penkamkene.
32 Ange ukupra kukene pangeda, Allah kandi, ‘Angeda pio tek sisi telep keca karepmanere,’ tenenkamnereme. Dinino, ila jem sapi bisam popmengedi, kan karena tep duyaketenya peda, ‘Angeda, yambul telepe pua,’ tenepnetume.
Tonda, ila jem sapi, er yan gala siriknge cap, er giso deiki takke beleramrenge cap, akepman yana karepketenya peda, ‘Angeda, yambul mambul pua,’ tenepnetume. Dinino, ne kange dipru yuma di, kan tepapu moupra tenekenedi, mut pena deiki kan si eremkenyopda, ‘Ada pio telepe kunmare,’ tenepnetume.
33 Ange utopu, nedi kan si eremkamkena deiki di, sun tali kankan dakunge nesala, ange epmenge dingeda, kange deipra pingpinga di kunkamenge. Utopu, ware nesala do yuma, Allah kan si eremengedi, ‘Er dipapu lyemdonkamsere’ tenen, teka tenepra kunge nesala yumada, pio gampu kunkamenge.
34 Atep nengeda, ne nai Allah, kanda sun kankan kunge neng, bouna di dipru dakra amutara kunge neng, morokengedi pekenung upu yumada, men tamrume. Adipapu gekepra melimserume.
Tonda, kan nyapu sisa, wenemna ati pumbon kuramenge nengdi morokenge pangeda, kandi gekepra men tamrume. Anesaladi morokengetopu, gekepra lyemdorume.
35 Ne nai Allah kan tepapu, im deiki kapu keca cap, tuai mutu kapu keca yuma cap, tonda ila laut mokon amutara kure keca cap, tu neitamai kure keca cap yumadi, ‘Kan tepapu si erepra gispal donkamkeng’ tenen, putanerure.
36 Angeda tali tep men pepne. Nun nai bo Allah kandi, Yerusalem mutu yumada, lyepra telep kupra deipkamsereme. Tonda, Yehuda yala neng, sun kunkameng mutu peda, dumsisikra teleppu kweipkamreme.
Ukupmempa, kan nyapu ange epmengedi, sun amutu yangedi, sun pe mutu sisa kepra, yana talepra kunkamenge.
37 Kan tep teka tenepra, kan amutara kunge nesala, sundi deipmengepa, dadeipdanen benkameng nesala yuma peda, amutupu talepra kunkamenge.
Tonda, Allah kan tep teka tenenge nesala yumadi, ‘Allah er sida ila mambule’ tenen, kange deipra kan sipu eremenge nesala yumada, amutupu talepra kunkamenge. Dauddi pepu.