Psa 7 | XteSC | STEP | Dauddi gitar bung-bung pena utopu keca, er sida kecapi dopra, Allah Yahweh tep, amut pepra engepudi, er podan ngeboda Benyamin yala ngebo er sida Kush tep pepu.

Psalms 7

“Allah, ne kuramsitopu upu dumsisi kupra, bokeipmemdi, ‘Ne podan neng tep wenepkamrum’ tenen, moropkene,” pepu upu

1 Dauddi gitar bung-bung pena utopu keca, er sida kecapi dopra, Allah Yahweh tep, amut pepra engepudi, er podan ngeboda Benyamin yala ngebo er sida Kush tep pepu.
2 “Uo ne nai bo Allah Yahweh, ikin kunere taruda, kan damaipu yana inipra kunune. Atep, yu nengdi, ‘Angebo popkup’ tenen, ne tep domyakanenung neng tep nengeda, kandi kalekra talenememdi, lyepropkamnerume naio.
3 Gum dingeda, ne podan nengdi, ne popra sikke buluktapkamnenge. Ukupmanto ngeda, ila yu pus, er si singa pus, erdi yuk gam kun keca tep si topra popredi, sun nong yuma sek-sek bukredi jeramretopu, ne podan nengdi, ne tep ukupkamnenge. Yuk nengdi, ne tep, men lyepnetenga cadi, ne podan nengdi, ne nong dopra, puto di gipra dubenkamnenge.
4 Uo, ne nai Allah Yahweh, nedi mali konum kupnyopda, kandi ila ikin keca ne nong deiki deipnetumdi, wenepkamnerume. Ne men kupsi dinin, ne pe buru di, pio mali kun keca, tek sisi konum kwamtene teptoda, ne tep kandi wenepkamnetume.
5 Ange utonun, ne nai Allah, kan menmena tekra ketenepmemdi, ne tep melipra kalengkamnerume. Kandi, ‘Angeda ukupkamrume, angeda pio men kupkamrume,’ pepra, deipsemum upu deiki di, ne ikin kunerenge tep, upu bokeipkamnerume.
Ange utopu, ne kabo sisadi, telep kweipneu dinin, nedi tamupra er tep mali kwamtene teptoda, ne tep wenepkamnerume.
Tonda, deiyo men kwapu dipapu, ne podan neng, sun talerami keca, nedi konum dalupra dopramtene teptoda, ne tep wenepkamnerume.
6 Ada, nedi yuk neng tep, tek sisi mali-mali keca konum kweiamtene teptoda, Allah kandi go kareptumpa, ne pona tep yu nengdi, domyanetengedi, ne yana tomopnetenge. Yu nengdi tomopnengedi, lukra poptapnengopda, ne gemnada, tu deiki deipra yanipnetenge.
Teka, ne mali kwamtene teptoda, yu nengdi, poptapnengedi, ne gemnada tu deikipu buta neitamai katawaipu deiptapnetenge. Dinino, nedi yuk neng tep mali men kupsi.
7 Atep nengeda, uo ne nai Allah Yahweh, kan yu kupkerepa, tekmemdi keteneipkurume!
Ne podan nengda, ila yu kupupa, ne tep, ‘Angeboda nun pio songe,’ tenenengedi, poryankamnenge.
Atep ne nai Allah, kanda menmena tekra ketenepmemdi, ne tep melipra kalengkamnerume. Kandi, ‘Angeda ukupkamrume, angeda pio men kupkamrume,’ pepra, deipsemum upu deiki di, ne ikin kunerenge tep, upu bokeipkamnerume.
8 Allah kandi upu bokeipkamneruma tep, yuk-yuk mutu nengdi, aca yana bulupmengedi, kan damai dana-dana tara bukra ongopdongopmengedi, dinkamenge. Atep, kanda ila nimi deiyo ngebo kumemdi, nimi upu bongdina tep, deiki tara erepra bungrumai, er si tahkta deiki bukmemdi, ‘Nimi yuma tep, upu bokeipkamserum’ tenen, moropkene naio.
9 Allah Yahweh, er dipapu, nun tuai kunup nesala yala-yala yuma cap, mutu-mutu neitamai kunge nesala yuma cap tep, upu bongdina deiyo ngebo kurure.
Atep, ne nai Allah Yahweh, kan dipapu ketenepmemdi, ne dumsisipu kuramsi keca yuma tep, beta tenipetepmemdi, kandi ne tep, upu bokeipkamnerume.
Tonda, ne kange dipru neitamai tenena deiki di, mok upu tenpunge peda men peramsi. Ne kange dipruda, dumsisipu kunerura deiki di, ange dipetepmemdi, ne kuramsitopu kupra, upu bokeipkamnerume.
10 Dinino, sun dipru pio mali kunge nengdi, mali kunge keca yala-yala yuma tep nengeda, naio, ‘Kan dipapu akeca yuma gum kupra deipsetum’ tenen, moropkene naio.
Mali kunge neng tep, wenepra gum kupra deipkamrum dinin, kandi, ‘Ukupkamrume,’ peipsemumtopu, dumsisipu kunge nesalada, puto kweipsemempa, pio tep akunkamepe.
Ada, kanda nimi tuai nesala yuma tep, sun kange tenenange cap, sun dipru neitamai kure keca yuma cap, moupra dipetepmemdi, ‘Telep kunung do, gum do?’ tenen, piripeteserum ngeboda, kan Allah pua.
Ne nai Allah, kandi peipsemum upu peseretopu, kandi pio dumsisipu kurume. Mali kun kecada, tenpunge peda, pio men kukerure.
11 Ne nai Allah, kan dipapu ne tep, melipra kalengnerume. Ukupmantoda, jen nengdi, ‘Nun pona tep nengdi mar pepmengepa popsenung’ tenen, sun nong lelimna keca, er si perisai dopra embaramengtopu, kandi ne tep pio kalengnerume.
Allah kandi, ware mutu kunge nesala do yuma, sun dipru neitamai, pio dumsisipu kunge nesala tep nengeda, kan dipapu lyemdoserume.
12 Allahda, erdi, ‘Angeda kunkamrume, angeda pio men kunkamrume,’ pepra deipseutopu, ‘Anengda telep kunung do, mali do?’ tenen, pio dumsisi kupra, upu bongdina deiyo ngebo kurure.
Allah kanda tumi-tumi yuma neitamaida, mali kunge nesala epmemdi, tali kaukemna gum di, aneng tep kandi yu kukerepa, ‘Ne dabale,’ tenerume.
13 Atep, ware nesala do yuma, sun mali kunge keca yumada, men tapmengedi, Allah er damai tamupra, ton men yangopda, Allahdi anesala tep upu bokeipredi, wenepra poptapkamre.
Ukupmantoda, jen nengdi yuk neng pona tep, sun nimi pon parang ya, si ketenepmengedi, porbaramengtopu, Allahdi sun mali kunge nesala tep, yu kuprepa, adipapu aneng tep popra gawal dakamre.
Allahdi nimi tuai nesala yuma tep, wenepkamra cadi, ukupmanto ngeda, er nimi pona tep marda, jen tapu deiki konum ketenepmare.
14 Erdi, er nimi pon keca yala-yala yuma konum ketenepmare. Tonda, er mar urupaida, uku bu sekmengepa jeramretopu kunmardi, konum uku sekra ketenepmare.
15 Dinino, tek sisi sun dipru neitamai di, pio malipu kunge nesalada, ange tenena gum dipapu, sun kange dipru neitamaida, pio mali kuna deiyo keca konum wekra dekpepupa, malipu kununge.
Ukupmantoda, nerapudi, mundu douamenganen, ‘Mi deipkun’ tenen, mi deiyo weika di pu jeramretopu, amali kun nengda, ‘Mali-malipu kupkupe,’ tenen, konum ketenepra kununge.
Ukupmantoda, nerapu mundu doramengtopu, amali kun nesalada, mali kuna deiyo keca, sun kange dipru neitamai wekredi dekperure. Ukupmanto ton, nerapudi, mundu doamenganen, amenda taru nyapu deriramengtopu, amali kunge nesaladi, mok upupu pepra kununge.
16 Sun mali kunge nesaladi, ‘Yuk neng tomopmepedi, poptapkamep’ tenen, nimi embarameng bisi neitamai di, tu palipmanga pumbon singidongonunge. Dinino, amenda taruda, sun pedipapu tu paliamenga pumbon sakamenge.
17 Atep, sun anesalada, ‘Ukupmepya deiki di, yuk neng ton poptepe,’ tenenge kecada, sun nong deikipu tamupra yaredi, sun pe deikipu kupkamre.
Ange utopu, sundi yuk neng tep, ‘Anengda, adipapu poptapmepedi, gawal dakamepe,’ tenepmengedi, ketenepmenge kecada, amenda taruda akecapu, kange di tamupra, sun pe nong deiki kupkamre. Adeiki di depkamenge.
18 Dinino, ne nai bo Allah Yahwehda, pio dumsisipu kuredi, pio teleppu kurura cadi, ne dingeda, ne nai Allah tep, “Naio, kanda pio teleppu kuruma cadi, telepe pepkene,” pepra, er tep pio gispal donapu kunkamne.
Allah ^{▼▼Allah – Acada, Ibrani upu deiki di, Allah er si tep, ‘Yahweh’ cap, tonda, ‘Allah Elyon’ cap, pepra seki. Aupu ‘Elyon’ deiyoda, ‘Akeca-keca yuma talepra, pio deiki tara kuredi, Ila Puto Eremna Ngebo, nun nai Allah,’ tenena tep, ‘Elyon’ seki. Sun kael kemna tep, angeda konum jenek kupra sekmepu.} Yahwehda, akeca-keca yuma talepra, pio deiki tara kuredi, Ila Eremna Ngeboda, ila puto weik kurure. Atep, nedi kange lon mut pepnedi, er si atep, pio eremkamne ja!