Psa 70 | XteSC | STEP | Raja Dauddi aMazmur upu mut sekudi, Allah upu mut pena deiyo ngebo tep karepu. Ada, ‘Allah gispal dona tep, gam keca popra er tep karepsinge, tupa tenenkamne’ tenena tep, amut seku. Dauddi pepra seku upuda ake.

Psalms 70

‘Ne podan nengdi popnenunga tep, Allahdi lyepnetue’ tenen, moropne pepu upu

1 Raja Dauddi aMazmur upu mut sekudi, Allah upu mut pena deiyo ngebo tep karepu.
Ada, ‘Allah gispal dona tep, gam keca popra er tep karepsinge, tupa tenenkamne’ tenena tep, amut seku. Dauddi pepra seku upuda ake.
2 Uo, ne nai Allah, ‘Kandi lyepnetum’ tenen, moropkene naio.
Ne nai Allah Yahweh, sika di guma dinin, menmena di yana melipneo!
3 Ne pona tep nengdi, ‘Angebo popkupe,’ tenenenung nengda, ‘Kan Allahdi sun tep, kange tenimtona deiyonge cap, ali dangna deiyonge cap, kareptumpa, ikin kunkameng’ tenen, moropkene.
Teka, ‘Angebo poptepepa, ikin weik kuptue,’ tenen, erterenenung nengda, tamupra bengedi, ali weik dangkameng’ tenen, kan Allah tep moropkene.
4 Tonda, anengdi ne tep, ‘Walito ikin kupmare,’ pepra, nyek-nyek penenung nengda, ‘Angebo popkupe’ tenen, warengnenung dinin, kandi sun tenenge keca dopra, tamupra sun deiki deipmempa, ali weik kunkamre’ tenen, moropkene naio.
5 Dinino, ware nesala do yuma, sundi, ‘Uo, Allah damai kuptepe,’ tenen, ila di putaprepa, kan tep teka tenenung nesalada, kan Allah tep, kange deiptengedi, kan damai kutengedi, pingpinga di kunkameng’ tenen, moropkene naie.
Angetopu, ware neng do yuma, ‘Allah er dipapu nun tep bicau tenepra lyemserure,’ tenen, kan tep kange derinung nesala yumadi, ‘Nun nai Allahda, pio puto weik cap, telep cap, kurure,’ pepra, ‘Pio atep aupu penkameng’ tenen, moropkene.
6 Dinino, ne nai Allah, neda pio amutara ngebo kununa cadi, akeca-keca yuma men talepra kunune. Neda tali kankan ngebopu kunune.
Atep, ne nai Allah! ‘Ne damai menmena yamemdi, melipkamnerem’ tenen, moropkene.
Yuk ngebodi gum dinin, kan dipapu ne melimna cap, ne lyemna cap tep deiyo ngeboda, kan tenpupu kunerume.
Atep nengeda, ne nai Allah Yahweh, ‘Angebo melimna tep, sika di yankaman’ tenena gume. Menmena di yana melipra lyepnetume naio.