Psa 71 | XteSC | STEP | Uo, ne nai bo Allah Yahweh, kan tepapu teka tenekenuna cadi, ‘Ne ikin kupnerur’ tenen, kan damaipu yana kunune. Atep, kandi melipra kaleknemempa, ‘Ne pona tep nengdi yana, sundi ne men popnetengepa, ne ali men dangkamne’ tenen, moropkene naio.

Psalms 71

Wisi konum deiamu ngebodi, ‘Allah kandi tupa melipneo!’ pepra, moropu upu

1 Uo, ne nai bo Allah Yahweh, kan tepapu teka tenekenuna cadi, ‘Ne ikin kupnerur’ tenen, kan damaipu yana kunune. Atep, kandi melipra kaleknemempa, ‘Ne pona tep nengdi yana, sundi ne men popnetengepa, ne ali men dangkamne’ tenen, moropkene naio.
2 Allah kanda pio dumsisipu kuruma deiki di, ‘Ne tep melipra lyepnememdi, telep kweipkamnerem’ tenen, moropkene naio. Tonda, nedi kan tep moropkene taru yumada, ‘Moupra gekepnememdi, yana melipkamnerum’ tenen, moropkene.
3 Ukupmanto ngeda, ‘Ne pona tep nengdi yana popnenung’ tenen, ila mutu deiki bungne gel damai bena inipnepa, lelipneredi telep kuramnetopu, ‘Kan dipapu, ne tep melipra kalengkamnerem’ tenen, moropkene.
Ada, ‘Ne ikin kunerur taru yumada, kan damaipu sepra yanedi kunepa, teleppu kunkamtene’ tenen, moropkene. Allah kandi ne tep, “Angebo tupa-tupa melipra lyepropkamne,” pepra, konum tenepnemumdi, kalengnerume.
Deiyoda ake. Ukupmantoda, ‘Ikin keca ne damai yanerur’ tenen, ila mutu bungne gel do, nimidi domenge gel ati do, ange damaipu bena inipnepa, teleppu kunkamne. Ange utopu, kan damaipu kunyopda, ikin keca ne damai men yakankamre, ukurepa neda pio teleppu kunune.
4 ‘Pio mali-malipu kunge nengdi, ne tep popnenung’ tenen, ‘Ne nai bo Allah, kan dipapu, ne tep melipra lyepropkamnerem’ tenen, moropkene. Anengda kandi pesemum upu yumada, yanitamnapu kununga cadi, kandi aneng tep wenepra popkamrume. ‘Anengdi ne damai yana popnenung’ tenen, ‘Kandi melipra kaleknememdi, lyepropnemem pangeda, sun pio mali kunge nengdi ne tep men yana popkamneng’ tenen, moropkene.
5 Allah kan tepapu morokenuna deiyoda, ake. Nedi, ‘Akeca-keca yuma talepra ila puto weik kurya deiyo ngebo Allahda, ^{▼▼Allah – Akayat neitamaida, Allah tep, Ibrani upu deiki di, ‘Adonai’ pepra seki. Aupu ‘Adonai’ deiyoda, ake. Ada, ‘Akeca-keca yuma taleredi, ila puto weik ngebo kurura cadi, er teneretopu kurure’ tenen, seki. Atep nengeda, sun kael kemna tep, aupu deiyongepu katuai di sekmepu. Indonesia upu Allah upu buku neitamaida, ‘TUHAN’ pepra sengnunge. Ange peda telep dinin, aupu ‘Adonai’ tek sisi deiyo akapu ngeda, sun kael kemna tep, nundi konum katuai di sekmupu.} kan dipapu ne tep lyepropkamnerem,’ tenen, kan tepapu teka tenekenuna tepa.
Teka ne nai Allah Yahweh, ^{▼▼Yahweh – Allah er pe si, tek sisi ngeda, ‘Yahweh’ kurure. Ibrani upu deiki di, asi er deiyoda, ‘Ne pio akunune.’ Ada, akeca-keca yuma kapul men ketekeipra deiamu taruda, Allah konum akuramu. Tonda, ataru di dipra, pio dorkunkamre taru peda, Allah pio akunkamre. Allahdi Musa tep, er si katuai di lap pepu (Keluaran 3:14). Allahdi Musa tep, “Ne si ‘Yahweh’ kael keprumudi, asipu erepra, ne tep gispal donkamnerume,” pepu. Indonesia Alkitab neitamaida, Allah er si Yahweh men sengnunge. Sunda, ‘TUHAN’ pepra sengnunge. Atep, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, ‘Yahweh’ kwamngai,’ tenenkamrume. Allah er si Yahweh pena peda, telepe pua.} neda metek mi kuramsi taru di dipra, ne gam kune taru yumada, kan tepapu teka tenekenune. Yuk ngebo ton pio gume.
6 Ne nin sisadi deipne taru di dipra, ne gam tupa kunun taru yuma neitamaida, ‘Allah dipapu, ne tep melipra lyemdonkamnere’ tenen, kan tepapu teka tenekenune. Teka, kan puto deiki di, na nin sisadi, deipneupa, kan dipapu ne tep, pio kalengnerume.
Tonda, kan pio telep kurumnge cap, ila puto weik kurumnge cap tep, kan tepapu, kan si pio eremkamkene. Ange tep nengeda, ne gam kunkamne taru yumada, kan tepapu, “Kanda pio telep kurume,” pepra, kan sipu eremkamkene!
7 Naio, ne gam kuramsi taru neitamai yumada, ikin kange doupra kuramsi taru yumada, kan dipapu melimamnemumpa, neda petenkemna utopu ngebo kuramsipa, yuk nengdi ange diramya deiki di kael keami. Ada sundi, ‘E, tek sisi Allahdi, angebo pio melipra kalengrura cadi, nun peda, Allah tep, teka teneptepe’ tenen, konum kael kemami.
Sundi ange kael keamya deiyoda, ake. Ada, ne ikin kuramsi taru yumada, kan puto deiki di pio melipra lyemdoramnemuma cadi, kan damaida, teleppu kunune.
8 Ange tep nengeda, ataru-ataru yumada, kan tepapu, “Kanda pio teleppu kurume,” pepra, kan sipu eremkenune.
9 Ukutaruda, ne konum wisi deipsa tep, ‘Ataruda, kandi men kaukepra tapkamnerum’ tenen, moropkene naio. Ada, ne konum wisi deipsipa, ne putoda bouna dipapu konum kunman dinin, ‘Ataruda kandi ne tep men kaukepra tapkamnerum’ tenen, moropkene naio.
10 Deiyoda, ne tep, ‘Angeboda, nun songe,’ tenekenung nengda, “Er tep mali kweipkamepe,” pepra, ne tep mali upu penengedi upu talenunge. Tonda sun aneng dipapu, ‘Gume, angebo adipapu poptaptepe’ tenen, bulupmengedi, warengnenunge. Sundi ne tep, nimi pon upu pengedi talenenunge.
11 Ne pona tep nengdi, “Gume, angeboda, Allahdi konum kaukepra tapka cadi, erda tali lupra poptepe,” penenunge. Tonda, sundi, ‘Gume ware nengdi yana, angebo melipra lyepkameng do? Gum atep, nun dipapu, er tep sepdara dombena tomopmepedi, tali lupra poptapkamepe,’ tenenenunge.
12 Ange tep nengeda, ‘Uo ne nai bo Allah, kanda tapnememdi, karenaipu men kunkamnerum’ tenen, moropkene. Ange gum dinin, ‘Ayu nengdi popnenung cadi, kanda menmena di, ne damai yana melipra kalengkamnerum’ tenen, moropkene naio!
13 Tonda, deiyo men kwapmarepapu, ne tep, “Er mali kupka tep, popkupe,” pepra, minina upu penenung neng yumada, ‘Kandi aneng tep mali kweipmempa, ali dakra kunkameng’ tenen, moropkene.
Tonda, ‘Kandi sun yu neng yuma tep, wenepra popmemdi, gawal dangkamrum’ tenen, moropkene naio. Tonda, ange utopu, ware neng do yuma, sundi ne tep, ‘Angebo mali kweipmepedi, popkamape,’ tenenenung nesala yumada, kandi wenepra popmemnyopda, ali dakmengepa, yuk neng yuma epmengedi, aneng tep, nyek-nyek pepmengedi, aneng deiki mali upu weik penkameng’ tenen, moropkene.
14 Ne pona tep nengda, ali weik dangkameng dinin, nedi kan Allah tep, ‘Allah er dipapu ne tep melipra lyemdonkamner,’ tenen, tupa-tupa teka tenenkamkene. Tonda, kan Allah tep, “Kanda pio teleppu kurume,” pepra, tupa-tupa tapakra kan sipu eremkamkene naio!
15 Tonda, nedi, ‘Yuk neng gekenkameng’ tenen, kan Allahdi pio telep kupra, dumsisipu kurum keca yumada, lap penapu kunkamne. Ada, kandi, “Angeda kunkamrume, angeda pio men kunkamrume,” pepra, deiamsemum upu peseretopu, telep dumsisi kunangepu kurum keca tep lap penkamne.
Tonda, tumi-tumi yumada, “Allahdi pio melipra lyemserure,” pepra, yuk neng sun gekena tep, lap penapu kunkamne. Ange tupa penkamna deiyoda ake. Kandi nun tep melipra lyemserum ngeda, men nukmanto kurura cadi, ange yuma men kael keptenedi, tenpu taru deiki di men lap peptenya tep, tupa-tupa lap penapu kunkamne ja!
16 Atep, kanda Allah Yahweh, akeca-keca yuma talememdi, ila puto weik deiyo ngebo ^{▼▼deiyo ngebo – Ayat 16 neitamaida, Allah er si tep, Ibrani upu deiki di, ‘Adonai’ pepra seki. Aupu ‘Adonai’ penga deiyoda, sun kael kemna tep, aupu deiyongepu katuai di sekmepu.} kuruma cadi, kandi pio kunupsek pen pel domem ngeda, lap penapu kunkamne. Kandi pio telep dumsisipu kurum keca yuma lap penkamna deiki di, kan si tepapu pio eremkamkene. Yuk ngebodi kure keca tep men lap penkamne. Kan dipapu kurum kecapu pepnedi, kan sipu eremkamkene.
17 Uo ne nai bo Allah, ne metek mi kuramsi taru di dipra aneitamai taru yumada, kandi, ‘Ukupkamrume,’ pepra, peteremnapu kuramnemumpa, kael kemamsi. Tonda, yuk neng gekena tep, ataru peda, kandi pio telep kunupsek pen pel dorum ngeda, tupa lap penune.
18 Atep nengeda, ne nai bo Allah, neda konum wisi deipnedi, kul potong konum kupnerya peda, kandi ne tep, kaukepra men tapkamnerume’ tenen, moropkene. Tupa melimnapu kunkamnerume naio.
Ada, ne gam tupa kunkamne taru yumada, kan ila puto deiki pel dorum ngeda, ‘Yuk nengdi amenda taru deipbankameng nyapu peda, gekenkameng’ tenen, tupa lap penapu kunkamne ja!
19 Uo nun nai Allah, kan pio telep dumsisipu kurumnge cap, kan ila puto deiki pel dorumnge yuma capda, nun tuai nengdi men nuktepe. Tuai mutu di deiki tara dipra, im deiki ila karenai kurepa, aneitamai goda, nimidi kunupetepra lap men peptepetopu, kan ila puto di pel doramumnge cap, dumsisipu kurumnge capda, men nukra lap peptepe.
Allah kanda, pio mambul weik puto pel konum doruma cadi, Ware ngebo ton, kan kurum utopu kurur do? Gume kan kurumtopu ngebo ton, pio men kurure.
20 Ne kael kemna tep, kandi ikin keca cap, kange mun kange douna tep keca cap, pio weika di kareamnemumpa, puto bounpu kuramneupa, men kupmanto kuramsi.
Dinino, ukutaruda, kandi ne tep, kange di tamupra telep kweipnememdi, tekra deipkamnerume. Tek sisi konum depmanto kuramsipanen, ukutaruda ne kaele, kandi ne tep, kange di ton cap, telep kupra deipkamnereme.
21 Ne dipru kwa dipnemempa, kange di ton cap telep kweipnemempa, yuk nengdi ange epmengopda, sundi ne tep weikanun ton gispal donkamnenge.
22 Tonda, mut pena tep lelim peramre keca, sepuluh tapu kurur keca, er sida gambus dopropnedi, mut pene dingeda, kan tep, “Kanda pio telepe,” pepra, kange lon mut pena deiki penkamkene. Deiyoda, kandi ne tep, tamna pio gum di, tupa-tupa melipra kalengneruma tepa. Kandi ne tep, ‘Ukupkamkene,’ pepra, pedina upu deiki penerumtopu, angepu tupa kuneruma tep, kan sipu eremkenedi, mut penkamkene naio.
Tonda, mut pena tep lelim peramre keca, tapu sepuluh di kwamunge er sida kecapi dopra, ange deiki di, mut penedi, “Kanda pio telepe,” penkamkene. Uo, nun Israel nesaladi si eremkenup Allah, kanda pio teleppu kurume. Kan dipru neitamaida, mali kun keca tenpunge peda, men kurure.
23 Neda pingping kange deipnedi, ne sipyal deiki di, “Kanda pio telep kurume,” pepra, mut pepnedi, kan si eremkamkene. Kandi lyepropnemumpa, ne men depsa cadi, ne kange dipru neitamai yumadi kan tepapu, mut penedi, “Kanda pio teleppu kurume,” pepra, kan sipu erekamkene. 24 Tonda, tumi-tumi yumada, ipna taru di dipra, keteng komuni yumada, ne penkamne upu deiki di, “Uo, ne nai Allah, kandi pio dumsisi kuruma deiki di, ne tep pio melimnerume,” pepra, sun yuk neng gekena tep, lap penapu penkamne. Deiyoda ake.
Ada, sun yu nengdi ne tep, ‘Angebo popkupe,’ teneramnei nengda, Allah kandi wenepra popmemnyopda, yuk nengdi ange epmengedi, ne pona tep neng tep, ‘Uo, sunda tek sisi mali kuramya tep, sun dakwapye,’ pepmengepa, ne tep popnei neng yumada, sun aupu pepmengepa gekepmengedi, ali pio weik dangkamenge.