Psalms 72

Nimi deiyo ngebo Raja Dauddi, Israel nesala, sun ila nimi deiyo kepra talenkamre ngebo Salomo tep, Allah moropu upu

1Nimi deiyo ngebo, Raja Salomodi Allah tep pepu. Ne nai Allah kandi, “Ange kunkamrume, angeda men kunkamrume,” peiamsemuma utopu kupra, kandi deipkamserum nimi deiyo ngebo Rajada, ‘Erdi nimi yuk nesala yuma tep, upu telep kupra bokeipkamre’ tenen, moropkene.
Kandi er tep, angepu peterepmemdi, kan ila kael kemna deiyo keca kareptumpa, ‘Nun talenkamser Raja ngebo, telep kupra kutudi, ila nimi deiyo ngebo Raja kepra, talepra kunkamre’ tenen, moropkene. Kandi er wepra deipmuma cadi, ‘Kandi aRaja ngebo tep, dumsisi kupra, pel dona deiyo keca peterepkamrum’ tenen, moropkene.
2Ukupmempa, kandi, ‘Ne nyapu sisa kunkameng’ tenen, wepra deiamsemum Israel nesala tep, aRaja ngebodi, “Ange kunkamrume, angeda men kunkamrume,” pepra, kan nyapu tep, dumsisi kupra talenkamre. Aupu deikipu, erdi tenepra sun anesala wenepmaryane, dumsisikra telep kudinkamre.
Tonda, ikin weik keca dorongedi, kange mun kange doupra kunung nesala, erdi melipra pel dopbanmaryopda, sun yuma telep kange doupra kunkamenge.
3Pio dumsisipu kupbanmaryane, adeiki di nun kunkamep mutu cap, nun talepra kunkamep keca cap, wa pepra kounkamep keca yuma capda, bolongredi moupbanmaryane, nong pio teleppu kupbaryopda, amutu neitamai kunkameng nesala yuma peda, teleppu kunkamenge.
Tonda, erdi nimi deiyo talepra kunkamre keca yuma, teleppu kupbanmaryopda, ‘Erdi talenkamre nesala yuma peda, pio teleppu kunkameng’ tenen, moropkene.
4Tonda, sun amutu kungedi, ila kange mun keca kurepa, pio ikin kange doupra kunung nesala yuma tep, kandi melipmempa, erdi nimi deiyo talepra, Raja ngebo kunkamra cadi, sun anesala tep melipra telep kudinkamre. Mali kunge nengdi, kan nyapu tep, ‘Popkupe,’ tenepra yakankameng taruda, erdi sun podan neng tep porbisinkamre.
Tonda, kankan kunge nesaladi derinung nyapu yumada, erdi melimkamre. Ukupredi tali kankan kunge nesala tep, sun nong deiki ikin keca derinung nesala yuma tep, erdi popbisipredi, gawal dangkamre. ‘Ukunkamre’ tenen, moropkene.
5Ne nai Allah, kandi nun ila nimi deiyo ngebo Raja tep melipmemnya deiki di, amutu nesala pio talenkamre. Ada, er dipapu amutuda taleamreyanen, dortaru ware, keteng ibenap, ubenap kepbankamre taru yumada, aRaja ngebo dipapu nimi deiyo ngebo kepra talenkamre. Ukuredi adeipdanen, bankameng nesala yuma peda, er dipapu talenkamre.
6Er dipapu anesala talenkamre taruda, ukupmanto, wa pepra kouamengai mo cepredi, adeiki sarepa, koun keca telep kupra bongoramretopu, Allah kandi er tep melipmemnya deiki di, erdi talenkamre nesala yumada, teleppu kunkamenge.
Tonda, mo weika di cepredi, koun keca bo deiki sakrepa, koun keca bolongredi, urasin telep kemamretopu, kandi melipmemnya deiki di, ‘Nun Raja ngebodi talenkamne nesala yumada, teleppu kunkameng’ tenen, moropkene.
7Ne nai Allah, kandi er tep melipmemnya deiki di, erdi talenkamre nesaladi, dumsisi telep kun kecapu pio tep kupbankamenge. Tonda, nun mutu neitamai pel donkamep keca yumada, ‘Awar-awar yuma mapbapepa, pio teleppu kupbankamreyane, sirya dangna taru peda, tupa teleppu kunkamser’ tenen, moropkene.
8Ne nai Allah, kandi nun ila nimi deiyo ngebo tep, melipmemnya deiki di, erda nimi deiyo ngebo Raja kepra talenkamre taru di, talenkamre mutuda, keteng yakan tara di dipdongopra, keteng dangban tara yuma cap, taleprepa, go weik kunkamre. Ada, atara ila laut mokon damai tara di dipdongopra, ortara laut mokon damai tara yumada, erdi talenkamre. Ukuprepa daneitamai yumada, ila pala weik mutu kunkamre.
Ange utopu, keteng yakan tara embeu ila me, er si Efrat me damai di dipdongopra, keteng dangban tara yumada, im siri, mutu siri yuma, ‘Kandi melipmempa, er dipapu amutu yuma talenkamre’ tenen, moropkene.
9Tonda, me metekapu kure mutu, katawai mutu neitamai, dakunge nesala yala-yala yumada, tenpuaipu men kungedi, amutu kunmana tapra, ormutu kunmana kemengedi, embandanapu kununge. Akunge nesalada, nun ila nimi deiyo ngebo Raja damai yangedi, er gispal dona tep, yana gutam tu dipdongopra, genedongopra gispal donkamenge.
Ange utopu, er podan neng peda, er damai yangedi, er gispal dona tep, yana gutam tu dipdongopra, genedongonkamenge. Ange utopu, anesala yumadi yana, er si erepra, er yan iriamu tarapu kunkamenge.
10Ukupra, erdi amutu yuma talenkamre taru neitamaida, keteng dangban tara, Tarsis mutu neitamai, nimi deiyo talepra kunung nesala cap, laut mokon neitamai dinin, mokon deipra sekdongopu mutu kunung nesala yuma, er damai yangedi, erda ila nimi deiyo ngebo Raja kunkamra tep, sun talepra kunge telep keca yuma dopra, er damai yana kareryakankamenge.
Tonda keteng yakan tara, Arab mutu cap, Etiopia mutu cap, ila nimi deiyo kepra Raja taleami neng yumadi, nun mutu talenkamser Raja tepapu, gispal dongedi, telep keca dopra er damai kareryakankamenge.
11Tonda, mutu yuk-yuk yuma dinin, ban-ban yuma talepra ila nimi deiyo kepra taleami Raja neng yumadi, er tepapu gispal donkamenge. Ukupra kungedi, sun aneng yumada, er amutara kunkamenge. Sun yumadi er pelpu donkamenge.
12Ataruda nimidi, ‘Anesalada mambul gume,’ tenepra tamengedi, pio kange mun pel dimengepa, ikin kange doupmengedi, puto boun kupra kunge nesala yumada, erdi lyepropkamre.
Tonda, amutara kunge kankan kunge nesaladi, ‘Nun mambul kuserura tep, ware ngebodi melipra lyepsetu do?’ tenen, erterenkameng dinin, sun melipmanto neng ton men epmengopda, nun Raja ngebo tep mororyakankamenge. Er tep, “Melipseo,” pepra moronkameng nesala yuma tep, erdi telep kupra melipredi, lyemdonkamre.
13Deiyoda, erda ila nimi deiyo ngebo, Raja kepra talenkamre ngebodi, sun tali kankan kunge nesala cap, bung keca pio men talenung nesala cap tep, bicau kurepa, sun kange mun kange doupra kunung nesala tep, erdi melipra lyemdonkamre.
Ange utopu, yu nengdi, ‘Sun tali kankan kunge nesala cap, puto boun nesala cap, dapoptapkamepe,’ tenengepa, kange mun kange doupra, dakunung nesala yuma peda, erdi lyemdonkamre.
14Yu nengdi, sun tali kankan kunge nesala tep, ikin keca sun nong deiki deipmengedi, “Adipapu pel tali dopseso,” pepra, yu upu deiki di dimengepa, kange mun kange doupra, kunung nesala yumada, er nimi deiyo kepra kunkamre ngebodi, amutu yuma talenkamre taruda, sun anesala yuma tep lyepropredi, kanam keipkamre. Ukuprepa, sun kunkamengada teleppu kunkamenge. Tali kankan kunge nesala yuma tep, ila di bicau tenerura tep, pepne.
15Erda nun ila nimi deiyo ngebo kemna tep, yankamre ngeboda, pio gampu kunkamre. Ukurepa, karen keca tep doupra, yakankameng nengdi upenkamenge. “Nun deiyo ngebo, kanda teleppu. Pio gam kunkamreme. Atep nengeda, Arab mutu sida, Syeba mutu di, pio kunumna weik gat keca, er si emas duyakankamkepe,” pepra kareryakankamenge.
Tonda, nimi yumadi, ‘Allahdi angebo tep, pio melimrepa, teleppu kunkamre’ tenen, er tep tupa-tupa moronkamenge. Tumi-tumi yumada, er gispal dona tep, telep upupu penkamenge.
16Tonda, animi deiyo ngebodi, amutu talenkamre taru neitamaida, Allahdi melimrepa, amutu neitamai yumada, gandum wa pio weik bonongkamre. Tonda, amutu buma deiki wa pepra, kouramenge gandum yumada, nong pio weik konum kepre pangeda, kumanya yaredi, pung perepa, gandum bo yuma gamaiprepa gangankamre. Tonda, sun amutu neitamai yumada, sukun tupu kunkamre.
Ada Libanon mutu, telep sukun tu kuramrepa, du mouramre co yala-yala yuma, du weik mouramretopu, nun mutu peda utopu kunkamre. Amutu neitamai kunkameng nesala yuma peda, denge pio weika di deipra tapakbangepa, anesala gungda, tali bura mutu paramre mutmuta utopu kupra kunkamenge.
Ukupra kunkameng taru, sundi wa pepra kounkameng keca yumada, telep kupra bongorepa, kipra jenkamenge. ‘Ange yuma ukupra kunkamre’ tenen, Allah tep moronkamepe.
17Sun amutu kunkameng nesala yumadi, ayana talenkamser ila nimi deiyo Raja tep, gispal domengepa, pio akunkamre. Tonda, ayankamre ngebo, er si tupa akaprepa, er tepapu, “Nun deiyo ngebo ake,” pepra, er tep gispal pio donkamenge. Keteng asuru akapkamre taru yumada, er tepapu gudinkamenge.
Aila nimi deiyo ngebo, pio telep kunkamra deiki di, mutu ban-ban yuma kunung nesala yala-yala yumada, teleppu kudirepa, weika di tapakbangedi, telep kunkamenge. Erdi, tuai mutu neitamai kunge nesala yuma tep, telep kudiredi, melimrepa, tuai mutu nesala yumadi, “Teka, erda pio telep ngebo kurure,” pepra er tep gispal pio donkamenge.
18Atep, ne Raja Salomodi, ne nai Allah Yahweh kan tep, telepe pepra, kan si erekenune. Utopu, sun Israel nesala yumadi, kan sipu eremkamkenge. Ada, “Israel nesala tep, pio melipra kalengserur Allah, er si Yahweh, er dipapu, ila mambul pel, pio kunupsek pen pelpu dorure. Yuk ngebo ton, er mambul pel doretopu men doptue,” pepne.
19Ne nai Allah Yahweh, kanda pio telep ngebo kuruma cadi, kan sida ila mambul si kukerure.
Atep, nesala ban-ban yumadi, kan sipu pio eremkamkenge. Ukukengepa, pio tep kan sida akunkamre. Tonda, kandi mutu ban-ban yuma talemeppa, tuai mutu kunge nesala yumadi, kan sipu eremkengepa, ‘Allah kan ila puto cap, kandi pio mambul pel dorumnge cap, kan pio teleppu kurumnge cap dipapu, tuai mutu yuma dinipkamre’ tenen, moronupe. ‘Angeda pio tek sisi nong kupkamre’ tenen, ‘Amin,’ pepne. Akonuma.
20Nimi deiyo kepra taleamu ngebo Isai, er mi Daud amut upu pepka deiki di, Allah tep moropudi gawal daku.