Psa 73 | XteSC | STEP | Allahdi er mawa nesala, Israel yala nesala tep, bicau teneredi, telep kudirure. Tek sisi mali kuna gum di, dipru dumsisi kuprepa, teleppu kupra kunung nesala yuma tep, Allahdi pio ila kange deriredi, telep kudirure.

Psalms 73

Dipru eremna nesala tep pepu upu

1 Allahdi er mawa nesala, Israel yala nesala tep, bicau teneredi, telep kudirure. Tek sisi mali kuna gum di, dipru dumsisi kuprepa, teleppu kupra kunung nesala yuma tep, Allahdi pio ila kange deriredi, telep kudirure.
2 Dinino, men taruda, ne kange konum wang-wang pepneua deiki, ne teka teneramsi ngeda yawarapmanto kupneu. Ukupmantoda, ulapne weik kupre bisi, nimi mangkau kange doupra embangepa, olapne di popmanto kuramengtopu, kuramsi.
3 Ukuramsa deiyoda, ake. Nedi sun kange dipru erepra gemenapu kunge neng, pel dopra doron keca weika dorongedi, kange deipra teleppu kungepa, dinedi, ‘Uo, sun anengda kanampu kunung dinin, neda ware keca deiyo tep ikinpu kunun do?’ teneramsa deiki di, tulum kupneupa, ne teka tenepsinge, yawarapmanto kupneu.
4 Walwal kuramsi taru teneramsi ngeda, ake. Uo, sun dipru erepdangedi, gemepra kunung nengda, sun nong ton pu weika di men jerure. Sun nong yuma telep kupra puto dipapu pio teleppu kununge.
5 Tonda, nun yuk tali dakunup nesala yumada, kange mun keca nun damai yakarepa, ikin kange doupra kuramnup dinin, nun ikin kurameptopu, sun anengda ikin weik men kununge.
Sun kunung keca yumada, teleppu kurura cadi, sun kanampu kunung dinin, nepuda, pio pe deipra ikin pelpu donuna cadi, ‘Uo, ware keca deiyo tep ikin kunerur dinin, sunda kanampu kunung do?’ tenen, kuramsi.
6 Yuk neng ikin keca dororamengtopu, sun aneng ton men doronunge. Atep nengeda, sun dipru erepdange neng, ikin keca sun nong deiki men kurura tep, talipu kungedi gemepra kari ponunge.
Ukungedi, ikin keca doronung nesala tep, tupa-tupa yu upu pena cap, pona cap kununge. Sunda, dipru erepdangedi, yu kunungada, men inimnunge. ‘Nunda telep nengpu kunupe’ tenen, katuai dipu kununge.
7 Sun mali kunung nesala, sun dipru neitamaida, mali kun kecapu diniprepa, ali kuna gum dipapu, sundi, ‘Mali kun kecapu talepra, tali lupra kunkamape. Nun tenepmepe ngepu, kunkamepe,’ tenepmengedi, adeiki di, malipu kununge. Sundi, ‘Mali kun kecapu kunkamepe,’ tenenungada, pio weik kurura cadi, men nukmanto kurure.
8 Sun upu tali-tali penunga deiki di, yuk nesala yuma tep, autupra nalemengedi, nyek-nyek pepra, gemengedi malipu kununge. Dipru eremna deiki di, sal nong-nong kapmengedi, yuk tali nesala yuma tep nengeda, ‘Nundi penup upu men gekepsemumnyopda, nundi sun deiki ikin keca weika di, derinkamsepe,’ pepra gemenunge.
9 Sun anengdi upu penungada, “Im deiki kure keca cap, Allah capda, tali kecapu kurure. Ange yumada, mambul gum dinin, nunpuda ila mambul kunupe. Tonda, tuai mutu kure keca yumada nun pe keca pua,” pepmengedi, yuk nesala yuma tep, “Sunda mali nesalapu kununge,” pepra mali upu perbanunge.
10 Upepmenge pangeda, yuk tali-tali dakunung nesala pe, Allah teka tenenung nesala peda, aneng sun upu gekepmengedi, ‘Sun anengda tek penmasenge’ tenen, sun penge upupu gekepra dombanunge.
11 Sun asal nong-nong kamenge nesaladi penung upuda ake. “Allah ^{▼▼Allah – Acada, Ibrani upu deiki di, Allah er si tep, ‘Allah Elyon’ pepra seki. Aupu deiyoda, sun kael kemna tep, angeda konum jenek kupra sekmepu.} akeca-keca yuma talepra, pio deiki tara kuredi, Ila Puto Eremna Ngeboda, nun kupe keca yuma epra men kael kemserure. Im deikipu kurura cadi, ware ka di nun kupe keca epra kael kepsetu do?” pepra, mali upupu penunge.
12 Sun pio mali kecapu talepra kunge nesaladi kunge kecada, konum lap pepmasen adano. ‘Ware kupkamser do?’ tenena gum dipapu, sun tali kange doupra kununge. Kange mun keca yala-yala yumada, sun damai yarepa ikin men kurure. Tonda, sun talenung keca yuma peda, tapakra dorongedi, weik kupbarepa, isomka nengpu kupbanunge.
13 Ange yuma diramsa tep, men taru di teneramsi ngeda ake. Uo, sun malipu kunge nesalada, sun gam kunung taru yuma, tali kange deipmengedi, isomka nengpu kununge. Dinino, ne ikin kunerure. Atep nengeda, ‘Ne dipru dumsisipu kunedi, mali kupnun’ tenen, kalengdanun ngeda, talipu kunune. ‘Deiyo ton men kurure,’ teneramsi.
Tonda, yuk neng epnengedi, ‘Angebo tek sisi mali men kurure, tenepkamneng’ tenen, mali kuramsi keca yuma tapsidi, teleppu kuramsi. Ukupmantoda, mali keca nun buru palepserepa, buru me kurameptopu, mali kun keca yuma tapsidi, teleppu kuramsi. Dinino, ‘Ange peda, tali tep kupsa,’ teneramsi.
14 Ne kange neitamai teneramsi ngeda, ‘Ataru-ataru yuma ikin kecapu ne damai yakanerure. Ange utopu, ipna taru yumada, kange mun keca ne damai pio weik yakanerure. Ukuneryada, Allahdi wenemnerepa, ikin kunerur do?’ tenen, mali kange doupra kuramsi. Atep, ne kange mun deikipu kuramsi.
15 Ange utopu kupra teneramsi dinin, ne teneramsi ngeda, yuk nesala gekepmantoai jenek kupra men peramsi. Ne nai Allah, nedi kan nyapu, teka tenekenung nesala tep, apu utopu katuai konum peamtenyopda, tek sisi nedi kan nyapu tep, pio mali kuamtene. Ada amali upu deiki di kan cap, kan tep teka tenekenung nesala cap tep, yanipmanto kuramsi dinin, aupu katuai di men peramsi.
16 Dinino, ‘Apepmasi upu yuma tep, akeca yuma piripra kael kepkune’ tenen, kurpetenmasi taruda, ne pio kange mun kwamneua tep, men kael kepmanto kuramsi. Ange yuma tenipeteramsidi, ikin kuramneupa, kange mun kange doupra kuramsi.
17 Ukuramsiyanen, amenda taru Allah Yahweh er si eremna ati bena weksi taruda, sun mali kun keca kunge neng amenda taru kupkameng ngeda, betapra kael kepsi. Ada, amenda taru Allahdi, amali kunge nesala yuma tep, wenepra popredi, gum kupra deipkamre ngeda, betapra kael kepsi.
18 Ne nai Allah, tek sisi kandi, amali kunge nesala sun embankameng bisi yumada, ulapnapu keipmemdi, kaukeptapmempa, abisipu embangedi, saka poprepa, denapu kunkamenge. Sun kunge keca cap, sun talenge keca yuma capda, gum kupkamre ja.
19 Kandi amali kun kecapu talepra kunung nesala tep, wenepkamrum taruda, adipapu anesala popra menmena gum kupra deipkamrume. Ukupmantoda, me oupredi akeca-keca yuma dopra menmena dubaramretopu, sun nong deiki adipapu ikin keca deipkamrume. Ukupmempa, amali kunge nesala menmena popmempa, depmengedi gawal dakamrume.
20 Ukupmantoda, nimidi ken mapmengedi, akeca-keca yala-yala yuma dinung dinin, mapmanganen, bukmengedi, adipapu sun arup taru ken deiki di dirameng keca katuai men kuprepa, men epmanto cadi, lumdongoramengtopu, kunkamenge.
Ada, Allah Yahweh kandi anesala sun wenemna tep yankamrem taruda, sun mali kunge nesala yuma adipapu gum kupra deipkamrume. Ken mapmanganen bukmengedi, lumdongoramengtopu kupra, kan adipapu anesala tep wenepmemdi, gum kupra deipkamrume.
21 Menmena di, amali kun nesala sun kuramenge keca diramsi taruda, ‘Uo, sunda kanam dipu kununge,’ teneramsidi, ne dipru neitamaida, tungkula keca popserepa, nong neitamai wekseredi, pu weik jeramsertopu, kuramneu. Ne kange dipru neitamaida, tulum weik kupneupa, mali kange doupra kuramsi.
22 Ukupra kuramsi taruda, ne nai Allah kan damaida, neda pio walwal ngebo utopu kupra kuramsi. Tonda, tali bura tara gam kure keca moupra men tenepmanto kuramengtopu kupra kan damai kuramsi. Kange douna gum kunung nesala utopu, kuramsi.
23 Ukupra pio mali weik kuramsi dinino, ukutaruda, ne telep kange doupra kunune. Neda ne nai Allah kan damaipu tupa kune taruda, kandi ne buru dumsisi tarange talepnememdi, telep kupra melimnerume. Kan damaipu pio akunkamne.
24 Kandi ne tep, “Ukunkamrume, angeda, men kunkamrume. Telep ngeda ake, mali ngeda ake,” pepra peteremnememyane, ne sirya taru konum depnyopda, kan dopropnememdi, kan ila dirin cap, pio telep kupra kurumnge cap damaida, im deiki deipkamnerume.
25 Uo ne nai Allah, kanda im deiki kumempa, kan tepapu putanerura cadi, akonuma. Wareto keca ton putapnetu do, gume. Gume, kan cap kikiman kunkamnem ja. Kan tenpu tep putanerure. Ange utopu, tuai mutu kunkamne taruda, kan tepapu putanerepa tenekenune. Tuai mutu neitamai akunkamne taruda, yuk keca ton pio men putanerure. Allah kan tepapu pio putanerure.
26 Ne nong cap, kange tenenange cap yumada, bounpu kupbaredi, amenda taru gum kupkamnerya peda, ne nai Allah kan dipapu ne dipru neitamai puto kemdinerume.
Teka ne nai Allah kan dipapu, kalekra dinememdi, yuma taru yuma pio tep lyemdonkamnerume. Atep nengeda, yuk keca gum dinin, kan tenpu putanerepa, kunune.
27 Dinino, ware nesala do yuma, kan tep, ‘Nun songe’ tenen, dabal kuprepa, kan damai di yukai saka banung nesala yumada, sun pedi konum mali kudidanunga cadi, kandi anesala wenepmemdi, gum kupra deipkamrume.
Anesalada, pumun taru, ‘Nun nai Allah er amutara kunkamepe,’ tenerami dinin, ukutarada yuk kange tenepmangdi, ‘Erda nun songe’ tenen, kan yanitamkenunga tep nengeda, sun anengda adipapu wenepmemdi, popra gum kupra deipkamrume.
28 Dinino, nepuda pio tek sisi ne nai Allah kan damaipu kunkamne. Angepu tenepra kununada telep pua. Ne kange dipru neitamai di, konum tenepsi. Ada, Allah Yahwehdi akeca-keca yuma taleredi, ila puto weik ngebo kurura cadi, erdi, ‘Ukunkamne,’ teneretopu, ange yuma tek sisi kurure. Atep, neda, ‘Er damaipu kunkamne. Er dipapu melipra lyemdonkamnere’ tenen, kunkamne.
Ne nai Allah, kan dipapu tupa kalekra melimnerur ngebo kuruma cadi, kandi mambul pel dorumnge yumada, yuk nesala sun gekena tep lap pepra peterembankamne.