Psa 74 | XteSC | STEP | Mazmur upu mut sengna ngebo, er si Asafdi, aupu seku. Erdi pepu upuda ake. Uo, nun nai bo Allah, ware keca deiyo tep, kandi konum tapsemumpa, nun tupa ikinpu kunup do? Pio tep, kaukepra tamkamserem do naio? Ukupmantoda, nun Israel nesalada, kandi peirum domba bisam utopu nesala kunupe. Dinino, kan yu pio weik kupkerepa, nun Israel nesala tep, tupa-tupa deremnapu kunkamserum do?

Psalms 74

Yuk mutu yu nengdi, Allah er si eremna ati uruptapipa, “Nun nai Allah melipseo!” pepra moropu upu

1 Mazmur upu mut sengna ngebo, er si Asafdi, aupu seku. Erdi pepu upuda ake.
Uo, nun nai bo Allah, ware keca deiyo tep, kandi konum tapsemumpa, nun tupa ikinpu kunup do? Pio tep, kaukepra tamkamserem do naio?
Ukupmantoda, nun Israel nesalada, kandi peirum domba bisam utopu nesala kunupe. Dinino, kan yu pio weik kupkerepa, nun Israel nesala tep, tupa-tupa deremnapu kunkamserum do?
2 Gume naio, kandi ketekepra deiamsemum nesala, ‘Nun Israel yala nesala tep, kange di ton cap tenepsememdi, yana melimkamserum’ tenen, moropkepe naio!
Kandi nun Israel nesala tep, ‘Anesalada, ne mawa nesala kununga cadi, sunda pio talenkamne’ tenen, weiamsemumdi, nun ikin weik kuramupunge neitamai di, konum melipra lyepsemume naio!
Tonda, Sion mutu ^{▼▼Sion – Ibrani upu neitamaida, ‘Sion mutu’ pepra seki dinin, aseki ngeda, tek sisi Yerusalem mutu tenepidi seki. Sion perami ngeda, ada pumun taru amutu si tep perami dinin, ukutaruda, amutu tenpu tep, Yerusalem mutu penunge. Allah upu neitamaida, amutu si tep, si butene penung dinino, amutuda, tenpua. Atep, ‘Sion’ epmumnyopda, ‘E, ada Yerusalem mutu tep seki,’ tenenkamrume.} tep, lumdongona gum dinin, kange di ton cap tenenkamrume! Ada, kandi, “Amutuda keana taru tep ne si eremna ati akunkamre,” peipsemumai tep pepne naio.
3 Sun yuk mutu yu ^{▼▼yu neng – Aupu deiyoda, sun Babel mutu jen talena nengdi, Yerusalem mutu yuma popra sikke buktapi taru tep pepu do? Sun Makabes mutu nengdi yana, Yerusalem mutu neng popi taru tep pepu do? Angeda, nun yambul walwale.} nengdi, yana poptapidi, kan si eremna ati yuma urupra sikke buktapipa, tupa malipu kururaida, nun nai Allah, kan tamupra yamemdi, ange dinkamrume.
Ada, men taruda, nun pona tep nengdi, kan si eremna ati pumbon dinin, Pio Telep Lengna Ati pumbon deiamupu keca yumada, anengdi akeca yuma dakra sikke buktapi.
4 Sun yuk mutu yu nengda, ‘Allahda, nun songe,’ tenenung nengdi, kan si eremna ati pumbon yana wekidi, yanina tep, ila upu deiki di ngolokidi, mali upu pepkei.
Tonda, sundi, ‘Akati cap, amutu kunge Israel yala nesala cap, konum popra gawal dakmapa cadi, amutu yumada, nun ngepu kunkamre’ tenen, lyom opkal er sida spanduk deiki sun si sekidi, akeca dopra, Allah kan si eremna ati pumbon ikra deipi.
5 Nun nai Allah, kan si eremna ati pumbon wekidi, ila co kwemna tep ya, er sida kapak ya dopropidi, nimidi bura mutu paramre lyom co bena kwemamengtopu, akati pumbon deiamupu keca yumada, akapak ya di, akeca yuma kweptapidi, urupra gawal daki.
6 Ukupi dingeda, adipapu sun metek kapak ya cap, paku dangne keca, er sida palu capdi, ila kael nengdi urasin telep kuna tep, co dopra, aco deiki petupra deiami keca yumada, urupra daktapi.
Teka, ‘Akatida urasin telep kupkamre’ tenen, pio telep gat co deiki, ila kael keami nengdi petupra deiaminge yumada, dakrapidi, sikke buktapi.
7 Sundi akati pumbon kwamu keca yuma konum uruprapidi, akati pumbon kwamu keca yumada uku ^{▼▼uku – Aupu kael kemna tep, 2 Raja-Raja 25:9 dinkurume. Babel mutu ila nimi deiyo ngebo, Raja Nebukadnezar, er jen talena nengdi, Allah er si eremna ati urupra tapudi, uku dongopu.} dongopipa, ukudi jepra gawal daku.
Allah kandi, “Akati pumbonda, ne pe sipu eremnengepa, ne cap, sun cap, aceipu kikiman kunkamepe,” pepra, peiamsemum ati yumada, sun ayu nengdi pio mali kupra deipi.
Ukupi dingeda, akati yuma dakra uruptapidi, tu deikipu deipi.
8 Nun podana nengdi, “Gume, sun Israel yala nesala yumada, pio popra, gawal dakmepyopda, sun gam tupa kunkameng nengda, nun amutarapu pio akunkamenge,” pedaramidi, gemenapu kurami.
Tonda, nun Israel yala nesala kuramepu tara neitamai yumada, Allah kan si eremna tep, yambul ati domupudi, buluamupu ati-ati yuma peda, dakrapidi, uku dongopipa, uku di jepropudi, gum kupu.
9 Ange yuma ukupseia tep nengeda, ukutaruda, nun kuramepu mutu neitamaida, ‘Allah tupa akuredi, pel tupa melipra doserure’ tenen, petenkemna keca tenpunge peda, pio men dinupe.
Tonda, kan Allahdi nun tep, upu tupa men peseruma cadi, nun kan-kan neitamaida, kandi pepmempa, gekepmengedi, kan upu lap pena deiyo neng, sun nabi-nabi ^{▼▼nabi-nabi – Aupu deiyoda, ake. Ada, Allahdi er upu peiamupa, erdi wepra deiamu neng, aupu gekeramidi, Israel yala nesala tep, lap perami. Anengda, ‘nabi-nabi’ neng perami. Atep, nabi neng ton men kurami taruda, sun Israel nesaladi, ‘Uo, ukutaru Allahdi konum tapseudi, bendopseue,’ tenerami.} neng ton, pio men kununge.
Tonda, nun Israel yala nesala kankan neitamaida, tenpu ngebo peda, ‘Allahda, ue ukuprap taru ton wenepkamsere’ tenen, kael keptudi, upu men lap pepsetue.
10 Atep nun nai Allah, nundi kan tep asipetepkepe. Ware kuprap taru ton, nun pona tep nengdi, nyek-nyek pepsengedi, mali upu tupa penkamseng do?
Ada, nun pona tep nengdi, kan pe si tepapu yanipmengedi, kan tep pio mali upu pepkengedi, mali kweipkameng ngeda, tupa-tupa dorkunkamre taru peda, pio tep, ato upu tupa penkamseng do?
11 Atep nun nai Allah, ware keca deiyo tep, kan pe buru di, amali neng men porum do?
Tonda, ware keca deiyo tep, kan puto buruda, nun tep melipra men talesememdi, kan taram deikipu kan buru taledamemdi, amali kunge nesala tep, men portamrum do?
12 Ange yumada, ne walwal dinin, ne tek sisi konum kael keamsi ngeda, ake. Ada, ne nai Allahda, ne ila nimi deiyo ngebo, Raja kuredi talenerure.
Allah er dipapu, tuai mutu ban-ban yuma neitamaida, nimi tuai nesala tep melipra lyemdorure. Yuk ngebodi gume.
13 Allah kanda, ila puto weik ngebo kuruma cadi, kan ila puto deiki di, ila laut mokon ^{▼▼laut mokon – Aupu pepka deiyoda, nun yambul walwal dinin, nun tenenupada, Israel nesaladi, Mesir mutu tapra, Kanaan tara sepdara bei taruda, Allahdi ila laut mokon er sida Teberau neitamai bokropupa, Israel nesala kalkal pepu tu deiki yanipra bei. Ange kael kemna tep, Keluaran 14 dinkurume.} neitamai bokrapmumdi, aneitamaida, tu kalkal peipsemumdi, bisi keteneipsemume.
Tonda, Allah kandi akeca-keca yuma ketekepra deiamum taruda, ila laut mokon pumbon kwamu yu bal, er sida Naga, ^{▼▼Naga – Akeca er si tep, tonda ‘Lewiatan’ pepra sengnunge. Aupu pepka deiyoda, nun yambul walwal dinin, nun tenenupada ake. Ada, Israel nesaladi pumun taru tenerami ngeda ake. Ada, ‘Allahdi akeca-keca yuma ketekepra deiamu taruda, ila laut mokon pumbonda, ila yu bal, er si Naga, tonda, Lewiatan kuramu dinin, Allahdi im deiki mokonai cap, tuai deiki kwam mokonai cap, neitamai bokrapudi, yuk-yuk deipu taruda, (Kejadian 1:6-7), Allahdi akeca, er sida Naga pomu,’ teneramya tep, Mazmur seku ngebodi aupu seku.} er giso yuma popra, tetek singipmumdi gawal dakmume.
14 Teka, kan Allahdi, laut mokon pumbon kuramu lyom bal, er sida Lewiatan, er giso popmumpa, depka cadi, kandi er nong dopra karepmumpa, tali katawai mutu gam kuramu keca yumadi, er nong yuma jepramipa, gum kupu.
15 Tonda, me pio gumaida, kan dipapu me bungna ^{▼▼me bungna pepu ngeda – Aupu kael kemna tep, Keluaran 17:6, tonda Bilangan 20:7-11 cap, Yosua 3.14-17 cap, Yosua 4.23 cap dinkurume.} cap, embaramre me cap, ketenepra deiamsemume.
Angetopu, ila embaramu me peda, kandi peipmumpa, ame cepropupa, keana taru tep, men embaramu.
16 Allah kan dipapu, keteng komuni taru pe, lukunda taru peda, ketekepra deiamuma cadi, ataru-ataru yumada, kan puto deiki talerume.
Tonda, keteng cap, war cap, kuru cap yumada, kan dipapu ‘Aca kunkamre’ tenen, ketekepra deiamumtopu, tupa acapu kurure.
17 Ange utopu, tuai mutu ban-ban yuma neitamaida, ‘Meda aca embankamre. Tuda aca kunkamre, laut mokonda, aca deipkamre’ tenen, yuk-yuk kecada acapu dakunkamrure,’ teneamumtopu, konum keteneipmupa, tupa aceipu akurure.
Allah kan dipapu, mo cemnedi, bul kun li cap, dou mandi bupu kun li cap, kan dipapu ketekepra deiamumtopu, tupa akurure.
18 Uo, nun nai Allah Yahweh, kan tep, ‘Allahda nun songe, er tep nun dabale,’ tenenge nengdi, tupa nyek-nyek pengedi, mali upu weik tupa penungada, lumdongona gume naio. ‘Ange ka di ton cap tenepmemdi, aneng tep wenepkamrum’ tenen, moropkepe.
Teka, amali kun kecapu talepra kunge nesaladi, ‘Allahda dakwapye, er tep nun songe,’ tenenung nengda, kan pio telep si tep, mali-mali upu pepra, kan deiki derikenunge.
19 Uo, nun nai Allah, nun Israel yala nesalada, puto boun nesalapu kunupa cadi, kandi tapsemem pangeda, ‘Nun pona tep nengdi adipapu yana portamsenung’ tenen, kandi kalengkamserume naio! Ukupmantoda, bura tara kuramre ma, er si yal ma, ama puto pio bounpu kuramretopu, nun Israel yala nesalada utopu, puto bounpu kunupe. Atep nengeda, ‘Kan dipapu, nun tep lyepkamserum’ tenen, moropkepe!
Teka, nunda bung keca yala-yala yuma talena gum di, tali kan-kan nesalapu kunupa cadi, kandi nun Israel yala nesala tep, men lumdongonkamserume naio. ‘Kange di ton cap tenepsememdi, lyepkamserum’ tenen, moropkepe.
20 Tonda, kan Allahdi, “Nedi peiamsisi upu moupra taleprumudi, dumsisipu kurumupa, nedi pio telep kudinkamsene,” pepra, pedina upu deiki peiamsemum ngeda, lumdongona gume naio! ‘Angeda tupa-tupa tenememdi, nun tep melipra kalengkamserum’ tenen, moropkepe.
Ange moropmakep ngeda, tali tep gume. Deiyoda, nun mutu neitamaida, pio mali kunge neng tupa kungedi, yuk neng tep, tali lupra portamsenunge. Mali-mali weik kusenunge naio. Ange tep nengeda, ‘Kan dipapu lyepropkamserum’ tenen, moropkepe naio.
21 Uo, nun nai bo Allah, yuk mutu yu nengda, nun Israel nesala kan-kan di, ton neng tep popra yaniptapmengedi, ila ikin keca nun nong deiki derisenunga cadi, ‘Ange tenepmemdi, melipra loptapsemempa, nunda ali men dangkamep’ tenen, moropkepe naio.
Ukupsemem pangeda, nun tali kan-kan nesala cap, akeca-keca yuma putarur nesala cap, konum melipra lyepropsemem pangeda, nun yumadi, kan si tepapu, eremepedi, kan tep, “Kanda pio telepe,” pepra, kan sipu eremkamkepe.
22 Atep nun nai bo Allah, ‘Kanda menmena bukra tekromemdi, kan mawa nesala, nun Israel yala nesala tep nengeda, nun damai yana melipra lyepropserume’ tenen, moropkepe.
Tonda, kange di ton cap, ange tenenkamrume. Ada, sun mali weik kunge nengdi, kan Allah tep, ‘Erda, nun songe. Allah tep nengeda, nun dabale. Allahdi ware kupsetu do? Gume, erda tali ngebo pua’ tenen, nyek-nyek pekenung nengda, lumdongona gume naio! ‘Anengda, tupa tenepmemdi, wenepra popkamrume’ tenen, moropkepe naio!
23 Tonda, sun yu nesaladi, kan tep, ‘Allah erda nun songe,’ tenekenung nesala yumada, ila upu deiki di, mali-mali pekenunga cadi, ange peda lumdongona gume naio!
Teka kan tep, ‘Nun songe, er tep yanipkamepe,’ tenekenung nengda, ila upu di tupa-tupa mali pekenunge. Angeda, men lumdongonkamrume naio! Anengda, wenepra popkamrume!