Psa 75 | XteSC | STEP | Nimi er si Asafdi, aMazmur upu mut seku. Sekudi, Allah upu mut pena deiyo ngebo tep karepu. Asafdi pepu. “Amutda, yuk mut er sida, ‘Nun mali kunange tep, men wenepra popkamserem tenen, moropkepe’ pena mutu lelim utopu ton, amut peda penkamrume,” pepu.

Psalms 75

Allahda ila mambul puto pel dorurnge cap, nimi upu bongdina tep, telep perurnge cap tep, “Kanda pio telepe,” pepra er sipu eremkamepe pena tep upu

1 Nimi er si Asafdi, aMazmur upu mut seku. Sekudi, Allah upu mut pena deiyo ngebo tep karepu.
Asafdi pepu. “Amutda, yuk mut er sida, ‘Nun mali kunange tep, men wenepra popkamserem tenen, moropkepe’ pena mutu lelim utopu ton, amut peda penkamrume,” pepu.
2 Nun nai Allah, kan tep, ‘Kanda pio telepe,’ pepra kan sipu eremkenupe.
Nundi kan si tep eremepe taruda, yuk nengdi ton, ‘Uo, Allahdi ila mambul pel dorur ngeda, nimidi pio men kupmantonge pel dorure,’ penunge.
3 Allahdi upepu. “Nedi konum tenemsi taru yaryopda, nedi sun damai yana sun yuma tep, nimi upu bokeipkamsene. Ada, nedi, ‘Ange kunkamrume, angeda pio men kunkamrume,’ pepra deipsisi upu perurtopu, dumsisi kupra upu bokeipsenedi wenepkamsene.
4 Tonda, ne tenemsi taru konum yaryopda, tuai mutu ban-ban yuma longkamre. Ukupyopda, nimi tuai nesala yumadi, epmengedi, ‘Uo’ tenen, kware weik kunkamenge.
Ukupkamne dinino, tek sisi ne dipapu, ‘Tuai mutu long-long peprur’ tenen, tuai amutara deipsi ngeda, pio puto kepra deipsi.
5 Tonda, ne Allahdi sun balila kupra, gemenung neng tep, “Sunda balila kemna cap, salnong-nong upu pena capda, pio meme. Angeda tupa men penkamrume,” pepsi.
Tonda, nedi, ‘Ange kunkamrume, angeda pio men kunkamrume,’ pepra deipsisi upu yaniptapmenge neng tep nengeda, nedi pepsi. “Sun pedi, sun pe tepapu, ‘Nunpuda ila puto neng kunupe,’ pepra, dipru men erepdankamrume.
6 Angetopu, sun salnong-nong kamrum deiyo-deiyo nengdi, ‘Nunpuda, ila puto neng kunupe,’ pepra, gemena meme,” pepsi.
Tonda, sunda gemenapu kurumudi, ‘Nunda pio telep neng, puto weik neng kunupe,’ pepra, salnong-nong penada yapkurume. Ato upu penada pio meme,” pepsi.
7 Allahdi upepka tep, ne aMazmur upu sekman ngebodi pepsene. Allahdi ange peipseua deiyoda ake. Ada, nun ikin kusere taruda, nun melipra lyemna deiyo ngeboda, keteng yakan tara di men yankamsere. Tonda, keteng dangbaramre tara di men yankamsere. Angeda pio gume.
Ange utopu, ikin kuserenge neitamai di lortamna cap, lyemdona cap tep deiyo ngeboda, dapu mutu di men yankamsere. Tonda, iknapi dam tara di men yankamsere.
8 Teka, tuai mutu neitamai dana-dana tara yuma di, nun melipra lyepsetua deiyo ngeboda, men yankamre. Ange gum dinin, nun kunup keca tep, upu bokeipkamsera deiyo ngeboda, Allah er dipapu upu bokeipseredi, menenga keca karenkamsere.
Ada Allah er dipapu, ton ngebo wenepredi amutarapu deipkamre. Ton ngebo tep, ‘Telepe,’ pepre dingeda, angebo erepra telep kweipkamre. Yuk ngebodi gume. Allah er ja!
9 Ukupmantoda, nimidi ila kailya kalepmengedi, ‘Jen keca lukra, nimi yuma tep bokra karerbenkup’ tenen, ila pala keca deiki jen keca yala-yala yuma deipmengedi, bokra karerepembarameng utopu, Allah er peda utopu konum ketenepmare.
Deiyo neitamai ngeda, nun nai Allah Yahweh, er dipapu nun tuai nesala yumadi kuramepetopu tep, upu bokeipseredi, menenga keca cap, wenemna keca cap karenkamsere. Ukupmantoda, nimidi kange yawaramre yu me karepmengepa, akeca jenge neng, ikin pu jeramretopu, Allahdi nimi tuai nesala mali kunge keca tep, upu bokeipkamser taruda, ila ikin wenemna keca bokra karenkamsere.
Tonda ukupmantoda, nimida me mau di me gwepmengedi, adipapu ame dingtamamengtopu, Allahdi nimi tuai nesala yuma tep, upu bokeipkamre. Tenpunge peda men tapkamre.
Atep nengeda, sun mali kun kecapu talepra kunge nesala yuma tep, sun wenemna tep, Allahdi ila kange mun keca karepre pangeda, sun yumadi ange dopropkamenge.
Teka, nimidi tenpu me mau, er si cangkir dopra ame jepmengedi, gawal dangamengtopu, Allahdi sun mali kunge nesala tep, ila kange mun wenemna keca karepyopda, anengdi ange yuma dopropmengedi, weik ikin kange doupra kunkamenge. Tenpunge peda, men taptenge.
10 Dinino, ne aMazmur upu sekman ngeboda, nun nai bo Allahdi apel donkamrenge tep, ila upu deiki di, ‘Kanda pio telepe. Atep, pio mambul pel doserume,’ pepra, tupa-tupa er sipu eremkamne ja!
Teka, nun apu bo Yakubdi si eremamu Allah tep, nedi ton, ‘Kanda pio telepe,’ pepra, er sipu pio eremkamne ja.
11 Sun ila nimi deiyo-deiyo kunge neng yumada, sun cap, sun puto deiki di talerami keca cap yumada, Allahdi akeca yuma gum kupra deipkamre.
Ukupmantoda, ila sapi bisam er giso deiki ingamre takke kecada, ‘Angedi popserur’ tenen, nimidi sengtamamengtopu, Allahdi sun mali kun keca talepra kunge deiyo-deiyo neng tep, wenepredi, gum kupra deipkamre.
Dinino, sun dumsisipu kunge nimi deiyo-deiyo nengda, Allahdi, ‘Angeda kunkamrume, angeda pio men kunkamrume,’ pepra deipseu upuda, pio moupra gekeramidi, teleppu kuramya tep nengeda, Allahdi aneng erepredi, telep kweipre pangeda, yuk nesala yumadi, aneng tep gispal donkamenge.