Psa 76 | XteSC | STEP | Allah upu mut pena deiyo ngebo karena tep, nimi si Asafdi seku. Asafdi, “Amutda, alat musik tapu di lelim pen keca, er sida kecapi deiki di penkamrume,” pepu.

Psalms 76

“Sion mutu tep Allah upu mut penkamne,” pepu upu

1 Allah upu mut pena deiyo ngebo karena tep, nimi si Asafdi seku. Asafdi, “Amutda, alat musik tapu di lelim pen keca, er sida kecapi deiki di penkamrume,” pepu.
2 Yehuda tara kunge nesala yumadi, Allah tep konum kael keami. Ange utopu, Israel yala nesala yumadi, Allah tep, “Erda pio telepe,” pepra, er si eremnunge.
3 Allahda keana taru ^{▼▼keana taru – Aupu deiyoda, ake. Ada, pumun taruda, Allah Yahwehdi, “Yerusalem mutu neitamaida, ne si eremna ati dopkamrume. Dopmumnyopda, ne Sambala yana akati pumbon, Pio Telep Lengna Ati neitamai, aceipu keana tep kunkamne ja,” pepka tep, Asafdi ange seku.} tep, Yerusalem mutu kurure.
Teka, er keana taru tep kururaida, Sion ^{▼▼Sion – Yerusalem mutu si penupada, ada ukutaru di amutu tep asi penup dinin, pumun taruda, sun Ibrani nesaladi Sion mutu, tonda Salem mutu perami. Amutuda tenpu dinin, amutu si tep, si weneri perami.} mutu neitamaipu kunkamre.
4 Yerusalem mutu neitamai di, nun pona tep nengdi mar dopra uku sekidi, dokotepsei dinin, Allahdi auku jen mar yuma gum kupra deipu. Tonda, nun pona tep jen talena nengdi sun nong lelimna tep talepi perisai cap, tonda sun nimi pona tep parang ya cap, yuma dopra, sikke buktapudi, gum kupra deipu.
5 Uo, nun nai Allah, kanda pio teleppu kuruma cadi, kan dirineda, pio weike kukerure. Tonda, pumun taru bungamu ila mutu-mutu yuma tep nengeda, ‘Angeda pio mambule’ tenenup dinin, tek sisi angeda yambulanun pua, dinino, kan telep kuna cap, ila puto kuna cap, kurum ngeda, pio men nukmanto, kanda pio teleppu kurume.
6 Nun pona tep nengda, pio kware tenena gum, balila weik kuramidi, yana popeterepsei dinino, kandi melipsemuma deiki di, aneng popmepudi, aneng yumada, talerami keca yuma dalupra dopropmepu. Aneng yuma konum popra gawal dakmupka cadi, sunda kange di ton cap men gam bukamenge. Konum depropi.
Teka, sun cap podanmapu taruda, sunda kan Allah tep kware weik kupupa, sundi, ‘Uo, ware kuptepe do?’ tenen, tenimtonapu kunmaia cadi, sun buru puto gum kupupa, nimi pon keca men talepmanto kunmaidi, nun pona tep men kupmanto kupi.
7 Uo, nun apu bo Yakubdi, si eremamu Allah, kandi nun pona neng tep, sun tep ila puto di wenepmuma cadi, sun jen talena neng kuda bisam deiki bukra yakarami neng cap, aneng sun kuda bisam yuma capda, kandi melipsemuma deiki di, popnapu kupmupupa, sun yumada, popra gawal dakmepu.
8 Ange tep nengeda, nun nai bo Allah kanda, nimi yumadi, kan tep kware weik kunkamepe. Kandi nimi tuai nesala yuma tep, upu bokeipsememdi, ila yu deiki di wenepkamserem taruda, ware ngebodi tupa tektu do? Gume tuai nesala yuma neitamai di, tenpu ngebo peda, men tektu.
9 Gume, kanda im deiki kurumai di, kan Allahdi, “Sun tuai nesala yumadi mali kurumnge tep, ukupra-ukupra wenepkamsene,” pepra, upu bokeipsemum taruda, nun tuai mutu neitamai kunup nesala yumada, ila kware weik kupseupa, upu pena gum dipapu, dim peprapu kunupu.
10 Ada, kan Allahdi, ‘Sun tuai nesala kankan dinin, yuk nengdi sun nong deiki ikin keca weik deipmengepa, sun kange dipru pio bounpu kunge nesala tep, nedi melipra lyepropkamne,’ pepmum taruda, tuai nesala yuma gekepidi, kware pio weik kupupa, dim peprappu kupmepu.
11 Teka nun nai Allah, kan tep pio yu tenepmengedi, ‘Allahda nun songe,’ tenekenung neng peda, kandi sun tep wenepmemdi, popmemnyopda, sun aneng peda, tamupra yana kan tep, ‘Uo, tek sisi Allahda, pio puto weik ngebo, tonda, pio telep ngebo kurure,’ pepra, kan si eremkamkenge.
Teka nun nai Allah. Kan tep, ‘Nun songe,’ tenekenung neng, amenda taru tupa gam kunkameng neng peda, siryada sun pedi yana, kan tep, ‘Allahda pio telepe,’ pepra, kan si erepkengedi, gispal donkamkenge.
12 Ange tep nengeda, nun Israel nesala yuma ketenepkamepe! Nundi si eremnup ngebo, nun nai bo Allah Yahweh tep, “Naio, kan gispal dona tep, angeda ukunkamkene, angeda ton ukunkamkene,” pepra, pedina upu deiki di penkamepe.
Tonda, ange penkameptopu, men tapkamepa tep, tek sisi nong kupkamre. Atep, ‘Ware mutu nesala do yuma, Allah damai yakankameng nesala yala-yala yumada, nun nai Allah gispal dona tep, telep karen keca doupra, er damai duyankamepe.
Ada, nimi men kupmanto keca, ila puto kunupsek pen pel dorur ngebo, nun nai Allah tep, telep karen keca ketenepra doupra, er tep kareryakankamepe! Er tep nengeda, kware weik kuserure!
13 Ada, nun nai Allahdi, nimi tuai nesala, sun ila nimi deiyo-deiyo kepra kunge nengda, salnong-nong kamnung dinin, adeiyo neng yuma peda, wenepredi amutarapu kepra derirure. Er tep nengeda, sun kware weik kurepa, kange mun kange doununge.
Teka, Allah er dipapu, ila nimi deiyo kepra, tuai nesala ban-ban yuma talepra kunge Raja-Raja neng peda, Allah tep tenepmengedi, kware pio weik kuprepa, sun nong yuma moropsemnunge.