Psa 77 | XteSC | STEP | Nimi si Asafdi aMazmur upu mut sekudi, Allah upu mut pena deiyo ngebo tep karepu. Tonda, Asafdi pepu upuda ake. Amut er lelimda, yuk mut, er sida Yedutun lelim peramnuptopu kupra, amutu peda utopu penkamrume.

Psalms 77

Ikin weik kuramupu taruda, Allah er puto di meliamseunge tep pepu upu

1 Nimi si Asafdi aMazmur upu mut sekudi, Allah upu mut pena deiyo ngebo tep karepu. Tonda, Asafdi pepu upuda ake. Amut er lelimda, yuk mut, er sida Yedutun lelim peramnuptopu kupra, amutu peda utopu penkamrume.
2 Ikin weik kunerur taruda, ‘Ne nai Allah, kanda akeca-keca talememdi, kan ila puto deiki di, ‘Kan dipapu yana melipra lyepnetum’ ila upu deiki di moronune.
Ada, “Ne nai Allaho, ‘Kan dipapu yana melipra lyepnetum’ tenen, moropkene,” pepra moronune.
3 Teka, ne ikin keca kunere taru neitamai yumada, nun nai Allahdi, akeca-keca yuma talepra, deiki tara erepra, ila puto weik ngebo kurura cadi, ‘Er dipapu lyepnetu’ tenen, er tepapu moronune.
Lukunda neitamai yumada, beipye peingna gum dipapu, ne buru bepekra erepnedi, ‘Ne nai Allahdi melipkamner’ tenen, tamna gum di, er tepapu moronune.
Ne dipru buluksakneua cadi, yuk nengdi, ‘Nun kapda ikin kurura cadi, nundi er dipru kwa dipkamepe,’ tenen, pirirpetenenung dinin, neda kange deipra pio men kutene. Tupa kange mun kange doupra kunune.
4 Ataru neitamaida, nun nai Allah tep, tenipetepnedi, tupa engepra ngolongnune.
Allahdi melipra pel doserur keca tep tupa tenipnedi, ne kange dipru neitamaida, pio puto bounpu kunerepa, men kupmanto kunune.
5 Ne nai Allah, kandi ikin keca kareneruma deiki di, lukunda taru neitamai men mapmanto kunune.
Tonda, pio kange mun kange doupra kununa cadi, upu tenpunge peda men peptene.
6 Dinino, pumun taru kwamu keca yuma kange di ton cap tenenune.
Teka, menop taru kwamunge cap, kandi dorkuramupu keteng tamun di, mambul pel doramumnge cap tep, tupa tenenune.
7 Ukupne dingeda, lukunda taru neitamai yumada, tenenapu kunune.
Ada, ‘Uo, Allahda, dan cei kunmar do?’ tenen, ne kange dipru neitamai yumada, pio asimterenapu kunune.
8 ‘Ne nai Allah, akeca-keca taleredi, ila puto weik ngebo kurur dinin, ne tep pio kaukepnapu kupneredi, men melipkamner do?’
Akeca-keca yuma talepra, deiki tara erepra, ila puto weik ngebo ‘Allahdi, ne tep kange di ton cap pio bicau men tenenkamner do?’ tenenune.
9 Allahdi, nun tep, ‘Ila di bicau tenesenedi, pio telep kupra derinkamsene,’ pepra pedina upu deiki di peiamseu ngeda, konum tapseua cadi, amenda taru peda pio men melimkamser do?’ tenenune.
Ada, Allahdi nun tep, ‘Ukupra-ukupra telep kudinkamsene,’ pepra, pedina upu deiki di peiamseunge yumada, konum tapseua cadi, doryankamser taru neitamai yuma peda, pio men melimkamser do?’ tenenune.
10 Deiyoda, ‘Allahdi bicau teneseredi, telep kupra melimserur ngeda, konum lupropka tep, ange tupa men tenenkamre do?
Agum dingeda, nun mali kunange tep, yu kupka deiki di, ‘Nedi sun tep tupa bicau tenepra men melimkamsene,’ tenepra, konum tapseu do?’ tenenune.
11 Ukupra tenepne dingeda, nedi upenune. “Uo, akeca-keca talepra, deiki tara erepra, Ila Puto Eremna Ngebo kurur Allahda, er dumsisi tara buruda, ila puto weik kuramu dinin, ukutaru konum puto bounpu kunmar do?’ tenepnedi, ne kange mun kange doununa deiki di, ne dipru bulungsangnerure.
12 Men kupmanto kununa cadi, Allah Yahwehdi, nimi men kupmanto keca pel doramseu ngeda, kange di ton cap tupa tenenapu kunkamne.
Tonda, pumun taru nun Israel nesala tep, ila puto weik keca melipra pel doramsemum ngeda, ka di ton cap, tenenapu kunkamne.
13 Teka, kandi melipra kuramsemum nge yumada, moupra tenimpetenkamne.
Tonda, ila puto deiki di, nimi men kupmanto keca deiki meliamsemumdi, pel doramsemumnge yuma peda, pio moupra tenenapu kunkamne.
14 Uo nun nai Allah, kandi kurum keca yumada, mali kunange pio gum di, pio dumsisi telep pelpu doserume.
Yuk ngebodi, tenpunge peda, kandi dumsisi pel domemnya utopu men doptue! Nundi si eremkenup Allahda, kan tenpua. Yuk Allah ton pio men kurura cadi, kan utopu ngebo ton, tek sisi pio men kurure. Kanda Allah tenpu kurume.
15 Nimi pio men kupmanto keca pel dorur Allahda, kan tenpua.
Tuai mutu ban-ban yuma neitamai kunge nesala, sun dinunga kan-kan di, kan ila puto deiki di nimi men kupmanto keca, ila puto weik pel konum doramumpa, nimi yumadi konum dirami.
16 Allah kandi, ‘Ne mawa nesala ake’ tenen wepsemum Israel nesala tep, kan ila puto buru deiki di, nun ikin kuramepunge neitamai di konum melipra lyepsemume.
Ada, nun apu yapu Yakub cap, Yusuf capdi deiamreipa, dadeipdanen yakaramepu neng, nun Israel nesala tep, melipra lyepropsemuma tep pepkene naio.
17 Ila laut mokon di, kan Allah tep epkeu taruda, kware weik kupupa, mokon yuma moropsepu. Ukupmantoda, nimi pu weik jeprepa, nong yuma moropsemnungtopu kupu.
Teka ataruda, ila laut mokon Teberau ^{▼▼Teberau – Di Alkitab Ibrani neitamai di, laut si ‘Teberau’ men seki dinin, nun tenepmupkada, ‘Israel nesalada, Mesir mutu neitamai di sepdara bendopi taruda, Allahdi laut mokon Teberau bokeipu taru tep, pepka,’ tenepmupu. Tonda, ayat 20-21 ton dikurume.} kan Allah tep epkeu taruda, alaut mokon karu neitamai yuma di moropsepnapu kupu.
18 Ataruda, dua neitamaida, mo pio weika di cepu. Tonda, kulman lelim weik kupu.
Kulman pepu taruda, amutu dana-dana tara yumada, pereng lang pereng lang penada, weika di ton pepupa epi.
19 Ila puto kumanya yau taruda, bopatekra kupupa, amutu paramu keca yuma jenmaudi, perenglang pereng lang penmaupa, amutu yuma dirin weik kupudi, ila kulman popudi, lelim ton pepu.
Ange yuma ukupka tep, ataruda tuai mutu ban-ban yumada longnadi, long-long pepupa, moropsepnapu kupu.
20 Ataruda, kandi lyepropsemumdi, ila laut mokon neitamai di, telep bisi keteneipsemume.
Teka, aila laut mokon puto neitamaida, kandi nun telep bisi bana tep, katuai keipsemumdi, dubesemume. Dinino, kandi akalkal pemu tu deiki yanipra embemumaida, katuai gum tep, nimidi men dirami.
21 Ataruda, kandi kan mawa Israel nesala tep, menepra dubaramumpa, nun apu yapu yumada, kan amnyo tarapu dombarami. Ada, domba bisam peina deiyo nengdi, sun domba bisam dubaramengtopu kandi nun Israel nesala yuma tep, dubenamsemume.
Ada, kan pel doramrei neng, Musa cap, Haron capdi, menepra dubaramreipanen, nun apu yapu yumadi, sun amnyo tara dombaramipa, kan Allah ila puto deiki di lyepropsemume.