Psa 78 | XteSC | STEP | AMazmur upu seku ngebo, er sida Asafdi, peteremna mut upu seku. Asafdi pepu upuda, ake. Uo, ne yala nesala, sun Israel yala nesala yumada, ne pepkusen upu moupra gekepneso! Ada, ne sipyal deiki pepkusen upuda, moupra gekepkunerume!

Psalms 78

Allahdi Israel nesala tep, pio telep kupra meliamu dinin, sunda mali-malipu kuramya tep pepu upu

1 AMazmur upu seku ngebo, er sida Asafdi, peteremna mut upu seku. Asafdi pepu upuda, ake.
Uo, ne yala nesala, sun Israel yala nesala yumada, ne pepkusen upu moupra gekepneso!
Ada, ne sipyal deiki pepkusen upuda, moupra gekepkunerume!
2 Nedi, ukupmanto upu utopunge dinin, er sida amsal deiki, aupu pepkusene.
Nedi pepkusen upuda, menop taru di peramneipa gekeramsa tep, menmena kanam dipapu men gekepkurume. Moupra gekepterepmum dingeda, ‘E, deiyoda ake,’ tenen, kael kepkamrume.
3 Nun apu yapu nengdi, peramsei upuda, konum men di gekeramupka cadi, angeda, konum kael keamepu.
4 Atep, nundi deiamepu nyapu peda, gekepkameng’ tenen, lap pepmepepa, nun nyapu sisadi ton gekenkamenge.
Tonda, ‘Nundi deiamepu nyapudi deipmengepa, dadeipdanen bankameng nesala peda, gekenkameng’ tenen, aupu yuma lap penapu kunkamepe.
Ada, nun nai bo Allah Yahwehdi, pio telep kupra pel doramunge cap, er ila puto di pel doramunge cap, tonda, er puto deiki di kunupsekpen pel doramunge capda, lap penkamepe.
5 Ton ngeda, ake. Allahdi, nun apu bo Yakub tep, “Ange kunkamrume, angeda pio men kunkamrume,” pepra, mem upu pepra deiamupa, Yakubdi gekepu.
Gekepka cadi, nun Israel nesala, yala-yala yuma tep, Allahdi, amem upu pepra deiamseupa, “Ukunkamrume,” pepka tep, aupu tupa akurure.
Menop taruda, Allahdi nun apu yapu yuma tep, “Ange kunkamrume, angeda pio men kunkamrume,” pepra deiamu. Tonda, “Amem upuda, sundi deipbankamrum nyapu tep, aupuda lap pepnapu kunkamrume,” pepu.
6 Ada, Allahdi amem upu peipu taruda, ataru gam kurami Israel yala nesalada, sundi deipkameng nyapu kapul men deiamya cadi, Allahdi, “Sun amenda taru derinkamrum nyapu peda, ‘Aupu kael kepkameng,’ tenena tep, “Amem upu dopra pio peterembankamrume,” pepra deipu.
Ada, ataru gam kurami nengdi, kapul men deiami nyapu dinin, ‘Sundi deipmengepa, dadeipdanen bankameng nyapu ton kael kepkameng’ tenen, pepu.
Tonda, anengdi amenda taru derinkameng nyapu peda, ‘Sundi ton dadeibankameng nyapu tep, aupu lap pepmengepa, kael kepkameng’ tenen pepu.
7 Ada tali tep gum dinin, deiyoda ake. Ada, sun amenda taru gam kunkameng Israel nesala yala-yala yuma peda, sun nai bo Allah tep, ‘Gume, Allah er dipapu nun tep, melipra lyepsetudi telep kweipsetue,’ tenepmengedi, er tep teka tenepmengedi, sun kange dipru er deikipu derinkamenga tepa.
Tonda, ‘Sun amenda kunkameng Israel yala nesala yumada, Allahdi ila mambul pel doramunge yuma tep, men lumdongonkameng’ tenen, aupu peipu.
Tonda, sun amenda kunkameng Israel yala nesala yumada, Allahdi, “Ange kunkamrume, angeda pio men kunkamrume,” pepra deiamseu upu, pio men lupronkamenga tep, aupu peipseu.
8 Ton deiyo ngeda ake. Ada, ‘Amenda taru gam kunkameng Israel yala nesalada, sun apu yapudi, mali weik kuramitopu, men kunkameng’ tenen, aupu peipseu. Ada, menop taru kurami Israel yala nesalada, pio balila kuramidi, Allahdi peiamu upu men gekepmanto kurami.
Ukuramidi, ‘Allahdi peipseu upuda, nun songe’ tenen, erdi peiamu upu yuma yanitamnapu kuramidi, sun pe kange di teneramingepu kurami.
Tonda, sun menop taru kurami Israel nesalada, sun kange dipru neitamaida, Allah tep, tupa-tupa teka men tenepra kurami. Sunda, ton taruda, teka teneramnanen, amenda taru dorkupban dingeda, ka di ton cap, Allah tep, teka tenena gum di, tamnapu kurami.
Sun kange dipru neitamaida, ‘Allahdi, “Ange kunkamrume, angeda pio men kunkamrume,” pepra deiamseu upuda, pio moupra talenapu kunkamepe,’ men tenerami. Atep, Allah tep tamamidi, yuk tali keca tep, “Nun nai bo ake,” pepra, isok sipu eremami.
9 Ukupmantoda, Israel neng dinin, sun Efraim yala nengda, ‘Allah melipserya deiki di, nun podan neng tep, mar porbenkamep,’ tenepi.
Dinino, sundi amar podan taru neitamaida, kware kupupa, amnyo karikra sepdara bendopi.
10 Tonda, Allahdi, “Ange kunkamrume, angeda pio men kunkamrume,” pepra deiamseu mem upu cap, tonda Allahdi, “Sunda ukupkamrume, ukuprumupa, nedi pio telep kudinkamsene,” pepra, pedina upu deiki peiamseu upu capda, ange yuma yanitamnapu kurami.
Ada, Allahdi, “Ange kunkamrume, angeda pio men kunkamrume,” pepra deiamseu mem upuda, moupra men taleamya cadi, sunda mali-mali weik kurami.
11 Tonda, Allahdi, sun melimna tep, pel weika di melipra doramunge yumada, sunda lumdongonapu kuramidi, akeca yumada pio men tenerami.
Ange utopu, Allah er puto di pio kunupsek pen pel doramunge yuma peda, lumdongonapu kurami.
12 Teka, anesala sun apu yapu tupa gam kurami taru neitamai yumada, Allahdi, ila puto weik kunupsek pen pel doramupa, ataru gam kurami neng, sun pe asuru di dirami.
Ada, Mesir mutu neitamai dinin, amutu sida, Zoan ^{▼▼Zoan mutu – Amutu neitamaida, sun Mesir mutu nesaladi, sun jen keca weika di bulupra ‘Mawa deipkamep’ tenen, dupra yana derirami. Tonda, Israel nesaladi, Mesir mutu tapra, ‘Kanaan tara benkamep’ tenen, bendopi taruda, Zoan mutu tapra benmaipa, Allahdi ila laut mokon, er sida Laut Teberau me bokra deipupa, sunda tu kalkal pepka deiki yanipra ortara sepdara bendopi. Aupuda kael kemna tep, Keluaran 1:11 dinkurume.} mutu damai di, ila mambul kunupsek pen pel domunge peda, men teneramidi, konum luprami.
13 Ada, ila laut mokon er sida, Laut Teberau, me neitamai di bokropupa, alaut mokon me yumada, butene kepra, tekrapudi, dim pepnapu kupupa, sun Israel yala nesalada, daneitamai di, tu kalkal pepka deiki yanipra bendopi.
Ukupmantoda, nimidi, ila pala gel weika di dopra, tenpaipu dopra, weika di yakra deriramengtopu, Allahdi alaut mokon ^{▼▼laut mokon me – Aupuda, sun kael kemna tep, Keluaran 14:26-31 dinkurume.} me yuma dopra, butene keipupa, ameda tekra dim pepnapu kupudi, saka men embendanmanto kupu. 14 Tonda, Allahdi, Israel yala nesalada, ‘Ortara mutu bana tep, abisipu benkamep,’ tenepmengedi, ‘Kael kepkameng’ tenen, ataru neitamai yumada, keteng komuni taruda, ila dua ^{▼▼dua – Aupu kael kemna tep, Keluaran 13:20 dinkurume.} karepupa, mepra banmauai bisipu, sunda amenda tara melipra barami.
Ange utopu, ataru lukunda neitamai yumada, lukunda neitamaida, ila uku bu karepupa, ila lyom co tengamretopu kupra deipupa, sun Israel yala nesala tep, melipra kalengamu.
15 Tonda, ‘Kanaan tara mutu benkamep’ tenen, pio katawai mutu neitamai embarami taruda, nimi cap, me cap pio gum mutu cadi, sunda me putapu taruda, Allahdi ila mutu bungne gel neitamai di bokropu.
Aila gel ^{▼▼gel – Aupu kael kemna tep, Keluaran 17:1-6 cap, Bilangan 20:10-13 cap dinkurume.} neitamai bokropu pangeda, me weika di embaramupa, sun Israel nesaladi ame gwepra jerami. Ada meteka di gume. Me weika di embaramnga cadi, ukupmantoda, nimidi ila mokon neitamai me gweramengtopu, kurami.
16 Teka, Allah er puto deiki di, pel dopka cadi, ila mutu bungne gel neitamai di, ila me pakra embaramupa, sunda ame dam yana gwepra jerami.
Teka, ameda yambul me gume. Agel neitamai di, ila me embaramutopu, kupra karepupa, agel neitamai di, ila me embaramupa, amepu gwepra jerami.
17 Allahdi, ‘Sun Israel yala nesala melipkamne’ tenen, akunupsek pen pel weika di, doramu dinin, sundi kange di ton cap, ‘Allahda nun dabale. Er upuda men gekenkamep’ teneramidi, Allah tep mali-malipu ^{▼▼mali-mali – Aupu kael kemna tep, Keluaran 16:1-3 cap, Bilangan 11:4-6.cap dinkurume.} kurami.
Allahda, ^{▼▼Allah – Acada, Ibrani upu deiki di, Allah er si tep, ‘Allah Elyon’ pepra seki. Aupu deiyoda, sun kael kemna tep, angeda konum jenek kupra sekmepu.} akeca-keca yuma talepra deiki tara kuredi, Ila Puto Eremna Ngebo kurur dinin, sundi, ‘Allahda nun songe cadi, er upuda men gekenkamepe,’ peramidi malipu kurami.
Allahda, akeca-keca yuma deiki tara kuredi, akeca yuma talepra, ila puto weik ngebo ^{▼▼puto weik ngebo – Akayat neitamaida, Ibrani upu deiki di, Allah er si tep, ‘Elyon’ pepra seki. Aupu ‘Elyon’ pepinge er deiyo neitamai ngeda, sun kael kemna tep, jenek kupra sekmepu. Ada, ‘Allahda, akeca-keca yuma deiki tara kuredi, ila puto weik kure deiyo ngebo kurure. Yuk puto kure keca yumada, er amutarapu kurure,’ tenena tep, ‘Elyon’ pepra seki.} kurur dinin, sundi, ‘Allahda nun songe cadi, er upuda men gekenkamepe,’ peramidi malipu kurami.
18 Tonda, sundi, ‘Uo ajen keca cap, tonda ayala jen keca capda, pio putapsera cadi, ‘llah kandi, adipapu nun putapser kecapu karenkamserume, pepra,’ sun kange dipru neitamai teneramya deiki di, Allah tep piripetererami.
Ada, sundi, ‘Allahda tek sisi puto weik ngebo kurur do, gum do? Er puto di nun putapsere keca tek sisi karepsetu do? Gum do?’ tenen, sundi, ‘Tu kecapu ^{▼▼tu keca – Aupu kael kemna tep, Keluaran pasal 16 yuma dinkamrume.} karepserume!’ pepra, Allah tep piripeterami.
19 Ada, sun ataru kurami Israel nesaladi, Allah tep nengeda, ‘Nun putapsere keca yumada, tek sisi Allahdi karepsetu do? Gum do?’ tenen, er tep mali upu perami.
Ada, sundi, “Gume, yuk nesala pio men kunungai, ila katuai mutu neitamai kunmapa cadi, Allahdi nun putapseretopu, telep jen keca weika di, karepsetu do? Gum do?’ tenerami.
20 Sundi uperami. “Dyo, Allahdi, ila mutu bungne gel popupa bokropudi, agel neitamai di ila telep me embaramupa, gwepra jeramepu.
Dinino, Allahdi tek sisi roti kwaneng cap, tu keca cap karepsetupa jeptepe do? Nun kangeda, ange men kupsetue,’ tenepmepe,” peramya deiki di, Allah tep pirirpeterami.
21 Sundi Allah tep mali upu peramya cadi, Allah Yahwehdi, sun Israel yala nesala yuma tep, mali kange dopudi, sun tep deremamu.
Teka, ataruda, Yakubdi deiamupa, sundi dadeipdanen yakarami nesala yuma tep, Allahdi yu weik kupu.
Ukupmantoda, ila uku jeramredi, bupu weik kuramretopu, Allahdi Israel nesala yuma tep, yu pio weikanun ton cap tapakra kupu.
22 Allahdi yu weik kupkada, ake. Ada, sun Israel nesala yumadi, er tep, teka men teneramya tepa. Sundi, ‘Allahda nun putapsere keca yumada, er puto deiki di melipra karepsetue,’ men teneramya tep, Allahdi sun tep yu weik kupu.
Tonda, sundi, ‘Gume, Allahdi tek sisi lyepsetu do, gum do? Men kuptu do?’ tenen, tenimtonapu kuramidi, teka men teneramya tep, Allahdi yu kupu.
23 Sun Israel nesaladi, Allah tep teka men tenerami dinin, Allah er upu pepka deiki di, im deiki buplan utopu keca pakeipudi, jen keca weika di karepu.
24 Ada, im deiki kuramre jen keca, er sida mana ^{▼▼mana – Aupu kael kemna tep, Keluaran pasal 16 yuma dinkamrume.}, karepupa, im deiki di mo cemamretopu kupra, im deiki jen keca, roti kwaneng utopunge, er sida mana, sangnapu kuramu.
Teka, ada im deiki kuramre jen keca, yambulanun gandum utopu ngeda, er sida mana, Allahdi dopra sun Israel nesala sun jena tep kareamupa jerami.
25 Tek sisi amana kwanengda, im deiki kunung malaikat nengdipu jenung dinin, ataruda, sun tuai mutu Israel tara neitamai depkameng nesala peda, akeca dopra jerami.
Allahdi sun tep kareramu jen kecada, meteka di gume. Jen keca denge pio weika di kareramupa jerami.
26 Tonda, Allahdi, keteng yakan tara di yakare kumanya tep, “Pung pepkurume,” pepka cadi, akumanya puto di Israel nesala deiki puramupa kurami.
Tonda, Allahdi kumanya tep, “Pung pepkurume,” pepupa, er puto deiki di, dapu tara ila puto kumanya ^{▼▼kumanya – Aupu kael kemna tep, Keluaran pasal 16 cap, Bilangan pasal 11 cap yumada dinkurume.} peda, pung peramu.
27 Allah er puto deiki di, akumanya butene karepupa, akumanya butene im neitamai di puramnga cadi, tu kecada pio weika di sangamu. Ada, tu butbuta pio weik, men nukmanto kuramretopu, tu keca pio weika di kareamupa, im neitamai di sangamu.
Akumanya di dubaramu kecada, yal ma urasin utopu ma dopra dubaramupa, sun Israel nesala kurami mutu neitama sangamu. Ada meteka di gum dinin, laut mokon pirmanai, me wenenga er sida pasir, pio weik, men nukmanto kuramretopu, ama peda weika di sangamu.
28 Allahdi, ‘Ukupkamre,’ tenemutopu, ama yumada, kumanya di dubaramupa, Israel nesala kurami mutu neitamai sangamu. Ada, keana taru tep, opkal bol di domi ati, er sida tenda ati damai sangamupa, sundi ama dopra jerami.
29 Ada, sun Israel nesaladi, “Ange-ange putapsera cadi, angepu karepsetue,” pepra, mororami kecada, Allahdi konum kareamupa, aroti cap, ama cap dopra jeramipa, sunda pio konum bouramu.
30 Sunda, akeca pio weika di jerami dinino, men boupmaudi, tupa putanmaupa, jen jenmai taruda, ‘Nun konum boupmasere,’ men tenepidi, akeca-keca tupa jenmaipa, sun sipyal pumbon tupa kupmau taruda, ikin keca sun damai yau.
31 Ada, ajen keca tupa jenmai taru neitamaida, Allahdi sun tep ila yu kupupa, wenepu.
Allah er yu weik kupupa, sun Israel nesala kankan neitamai, nong puto weik kurami nengda, pio weika di popra gawal daku.
Teka, ada Allahdi, Israel yala nesala wenemna tep, sun kankan dinin, nong puto weik neng cap, kaber neng ^{▼▼kaber neng – Aupu kael kemna tep, Bilangan 11:31 dinkurume.} sun wisi kapul men deiami neng cap yumada, popra gawal daku.
32 Allahdi, ‘Anesala tep, ikin keca karepnyopda, sun mali kunge keca kael kepmengedi, tapkameng,’ tenepu dinin, Allahdi ila kange mun wenemna keca karepu dinin, sun Israel nesalada, tupa-tupa pio mali-malipu kupbaramidi, Allah tep yanitamnapu kurami.
Ada, Allah er puto deiki di, ila kunupsek pen pel cap, nimi men kupmanto pel cap doramu ngeda, teka men tenerami.
33 Sundi malipu kuramya tep, Allahdi, ‘Keteng tamun weikanun ton gam men kunkamenge,’ tenepupa, menmena denapu kuramidi gawal dangami. Ukupmantoda, nimi tenpu isin dim peprepa, adipapu deramengtopu, Allahdi sun gam kuna deiyonge dodoramupa, menmena derami.
Tonda, sun gam tupa kurami taruda, kwar kun keca weika di kareamupa, sunda, ‘Uo ware kupkamser do?’ tenen, kwar weik kwamupa kurami.
34 Ataru yuma neitamaida, Allahdi sun Israel nesala weika di poramu taruda, sun tupa gam kurami nesaladi, ‘Uo, Allahdi melipra lyepsetu do?’ tenen, kange di ton cap, er tep mororami.
Tonda, sundi, ‘Uo, nun mali-mali weik kuramepu ngeda, tapkupe,’ tenen, mali weik peramidi, ‘Allah er dipapu lyepsetu’ teneramidi, ‘Allah er damai tamupra bena kunkamep’ tenen, er tep mororamidi, ‘Dan cei di Allah cap kikiman kutepe do?’ tenenapu kurami.
35 Sun ikinpu kurami taru neitamaida, ‘Uo, tek sisi Allahda, nun puto kareserur ngebo cap, sun melipra kalengna deiyo ngebo kuserure,’ tenerami. ‘Ukupmantoda, Allahda ila mutu bungne gel utopu kuserura cadi, er damaipu telep kuptepe,’ tenerami.
Tonda, sundi, ‘Gume, Allahda akeca-keca deiki tara, Ila Puto Eremna Deiyo Ngebo ^{▼▼Ngebo – Akayat neitamaida, Ibrani upu deiki di, Allah er si tep, ‘Elyon’ pepra seki. Indonesia upu di, ‘Allah Mahatinggi’ pepra sengnunge. Angeda telep dinin, aupu ‘Elyon’ er deiyo neitamai ngeda, sun kael kemna tep, jenek kupra sekmepu. Ada, ‘Allahda, akeca-keca yuma deiki tara kuredi, ila puto weik, Ila Puto Eremna Deiyo Ngebo kurure,’ tenena tep, ‘Elyon’ pepra seki. Angeda konum jenek kupra sekmepu.} kurure. Atep, ‘Allah er dipapu, nun tep, lyepropsetudi, kange di tamupra telep kweipsetupa, teleppu kutepe,’ teneramidi, Allah tep mororami.
36 Dinino, anesaladi, sun sipyal deiki dipu, gekena telep upu pertamami dinin, sun dipru neitamaida, ange utopu men tenerami, sun sipyal deiki di mok upupu perami.
37 Tonda, sun dipru neitamaida, ‘Allahdi pesere upu, pio moupra talepra, teleppu kunkamepe,’ men teneramidi, er upu tep, yanitamnapu kurami.
Tonda, Allahdi, “Ange kunkamrume. Ukupmumnyopda, nedi telep kudinkamsene,” pepra, pedina upu deiki peiamu upuda, moupra talena gum di, ange tapra, mali-malipu kurami.
38 Sunda malipu kurami dinin, Allahdi, sun tep ila di bicau teneramnga cadi, sun mali kurami ngeda, kaukepra daepudi, tupa melimnapu kuramu.
Allahdi, sun mali kurami keca yuma tep, anesala wenepra men popra gawal daku.
Tek sisi, sun mali-mali weik kupbarami taru neitamaida, Allahda yu weik kupu dinin, er adipapu sun tep, ‘Gume sunda menmena adipapu men wenepra popkune,’ teneramudi, tali dim penapu kuramu.
Atep nengeda, er yu weik kuamu dinin, erdi anesala tep, adipapu tali lupra, men poptapu.
39 Deiyoda, erdi sun tep, ‘Gume, sunda tali tuai nesalapu kununga cadi, sun putoda yambulanunpu kununga cadi, gam pio men kunkamenge. Menmena depkameng ja.
Ukupmantoda, kumanya yaredi, puprepa, adipapu gum kupbaramaretopu, sun peda, menmena di depkamenga cadi, adipapu sun tep men wenepra poptapkamne,’ teneramudi, tali dim pepnapu kuramu.
40 Dinino, sun Israel nesalada, nimi gumai, pio katuai mutu neitamai embarami taruda, sundi, ‘Gume Allahdi, “Angeda kunkamrume, angeda pio men kunkamrume,” pepra deiamseu upuda, nun songe,’ teneramidi, aupu yanitamnapu kurami. Pio weika di, mali-mali kurami.
Sunda pio me gumai embarami taruda, mali weik kuramya deiki di, Allah er kangeda, ‘Uo, warya tep, ne tapnengedi, mali-malipu tupa kunung do?’ teneramudi, mambul kange doupra, er dipru engena utopu kuramu.
41 Sunda, pio me gumai embarami taruda, mali weik kuramya deiki di, Allah er kangeda, ‘Uo, warya tep, ne tapnengedi, mali-malipu tupa kunung do?’ teneramudi, mambul kange doupra, dipru engena utopu kuramu.
Israel nesaladi amali weik kuramya deiki, Allahdi sun tep, mali kange doupra, deremnapu kuramu. Allah erda, Pio Telep Lengnapu kurur ngebodi, Israel nesala tep pio kalekra meliamu. Erdi sun Israel nesala tep, pio melimnapu kuramu dinin, sun mali kuraminge deiki, Allahdi sun tep, mali kange douamudi, yu kuramu.
42 Sun Israel nesaladi, ‘Allahda tek sisi pio puto weik kurur ngebo,’ men tenerami.
Tonda, sundi, ‘Uo, Allahdi nun pona tep nengdi, nun tep popmanto kuramsei taruda, nun nai bo Allahdi melipra lyepropseu,’ men teneramidi, ange peda, lumdongonapu kurami.
43 Angepu gum dinin, tonda sundi, ‘Uo, Mesir mutu neitamai ikin weik kuramepu taruda, Allah dipapu, pio puto weik kunupsek pen pel cap, nimi men kupmanto keca cap, mambul pel doramnga deiki di, loptapseudi, lyepropseue,’ men tenerami. Ange peda, lumdongonapu kurami.
Ange utopu, Mesir mutu neitamai dinin, mutu si Zoan mutu ^{▼▼Zoan mutu – Amutuda, Mesir tara neitamai kwamu. Akati arum neitamaida, sun Mesir mutu nesaladi, sun jen keca kina ati ton doami. Allahdi Israel nesala loptapra lyepropu taruda, amutu neitamai kurami. Keluaran 1 dinkurume.} damaida, Allahdi nimi men kupmanto keca, pel doramu deiki di, Israel nesala lyeproamu ngeda, sun tupa men teneramidi, malipu kurami.
44 Allahdi, Israel nesala lyemna tep, Mesir mutu neitamai di ila kunupsekpen pel dopu ngeda ake. Ada, sun Zoan mutu neitamai embaramu ila me yumada, yapi ^{▼▼yapi – Allahdi amutu neitamai embaramu ila me yumada, yapi keipupa, men jepmanto kupu. Ange kael kemna tep, Keluaran 7:14-24 dinkurume.} kepupa, ame men jepmanto kupu.
Allahdi amutu me yuma yapi keipka cadi, ange tep nengeda, sun amutu nesala yumadi ame gwepra men jepmanto kurami.
45 Tonda, Allahdi amutu nesala wenemna tep, sun mutu neitamai yumada, deibum ^{▼▼deibum – Aupu kael kemna tep, Keluaran 8:20-24 dinkurume.} utopunge, denge pio weika di dokotepupa, amutu dinikudi, adeibumdi anesala, sun nong bol jepronapu kurami.
Tonda, sun wenemna tep, kori ^{▼▼kori – Allahdi amutu neitamai embaramu ila me yumada, yapi keipupa, men jepmanto kupu. Ange kael kemna tep, Keluaran 8:1-15 dinkurume.} pio weika di karepupa, amutu dana-dana tara yuma dinikupa, sun yumada, kange mun kange doupra kurami. Ukupka deiki di, amutu nesala pio mali kupdongopu.
46 Tonda, sun Mesir nesaladi kouami keca konum bolongamu dinin, Allahdi ila po keca ^{▼▼po keca – Ange kael kemna tep, Keluaran 10:1-20 dinkurume.} karepupa, akeca di, sun wai dam jen keca yala-yala yuma jepropi.
Mesir mutu nesaladi, pel weik doramya deiki di, sun wa tu neitamai jen keca weik akwamu dinin, Allahdi apo keca karepka deiki di, akeca yuma jepropi.
47 Tonda, sun Mesir mutu nesaladi, anggur du wa ton peiamipa, du weik moamu dinin, Allahdi im deiki, mo ^{▼▼es mo – Ange kael kemna tep, Keluaran 9:13-35 dinkurume.} dinin, gel duduya utopunge dokotepupa, akeca yuma sikke buktapupa, gum kupu.
Tonda, sundi kouami co du mouamunge, kwarang co utopu ngeda, er sida ara coda, es me sakupa, bul weik kupupa, aco yumada sukupra ekra kolupropu.
48 Allahdi, es mo dinin, gel duduya utopu ngeda, sakupa, sun peirami sapi bisam ^{▼▼sapi bisam – Ange kael kemna tep, Keluaran 9:13-35 dinkurume.} yumada bongopra poptapupa, yuma depi.
Tonda, sundi peirami domba bisam ^{▼▼domba bisam – Keluaran 9:20-26 dinkurume.} cap, kambing bisam capda, Allahdi perenglang pena dokotepupa, akeca yala-yala yuma popra gawal daku.
49 Allahdi sun Mesir mutu deiyo-deiyo neng tep, yu weik kupupa, akange mun keca weik, sun nong deiki deiamu.
Ada, er yu weik kupunge cap, sun tep ‘Dabale,’ tenepunge cap, ila kange mun keca weik cap, sun nong deiki cap, sun mutu deiki cap deiamupa, ikin pio weik kurami.
Tonda, Allahdi, akange mun keca weika di kareamngada, nimi pona tep pel don malaikat, denge pio weik dokotepupa, er yu dopra, Mesir mutu nesala, sun damai yana, ikin keca weik derirami.
50 Tonda, Allah er yu weik kupka tep, ‘Aneng men popra gawal dakamne,’ men tenepu. Erdi tenemutopu, anesala deiki er yu weik karepu.
Tonda, ‘Anesala men wenepra popkamne,’ tenena gum dipapu, sun ataru kurami Israel yala nesala kan-kan di, denge pio weika di poptapupa, depi.
Ada, ila kange mun pu karepka deiki di, ataru kurami Israel yala nengda, denge pio weika di deami.
51 Tonda, Mesir mutu neitamai kurami nesaladi konum deiami nyapu, sun weni nyapu ^{▼▼weni nyapu – Mesir mutu nimi deiyo-deiyo neng wenemna tep, Mesir nesaladi deiami weni nyapu yumada, Allahdi popra gawal daku. Keluaran 11-12 dinkurume.} yumada, ataru dipapu, Allahdi kange mun dena deiyo keca, adipapu karepupa, sun weni nyapu yuma adipapu depi. Anyapu tep nengeda, sun Mesir mutu nengdi, ‘Uo, nundi menmena deiamupu weni nyapuda, konum nepmengopda, amenda taruda sundi nyapu ton deipmengepa, dadeipdanen bankameng nyapuda, nun mutu talepmengedi, puto kunkamenge,’ teneramidi, ‘Nun weni nyapu yumada, pio telepe,’ tenerami dinin, Allahdi sun Mesir mutu ^{▼▼Mesir mutu – Yuk Allah upu buku neitamaida, ‘keturunan Ham’ pepra seki. Ada, Nuhdi deipu ngebo, er si Hamdi deiamupa, dadeidanen yakarami nesalada, Mesir mutu bena kuramya tep, Ibrani upu deiki di, ‘Ham’ pepra seki.} weni nyapu yuma poptapudi gawal daku.
52 Allahdi ange-ange yuma konum kupudi, erdi ‘Anesalada ne mawa neng kunkameng’ tenen, weiamu nesalada, dopra, Mesir mutu tapra, yuk karen mutu dubenamu. Ukupmantoda, domba bisam peina deiyo nengdi, sun domba bisam dopra baramengtopu kupra, Allahdi sun Israel nesala loptapra lyepudi dubaramu.
Tonda, Mesir mutu konum tapra, bendopi taruda, nimi pio gumai, ila katuai mutu neitamaida, Allahdi sun Israel nesala dubenamu. Domba bisam deiyo nengdi, mepra bangepa, sun domba amenda yakaramengtopu, Allahdi menmena mepra baramupa, Israel nesala er amnyo tara melipra dombarami.
53 ‘Israel nesala kware men kunkameng’ tenen, Allahdi sun tep melipra kalengamudi, ‘Abisi benkurume’ pepra, mepra baramupa, sunda er amnyo tarapu embarami.
Sun Israel nesalada, teleppu kurami dinin, sun pona tep nengda, Mesir mutu jen talena neng yumada, ila laut mokon di jepropupa, sun yuma depi.
54 Allahdi Israel nesala dopra baramupa, sun yumada, pio telep mutu lengnai yana kunmai. Ada, Allahdi konum weiamu mutu, pio telep lengna mutu damai dubaramupa, dakunmai.
Ada, Allah er ila puto buru di, dalupra dopropu mutu deiki bena kunmai.
55 Allahdi, ‘Israel nesala yuma amutu neitamai kunkameng’ tenen, konum tenepka tep, amutu neitamaida, menop taru di konum kurami nesala yala-yala yumada, Allahdi enepra dokotepupa bendopi.
Tonda, Allahdi, ‘Israel nesalada, sun yala yuk-yuk kuramengtopu, tapu di amutu yuma kunupetepudi, amutu tu bokra karepupa, dopropi.
Ada, ‘Sun Israel nesala, yala-yala yuk-yuk kuramengtopu, amutu tu dopra, kunkameng’ tenen, Allahdi amutu bokra karepupa, sun opkal bol di dodin tenda atipu kurami.
56 Allahdi ukupra meliamu dinin, sun Israel nesaladi, ‘Akeca-keca deiki tara kuredi, Ila Puto Eremna Ngebo ^{▼▼Ngebo – Akayat neitamaida, Ibrani upu deiki di, Allah er si tep, ‘Elyon’ pepra seki. Sun kael kemna tep, asi deiyo ngeda jenek kupra sekmepu.} Allahda, telep kupra melimkamser do, gum do?’ teneramya deiki, Allah tep piripetipidi, ‘Allahda, nun dabale cadi, er upu men gekenkamepe,’ teneramidi, malipu kurami.
Tonda, Allahdi, “Ange kunkamrume, angeda pio men kunkamrume,” pepra deiamu upuda, moupra men taleramidipu, men dombarami.
57 Ada, sun apu yapudi, mali weik kuramitopu, ataru kurami Israel nesala peda, Allah tep tupa teka men teneramidi, er tep tapra malipu kurami.
Ukupmantoda, nimi pona marda, gwalipmarenge di, dopmengepa, dumsisi kupra, mar men dourbetu utopu, sun anesala sun kange dipru yumada, konum gwalipupa, Allah tep teka men teneramidi, er upu tupa talepra men dombarami.
58 Tonda, sun Israel yala nesaladi, “Nun nai bo ake,” pepra, tali keca cap, isok cap tep, teka teneramidi, akeca tepapu si eremamidi, mutu dup deiki, isok si eremna ati doramya tep, Allahdi sun tep yu weik kuramu.
Allahdi, ‘Gume, ne mawa nesaladi, ne pe sipu erepnetenge. Yuk tali keca tep si men eremkamenge,’ tenepka cadi, sundi tali keca tep, ‘Nun nai ake,’ pepra, isok si eremamipa, Allahda tulum weik kupupa, yu kange doupu.
59 Sun Israel nesaladi, amali kun keca weik kupbaramipa, Allahdi ange yuma epra kael kepkopda, yu weik kupupa, erdi sun Israel yala nesala tep, ‘Anesala ne dabal cadi, sun tep ton cap tupa men melipra kalengkamne,’ teneramudi, sun tep tamamu.
60 Tonda, Allahdi keana taru tep, Silo ^{▼▼Silo mutu – Silo mutuda, Efraim yala nesala kurami mutu neitamai kwamu. Ada ila ati arum domipa kwamu. Pumun taruda, yu nimi bo nengdi, Yerusalem mutu popra uruptapipa, Israel nesaladi, Peti Perjanjianda dopra, Silo mutu keana taru tep, bena deipipa, acapu dakuramu. Ange kael kemna tep Yosua 18:1 cap, 1 Samuel 1:3 cap dinkurume.} mutu neitamai kuramngada, amutu tapra bendopu.
Ada, Allah er yu weik kupka cadi, keana taru neitamai di, ‘Ne cap, Israel nesala cap kikiman kunkamep’ tenen, er si eremna ati tep, opkal bol di, dodina ati, er sida Antamdina Tenda Ati, Siloh mutu neitamai keana taru tep deipinge peda, Allahdi akati tapra bendopu.
61 Tonda, atenda ati pumbon deiami mambul keca, er sida Peti Perjanjian ngeda, Allah er puto akeca deiki deiamu dinin, yu weik kupka cadi, go karepupa, sun yuk mutu yu nimi bo nengdi ^{▼▼nimi bo neng – Angeda, sun Filistin yala nesaladi Silo mutu yana, Peti Perjanjian co bekinda, upula dopra dubenami. Ange kael kemna tep 1 Sam 4:1-22 dinkurume.}, aPeti Perjanjian upula dopropidi, yuk mutu dubei.
Ada, Allah er puto cap, er dirine capda, amambul bekin er sida, Peti Perjanjian deiki konum deiamu dinin, go karepupa, Israel nesala sun podan neng, Filistin mutu nengdi yana akeca upula dopropi.
62 Angepu gum dinin, Israel nesaladi mali weik kuramya cadi, Allahdi go karepupa, sun pona tep nengdi, yana, Israel nesala denge pio weika di, nimi pon parang dopra ya di, portamami. ^{▼▼portamami – Ange kael kemna tep 1 Sam 4:10-11 dinkurume.}
Israel yala nesaladi, mali weik kuraminge tep, Allahdi sun tep, ‘Ne dabale, sun dakwapye,’ tenepudi, sun tep men kalengamudi kaukemamupa, ikin keca weik sun damai yakaramu.
63 Ukupmantoda, ila uku bo di akeca-keca yuma jeramretopu, sun podan taruda, Israel yala kaber yumada, neng weika di, portamamipa, depra gawal daki.
Sun mar podan taruda, Israel yala kaber nengda, denge pio weika di portamamya cadi, Israel yala kaber nerapu kanam nerapudi, nimi men dopmanto kuramidi. Talipu kurami.
64 Tonda, apodan taru neitamai peda, Allah si eremna ati pumbon pel dorami neng, sun imam-imam neng peda, pio weika di porami. Ada nimi pona tep parang ya dopra, sun imam neng weika di porami.
Ataru neitamaida, pio podanapu kuramya cadi, aimam nengdi domi nerapuda, sun neng yapu poramipa, solu daki dinin, go ton men kupka tep, sun neng yapu tep, engena cap, nimi nong peina capda, telep kupra men peipmanto kurami.
65 Aikin keca pio weik, Israel nesala deiki yakaramupa, kange mun kange doupra kurami dinin, ataru neitamaida, Allahda akeca-keca yuma taleredi, ila puto weik ngebo, kange di ton cap bukroudi, ‘Israel nesala lyepkamne’ tenen, ketenepra yau.
Ukupmantoda, nimidi kange yawaramre me weika di jepmengepa, kange douna gum di mapmanganen, amenda taru ka di tamupra menmena bukrongedi, ila upu di perameng utopu, Allahdi sun Israel nesala damai yana lyepropu.
66 Ada, Allah er mawa nesala tep, ‘Israel nesala yuma popra gawal dakamep’ tenen, sun damai yana poryanami yu neng Filistin yala neng tep nengeda, Allahdi, sun amnyo tara yana, adipapu aneng tep ila kange mun keca ^{▼▼kange mun keca – Angeda, Allahdi sun Filistin nesala denge weik poramunge tep do, kange mun pu karepunge tep tenepudi seku do? Ange kael kemna tep 1 Sam 5.6-12 dinkurume.} karepudi, poptapu.
Allahdi ayu Filistin neng popra gawal daktapu deiki di, ali weik dakipa, yuk mutu nesala yumadi, Israel sun podan neng tep, ‘Anesalada pio mali, sunda dakwapye,’ tenenapu kuramyanen, tupa pio tenenapu kununge.
67 Dinino, Israel nesala mali kuraminge tep, Allah er yu weik kuramu taruda, Yusufdi ^{▼▼Yusuf – Angeda, Israel sun apu bo Yusufdi deiamu ngebo er sida Efraim kuramu. Aceida, Yusuf si seku dinin, ada Israel nesala yuma tenena tep, ‘Yusuf’ pepra seku. Tonda, ange utopu, ‘Efraim’ pepra si seku ngeda, ada Israel nesala yuma tenena tep seku. Efraim yala nengda, Israel tara dinin, dapu tara, arah utara mutu neitamai kurami.} deiamupa, sundi dadeipdanen yakarami neng peda, Allahdi aneng kaukepra tamamu. ‘Ne si eremna atida, sun mutu deipkamne,’ men tenepka cadi, sun mutuda tapu.
Ange utopu, Allah er yu weik kuramu taruda, Efraimdi ^{▼▼Efraim – Efraim yala nengda, Israel tara dinin, Yusufdi deiamupa, dadeipdanen yakarami neng kurami. Yuk Allah upu buku neitamaida, ‘kemah Yusuf’ pepra sengnung dinin, ada Efraim yala neng tep upepra sengnunge.} deiamupa, sundi dadeipdanen yakarami neng peda, Allahdi aneng kaukepka cadi, ‘Ne si eremna atida, sun mutu deipkamne,’ men tenepka cadi, sun mutu ton wepra men tenepka tep, tapu.
68 Allahdi, Efraim yala neng kurami mutu men wepu dinin, sun tapra, Israel mutu iknapi dam tara kurami nengpu, sun kurami mutu wepu. Ada, Yehudadi ^{▼▼Yehuda – Yehuda yala nengda, Israel tara dinin, iknapi dam tara, itara mutu (arah selatan) mutu neitamai kurami. Amutu neitamai di, Allah er si eremna atida, Raja Salomodi domupa, akurure.} deiamupa, sundi dadeipdanen yakarami nengdi kurami mutuda, ‘Ne si eremna atida, sun mutupu deipkamne,’ tenepka tep, sun mutu wepra ereipu.
Allahdi amutu wepka deiyoda, Sion mutu akwamnga tep, Allahdi amutu tep kange deiamnga cadi, ‘Ne si eremna atida, acapu akunkamre’ tenen, amutu wepra ereipu.
69 Allahdi Sion ^{▼▼Sion – Sion mutu pepkada, ada Yerusalem mutu yuma tep pepu. Sion mutu dup ada, pumun taru di Yerusalem mutu yuma er si tep, ‘Sion’ perami dinin, amutuda tenpu pua.} mutu wepu dingeda, erdi, ‘Ukupkurume,’ peipupa, sundi er si eremna atida, amutu neitamaipu domi. Ada, im deiki yuma telep kupra deiamupa, pio tep deiki tara akunkamretopu, er si eremna ati peda, Sion mutu dup deikipu tupa akunkamre.
Tonda, tuai mutu ban-ban yuma ketekepra deiamngada, men gum kupkamre, apio akunkamretopu, er si eremna atida, Sion mutu dup deiki pio tep akunkamre. Amenda taruda, ange peda men gum kuptue.
70 Amenda taruda, Allah er amutara telep kupra kuramu ngebo, er sida Daud, angebo wepra ereipu. Ada, ‘Ne mawa Israel nesala talepra, sun ila nimi deiyo ngebo Raja kunkamre’ tenen, Daud wepra ereipu.
Daudda, domba bisam peina deiyo ngebo kuramu dinin, Allahdi Daud tep wepra ereipu.
71 Daudda, jem domba bisam cap, ner domba bisam cap, sundi deiami domba nyapu cap, kalekra peiramu dinin, Allahdi Daud tep ‘Ne mawa nesala talepra, ila nimi deiyo ngebo kunkamre’ tenen, Daud wepra ereipu.
Allahdi, ‘Yakub deiamupa, sundi dadeipdanen yakarami nesala, sun Israel yala nesala yumada, ne mawa nesala pio kunkameng’ tenen, konum weiamu cadi, ‘Dauddi anesala yuma talepredi, sun ila nimi deiyo ngebo Raja kunkamre’ tenen, Daud wepra ereipu.
Ukupmantoda, domba bisam peina deiyo nengdi, sun domba bisam melipra kalengamengtopu, Daud peda sun Israel yala nesala yuma tep, melipra kalengkamre,’ tenepka cadi, Daud weprapudi, erepra deipu.
72 Allahdi, Daud konum wepra deipupa, Dauddi sun Israel yala nesala taleamudi, sun ila nimi deiyo ngebo Raja kepra kuramu. Tonda, Daud er kange dipru neitamai yumada, pio dumsisi kuramnga cadi, Israel nesala tep, telep kupra melipra kalengamu.
Tonda Daudda, ila kael keamu ngebo kuramnga cadi, erdi pio telep kupra, sun Israel yala nesala yuma tep, “Ukunkamrume, angeda men kunkamrume. Telep kuna ngeda ake,” pepra, upu kareramupa, sunda teleppu kurami.