Psa 79 | XteSC | STEP | Nimi si, Asafdi aMazmur mut seku. Asafdi seku ngeda ake. Uo, nun nai Allaho, yuk karen mutu yala nesalada, nun mutu sisa yana dalupra dopropmasenge. Ada, kandi, ‘Israel nesalapuda acapu pio akunkamenge,’ tenepsemumdi kareamsemum mutu tepa. Kan tep teka men tenenung nesaladi, kan si eremna tep, pio telep lengna atida, konum wekidi, mali kupra deipi. Tonda, nun ila ati arum Yerusalem mutu neitamai yuma peda, popra gawal daktapidi, urupra sikke buktapseipa, pio malipu kuptapi.

Psalms 79

Yuk mutu nesaladi, Israel tara nesala yuma popipa, ikin kange doupidi, Allah tep, “Melipra lyepseo!” pepra moropi upu

1 Nimi si, Asafdi aMazmur mut seku. Asafdi seku ngeda ake.
Uo, nun nai Allaho, yuk karen mutu yala nesalada, nun mutu sisa yana dalupra dopropmasenge. Ada, kandi, ‘Israel nesalapuda acapu pio akunkamenge,’ tenepsemumdi kareamsemum mutu tepa.
Kan tep teka men tenenung nesaladi, kan si eremna tep, pio telep lengna atida, konum wekidi, mali kupra deipi.
Tonda, nun ila ati arum Yerusalem mutu neitamai yuma peda, popra gawal daktapidi, urupra sikke buktapseipa, pio malipu kuptapi.
2 Tonda, kan amutara kungedi, kan pel donge nesala, sun Israel yala nesala weika di popra tapi.
Poptapidi, tu palina gum dipapu, ‘Tali lakra embange ma yumadi, adepi nesala sun nong jepropkameng’ tenen, katawai tu deikipu tali deiptapi.
Ukupra deiptapya tep, ma cap, bura tara tali gam kure keca capdi, yana adepi nesala sun nong yumada adipapu jepropkamenge.
3 Sun yuk mutu yu nengdi, kan mawa nesala weika di popi taruda, Yerusalem ila ati arum neitamai yumada, me tali daembaramre me utopu, apopi neng sun yapida, dana-dana tara embeu.
Tonda, amutu neng denge pio weik konum poptapya cadi, tupa gam kunmai nesala metekanunpu kunmaiya tep, konum depi neng, sun nong dopra, tu palipmanto men kupmanto kupya tep, sun adepmai nesala sun nong yumada, tali apu tapra kaukepmai.
4 Ange yuma tep nengeda, nun dana-dana tara kunge nesala yumadi, amutu epsengedi, “Uo, sun Yerusalem mutu kurami nesalada, pio mali kunmang adano,” pepra, mali upu pesenunge.
Sun yuk mutu nesaladi nun tep, nyek-nyek pesengedi, autupra mali upu weika di pesenunge.
5 Atep nengeda, nun nai Allah Yahweh, ware kuprap taru ton, nun mali kuramepunge tep, yu kupkerepa, ‘Aneng tep ne dabale’ tenen, wenepkamserem do? Kanda pio tep, mali kange dounkamserem do?
Kandi, ‘Ne mawa nesala Israel nengdi, yuk tali keca tep, ‘Nun nai,’ pepra si eremamya tep, ila uku bu jeramretopu, kan yu weik kupkerepa, pio mali kangepu dopra, kunkamserem do?
6 Ange gum dinin, nundi moropkepe ngeda, ‘Kan Allah tep, teka tenena gum di, men kael keamkei nesala, yuk-yuk mutu yala nesalada, sun deikipu kan yu tenerum ngeda, weika di derinkamrum’ tenen, moropkepe naio.
Sun ayuk-yuk mutu nesaladi, kan tep, teka tenepra, men kael keamkeidi, kandi peserum upu pio men talenunge.
Tonda, ayala yuk-yuk yala nesala cap, sun deiyo-deiyo neng capdi, ‘Allah Yahweh, er dipapu melipra lyepsetue’ tenen, kan si erepra, kan tep pio men morokenunge. Atep, sun yala yuk-yuk yala nesala tepapu wenepra popkamrume. Atepapu tenepra moropkepe naio.
7 Sun yuk mutu nesala wenepra popkamruma deiyoda ake. Ada, kan mawa nesala, nun apu bo Yakubdi deiamupa, dadeidanen yakaramepu Israel yala nesala tep, sun yuk-yuk mutu nesaladi, konum poryanmaseidi, sikke buktapmasenge naio.
Tonda, nun Israel nesala kuramepu mutu-mutu yuma, konum mali kupra deipmasengpa, ataruda nun mutu sisada, walangyopu mutu kurure.
8 Uo, nun nai bo Allah, nun ataru kunup nesaladi kan tep moropkepe. Ada, ‘Nun apu yapudi, kan upu yanirtamamidi, pio mali weik kurami keca yumada, kandi tupa tenepmemdi, nun ataru neitamai kunup nesala tep, ila di men wenemkamserem’ tenen, moropkepe naio.
Ange gum dinin, kandi ila di bicau tenepsememdi, menmena di yana melipra lyepkamserem’ tenen, moropkepe naio.
Deiyoda ake. Sun yuk-yuk mutu nengdi, yana popseidi nunda dopra, pio amutarapu deipseidi, pio mali konum kweipseia tep, kange mun kange doupra kunmapa tep, moropkepe naio.
9 Atep nengeda, nun si eremkenup Allaho, kan dipapu nun Lyemna Deiyo Ngebo kuseruma cadi, ‘Kan dipapu yana melipkamserem’ tenen, moropkepe.
Ada tali tep guma. Deiyoda, kandi lyepropsememnyopda, yuk-yuk nesala yuma epmengedi, kan tep, ‘Uo, Allah Yahwehda, tek sisi ila puto cap, telep cap kurure,’ pepmengedi, kan si tep gispal donkamkenge.
Tonda, nun Israel nesala tep nengeda, ‘Nundi mali weik kunup keca yumada, kaukepsememdi, ange yuma gum kupra deipsemem dingeda, nun ikin kuserenge neitamai di, melipra lyepropkamserem’ tenen, moropkepe naio.
Ange peda tali tep gume. Deiyoda, kandi konum lyepropsememnyopda, yuk-yuk nesala yuma epmengedi, kan tep kael kepmengopda, sundi, ‘Uo, Allah Yahwehda, tek sisi pio telep ngebo kurure,’ pepmengedi, kan si eremkamkenge.
10 Tonda, sun yuk-yuk mutu yala nesala yumadi, nun tep, “Uo, sun Israel nesaladi si eremnung Allahda, dan cei kunmardi men melipra lyemserur do?” pepra, ‘Kan tep mali upu pepkenung’ tenen, moropkepe naio.
Atep, ‘Ukupra mali pepkenung,’ tenena tep, “Naio, sun yuk-yuk mutu nengdi, kan amutara kuramepu Israel nesala weika di portamamipa, sun yapi weik embaramnga tep, ange kwang dangna tep, ‘Kandi ayu nesala popra, sikke buktapkamrem’ tenen, moropkepe.”
Sun yala yuk-yuk yala nesala popra gawal dakmemnyopda, nun ataru gam tupa kunmap Israel nesala yumadi ange yuma epkamepe. Tonda, sun yuk-yuk mutu nesala yumadi, ange epra kael kepkamkenge.
11 Tonda, sun yuk mutu nesaladi, nun tara neng tomopra popidi, sun pe mutu dubenamidi, wenemna ati dongopipa, ‘Mali pepra engenung upuda, kan damai yatupa, kandi gekepkamrem’ tenen, moropkepe.
Naio, kan buruda, ila puto weik kukerurtopu, kan ila puto di, sun yuk mutu neng tep popkamrume.
Ukupkamruma deiki di, sun anengdi, ‘Nun konum tomopmepudi, wenemna ati dongopmepu Israel neng, adipapu poptapkamepe’ tenen, tupa tenenung nengda, ‘Kandi nun kayapu neng loptapmemdi, lyepropkamrem’ tenen, moropkepe naio.
12 Tonda, sun yuk-yuk mutu nesalada, kan tep teka tenepra men kael kemkenung nesala, ada nun Israel neng dana-dana tara kunge nesala tep, ila di wenepkamrume.
Naio, kanda akeca-keca yuma talepra, nun ila deiyo ngebo kuruma cadi, sun yuk-yuk mutu nengdi nun tep, nyek-nyek pepra, mali upu weik peramseidi, auturamsei utopu dinin, ‘Kandi tapakra, ue yoneitam bari tapakra, pio weika di sun nong deiki ikin keca derinkamrum’ tenen, moropkepe.
13 Nun Israel yala nesala yuma, kandi ‘Ne mawa nesala’ tenen, wepra deiamsemum nesalada, kan amutarapu kunupe. Ukupmantoda, domba bisam peina deiyo nengdi, sun domba bisam peiramengtopu, nunda, kan amutarapu kunupe.
Atep, nun pona tep nesala yuma sun tep, popra wenepmemnyopda, nundi kan tep, ‘Uo, nun naio, pio telepe pepkepe,’ pepra, pio tep, tupa-tupa gispal donkamkepe.
Ada, ataru di dipra, doryankamre taru cap, aneitamai taru yuma capda, nun ataru kunmap Israel nesala cap, nundi deipmepepa, dadeipdanen bankameng Israel nesala capdi, kan tep, ‘Uo, nun nai Allah Yahwehda, pio teleppu kurur ngebo,’ pepra, kan si tepapu pio eremkamkepe naio.