Psalms 80

Israel nesala lyemna tep Allah moropu upu

1Mut wepra pena deiyo ngebo Asafdi kait poramre keca er sida Bakung deiki lipra penmau.
2Teka ne nai Allah, kanda Israel nesala tep, bisam peiramengtopu, nun makuna tep, pio kalekra melimserum ngebo kuruma cadi, nundi moropkepe keca moupra gekenkurume.
Tonda, Yusupdi deipupa, er yala nesaladi dadeipdanen bange nesala yuma capda, ‘Kan dipapu talepmemdi melimkamrum’ tenen, moropkene. Kan kurumaida, kan pel don neng, sun malaikat Kerub dana-dana tara bukmengepa, kanda aneitamai kurem ngebodi, kan nong yumada dirine weik leng-leng pekerur ngebo kan tep moropkene.
3Kan puto cap, dirine capda, Manase yala nesala cap, Benyamin yala nesala cap, Efraim yala nesala cap deiki derinkamserume. ‘Tonda kan putoda nun deiki yan deipsememdi, kan dipapu yana lyemdonkamserum’ tenen, moropkene.
4Teka nun nai Allah kan dipapu nun mali kunup keca yuma gum kupra deipsememdi, kan dirine karepsemempa, lekpu kunkamepe. Tonda nimi tep bicau tenesememdi, nun dipru tamupra derinkamsere. Ukupsememdi, lyepropsemempa, teleppu kunkamepe.
5Ne nai Allah Yahwehda, akeca-keca yuma talerumdi, im deiki jen talen malaikat yuma, sun ila deiyo ngebo kuruma cadi, kan nyapu yumadi kan tep, “Nun yan melipseo,” pepra morokenge nge tep, dan taru di gekepkamserem do? Nun mali kuramepunge tep, Allah kandi derepsemum ngeda, ware taru ton cap utopu derepkamserem do?
6Ukupmantoda, nimidi roti kwaneng dopra sun nyapu kareramengtopu kupra, Allah kandi, nun kan nyapu tep, kange mun kecapu karesemempa pio engenapu kunupe. Nunda, engepra asim deiki dipapu kunupe.
7Naio kandi, nun tep ila kange mun keca weik karepsemumdi, kaukeptapsemumpa, nun kunup mutupu dinin, nun kayapu dana-dana tara dakunge neng yumadi, nun tep, nyek-nyek pepra nalemsenunge. Nun podan nesaladi, ‘Popra daluptepe,’ tenesengedi, kange deipra autusenunge.
8Ange tep nengeda, nun nai Allah Yahwehda, akeca-keca yuma talerumdi, im deiki jen talen malaikat yuma, sun ila deiyo ngebo kurume. Kan dipapu nun mali kunup keca yuma gum kupra deipsememdi, kan dirine karepsemempa, lekpu kunkamepe.
Tonda nimi tep bicau tenesememdi, nun dipru tamupra derinkamsere. Ukupsememdi, lyepropsemempa, teleppu kunkamepe.
9Kan mawa nesala, nun Israel yala nesalada Mesir mutu kuramupupane, kandi anggur tapu yal dopra, yukai kouramengtopu, kan nyapu dopra, yuk mutu nesala kurami mutu neitamai koupsemume. Yuk mutu nesala yala-yala yuma amutu kuramipane, Allah kandi dopra donokmumdi, nunda amutu neitamai punupra deipsemume.
10Nun nai Allah kandi anggur tapu yal telepnge Mesir mutu di dopra duyamumdi, tu palipra telep kweipmumdi, koupmumpa, papudi, amutu yuma konum dinipu. Ada, kandi tu ketekepra deipsemumpa, anggur tapu yaten tu neitamai beredi, kwakra weik embandaramretopu, nun Israel nesala amutu neitamai weik konum kunupe.
11Ukupua deiki, atapu teru dipapu kwakudi, mutu dupai dan-dana yumada kepdongopu. Tonda amutu tengamu co, er sida aras co yumada, anggur tapu bongopudi, gwatepra singipdongopu.
12Atapu er teruda kwakra benamngane, keteng yakan tara ila laut mokon pirman tara beu. Tonda er bo sirida, ortara keteng darban tara, ila karen mutu, Efrat me embeua damai beu. Ada nun Israel nesala dipapu, amutu neitamaida, konum pio weik kupmepu.
13Ne nai Allah, kandi atapu du tep gel beilya wipdongomum ngeda, ware keca deiyo tep uruptapmumpa, nimi yuk neng embanmankapmengedi, atapu du tali dangdonung do?
14Abeilyada, bura bisamdi yana piriramnganen, daktapupa bura tara kuramre keca yala-yala yuma, tali wekra yakangedi, yan jedonunge. Ada, nun Israel nesala tep, yuk mutu nengdi, wekra yan posengya tep pepkene.
15Ange tep nengeda, ne nai Allah Yahweh, akeca-keca yuma talerumdi, im deiki jen talen malaikat yuma, sun ila deiyo ngebo kurum ngebo cadi, ‘Im deiki di kandi nun tara tamupra yan dipetepsememdi, melipsetum’ tenen, moropkene.
Ukupsememdi, kan nyapu nun kunup keca yuma tep moupra kael kemkamserume. Nunda kan mawa anggur tapu utopu neng kunupa tep, pepne.
16Angeda tali tep men pepkene. Nun, kan nyapu yumada, anggur tapu utopu nesala kunupa cadi, adipapu lyemdonkamserume.
Tonda kan pedi dumsisi buru di talepra kouamum anggur tapu yatenda, betapra kalengkamrume. Nunda, nimidi nyapu deipmengedi, moupra kalengamengepane, nerameng utopu, nunda Allah kan pedi moupra kalekamsemumpa, nepmepua tep, morokepe.
17Ukuamsemum dinin, ukutaruda, Allah kandi tapsemumpa, nimi yuk nengdi, kan anggur tapu yatupra uku dongomamengtopu kupsenge.
Tonda, kandi nun tep tulum tenesemumdi, tapsemumpa, gum dabanmasere.
18Kandi wepra kan dumsisi tara deiamsemum nengda, kandi pio tep melimkamserume. Nunda Allah kandi deipra kalekamsemumpa, nepmepu neng cadi, ‘Kandi ton cap puto karepkamserume’ tenen, moropkene.
19Ukupsemem pangeda, nun kan damai di gopra, yukai men benkamepe. Kan damaipu pio kunkamepe. Tonda kandi nun kunkamepai tupa melimsemem pangeda, nundi kan tepapu kange deipra, kan sipu eremkamkepe.
20Teka ne nai Allah Yahweh, akeca-keca yuma talerumdi, im deiki jen talen malaikat yuma, sun ila deiyo ngebo kurum ngebo, kandi nun mali kunup keca yuma gum kupra deipsememdi, kan kange telep deiki dipapu dinkamsereme. Kan dirine cap, puto cap karepsememdi, lyepropsemem pangeda, nun yumada teleppu kunkamepe, Dauddi pepu.