Psa 81 | XteSC | STEP | Nimi si Asafdi aMazmur upu mut sekudi, Allah upu mut pena deiyo ngebo tep karepu. Amutda, yuk mut er si Gitit lelim peramretopu kupra penkamrume. Asafdi pepu upuda ake.

Psalms 81

Allah ila di bicau tenepra, Israel nesala melimrur dinin, Israel nesaladi mali kunangepu tupa-tupa kununga tep seku upu

1 Nimi si Asafdi aMazmur upu mut sekudi, Allah upu mut pena deiyo ngebo tep karepu. Amutda, yuk mut er si Gitit lelim peramretopu kupra penkamrume. Asafdi pepu upuda ake.
2 Sun Israel nesala yumada gekepneso! ‘Nun podan nengdi popsenung’ tenen, kalekra melimsererdi, puto kareserur Allah tep, nun yumadi er si erepra, ‘Kanda pio telepe,’ pepra gispal donkamepe.
Ada, nun apu bo Yakubdi, si eremamu Allah tep, nun peda, ‘Naio, kanda pio telepe,’ pepra, pingpinga kange doupmepedi, ila upu deiki di penkamepe.
3 Allah er gispal dona tep, mut penkamep taruda, mut lelim pena keca, er sida, rebana ^{▼▼rebana – Aupu deiyoda, ake. Ada, tenpu alat musik, er si tep ‘rebana’ pepra seki. Angeda gambar dinkurume.} capdi, amut penkamepe.
Tonda, alat musik er si kecapi ^{▼▼kecapi – Aupu deiyoda, ake. Kecapi seku ngeda, tenpu alat musik, er si tep, ‘kecapi’ pepra seki. Angeda, er urasinda, gitar utopu kurure. ‘Gambus’ pepra seku ngeda, tapu deiki di lelim perur dinin, er urasinda gitar utopu gume. Gambar dinkurume.}, cap, gambus capdi, mut pepmepyopda, nimi gekepmengedi, kange derinkamenge.
4 Tonda, war ukupu tengamre taruda, pung pena keca, er si terompet ^{▼▼terompet – Aupu deiyoda, ake. Terompet si seku ngeda, tenpu alat musik, er si tep seku. Angeda, pung perameng keca kurure. Er urasin kael kemna tep nengeda, gambar dinkurume.} di ton pung penkamrume!
Ada, ukupu war tengamre taru, ila kailya kalenup taruda, terompet dopra pung penkamrume.
5 Ukunkamrumada, tali tep gume. Deiyoda, Allahdi nun Yusuf ^{▼▼Yusuf – Ibrani upu deiki di, ‘Yusuf’ seki deiyoda, ada, sun Israel yala nesala yuma tenena tep seki.} yala nesala tep, ‘Ukunkamrume,’ pepra deipseutopu kunkamepa tepa!
Angetopu, nun apu bo Yakubdi, si eremamu Allah, erdi, ‘Ukupu war tekre taruda, terompetdi pung peprumudi, ila kailya kaleprumudi ne si eremkamnerume,’ pepra deipseua cadi, angepu kunkamepe.
6 Tonda, nun co puna ngebo, Yusuf cap, er nyapsilip yuma cap tep, Allahdi, ‘Angeda pio tep kunkamrume,’ pepra deipu.
Ada, Yusufdi amutu tapra, Mesir mutu kurami nesala tep, porbenamu taruda, Allahdi, ‘Ange kunkamrume,’ pepra deiamutopu, ataru nun peda utopu kunkamepe.
Allahdi, ‘Ange kupkamrume,’ pepra, deipseu taruda, aupu kapul men gekeramsi. Asafdi pepu.
7 Dinino, Allahdi aupu peipseu. “Sunda moupra tenepso! Ila ikin keca ^{▼▼ikin keca – Aupu deiyoda, ake. Ada, Israel nesala Mesir mutu neitamai kurami taruda, Mesir mutu nengdi, ila ikin pel dimamipa, kange mun kange doupra kuramidi, apel dorami.} sun morokyo deiki kwamseu ngeda, ne dipapu ange dopra gum kupra deipsi.
Sun Mesir mutu nesaladi dimamsei pel tep, ila ikin keranjang dopra dubaramrum ngeda, ne Allah dipapu aikin kecada dopropsa deiki di, kanam keipsisi.
8 Sun Israel nesalada, ila kange mun kange doupra kuramrum taru neitamaida, sundi ne tep, “Uo, nun nai Allah loptapra meliseo!” pepra, moropnerumpa, ne adipapu melipra lyepropsisi.
Ada, ne Allahda, keana tarupu, ila dua neitamai kunmasai di, sun moropnerum upu gekepsidi, sun tep lyepropsisi.
Tonda, sun Israel nesala, me pio gum kwamu mutu, Meribah mutu neitamai kuramrum taruda, ne Allah dipapu, me ketekepra karepsisi.
9 Atep, ne Allahdi sun tep, ‘Ne mawa nesala kunkameng’ tenen, konum wepra deiamsisi Israel nesalao, gekepneso! Nedi sun tep wenemna upu ton pepkusena tepa!
Uo, sun Israel yala nesala yumada, nedi pepsene upu moupra gekepnetumopda, telep kutume!
10 Sun Israel nesala kankan neitamaida, yuk mutu nengdi si eremnung isok tep, ‘Nun nai pepra,’ atali keca si pio men eremkamrume! Angeda pio meme pepsene!
Angetopu, yuk mutu nesaladi isok si eremnung keca tep, tu deiki gutam dipdongopra, atali keca tep si pio men eremkamrume. Ne Allahdi pepsene.
11 Neda, sun nai bo Allah, ne si Yahweh kunune. Ne sipu eremnerume.
Sun Mesir mutu neitamai ikin weik kuramrum taruda, Ne Allah dipapu loptapsisidi, yuk telep mutu dubenamsisi. Atep amenda taru yuma peda, sun putaramsere keca tep, jen keca do yuk keca do yumada, ‘Melipra karepseo!’ pepra, moropnemumnyopda, nedi sun putapser keca yuma karenkamsene.
12 Atep, sun Israel yala nesalada, sun sipyal weika di aktapmumnyopda, nedi sun putan keca weika di karepsenepa, jenkamrume!
Ne Allahdi uperamsisi dinin, sundi ne upu men gekeramnerume.
Teka, sun Israel yala nesalada, nedi peramsisi upu tep, ‘Uo, teka naio, angepu gekepmepedi, kunkamepe’ tenen, ne amutara kepra men kuramrume. Aupuda gekena gum di, tamnapu kuramrume.
13 Ukupra kaukemnapu kuramneruma tep, sun balila kepra kuramrumdi, ‘Gume, ne pe kange dipapu tenenup kecapu talepra kunkamepe,’ tenepra kuramrume.
14 Uo, ‘Ne mawa’ tenen, wepra deiamsisi Israel nesaladi, ne pesenun upu gekepnetumopda, angeda telepe.
Angetopu, sun Israel yala nesalada, ne Allahdi, ‘Ange kunkamrume, adumsisi bisipu benkamrume, telep kuna ngeda ake,’ pepra, peteresenun upuda, gekepra kutumopda, telepe pua!
15 Ne pesene upu gekeprumudi, tek sisi kupmum pangeda, nedi, sun pona tep neng yumada, menmena di popra weneptenedi, sun amutarapu deiptene.
Ada, ne puto buru di, Israel yala nesala, sun podan neng tep, wenepra poptene, pepsene. Allahdi pepu.
16 Ne Allah tep, ‘Nun songe,’ tenenenung nesala yumada, ne Allah damai yangedi, kware weik kunkameng,’ putapnere.
Tonda, ‘Ne Allahdi anesala wenepra ponkamne taruda, pio-pio tep akunkamenge’ tenen, putapnere.
17 Ne Allahdi, ne putapnerur ngeda, ake. Ada, ‘Nedi Israel nesala tep, pio telep jen keca ^{▼▼jen keca – Aupuda, Ibrani upu deiki di, ‘gandum’ tonda ‘madu’ seku. Dinino, ajen keca yala butene pepu ngeda, ukupmanto tep pepu. ‘Gandum’ cap, ‘Madu’ cap pepu ngeda, tek sisi jen keca yala-yala yuma tenena tep seku.} er sida gandum du wepra karepsetene,’ tupa tenenune.
Tonda, ‘Gel imir pumbon kwengamre mong meda, gweprapnedi, sun tep karepsetene,’ tenenune.