Psa 82 | XteSC | STEP | Nimi si Asafdi aMazmur upu mut seku. Asafdi pepu upuda ake. Im deiki dinin, nimi upu bokra derinungaida, Allah er bungrurai di, tekra upu peipu. Ada, im deiki kunge ila deiyo-deiyo kepra, puto weik kunge neng bulupra deipudi, sun tep wenemna upu bokra, sun tep karepu.

Psalms 82

Allahdi im deiki kunge deiyo-deiyo neng tep, upu bokeipudi wenepu upu

1 Nimi si Asafdi aMazmur upu mut seku.
Asafdi pepu upuda ake. Im deiki dinin, nimi upu bokra derinungaida, Allah er bungrurai di, tekra upu peipu.
Ada, im deiki kunge ila deiyo-deiyo kepra, puto weik kunge neng bulupra deipudi, sun tep wenemna upu bokra, sun tep karepu.
2 Allahdi pepkada ake. “Sun im deiki deiyo talepra kurum nengda, ware kuprap taru ton, tali-tali upu pepra, tuai nimi upu bokeipkamrum do? Sundi mali kurum ngeda, tapkamrume!
Ada, sun tuai nesala, pio mali kunge neng tep, ‘E, sunda nun kayapu neng utopu kununge’ tenen, mali kupmenge nge akapmarya peda, sun mali kuramitopu, upu bokra men wenemrume.
3 Atep, ange taprumudi, sun tuai nesala lyan nyapu cap, puto bounpu kunge nesala cap tep, dumsisi kupra upu bokeipmumdi, telep kupra melimkamrume.
Ange utopu, akeca-keca talena gum di, pio kankan nesala cap, puto men kwapmarepa, yuk nesala amutarapu kunge neng cap tep, melipra kalengkamrume.
4 Tonda, angetopu, sun yu kuprepa, mali weik kunge nengdi, sun kankan nesala cap, puto bounpu kunge nesala cap tep, ‘Mali kweipmengedi, ikin keca sun deiki deipnung’ tenen, meliprumudi, lyemdonkamrume. Anengda tali kau kemna gume.
5 Sun pio mali weik kunge nesalada, ila di men kael keami, tonda ‘Telep kuna ngeda ake’ tenen, tek sisi moupra men tenenunge.
Atep nengeda, tali-tali embangedi, mali kun kecapu talepra kununga deiki di, sunda pio kunungna neitamaipu embanunge.
Ketengban Sun adeiyo-deiyo nengdi, pio mali weik kununga deiki di, yuk-yuk nesala yuma epmengedi, sun peda malipu kununge.
Ukupmantoda, tuai mutu yuma amutara bungrur gelda, long-long peprepa, mutu buma yuma teno pakra sangrura utopu, sun mali kunga deiki di, yuk-yuk nesala yuma peda malipu kununge.
Ukunga deiki, Allahdi, ‘Angeda kunkamrume, angeda pio men kunkamrume,’ pena upu yumada, sundi gum kupra derisenunge.
6 Pumun taruda, ne Allahdi, sun mali kuna deiyo-deiyo neng tep, upepsi. “Nedi akeca-keca talepra, deiki tara kunedi, Ila Puto Eremna Ngebo, Allah ^{▼▼Allah – Acada, Ibrani upu deiki di, Allah er si tep, ‘Allah Elyon’ pepra seki. Aupu deiyoda, sun kael kemna tep, angeda konum jenek kupra sekmepu. Indonesia upu deiki di, ‘Allah yang Mahatinggi’ penunge.} kununa tep, sun peda, puto weik kuruma cadi, ne kangeda, sunda ne nyapu sisa utopu kurume,” pepsi.
7 Upepsi dinino, sunda tek sisi puto kurum neng dinino, amenda taruda, tali tuai mutu neng deramengtopu, sun peda depkamrume.
Tali tuai nesala dinin, nimi deiyo-deiyo kepra kunge neng deramengtopu, sun im deiki deiyo-deiyo neng kurum dinin, pio mali weik kuruma cadi, sun peda tali depnapu kupkamrume.
8 Atep, uo nun nai Allah, kandi nun tep, ‘Ange kunkamrume, angeda pio men kunkamrume,’ pepra, dumsisi upupu pesemem utopu kupra, nun tuai mutu ban-ban yuma neitamai kunup nesala tep nengeda, upu bokeipkamserume!
Deiyoda, kandi tuai mutu ban-ban yuma neitamai kunge nesala yala-yala yumada, kan dipapu nun yuma tep taleserume! Kan puda nun Deiyo Ngebo kuruma tep, kan dipapu nun tep upu bokeipkamserume.