Psa 83 | XteSC | STEP | Asapdi, aMazmur upu mut seku. Asapdi pepu upuda ake.

Psalms 83

Nun Israel yalal nesala tep, ‘Aneng yuma popkup,’ tenesenung nesala yumada, ‘Allahdi wenepra popredi, gawal dakamre’ tenen, moropu upu

1 Asapdi, aMazmur upu mut seku. Asapdi pepu upuda ake.
2 Uo nun nai bo Allah, nun ikin keca talepra kunkamep taruda, ‘Kanda tali dim peprappu men kunkamrum’ tenen, moropkepe!
Uo nun nai bo Allah, upu pena gum di, dim pepra karenai utopu pio men kunkamrum dinin, ‘Adipapu, yana melipkamserum’ tenen, moropkepe.
3 Deiyoda, ukutaruda, ‘Allahda, nun pio songe,’ tenekenung nesaladi, kan nyapu sisa, nun Israel ^{▼▼Israel – Ibrani upu deiki di ‘kan nyapu sisa’ pepra seki dinin, akayat neitamai di, er upu deiyo neitamai ngeda, ‘Sun yuk mutu nesaladi, Israel yala nesala tep, poryankamenga’ tenen, seku. Atep, nundi jenek kupra, ‘Israel nesala’ sekmepu.} yala nesala tep, ‘Porbenkup’ tenen, konum keteneipmangdi bulumange.
Sun anesala yumadi, kan Allah tep, ‘Erda nun pio songe,’ tenekenung nesaladi, balila kupra, salnong-nong kamengedi, ‘Adipapu Israel nesala porbenkupe,’ pepra, konum ketenepra tekmange.
4 Tonda, sun anesaladi, ila kael keamya di, ‘Allah er nyapu sisa, sun Israel nesala popkup’ tenen, inipra bulupmengedi, upu konum talenunge.
Kanda Allahdi, nun Israel nesala tep, melipra kalengserum dinino, ayu nengdi, ‘Israel yala nesala yuma popra gawal dangkamepe,’ tenen, konum upu talenunge.
5 Sun ayu nengdi aupu pedanunge. “Nun yuma ketenepmeko! Ada, sun Israel yala nesala yumada, popra sikke buktapkamepe. Ayala nesala yumada, gum kupra deipkamepe!” pepra, upu taledanunge.
“Tonda, Israel yala nesala yuma popra gawal dakmepyopda, yuk mutu kunge nesala yumadi, sun si Israel ton, tupa pio men tenenkamenge. Israel nesala tep, lumdongonapu kunkamenge,” pepra, upu talengedi, penunge.
6 Deiyoda, sun ayu neng cap, sun damai kunge neng capdi, “Kikiman bulupmepedi, tenpu kange doupra, sun Israel yala nesala yumada, porbenkamape,” pepra, pedina upu deiki di pedanunge.
Ada, sundi kanda Allah tep, mali upu pedangedi, “Allah er nyapu sisa yumada, popra gawal dakamepe,” pepra, pedina upu deiki di konum upu talenunge.
7 Sun yu nengdi, nimi pona tep upu talenung nesalada, ake. Ada, sun Edom ^{▼▼Edom – Edom tara nesalada, Israel nesala sun co puna ngebo Abraham cap, er ner butene Hagar capdi deiamreipa, angebo Edomdi deiamupa, dadeipdanen yakarami neng tep pepu. Tonda, sun Ishmael yala nengda, Yakubdi deiamu ngebo, er si Esaudi deiamupa, dadeipdanen yakarami neng tep pepu.} tara neitamai kunge neng cap, tonda, Ishmael yala neng cap, dakurami.
Tonda, sun Moab ^{▼▼Moab – Moab tara nesalada, Yordan me dinin, adinin utara, dapu tara mutu neitamai kurami. Tonda, sun Hagar yala nengda, Yordan me dinin, ortara keteng yakan tara kurami.} tara neitamai kunge neng cap, Hagar yala neng cap, dakurami.
8 Tonda, sun Gebal ^{▼▼Gebal – Gebal tara nesalada, ila laut mokon, er sida Laut Mati dinin, iknapi dam tara kurami. Amon tara nesalada, Yordan me dinin keteng yakan tara, Moab mutu dipra, iknapi dam tara mutu neitamai kurami. Tonda, sun Amalek yala nengda, Yehuda yala nesala kurami mutu dinin, dapu tara mutu kurami.} yala neng cap, Amon yala neng cap, Amalek yala neng cap kikiman ‘Ukupkamape,’ pepra, pedina upu deiki di pedanmai.
Tonda, sun Filistea ^{▼▼Filistea – Filistea tara nesalada, Israel nesala kurami mutu dinin, ortara keteng dangban tara mutu neitamai kurami. Sun Tirus tara nengda, Fonesia yala neng kurami. Sunda, ila laut mokon er sida, Laut Tengah dinin, iknapi dam tara mutu neitamai kurami.} mutu neng cap, ila ati arum er sida, Tirus mutu neitamai kurami neng cap, dakurami.
9 Tonda, sun Asyur ^{▼▼Asyur – Sun Asyur yala nesalada, ila puto weik neng kurami. Nimi ponada, ila kael keami. Sunda, Israel yala nesala kurami tara dinin, iknapi tara kurami. Sun mutu sida, Mesopotamia mutu perami.} mutu neng cap, sun ayala-yala neng cap kikiman bulupi.
Sun anengda, puto weik kungedi, sun cap, Lot ^{▼▼Lot – Anesalada, sun apu yapuda, Lotdi deiamu nyapu, sun Moab neng cap, Benami neng capdi, deiami nesalada, Asyur mutu kurami. Ange kael kemna tep nengeda, Kejadian 19:36-38 dinkurume.} yala neng cap kikiman poryankamenge.
10 Atep nengeda, ‘Kanda Allahdi, sun Midian ^{▼▼Midian – Allahdi sun Midian mutu nesala popunge kael kemna tep, Allah upu buku Hakim-Hakim pasal 4:6-22 cap, tonda, pasal 7:1-23 cap, adeiki dinkurume.} tara nesala yuma popmumtopu, aporyankamseng neng tep, utopu popra gawal dakamrume’ tenen, moropkene.
Ange utopu, kandi nimi si Sisera cap, Yabin ^{▼▼Yabin – Yabin cap, Sisera cap popunge kael kemna tep, Hakim-Hakim pasal 4:1-24 dinkurume.} capda, ila me embaramre, er sida Kison mekin damai popmumtopu, ataru poryakan neng peda, poptapkamrume.
11 Aneng buteneda, ila ati arum er sida, En-dor ^{▼▼En-Dor – En-Dor ila ati arumda, ila lyom mutu er sida, Tabor mutu damai domi.} mutu neitamai di popmume.
Aneng butene cap, sun jen talena neng cap popmumpa, sun yumada tupu kepropu.
12 Ne nai Allah, nun Israel nesala tep, mar poryakasenung neng, sun nimi deiyo neng yumada, popra gawal dangkamrume. Ada, menop taru neitamai, sun nimi deiyo neng Oreb ^{▼▼Oreb – Allahdi, Oreb cap, Zeeb cap, tonda Zebah cap, Salmuna cap, sun yuma popu ngeda, Hakim-Hakim pasal 7: 24-25 adinin, 8:21 neitamai di dinkurume.} cap, Zeeb cap tep, popmum utopu tep moropkene.
Tonda, animi deiyo neng, sun amutara deiyo-deiyo pel talepra kunge neng peda, kanda Allahdi aneng yuma popra gawal dangkamrume naio. Ada, Zebah ^{▼▼Zebah – Ange kael kemna tep, Hakim-Hakim 8:21 dinkurume.} cap, Salmuna cap, popmum utopu tep pepne.
13 Sun aneng buteneda, ‘Gume, Allahdi kalengrur mutu, Israel yala nesala kunge mutu yuma cap, sun wa penai cap yumada, dalupra dopropmepedi, nunpu amutu tu yuma talenkamepe,’ teneramreidi, piripeteprei.
14 Uo, ne nai Allah, nun Israel nesala tep poryakasenung neng yumada, kandi popmemdi, sikke buktapkamrume. Ukupmantoda, ila kumanya pung peprepa yaredi, kalkal tu buta dopra dubaramrepa, gum kuramretopu, aneng peda, gum kupra deipkamrume naio! ^{▼▼naio – AMazmur neitamai, ayat 14-15 ngeda, aupu nong neitamai deiyo ngeda, ‘Allahdi Israel nesala tep, ‘Popkup’ tenenge neng yumada, ‘Allahdi popra gawal dakamre’ tenen, moron upu seku. Ada, ‘Allahdi ila kange mun keca yala-yala yuma dopra, sun nong deiki deiptuopda, aneng yuma gum kupra deiptu’ tenena tep, amazmur upu seku ngebo Asafdi pepu.}
Tonda, nimidi, sun gandum du taikmenge taruda, kumanya di tali bamlama keca dopra dubaramretopu, kan Allahdi ayu neng yumada, gum kupra deipkamrume naio!
15 Ukupmantonge ton, ila uku di, lyom mutu pirmanai, co palpal weiknge, akwamunge yuma peda, ange yumada, ila uku di jeramrepa, amutu deiki paramre keca yuma gum kupbaramre utopu, nun poryakasenung neng yuma popkurume.
16 Ange tep nengeda, nun poryakasenung neng tep, ila kumanya cap, kulman cap, perenglang penange cap di, aneng enepra dokotepkamrume.
Tonda, Allah kandi, ila puto weik kumanya cap, ila mo cap dopra, ayu neng sun mutu neitamai dokotepmemnyopda, sun anesala yuma kware weik kunkamenge.
17 Allah kandi aneng yuma tep, kange mun keca karepmemnyopda, sun yumadi pio ali weik dangkamenge.
Kandi nun pona tep neng wenepmemdi popmemnyopda, sun tara nesaladi, kan Allah Yahweh tep, ‘Uo, ukutaruda, angebo Yahweh er tepapu, enkamepe,’ tenepketenge, tenepne naio.
18 Ne nai Allah nedi moropken ngeda, ake. Kandi sun anesala tep wenepra popmemnyopda, sun yumada, ali weik kunkamenge. Tonda, kandi karepmemnyopda, ‘Sun kange wang-wang peprepa, kange tenimtonapu kunkamenge’ tenen, moropkene naio.
Allah kandi anesala popmempa, konum depmengopda, amenda taru yuk-yuk mutu nesala yumadi, aneng yuma tep, ‘Sunda dakwapye, mali nengpu kurami,’ tenenkamenge. Utenena tep moropkene naio.
19 Dinino, ila mambul ngeda ake. Ada, yuk Allah ton tek sisi pio men kurure. Kanda Allah ^{▼▼Allah – Acada, Ibrani upu deiki di, Allah er si tep, ‘Yahweh’, tonda, ‘Allah Elyon’ pepra seki. Indonesia Allah upu buku neitamaida, ‘Allah yang Mahatinggi’ pepra sengnunge. Dinino, aupu ‘Elyon’ deiyoda, sun kael kemna tep, angeda konum jenek kupra sekmepu.} Yahweh, akeca-keca yuma talemumdi, Ila Puto Eremna Ngebo kuruma cadi, kan tenpua. Tuai mutu ban-ban yuma peda, kan dipapu talepmumdi, ila deiyo ngebo kurume.
Atep, tek sisi kanda Allah tenpu kurume. Ange tep nengeda, nun Israel yala nesala tep mar peryakasenung nesaladi, ange yuma kael keptengopda, telep kupra kuptenge. Ange tenepnedi, kan tep moropkene naio!