Psa 84 | XteSC | STEP | Mut pena tep gonga kemna nengda Korah yala nengdi pepi mut. Mut si Gitit perami mut utopu pepi.

Psalms 84

“Allah er kun damai bana tep tupa putanerure,” pepu upu

1 Mut pena tep gonga kemna nengda Korah yala nengdi pepi mut. Mut si Gitit perami mut utopu pepi.
2 Ne nai Allah kan kun damai yakana tep tenenun ngeda, ware kupra do? Pio ila kange derinune. Ne nai Allah Yahweh, kandi akeca-keca yuma talerumdi, im deiki jen talen malaikat yuma, sun ila deiyo ngebo kurume.
3 Atep, neda, ‘Allah Yahweh kan si eremna ati damai yatene’ tenen, ne dipruai di pio putanerure. Ukunedi ne nonge cap, kange cap doprapnedi, Allah kan gam kuna deiyo ngebo deikipu deipra, ‘Kan dipapu melipneo,’ pepra kan sipu eremkenedi, morokenune.
4 Allah kandi pupalema ma, ‘Tali embarur,’ tenenup ma peda, kandi ati ketenemdirume. Tonda pupalema ma, ‘Im deiki tali lyangrur,’ tenenup ma peda, Allah kandi sun manai ketenem dirume.
Tonda, sun ati donaida, kan tep yapi keca popra uku dongomyakana ati damaipu, sun mi derinunge. Ne nai Allah Yahweh kanda, akeca-keca yuma talerumdi, im deiki jen talen malaikat yuma, sun ila deiyo ngebo kurume.
Tonda, “Allah kanda ne ila nimi deiyo ngebo Raja kurume,” pepra, moropkene.
5 Pio tek sisi ne nai Allah, kan kun damai kunkameng nengda, pio teleppu kungedi, tumi-tumi yuma kan sipu eremengedi, mutpu pepra gispal dokengedi kunkamenge. Konuma tenena tep, ‘Selah,’ pepne.
6 Ne nai Allah kandi puto karepmempa, pio teleppu kunkameng nengda, ila kange deipra pingpinga di kunkamenge. Ukungeya deiki di, Allah kan si eremkukenge taruda, sun urasinda, ‘Kan pio mawa mutu, Yerusalem mutu tarapu dirbepedi, kan si eremkamkepe,’ tenepra kunge nesalada, pio teleppu kudinkamrume.
7 Allah kan si eremna tep, sun anesala bisi kapul deiya banmangeane, pumun taru Israel nesaladi, engerami mutu, Baka mutu bisi bengedi amutu neitamai benga peda, kandi anesala melipmempa, amutu kamo tamupredi, me pukra embaramrai utopu kepra deipkamreme. Tonda amutu neitamai bangepane, Allahdi mo kareprepa cepredi, amendada, amutu mokon weik deipkamre.
8 Sun anesala Sion mutu bana tep, bisi banmange taruda, nun nai Allah kandi puto karepmempa, puto kepmengedi, puto kupyopda, Sion mutu damai benkamenge. Sion mutu benge taruda, Allah er damai wengbenkamenge.
9 Ne nai Allah Yahweh kanda, akeca-keca yuma taleredi, im deiki jen talen malaikat yuma, sun ila deiyo ngebo kurume. Atep, ‘Nedi kan tep moropkene upuda gekepnerume’ tenen, moropkene. Tonda, ‘Yakubdi deipupa, dadeipdanen, yakarami nesala tep, Allah kandi kalekra melimamum ngebo gekepnerum’ tenen, moropkene. Konuma tenena tep Selah pepne.
10 Tonda, nun nai Allah, kandi nun deiyo ngebo Raja melipra talepmempa, erda pio dumsisipu kunkamre. Tonda, ‘Kandi konum wepra deipmum ngeboda, talepmempa, erda kan amutara kuredi, pio teleppu kunkamre’ tenen, moropkene.
11 Ila telep ngeda, tenpu tumi Allah kan si eremna ati dam yankutenetoda, ila telepe. Dinin denge weike seribu tumida, tali yukai dakuntenya peda, telepe gume.
Tonda, nepuda kan si eremna ati buplan dam kalengna pel doptenya peda, ila telepe. Dinin, mali kunge neng sun telep ati bena kutenya peda, ange telepe gume.
12 Angeda tali tep men pepne. Allah kanda akeca-keca deiki tara talepra ila ngebo kumemdi, keteng dirin kuramretopu, kan dirineda nun deiki deriserume. Tonda, kandi im deiki kunge jen talen malaikat, sun deiyo ngebo kurume.
Tonda, Allah kanda erepra kumemdi, nun tep kalengsemempa, nun podan neng nun damai men yakanunge. Kan amutara kupepa melimserume. Allah Yahwehdi, tupa-tupa akeca-keca yamupra karesemempa, yuk mutu nesaladi, nun tep gispal dosenunge.
Ware nesala do yuma, mali kuna gum dipapu, dumsisipu kunge nesala tep, nun nai Allah Yahweh kandi, ukunung nesala tep, akeca-keca yuma yamupra kareserume. Allah kan dipapu nun tep bicau tenepsememdi, pio ila telep keca tenpunge peda, ton men tamserume. Akeca yuma yamupra kareserume.
13 Ne nai Allah Yahweh kanda, akeca-keca yuma talerumdi, im deiki jen talen malaikat yuma, sun ila deiyo ngebo kurume. Ware nesala do yuma, kan tepapu teka tenekenung nesalada, kandi telep kudimempa, ila kange deipmengedi pingpinga di kunkamenge. Dauddi pepu.