Psa 85 | XteSC | STEP | Korah yala ngebodi, aMazmur upu sekudi, Allah upu mut pena deiyo ngebo tep karepu. Angebodi pepu upuda ake.

Psalms 85

‘Allahdi, Israel yala nesala tep, kange di tamupra telep kweipsetu’ tenen, mororami upu

1 Korah yala ngebodi, aMazmur upu sekudi, Allah upu mut pena deiyo ngebo tep karepu. Angebodi pepu upuda ake.
2 Uo, Allah Yahweh, kandi kareamsemum mutu cap, amutu neitamai kunge nesala cap tep, bicau tenepsemumdi, loptapra lyepsemume. Ada, karen mutu nesaladi, nun apu yapu yuma tep, popra tomopra popidi, sun pe mutu tamupra dubenamidi, wenemna ati dongomipa, ikin weik kurami, kandi sun tep loptapra lyepropmume.
3 Angepu gum dinin, tonda, kandi wepra deiamsemum nesaladi mali kuramepu ngeda, daepsemumdi kaukepsemume.
Nun Israel nesaladi, mali keca weik kuramepunge yumada, kaukepsemumdi, amali kuna ngeda, gum kupra deipmume.
4 Kandi nun mali kuramepunge tep, yu pio weik kupkeu dinin, ange tapmumdi, nun tep, ‘Ne dabal’ tenen, yu weik kupkeu ngeda, ‘Dakwapye’ tenepmumdi, tapmume.
5 Ange tep nengeda, nun nai Allah, kanda nun Lyemna Deiyo Ngebo kuserema cadi, ‘Kandi nun tep, kange di tamupra telep kweipsetum’ tenen, moropkene naio.
Tonda, nundi mali weik kuramepunge tep, nai kan pio yu kupkeu ngeda, ‘Dakwapye’ tenepmemdi, kaukepsetum’ tenen, moropkene naio.
6 Uo, nun nai Allah, ataru di dipra doryankamre taru neitamai yumada, tupa yu tenenapu kunkamserem do?
Ange utopu, nundi deipmepepa, dadeipdanen bankameng nengdi amenda dortaru daderinkameng nyapu yuma pe tep, kandi sun tep, yu tenepra mali kange doupra kunkamrem do?
7 Uo, nun nai Allaho, ‘Kandi nun Israel yala nesala tep, ton cap bicau tenepsetumdi, kange di tamupra telep kweipsetum’ tenen, moropkene naio.
Ada tali tep gum dinin, deiyoda, tamupra telep kupra deipsetumopda, kandi wepra deiamsemum Israel yala nesaladi, kan tep, kange pio deipra kunkamkep’ tenen tep, moropkene naio.
8 Nun nai Allah Yahweh, kandi nun tep, ‘Ne ila di bicau tenepsenedi, pio telep kupra derinkamsene,’ pepra, pedina upu deiki peiamsemum ngeda, tupa-tupa kupsetumpa, dinkamepe’ tenen, moropkene naio.
Tonda, ‘Nun ikin weik kuserenge neitamai di, kan dipapu melipra lyepropkamserem’ tenen, moropkene.
9 Nun nai Allah Yahweh, kandi, ‘Ne mawa’ tenen, wepra deiamseu nesala tep, “Podana gum di, tali kange deipra kunkamrume,” pepra, pedina upu deiki di pepkamsera tep nengeda, ‘Allahdi pepkamser upuda, ne ton gekeptene’ tenen, ila di putanerure.
Ada, Allah tep teka tenepmengedi, erdi peserur upu moupra talepmengedi, dumsisipu kunge neng tep, aupu pepkamsere.
Dinino, ware nesala do yuma, sundi menop taru mali-mali kun kecapu talepra kuramrum ngeda, kange di tamupra, akecapu taleprumudi, ton cap men kunkamrume.
10 Allahdi, “Angeda kunkamrume, angeda pio men kunkamrume,” pepra, deipseu upu moupra talepmengedi, akecapu kunge nesala tep nengeda, Allahdi sun damai yana, melipra lyemdoserure.
Ada tali tep gum dinin, ‘Allah er pio telep kurur keca cap, puto weik kurur keca capda, nun mutu neitamai di katuai keipserepa, nimi yuma epmengedi, er Allah tep kael kepkameng’ tenen, moropkene naio.
11 Allahdi nun tep, ila di bicau teneseredi, “Angeda, ukuprapnedi, pio telep kudinkamsene,” pepra, pedina upu deiki di peipseunge yumada, pio men tapkamre. Ange yumada, pio karenkamsere. Tonda, erdi, ‘Ukunkamne,’ perur upu yumada, tek sisi angetopu kurure. Ange yumada, men gum kuptue.
Ange utopu, tonda erdi nun tuai mutu nesala tep, “Angeda kunkamrume, angeda pio men kunkamrume,” pepra deiamseu upu perurtopu, angepu tupa kurure. Tonda, akeca-keca yuma tep telep kupra deipseredi, podana gum dipapu, pio teleppu kunkamepe. Telep upu peserur nge cap, teleppu kupra derinkamserurnge capda, kikiman kunkamre.
12 Nimi tuai mutu nesala yumada, Allahdi pio telep kupra deriserur keca kael kepmengopda, sundi Allah tep teka tenepmengedi, pio men tamkamenge. Er sipu eremkamenge.
Ange utopu, Allahda, pio dumsisipu kupra kure ngebodi, im deiki di nun tuai mutu nesala tep, diseredi, pio melimnapu kunkamsere.
13 Teka, nun tenimtona gum dipapu, konum kael kemnupe. Allahdi pio teleppu kudinkamsere.
Ukunkamsera tep nengeda, erdi nun kunup mutu yuma tep nengeda, telep kupra deipserepanen, nun wa pepra kounup keca yuma cap, gam keca peinup keca yuma capda, pio weika di tapakra, teleppu kupbankamser ja!
14 Tuai mutu kunup nesala yumadi, Allah kure keca epmengedi, ‘Uo, tek sisi, er kure keca yumada dumsisi kupra pio teleppu kurure,’ tenepmengedi, moupra kael kepkamenge.
Allahdi kure keca yumada, pio dumsisi telepngepu kurura cadi, erdi pel donkamrai yuma cap, embankamrai yuma capda, pio dumsisi kupra teleppu tupa-tupa kunkamre ja!