Psa 86 | XteSC | STEP | Dauddi aMazmur upu mut pena tep nge seku. Sekudi, Dauddi pepu upuda, ake. Uo, ne nai Allah Yahweh, nedi moropken upuda, ‘Moupra gekepnetum’ tenen, moropkene. Deiyoda, nedi akeca-keca yuma men talenedi, ikin kangeda pio weik doupra kununa tep, ‘Kandi melipra lyepropnetum’ tenen, moropkene.

Psalms 86

‘Yu nengdi popnenunga tep, ‘Allahdi loptapra lyepropnetue’ tenen, morona upu.

1 Dauddi aMazmur upu mut pena tep nge seku. Sekudi, Dauddi pepu upuda, ake.
Uo, ne nai Allah Yahweh, nedi moropken upuda, ‘Moupra gekepnetum’ tenen, moropkene.
Deiyoda, nedi akeca-keca yuma men talenedi, ikin kangeda pio weik doupra kununa tep, ‘Kandi melipra lyepropnetum’ tenen, moropkene.
2 Naio, kandi, “Angeda kunkamrume, angeda pio men kunkamrume,” pepra deiamsemum upuda, pio tep talepra kununa cadi, ne gam tupa kunkamne taruda, kan dipapu kalengkamnerume.
Tonda, kan amutara kunedi, kan pelpu talepra donune. Atep, ‘Ne pona tep nengdi, poptapnenung’ tenen, nedi kan tep, ne kange dipru yuma kan deikipu deipkenedi, teka tenekenune.
3 Ne si eremnun Allahda, kan tenpua!
Atep, ‘Kanda ila di bicau tenepnememdi, weika di melimkamnerum’ tenen, moropkene naio! Kanda, akeca-keca yuma talememdi, deiki tara erepra, ila puto deiyo ngebo ^{▼▼ila puto deiyo ngebo – Ibrani upu deiki di, Allah tep, ‘Adonai’ seki. Aupu ‘Adonai’ deiyoda, ‘Ketengban nesaladi moupra kael kepkameng’ tenen, nundi ange katuai kupra sekmepu. Ada, ‘Allahdi akeca-keca yuma taleredi, deiki tara erepra, ila puto deiyo ngebo kurure’ tenen, Ibrani upu di ‘Adonai’ seki.} kuruma tep, teka tenekenune.
Kanda, ila puto ngebo kuruma cadi, tumi-tumi yumada, nedi, “Naio melipra lyepropneo!” pepra, kan tepapu morokenune.
4 Kanda, akeca-keca yuma talememdi, deiki tara erepra, ila puto deiyo ngebo kuruma tep, teka tenekenedi, ne kange dipru yumada, kan deikipu derikenune. Ange tep nengeda, kandi melipnemempa, pingping kange deipra teleppu kunkamne. Neda, kan amutara kununa tep, kandi, ‘Ukupkurume,’ pepnemem upupu talepra kunune.
5 Nedi kan tep, ‘Melipra lyepropneo!’ pepra, morokenuna deiyoda ake. Ada, kanda akeca-keca yuma talememdi, deiki tara erepra, ila puto deiyo ngebo kurum dinino, kandi kange deipsememdi, nun mali kunup keca tep, kaukemsememdi, gum kupra derirume. Ukumemdi, kanda pio telep kuruma tepa.
Tonda, ware nesala do yuma, sundi kan tepapu, ‘Naio, kan dipapu melipra lyepropseo!’ pepra, morokenge nesala tep, lyepropsememdi, pio telep kudiserume. Tonda, kanda, ‘Ila di bicau tenesememdi, pio teleppu kudinkamsene,’ pepra, pedina upu deikida, weika di peseruma tep pepkene.
6 Ne nai Allah Yahweh, nedi morokenun keca yumada, ‘Moupra gekepnememdi, melimkamnerum’ tenen, moropkene naio!
Ada, nedi, “Melipneo,” pepra, engena deiki di moronkamken keca yumada, ‘Gekepnememdi, ne moronkamken utopu kupra karenkamnerum’ tenen, moropkene naio.
7 Uo, ne nai Allah Yahweh, nedi moropkene upuda, ‘Kandi moupra gekepnetum’ tenen, moropkene.
Ila ikin keca, ne damai yaryopda, ataru dipapu, nedi kan tep, “Naio, melipneo,” pepra, moronkamken ja!
Kan tep moropkamkena deiyoda, tali tep gume. Deiyoda, kan dipapu tumi-tumi yumada, tek sisi tupa melimneruma tep, kan tepapu morokenune naio.
8 Yuk nesala yala-yala yumadi, yuk tali keca tep, ‘Nun nai bo ake,’ pepra, isok si eremnung dinin, sun si eremenge kecada, tali kecapu kurure.
Dinino, kan tenpuda, tek sisi Allah kurume. Ada, kanda akeca-keca yuma talememdi, deiki tara erepra, ila puto deiyo ngebo kuruma tep, tek sisi Allahda, kan tenpua!
Tonda, kan puto di ila mambul pel dorum ngeda, yuk nengdi ton pio men kuptenge.
9 Amenda sirya taruda, tuai mutu ban-ban yuma neitamai kunge nesala, kandi ketekepra deiamum nesala yala-yala yumada, kan damaipu yakankamenge.
Uo, Allah kanda akeca-keca yuma talememdi, deiki tara erepra, ila puto deiyo ngebo kuruma tep, tuai nesala yuma, kan urasin damai konum yangopda, sun yumadi, gutam tu deiki deipra genepdongopmengedi, kan si tepapu eremkamenge.
Tonda, kan cap, kan puto cap, kan pio telep si kurem ngebo cap tep, ‘Ayumada pio telepe,’ pepra, kan sipu eremkamkenge.
10 Kan sipu eremkamkenga deiyoda ake. Ada, kandi pio telep pel, ila puto di kunupsek pen pel domem taru yumada, nimi yumadi, ‘Uo, uo, angeda ware kupra kuptu do?’ tenen, kware weik kuprepa, sun kange derinapu kununge.
Tek sisi, Allahda, kan tenpua, yuk ngebo ton pio gume.
11 Uo, ne nai Yahweh, kandi nun tep, “Angeda kunkamrume, angeda pio men kunkamrume,” pepra, deiamsemum upu cap, ‘Telep kuna tep ban bisida ake,’ peserumnge cap yumada, ‘Kandi peterepnemempa, kael keptene’ tenen, putapnerpa, moropkene naio.
Ada tali gekena tep gum dinin, deiyoda, kandi, ‘Tek sisi dumsisi kuna ngeda, ake,’ pepra peserum upupu, ‘Nedi angepu talepra, dumsisipu kutene’ tenen, putapnera tep, moropkene naio.
Kandi ne kange dipru neitamai pel dopnetuma deiki di, nedi tenimtona gum dipapu, ne kange dipru yuma tenpu keipnemempa, kan deikipu deipkenedi, kan tepapu, kware tenenedi kunkamne.
12 Uo, ne nai Allah, kan tepapu, “Kanda pio teleppu kurure,” pepra, kan sipu eremkamkene. Kanda akeca-keca yuma talememdi, deiki tara erepra, ila puto deiyo ngebo kuruma tep, ne kange dipru neitamai yuma deiki di, kan si tepapu eremkamkene naio.
Teka, kan cap, kan puto cap, kan si cap tep, “Kanda pio telepe,” pepra, kan sipu pio eremkamkene.
13 Kan sipu eremkamkena deiyoda ake. Ada, kandi ne tep, ‘Pio ila di bicau tenekenedi, pio telep kupra kudinkamkene,’ ^{▼▼kudinkamkene – Ibrani upu deiki di, ‘hesed’ pepra seki. Yuk Allah upu buku neitamaida, ‘kasih-Nya kekal’ pepra sengnunge. Dinino, nundi, ‘Ketengban nesaladi, aupu deiyo yuma moupra kael kepkameng’ tenen, nundi ange katuai kupra sekmepu. Ada, ‘Allahdi sun Israel nesala tep pepu. “Ila di bicau tenesenedi, pio telep kupra kudinkamsene,” pepra, pedina upu deiki di pepka tep, ange yumada pio kunkamre, men tapkamre. Atep, Ibrani upu di ‘hesed’ pepra seki.} pepra, pedina upu deiki di peiamnemum ngeda, men nukmanto kurura tepa.
Tonda, menop taru konum depmanto kunmasi taruda, depmatenepa, konum depmengepa tu palinung neng kunungai, amutu sida Sheol mutu konum bena kunmatene dinin, ataruda, kan dipapu kwetepnemumpa, gam tupa kunune.
14 Uo ne nai Allah, pio balila weik kunge nengdi, yu kupupa, ‘Angebo popkup’ tenen, ne damai konum poryakanenunge.
Ada, ware kuprap nengdi do, sun pio kware tenena gum dipapu, ‘Angebo porbenkupe,’ pepra, sun yu neng yumadi bulupra, ne damai konum poryakanenunge.
Tonda, anengda, ‘E, angebo poptapmepyopda, Allahdi nun wenemna tep, ware kupkamser do?’ pio men tenenunge. Tali lupra poryakanenunge.
15 Dinino, ne nai Allah, ne kaele, kanda akeca-keca yuma talememdi, deiki tara erepra, ila puto deiyo ngebo kurume. Dinino, kan kange dipapu nun tep, bicau tenesememdi, nun mali kunup keca tep, adipapu poptamsetum dinin, kaukemnapu kusememdi, teleppu kudiserume.
Tonda, nun mali kunup keca tep, menmena di yu men teneserume. Tonda, kanda, ‘Ila di pio bicau tenesememdi, pio teleppu kudinkamsene,’ pepra, pedina upu deikida, weika di peserum ngeda, ange yuma tamna gum di, pio telep kupra deriserume. Tonda, kandi, ange yuma tep nengeda, nedi, “Ukupkamsene, ukupkamsene,” pepra, peserum utopu kupra, pio melimserume.
16 Uo ne naio, kandi ne tupa pio moupra dinememdi, ne ikin kunerur keca yuma tep, bicau tenepnememdi, yana melimkamnerume.
Ne damai yamem dingeda, lyepkamnerume naio! Neda, nanin kuramutopu, ne gam kunkamne taru yumada, kan amutarapu kunedi, kan tepapu pio pel donkamkene.
17 Naio, ‘Kandi bicau tenepnememdi, melipkamnere, tenepnedi kael keptene’ tenen, putapnera tep moropkene. Atep kandi peten kemna keca ton karepnerume naio. Adeiki di kael kepkamne.
Peten kemnange karepnemempa, ne tep, ‘Nun songe,’ tenenenung neng yumadi epmengopda, ali dangkamenge.
Ada, sundi, ‘Uo, tek sisi Allah Yahwehdi, angebo konum melimrure,’ tenepmengedi, kael kepmengopda, ali dangkamenge. Ne nai Yahweh, kange mun kange doupra kunun taru yumada, kan dipapu ne dipru kwa dimnememnya tep, sun yu nengdi, ange epra kael kepmengopda, ali dangkamenge.