Psa 87 | XteSC | STEP | Korah er deipupa, deipdanen barami nesaladi perami mutda ake. Allah erdi, ‘Amutu deiki ne si deipkamne’ tenen, wepra deipu mutu, mali keca tenpu peda pio men kure mutu buku. Amutu deikida, Allah Yahwehdi dopra deipu mutu, ila kota ketenepra deipu.

Psalms 87

Allahdi wepra deipu mutu Yerusalem tep, mut pepu upu

1 Korah er deipupa, deipdanen barami nesaladi perami mutda ake. Allah erdi, ‘Amutu deiki ne si deipkamne’ tenen, wepra deipu mutu, mali keca tenpu peda pio men kure mutu buku. Amutu deikida, Allah Yahwehdi dopra deipu mutu, ila kota ketenepra deipu.
2 Israel nesala kunung mutu neitamai yumada, ati arum weik adorami dinin, amutu yumada yambul mambule. Dinino, Allah Yahwehdi, Yerusalem mutu tep nengeda, ‘Amutu ila mambul mutu kapu,’ tenerure.
3 Uo, Yerusalem mutu neitamai kurum nesalada gekepkurume. Allah er si eremna ati, sun kota neitamai kurura cadi, nimi yumadi, sun kota tep, ila mambul upu pengedi gispal donunge. Konuma tenena tep Selah pepne.
4 Pio karen mutu kunge nesalada, Mesir mutu nesala cap, Babel mutu nesala capda, Yerusalem mutu tep konum gekepra kael keamya cadi, anesala si sengdina neitamaipu sekra deipkamne.
Tonda Filistea mutu kunge neng cap, Tirus mutu kunge neng cap, Etiopia mutu kunge neng cap, amutu-amutu kunung nesala yuma capda, Yerusalem mutu tep gekepra kael keamya tep, sun peda, ‘Yerusalem mutu kunung nesala kan-kanpu tapakra kunkamepe’ tenen, putarure.
5 Ange tep nengeda, Yerusalem mutu tep, nimi yumadi, “Nun peda amutu kunge nesala kutepe,” penkamenge. Tonda, ware ngebo do yuma, Yerusalem mutu neitamai di deipmenge ngeboda, yuk nesala yumadi, er tep gispal donkamenge.
Allah Yahweh, ^{▼▼Allah – Acada, Ibrani upu deiki di, Allah er si tep, ‘Yahweh’ cap, ‘Sebaot’ cap, tonda, ‘Elyon’ cap pepra seki. Indonesia Allah upu buku neitamaida, ‘Allah yang Mahatinggi’ pepra sengnunge. Dinino, Ibrani upu weneri deiyoda, sun kael kemna tep, ange yumada, konum jenek kupra sekmepu. Tonda, Yahweh kael kemna tep, Keluaran 3:14 cap, tonda lap pena upu nomor 49 dirume.} kanda im deiki jen talen malaikat yuma, sun deiyo ngebo kurume. Kanda akeca-keca yuma deiki tara talepra kumemdi, Ila Puto Eremna Ngebo kuruma cadi, Yerusalem mutu kunge nesala yuma tep, pio telep kudinkamre.
6 Ukupredi, Allah er si Yahwehdi nesala ban-ban yuma dopra, sun si sekeipkamre taruda, anesala dipetepredi, Yerusalem mutu neitamai di deipi nesala tep, ‘Anengda, ila mambul mutu, Sion mutu neitamai di, deipsei,’ pepredi, sun si sekeipkamre.
7 Ukupre pangeda, sun anesala yumadi, ‘Yerusalem mutuda nun deiyo mutu’ tenen, kange deipra kungedi, Allah er sipu erepra mut penkamenge.