Psalms 88

Ila kange mun kange doupra kun taruda, Allah tep moropu upu

1Sun Korah yala nengdi deiami ngebodi, aMazmur mut upuda seku. Ada, Allah upu mut pena deiyo ngebo karepkamenga tep, amutda sekra deipu.
Tonda, amut upuda, ‘Yuk Allah upu mut, er si ‘Leanot mut’ penmangepa, er lelim peramretopu kupra, amut peda utopu penkameng’ tenen, seku.
Tonda, Ezrahi yala ngebo, er si Hermandi amut upu sekra deipu. Ada, ‘Israel yala nesala yumadi, akecada kael kemkamenge,’ tenepudi seku. Hermandi sekudi pepu upuda ake.
2Uo, ne nai Allah, kan sida, Yahweh, kan dipapu ne Lyemna Deiyo Ngebo kureme!
Ada, lukunda neitamai yumada, kan damaipu yanedi, ‘Ne nai Allah melipneo,’ pepra morokenun taru yumada, kan dipapu, yana melipra lyemdonerume.
3Atep nengeda, nedi kan damai yana morokenun taru yumada, ‘Ne morokenun upuda, kan dipapu gekenkamnerum’ tenen, moropkene.
Teka, ‘Nedi morokenun taru yumada, kan amul di moupra gekenkamnerum’ tenen, moropkene naio!
4Ada tali tep gum dinin, deiyoda, ne kange dipru neitamaida, ikin weik kunerura tep, moropkene naio!
Tonda, ukutaruda, neda konum depmanto kunmana cadi, konum depnyopda, sun men taru di konum depipa, peipi nesala kunge mutu, er sida Sheol mutu, amutu neitamaipu konum wekmanto kunune.
5Ukutaruda, yuk nengdi, ne tep tenepnengedi, ‘Gume, angeboda, konum depmange neng utopu kurure,’ tenenunge.
Atep teka, nimi depmangepa, yuk nengdi aneng dopra tu palipmengopda, amenda taru anesala ton cap men melipmanto kunung utopu, ataruda ne peda utopu kunune.
6Ada, nimi depmangepa, yuk nengdi, ‘Gume, sunda nimi konum deami mutu neitamaipu bendopya cadi, dakwapye, nundi sun tep tupa men meliptepe’ tenen, kaukemsenung utopu konum kunmane.
Ada, nimi depmangepa, yuk nengdi, ‘Gume, sunda nimi konum deami mutu bendopya cadi, dakwapye, nundi sun tep tupa men meliptepe’ tenen, kaukemsenung utopu konum kunmane.
Aneng konum depmengepa, tu palipmengopda, dakuramenganen, orketeng tamun neitamai, sun konum deami nesala tupa men tenenungtopu, ne peda utopu kunune. Ne peda tupa pio men tenenenunge.
Tonda, ne kangeda, kandi tapmempa, ton nesalada tapmemdi, pio men melimrumtopu, ne peda utopu tupa men melimnerume naio!
7Ada ikin weik kunerura cadi, ukupmantoda, kandi ne dopra, nimi konum depmenge neng tu paliamengepa, sun kunungai, tu pumbonpu konum dongomengepa, kurameng neng utopu kunune.
Ukupmantoda, ila karu tu pumbon, pio kunungnai konum dongopnemumpa, kurameng utopu, tupa kunune.
8Ada, ne mali kuramsinge wenemna tep, yu weik kupkeupa, ne nong deiki ikin keca pio weika di deipnemume.
Ada kan yu deiki di, ila ikin keca weika di karenemempa, neda men kupmanto kunune. Ukupmantoda, laut mokon neitamai, me ila di deipredi, welepnen yakaramre utopu, ikin kecada, ne damai tupa yakanerure.
9Tonda, kan Allahdi, ne wenemna tep, kan pel domemnya deiki di, ne kayapu neng cap, ne damai kunge neng capdi, ‘Gume, angeboda, nun cap kikiman pio men kunkamepe’ tenen, tamnenunge.
Ukunememnya deiki, sundi ne tep, epnengedi, ‘Uo, angebo, er ikin weik kuryada, mambul weike’ tenen, kware pio weik kurepa, sundi, ‘Gume, nun cap, er cap kikiman men kutepe,’ tenengedi, ne tapnengedi, gopra yukai bena kununge.
Ikin deiki weik kununa cadi, ukupmantoda, wenemna ati pumbon dongopnengepa, bura men benmanto kuramengtopu kunune.
10Ange yuma tep nengeda, ne dipru neitamai di, pu jenerepa, engenapu kununa cadi, ne asuruda, pio pu jenerure.
Atep, ne nai Allah Yahweh, tumi-tumi yuma neitamaida, “Naio melipra lyepnerume,” pepra, kan tepapu morokenune.
Ada, ‘Allah dipapu melipra lyepnetu’ tenen, tupa-tupa ne buru erepnedi, kan tepapu morokenune naio.
11Ne naio moupra tenepetepkurume. Konum deamipa, tu palipi neng tep, melimrum do? Gume, aneng tep, tupa men melimruma cadi, ‘Ne depnun’ tenen, moropkene naio!
Ange utopu, konum deami nesala, sun sambalada, kange di tamupra, bukrongedi, kan damai yana, kan si tep, eremkenung do? Gume, ange peda men kupmanto naio. Atep, ‘Ne depnun’ tenen, melipra lyepneo naio!
12Tonda, kandi kan mawa nesala tep, bicau tenesememdi, “Tupa telep kupra derinkamsene,” pepra, pedina upu deiki di peiamsemum ngeda, sun konum deamipa, konum tu paliami neng, tu pumbon di ton, aupu yuma tep, tupa lap penung do? Gume, ange peda men kupmanto.
Ange utopu, konum deami nesala kunungai, akeca-keca yuma gum kupkamre mutu, er sida Abadon mutu neitamai di, sun deami nengdi, “Allahdi perurtopu, tamna gum di, angepu tek sisi tupa-tupa kurure. Erdi pio men tamserure,” pepra, kan si eremkenung do? Gume men kununge.
13Tonda, konum deami nesala kunungai, pio kunungna neitamai di, “Allahdi er pel dorur ngeda, pio telepe,” pepra, kan si ton eremkenung do? Gume, ange peda pio men kununge naio.
Tonda, kandi pio dumsisi kupra, teleppu pel dorumnge yumada, konum deamipa, akeca-keca yumada, luprongedi pio men tenipmanto kurameng nengdi, lap penkameng do? Gume, ange peda men kupmanto.
14Sun konum deami nengda, kan kurum keca pio men lap petenge dinino, ne nai Allah Yahweh, nedi kan tepapu, “Uo, ne melipra lyepneo,” pepra, engepna deiki di, morokenune.
Ada ipna taru yumada, ne adipapu mapmanyanen, bukronedi, kan tep, “Ne naio, kan dipapu melipra lyepneo!” pepra, moropnyopda, nedi morokenun upuda, kan damai yakarure.
15Dinino, ne nai bo Yahweh, ware keca deiyo ne, kandi ne tep tupa tamnememdi, yuk karen mutu utopu dokotepnemum do?
Tonda, ware keca deiyo tep, kan urasinda, inipronememdi, ne tara tupa men dinememdi, pio men melimnerum do?
16Ne kangeda, ne yambul nyapu kuramsi taru di dipra, daneitamai kuramsi taru yumada, kange mun kange doupra kuramsa tep, ataruda, ne adipapu konum depmanto tupa kuramsi.
Ada, ne gam kuramsi taru pe, ukutaru peda, kandi ila ikin keca ne deiki deriramnemumpa, kware weik kunerura cadi, ‘Uo, ware kuptene do?’ tenen, kange mun kange doupnedi, tenimtonapu kunune.
17Tonda, ukupmantoda, ila imna ipmengepa, uku di akeca-keca yuma jeramredi, gawal dangamretopu, kan ila yu weik kukerura cadi, ne wenemna tep karenermem kecada, ne deikipu yakanerure.
Ada, ne mali kuramsinge tep, menenga keca ila mambulnge dopra, ne deiki wenepra karenerumngedi, ne popra sikke bungtamneredi, gawal dangnerure.
18Ada, tumi-tumi yuma neitamaida, ne wenemna tep karenerum ikin kecada, ne dana-dana tara yuma ongopgenepdongopra yakanerure. Ukupmantoda, ila me opra embaredi, dana-dana tara kurur keca yuma jeramretopu kunerure.
Ada, tenpu tara di men yakanerure. Ange gum dinin, ne dana-dana tara yuma di, aikin keca ne damai yakaneredi, diningdongonerure.
19Uo ne naio! Kan dipapu ikin keca weika di kareneruma deiki di, ne tep pio bicau teneramnei neng cap, ne kayapu neng sisa cap, ne damai kunge neng cap, men di konum kael keamsidi, ne cap kikiman upu taleramupu neng cap yumada, konum tapneia cadi, neda pio kunungnai pumbon utopu kunune naio. Neda, pio ikin weik kunerura cadi, kan Allah tepapu morokenune naio!