Psa 89 | XteSC | STEP | Amutda nimi ton er si Etan, Ezrahi yala ngebodi pepu mut ake.

Psalms 89

Allahdi tuai nesala tep, ila di bicau teneserura tep, mut pepi upu

1 Amutda nimi ton er si Etan, Ezrahi yala ngebodi pepu mut ake.
2 Ne nai Allah Yahweh kandi nun tep bicau tenesememnya tep, nedi yuma taru yuma, kan sipu pio tep eremkamkene. Ada, mut pena deiki dipapu penkamkene.
Penkamkenada tali tep gume, kandi nun tep tamna pio gum dipapu, ila di bicau tenesememdi, tupa-tupa moupra telep kemdisememnya tep, penkamne. Tonda, aupu doupra, nundi deipmepepa, dadeipdanen bankameng nesala sun kori lap pepra peteremkamne.
3 Kandi nun tep bicau tenesememdi melimserum ngeda, ton pio men gum kupkamre. Pio tep akapkamre. Ukupmantoda, im deiki kure keca yuma pio akaputopu, Allah kandi nun tep bicau teneserumnyada, pio tep akapkamre.
Embana gum, dimpepra kuputopu, kan putoda utopu kukerure. Ada, Allah kandi, ‘Ne mawa nesala, pio kalekra melimkamne,’ pepra, pedina upu im deiki di konum pepra deiamsemuma tepa.
4 Kandi pepra deiamsemum upuda, nun apu bo Daud tep kandi wepra deiamum ngebo er tep peiamume. Kandi upeipmume. “Nedi wepra deipsi ngebo, ne amutara pel dore ngebo Daud tep, pio kalekra melimkamne,” pepra pedina upu peiamume.
5 Tonda, “Daud kandi deipmempa, dadeipdanen bankameng nengdi, kan talepmumnge yuma, sundi pio talenkamenge,” pepra pedina upu ton peiamume. Tonda, “Daud kan cap, kandi deipkamrem neng cap yumada, ila nimi deiyo neng bungna keca deiki, bukmengedi, amutu nesala yuma pio talenkamenge.
Ada doryankamre taru yumada, yuk yala nengdi, Israel yala nesalada, men talenkamenge. Akonuma pena tep, Selah,” pepne.
6 Nun nai Allah Yahweh, kandi ila mambul pel weik domemnge tep nengeda, im deiki tara ketekepra deiamum keca cap, im deiki kunung neng malaikat capdi, kan sipu pio eremkenunge. Im deiki kumemdi nimi men kupmanto keca yuma kurum ngebo tep, im deiki kunge neng yumadi kange deipkengedi kan tepapu gispal dokenunge.
‘Allah Yahwehdi, ‘Ukunkamsene,’ pesere upu yumada, tenpunge peda tamna gum di, ange yuma tek sisi tupa pel doserure. Nun tepapu moupra kalengseredi telep kudiserure,’ tenepmengedi kan sipu pio eremkenunge.
7 Teka nun nai Allah Yahweh, kan kumem mutu im deikida, Allah kan kumemnya utopu ngebo ton men kurure.
Tonda im deiki kunge malaikat yuma peda, kan utopu ton men kununge. Allah Yahweh kan kumemnya utopu ngebo ton pio men kurure.
8 Allah kan pel donung malaikat, ila puto weik neng, im deiki kungedi, Allah kan tepapu kware kurepa teka tenekengedi, kan sipu erepra gispal dokenunge.
Sun im deiki kunge malaikat yumada, ila mambul neng kunung dinin, nun nai Allah Yahweh kanda, pio ila mambul ngebo kurume. Sun im deiki kunge malaikat yumada, kan damaipu warekdongopra kungedi, kan sipu eremkenunge.
9 Teka nun nai Allah Yahweh, kanda akeca-keca yuma talepra, pio deiki tara kumemdi, ila kwemdin ngebo kurume. Allah Yahweh ^{▼▼Allah – Akayat neitamaida, Ibrani upu deiki di, Allah er pe si sisa, ‘Yahweh’ cap, tonda ‘Sebaot’ cap, pepra sekya cadi, sun kael kemna tep, nundi aupu ‘Sebaot’ deiyo ngeda, konum jenek kupra sekmupu.} kanda, akeca-keca yuma talerumdi, im deiki jen talen malaikat yuma, sun ila deiyo ngebo kurume.
Allah kan kumemnya utopu ngebo ton men kurure. Ware ngebo kan puto kumemnya utopu ngebo ton kurur do? Pio gume. Kandi, ‘Ukunkamne,’ pepra pedisemem upu yumada, tenpunge peda tamna gum di, pio tek sisi kuserume.
10 Tonda, ne nai Allah kan dipapu tenepmumpa, laut mokon deipudi puto welerur dinin, kan dipapu kalekra diruma cadi, kandi tenepmemtopu, me kait ila di welepmareane, kange di tamupra bouna di kwererure.
11 Ila laut mokon deipua neitamai, ila ikan er sida Rahab dakuramunge peda, Allah kan dipapu popra yawa poptapmume. Tonda, Allah kan ila buru puto deiki di, kan podandam nesala yuma konum sapra yuk-yuk donokmume.
12 Im deiki cap, im deiki kure keca yuma cap, tuai cap, tuai mutu neitamai kure keca yuma capda, kan dipapu ketekepra deipmuma cadi, kan pedipapu akeca yala-yala yuma talepra kurume.
Ada kan pengepu kurure. Tonda tuai mutu cap, tuai mutu neitamai kure keca yuma cap, tonda kunge nesala yuma capda, kan pedipapu ketekepra deiamuma tep, tupa talerume.
13 Tonda, Allah kan dipapu itara cap, utamna cap yuma, ketekepra deiamume. Ukupmuma tep nengeda, Tabor mutu cap, Hermon mutu cap, yumadi kan tepapu kange deipra gudikenunge. Amutu kunge nesaladi, mut pepra kan si tepapu eremkenunge.
14 Allah kan buru ila puto deiki di, nimi men kupmanto keca yuma kurum ngebo. Tonda kan buru tang deiki di ila puto pel dorume. Tonda, kan dumsisi tara buru ila puto weik cadi, erepra dorume.
15 Allah kandi, yuma keca yumada ila puto di erepra dopmumdi dirume. Kandi akeca yuma erepra dopmuma amutara ati ayumnya co utopuda, pio dumsisi kuna cap, pio tek sisi upu pena cap, kurure.
Tonda, kandi nun tep tamna gum dipapu ila di bicau tenesemumnye cap, kandi, ‘Ukunkamsene,’ pesememtopu kusememnya cap, yumada angepu kurure.
16 Ware nesala do yumada, kange tenimtona gum dipapu, pingping kange doupra Allah kan sipu eremkamkeng nesalada, kandi pio teleppu kudinkamrume. Allah Yahweh kandi, kan ila dirin ngeda, sun anesala nong deiki derimempa, adirin deiki di, kan damaipu yakankamenge.
17 Anesala yumada, kan si tep tupa tenepmengopda, yuma taru yuma pingping kange doupra teleppu kunkamenge. Tonda, kan pio dumsisi teleppu kumemnya tep, pio kange deipra kununge.
18 Atep kandi nun lyepropsemumdi, kan ila dirin dopra nun deiki deriserume. Tonda, kandi nun tep kange deipsemuma deiki dipapu, nun puto karepsemumdi, telep kupra deriserume.
19 Ange tep nengeda, nun ila nimi deiyo ngebo Rajada, nun nai Allah Yahweh kandi wepra deipmumdi, karepsemume. Utopu, nun Israel nesala wepra anuamsemuma deiyo ngeboda, nun nai Allah kanda Ila Eremna Deiyo Ngebo kurume. Kan tenpu kurume.
Allah kan damaida, mali kun keca tenpu peda, pio men kukerure. Kanda pio Lek Ngebo dipapu nun Israel nesala tep, kalekra melimserume.

Allahdi Raja Daud tep, ‘Ne mawa Israel nesala talenkamre’ tenen, wepra deiamnga tep pepu upu

20 Pumun taru kan upu lap pena deiyo ngebo tenpu tep, ken mana deiki di yan peiamume. Ada, “Tali dakunmange nesala kan-kan di, tenpu ngebo ton nedi wepra deipnedi, nedi peipnepa, kanda ne upu lap pena ngebodi, er giso deiki minyak me mokon dikipmempa, Israel nesala sun deiyo ngebo kunkamre,” peiamume.
“Angebo Daudda, nimi kan-kan dakuramrepane, nedi erepra deipnepa, ila nimi deiyo ngebo kepredi, Israel nesala talepra kunkamre,” tenen, peiamume.
21 Tonda, aupu ton peramume. “Nedi ne pel don ngebo Daud konum wepra deipsa tep, kandi er giso deiki minyak me dikra deipkurume,” pepra deipmume.
22 “Atep tupa-tupa ne ila puto buru di melimnepa, er peda puto dipapu kunkamre. Utopu nedi Daud talepnepa, ne amutarapu puto di pel donkamre.
23 Ne Allahdi Daud tep melipnyopda, er podan nengdi men yan popbisipkamenge. Tonda, mali kuna nengdi er tep men yan bisbisa kapkamege. Nedi Daud tep melipnyopda, yuk mutu nimi deiyo nengdi, er tep, ‘Nun gispal dona tep, co bo weik karepseo,’ pepmenga peda, men karenkamre.”
24 Atep er podan neng yumada, nedi popra gum kupra deipkamne. Tonda, er tep, ‘Popkupe,’ tenenge neng yuma popra gawal dakne pangeda, ware nengdi er tep mar penkameng do, gume pepne.
25 Ukupnedi pio tep, nedi er tepapu bicau tenepra melimkamne. Ukupnepa, erdi ne si tep tupa eremnere pangeda, nedi er tep, tamna pio gum di, tupa melimna deiki di, puto weika di karepnepa, yuk mutu nimi deiyo kepra kunung neng yumada, er dipapu erepra talenkamre.
26 Ne Allahdi er tep puto weika di karepnepa, Dauddi talenkamre mutuda, keteng darban tara deipu ila laut mokon di dipdongopra, keteng yakan tara Efrat me cap, Tigris me cap ortara yumada talenkamre. Apepman mutu yumada, er tep karepnepa, er dipapu talenkamre.
27 Ataruda Dauddi ne tep upenkamnere. “Kanda ne nai bo Allah kurume. Kanda ne nai Allah kumemdi ne tep melipra lyemdonerume. Ton ukupmantoda, ne nai Allah kanda ila gel bungamre utopu kupra kumempa, neda kan amutara kunkamne,” penkamre.
28 “Ne Allahdi, angebo Daud tep, ne mi sisa du ngebo utopu kupra deipkamne. Ukweipnepa, Daud erdi ban-ban yuma nimi deiyo kepra kununge neng yumada, amu kepra erda pio deiki tara di talepra kunkamre.
Ne Allahdi Raja Daud tep, nimi deiyo ngebo kepra ereipnepa, yuk mutu neng yuma sun deiki tara eremna ngebo kunkamre.
29 Tonda nedi, ‘Er tepapu pio bicau tenepra melimkamne,’ peiamsitopu tupa-tupa melimnepa, puto di kunkamre. Tonda, ne Allahdi, Daud tep, ‘Ukunkamkene,’ pepra pediramsi upu yumada, tek sisi pio tep kunkamre. Angeda men gum kupkamre.”
30 Erdi amutu-amutu yuma talenkamre taru di dipdongopra dorkunkamre taru yumada, Dauddi deiprepa dadeipdanen, bankameng neng dipapu, er bungruraida punupra bungkamenge. Ada, ne im deiki kunedi tuai mutu yuma talenkamne taru yuma, Daud er yala nengdi amutu yuma talenkamenge.
31 ‘Ukunkamenge,’ tenepsi dinin, erdi deiprepa dadeipdanen bankameng nesala yumadi, ne peipsi upu yanipra tapmengopda, tek sisi sun aneng tep wenepkamne. Nedi, ‘Ukunkamrume, angeda men kunkamrume,’ pepra deiamsi upu, tapmengedi, yanipmengopda, nedi aneng tep wenepkamne.
32 Sundi, ‘Allah peiamseu ngeda, ace’ tenen, moupra men tenepmengedi, tali-tali tenepra kungeopda, anesala wenepkamne.
33 Ada, nedi sun tep wenepra popkamna deiyoda, sun anesaladi ne upu yanipra tamnengedi, mali kunkamenga kunumna tep, ila kange mun keca karepnepa, dopropkamenge. Ada sun anesalada, balena di gepra popkamne.
34 Sun mali kun keca tep, wenepkamsen dinino, Dauddi deiprepa, dadeipdanen bankameng nesalapuda, nedi pio bicau tenenkamne. Ukupnedi Daud tep, ‘Ukupkamkene,’ peiamsi ngeda, pio men tapkamne. Tupa tenepra melimkamne.
35 Nedi er tep, ‘Ukupkamkene,’ pera pediramsi ngeda, ton men gum kuipkamne. Tonda apeiamsi ngeda, tenpunge peda ne pe ton tamupra men dopropkamne.
36 Ton cap atumi di dukdonopra pepsen ngeda, tek sisi pio tep akapkamre. Allah neda Pio Lek Ngebopu kununa deiki di aupu pepsene. Nedi Daud tep, ‘Ukunkamken,’ pepra pedina upu deiki peramsi ngeda, tali men peptamsi. Aperamsi ngeda, tupa tenenkamne.
37 Ada, erdi deiprepa, dadeipdanen bankameng nesala yumadi, sun nai bo Dauddi taleamrengepu talepdanen bankamenge.
Tonda sundi ne damai kunkameng ngeda, keteng deipredi, amutu neitamai yuma dirine kuramretopu, Daud er yala nengdi, amutu neitamai yuma talepra nimi deiyo neng kunkamenge.
38 Er yala nengdi amutu talepbankameng taru yumada, ware im deiki kuredi, er dirine pio tep akamamretopu kupra nimi deiyo neng kepmengedi, talepbankamenge. Akonuma pena tep, Selah pepne. Allahdi pepu.
39 Upepu pangeda, amut pepu ngebo Etandi tamupra pepu. Nun nai Allahdi aupu yuma peiamsemum dinino, ukutaruda kandi, nun nimi deiyo ngebo Daud tep konum derepmareme. Ukupmarema deiki di, kandi wepra deipmum ngebo Daud tep, ‘Ne songe,’ tenepra tapmareme.
40 Kandi kan amutara pel don ngebo tep, “Ukupkamkene,” pepra, pedina upu peramum ngeda konum tapmume, tenepne. Ukupmumdi er ila nimi deiyo ngebo kemna tep giso deiki deiamu ngeda, doprapmumdi, kandi bental pumbon dongopmume.
41 Tonda er kure mutu ila lyom gel beilya wiaminge cap, gat keca deiki di deipra telep ati dominge yuma capda, kandi urupra gum kupra deipmume.
42 Ukupmuma deiki di abisi embange nesala yumadi, er mawa keca yuma dalupra doronunge. Ukungedi sun kayapu yuk neng tep bena pepmengepa, sun yumadi er tep nalepra autununge.
43 Kandi er podan neng tep puto karepmempa, ‘Popbisipkamepe,’ tenenunge. Ukupmuma tep, er podan neng yuma telep kange doupra kunmange.
44 Er nimi pona tep douramu parang yada, Allah kandi, si gum kupra deipmume. Tonda, erdi, ‘Ne podan neng porbenkune’ tenen, ketemdire taruda, Allah kandi men melimrume.
45 Tonda, er puto di taleamunge yumada, kandi gum kupra deipmareme. Tonda, er ila nimi deiyo kepra bungruraida, kandi dopra tali tuai donokmareme.
46 Er kaber ngebo utopu tupa kuramtu dinin, Allah kandi er gam tupa kuna goda, tamupra yambulanun keipmumpa, wisi ngebo utopu konum kurure. Tonda, ali dangne kecapu er deiki deipmumpa, alipu kunmare. Akonuma pena tep, Selah pepne.
47 Ne nai Allah Yahweh, ware kupra taru yumadi, ne damai di gopra yukai kepronkamrem do? Kandi ne tep, ware kuprap taru ton yuma inipkamnurum do? Tonda ware kuprap taru ton yuma kan yuda uku bu jeramretopu kupra, ne deiki deipnemepa jenkamner do?
48 Ne nai Allah ne moropken ngeda, ne gam kuna tep taruda, go weik men kupnere. Tonda Allah kandi ketekepsemumpa kunup nesala yumada, puto gum nesalapu kunupe. Nun gam kunup taru yumada, ‘Angeda mambule, ukupra kunkamepe,’ tenena gum di, tali kange doupra kunupe.
49 Atep, ware ngebo ton dena gum di, gam tupa kupbankamre do? Tonda, ware ngebo ton, ‘Neda men depkamne ngebo’ tenen, lyepropdatu do? Angeda men kupmanto tep, akonuma pepna tep, Selah pepne.
50 Teka ne nai Allah, kanda akeca-keca yuma talememdi, ila puto weik ngebo kurumadi, kan menop taru di, nun nimi tep, ‘Ne mawa nesala kununge,’ teneramsemumdi, ila di bicau teneramsemumdi, meliamsemum ngeda, konum luprosemum do? Tonda, kandi, ‘Ukunkamne,’ perum ngeda, tupa tek sisi kuruma cadi, nun apu bo Daud tep, “Ukunkamkene,” pepra pedina upu peiamum ngeda, men dukdongopkamserema tep do? Angeda konum tapmaserem do?
51 Teka ne nai Allah Yahweh, kandi pio tenepkamrume. Ne kan amutara pel don ngeboda, ware keca deiyo tep tapnemumpa, ali weik dangnun do? Apepne ngeda tali tep gume, yuk mutu nesala yala-yala yumadi ne tepapu, yap-yap pepra, ikin keca ne nong deiki derinununga tep pepne.
52 Tonda, ne nai Allah Yahweh kan tep, ‘Nun songe,’ tenekenge nesaladi, nimi deiyo kemna tep wepra deipmum ngebo Daud tep, sundi mali pepra yap-yap penunge. Ada dan cei do yuma, er embarepa epmengedi nyek-nyek pepra nalemnapu kununge.
53 Dinino, ikin kunerya peda, ne nai Allah Yahweh, kan si tepapu pio eremkenedi gudinkamkene.
Telepe akonuma tep, amin pepne.