Psa 90 | XteSC | STEP | Allah er pel don ngebo Musadi Allah tep moropudi mut pepu. Teka ne nai Allah kanda nun damai kumemdi, pumun di melipyakaramsemuma, pio tep melipbankamsereme.

Psalms 90

“Allah erda, nimi kunungai tep, melimna ngebo kurure,” pepu upu

1 Allah er pel don ngebo Musadi Allah tep moropudi mut pepu.
Teka ne nai Allah ^{▼▼Allah – Akayat neitamaida, Allah er si tep, Ibrani upu deiki di ‘Adonay’ pepra seki. Aupu deiyoda ake. ‘Allah kanda ne nai bo Allah Yahweh, akeca-keca yuma talememdi, ila puto weik ngebo kurume!’ tenena tep pepi.} kanda nun damai kumemdi, pumun di melipyakaramsemuma, pio tep melipbankamsereme.
2 Tonda, mutu-mutu yuma kapul men ketekeiamum taru di akuramume. Tuai mutu cap, mutu-mutu yuma cap, kapul men ketekeiamum taruda, kanda konum akuramume. Allah kan gam kuna deiyo ngebo cadi, pio tep akunapu kunkamreme. Ataru di dipra dorkunkamre taru peda, gam pio tep kunkamreme.
3 Ne nai Allah kan dipapu nimi isin kareramsemum ngeda, kange di tamupra doropsemempa denupe. Depmepyopda, nun nong dopra ketekeiamsemum tu deikipu, bena deipsengepa butepu dangnupe.
4 Ne nai Allah, kandi tenemem ngeda, keteng tamun denge pio weik seribu tahun kemre ngeda, ‘Ada tenpu tumi utopu kupre,’ tenerume.
Tonda, keteng tamun denge weik seribu tahun kupra peda, tenpu tumi utopu tenerure. Tonda keteng tamun denge weik seribu tahun kupra peda, ada tenpu lukunda utopu tenerure.
5 Kandi nimi isin karepsemumnge tamupra doropsemem taruda, ukupmantoda kene mapdenka dupdup perameng utopu kunupe. Tonda mutmuta gapu bongopra tekapyane, nunum doramretopu, nun nimi peda ue tenpu gam kunmapyane, adipapu denupe.
6 Ada, ipna taru mutmuta yuma bongopredi, er urasin telep kupra tengamre dinin, keteng deiprepa, keteng bupu di, sintarada koludorure. Mutmuta koludoruramretopu, nun nimi peda adipapu denupe.
7 Ne nai Allah nundi mali kupmepyopda, kan tulum kupkerepa, nun isin karepsemum ngeda menmena tamupra doropsemem pangeda, dupdup peramengtopu kunupe. Mali kupmepya deiki kandi nun tep yu tenepsemem pangeda, adipapu yawarapra gum kudiserume.
8 Ne nai Allah nun mali kunup keca yumada, kan dipapu kael kemserume. Tonda, ‘Nimidi men dinmanenge’ tenen, mali kunup keca yumada, kan asuru di epra konum kael kemserume. Kanda dirin weik ngebo kuruma cadi, nun mali kunup keca men iniptepe.
9 Mali weik kunupa deiki di, Allah kan yu kupkerepa, nun gam kuna tep goda, yambul bumapu kareserume. Keteng tamun, keteng tamun yuma kupbaramepyane, sirya taruda isin karepsemumnge tamupra dopropsemempa, mali pepra ngolokmepedi, adipapu denupe.
10 Nun gam kuna tep keteng tamun go karepsemum ngeda, tujuh puluh tahunpu kepra deipsemume. Puto di kupe nengda, keteng tamun delapan puluh tahun kunupe. Dinino, akunup taru yumada, telep ton men kunupe.
Kange mun keca cap, pu jen jena deikipu kupbaramepyane, sirya taruda, kandi isin karepsemum ngeda, tamupra dopropsemempa, denapu kunupe. Nundi tenenupada, ‘Pio gampu kunkamepa,’ tenenup dinin, menmena denupe.
11 Ware ngebodi ton Allah kandi nun mali kunupnge tep yu tenesemem ngeda, moupra kael keptu do? Atep nengeda, Allah kandi nimi tuai nesala mali kunupnge tep, ila yu weik kukerura cadi, tuai nesala yumada, kan tepapu kware weik kunkamsere.
12 Atep nengeda, ne nai Allah kan dipapu nun tep, “Sun gam kunkamrum taruda, go weik gum cadi, moupra nungpetenkamrume. Ada, ‘Mali kupnup’ tenen, ataru-ataru yumada, pio moupra kunkamrume,” pepra peteremsemempa, nun kael kepmepedi, angepu talepmepedi, moupra kunkamepe. Ukupmepya deiki di, kael kemna deiyo keca kael kepmepedi kunkamepe.
13 Ne nai Allah Yahweh, ware kupra taru yumadi, kandi nun tep ton cap yu tenenkamserum do? ‘Nun tep yu tenesemem ngeda, tapmemdi, tamupra bicau tenepsememdi, lyepropsetume’ tenen, moropkene. Nunda kan amutarapu kunupa cadi, bicau tenepserume.
14 Ne nai Allah, ‘Kandi nun tep bicau tenepsememdi, kan telep kun keca atumi-atumi ipna yuma weika di karenkamserum’ tenen, moropokene. Ukupsemempa, nun gam kunkamep taru yumada, kan tepapu gispal dopra kupedi, gudin mut penkamkepe. Bicau tenepsememdi, melipsemem pangeda, pingping kange doupra teleppu kunkamepe.
15 Ne nai Allah nun mali kupmepunge kunumna tep, ikin keca kareramsemumpa, dororamepnge yumada, ‘Apununa tep, kange telep dounange weika di karenkamserum’ tenen, moropkene.
16 Ne nai Allah, kandi kunupsek pen pel domem kecada, kan amutara pel donup neng, nun damai kupsemempa, epra kael kemkamepe. Kandi, nimi men kupmanto pel, ila mambul pel ton, nundi deipkamep nyapu tep dopmempa, epra kael kemkamenge.
17 Teka ne nai Allah, kanda akeca-keca yuma talememdi, ila puto weik ngebo kurume. Atep, kandi nun bicau tenepsememdi, melipsemempa, kange deipra teleppu kunkamepe. Tonda, kandi nun tep, melipsemem pangeda, ‘Nun pel donkamepa yumada, telep dipapu nong kepbankamsere’ tenen, moropkene.
Nun pe puto deiki dipapu men kuptepe cadi, ‘Allah kandi puto karepsemempa, pel telep kupra donkamepe’ tenen, moropkene. Musadi Allah tep moropu.