Psa 91 | XteSC | STEP | Allahda, akeca-yuma talepra, Ila Puto Weik Deiyo Ngeboda, er amutara kunung nesala yuma tep, kalekra melimrepa, anesalada kange mun kange douna gum dipapu, kange deipra teleppu kunkamenge. Allahda, im deiki jen talen neng, sun malaikat yuma talepra, sun ila deiyo ngebo kurure. Atep, ware nesala do yuma, Allah er amutara kunge nesaladi, pio kwar-kwar gum dipapu, kange deipra teleppu kununge.

Psalms 91

‘Allah Yahweh, er dipapu kalekra melimkamser’ tenen, moronung nesala tep pepu upu

1 Allahda, ^{▼▼Allah – Acada, Ibrani upu deiki di, Allah er si tep, ‘Allah Elyon’ pepra seki. Indonesia Allah upu buku neitamaida, ‘Allah yang Mahatinggi’ pepra sengnunge. Dinino, aupu deiyoda, sun kael kemna tep, angeda konum jenek kupra sekmepu.} akeca-yuma talepra, Ila Puto Weik Deiyo Ngeboda, ^{▼▼Ngeboda, – Acada, Ibrani upu deiki di, Allah er si tep, ‘Allah Shadday’ pepra seki. Aupu ‘Shadday’ deiyoda, sundi, ‘Allahda akeca-keca yuma talepra, pio deiki tara kuredi, pio Ila Puto Deiyo Ngebo kurure,’ tenena tep ‘Shadday’ pepra seki. Sun Ketengban nesala kael kemna tep, angeda konum jenek kupra sekmepu.} er amutara kunung nesala yuma tep, kalekra melimrepa, anesalada kange mun kange douna gum dipapu, kange deipra teleppu kunkamenge.
Allahda, ^{▼▼Allahda – Ibrani upu deiki di, akayat neitamaida, Allah er si tep, ‘Allah Sebaot’ pepra seki. Aupu ‘Sebaot’ sekinge deiyoda, ‘Im deiki kunge jen talena malaikat yumada, Allah erda sun deiki tara deiyo ngebo kurure’ tenena tep, aupu ‘Sebaot’ penunge. Atep, sun Ketengban nesala kael kemna tep, aupu ‘Sebaot’ penga deiyongepu, katuai di sekmepu.} im deiki jen talen neng, sun malaikat yuma talepra, sun ila deiyo ngebo kurure. Atep, ware nesala do yuma, Allah er amutara kunge nesaladi, pio kwar-kwar gum dipapu, kange deipra teleppu kununge.
2 Nedi ne nai Allah er si Yahweh tep upenune. Ne nai Allah kandi ne tep ukupmanto, ila gel ati doamenga neitamai kuramengtopu, neda kan erepra kumempa, neda kan amutara kunkamne. Angeda tali tep gume, nedi kan Allah tep, ‘Er dipapu melipra kalengnerepa, ikin keca ne damai men yankamnera cadi, erdi pio lyemdonkamnere,’ tenepra kunune.
3 Ware nesala do yuma, Allah tep teka tenepmengopda, akeca-keca yumada, sun popmanto keca inipra yakankamrenge peda, Allahdi upu sengrepa, akeca di men popsetue.
Ukupmantoda, nimidi ma pena pemengepa, mangkau co du dopra jerepa, yourure. Youprepa nimidi doprapmenge dinin, tamameng utopu, Allahdi er tep teka tenenge nesala tep melipra lyemdonkamsere.
Tonda ila kange mun pu nimi weik jeramrepa, nesala ban-ban yuma gung weika di denung pu yala-yala yuma, nun kori yakankamrenge peda, Allahdi, ‘Ne mawa nesala apu jeprur’ tenen, kalekra lyemdoserepa, teleppu kunkamepe.
4 Ukupmantoda, ayam nyapu sun nindi dopra er pol amu deipra irirdongomamretopu, Allahdi er tep teka tenenung nesala yuma dopra, er damai derinkamre.
Tonda, sun yumada, Allah er ila puto di erepra kurepa, er amutarapu kunkamrume. Ukupmantoda, er pol puto di sun nong kepdongopserepa, dimpepra bouna di er amutara kunkamrume.
Ukumem pangeda, Allahdi pio men tamkamsere. Ukupmantoda, nimidi mar podan taru, ‘Mar popserur’ tenen, teng kenengmengedi, kelapi doupra mar porbaramengtopu, Allah er puto di nun tep melipra kalengserepa, popmanto keca nun damai yatua peda, men ponkamsere.
Ange utopu, Allahdi, ‘Ikin keca ne amutara kunge nesala damai yakarur’ tenen, er puto di nun tep pio melipra kalengkamsere. Atep, er amutarapu kunkamrume.
5 Pio melipra kalengkamsera tep, lukunda taru peda sun popmanto keca cap, isok cap tep kware men dangkamrume. Tonda komuni taru mangkau dakunmapepa, ‘Nimi pon nengdi, mar di popkuseng do?’ tenen, kwar men kunkamrume.
6 Kunukre taru nimi den pu yankamrenge cap, komuni taru yakankamrenge cap tep, kwar men dangkamrume.
7 Ataruda, nimi denge weik seribu neng apu jeramra deiki di, sun damai depmenga peda, sunda apu jepsetua peda, sun men depkamrume. Tonda, nimi denge weik sepuluh ribu neng (10.000), sun dumsisi tara yana depkameng dinino, sun Allah er amutara kunkamrum nesalada metek dila peda ton men dopkamsere.
8 Sun ukupra kunkamrum taruda, sun asuru di amutu yuma dinmarumpa, ‘Sun amali kuramenge nesala, sun wenemna tep doronung menengada, ikin keca doropmengedi denunge,’ tenen, dinkamrume. Utenepmumdi, sun mali kunge nesala depkamengada, sun asuru di dinkamrume.
9 Sundi, ‘Allahda akeca-keca yuma talepra, deiki tara kuredi, Ila Puto Ereman Ngeboda, er dipapu lyemdonkamsere’ tenen, er tep teka teneprumdi, er amutarapu kumum pangeda, Allah Yahwehdi, pio melipra kalengkamsere. Tonda, ne tep pio melipra kalengnerur ngebo Allah Yahwehdi, sun peda ton kalekra melimkamsere.
10 Ukupra melipseredi, kalengsere pangeda, sun kunkamrumai cap, sun ati cap yumada, ila ikin keca ton sun damai kuserepa, pio men doropkamrume. Tonda sun kunkamrumaida, kange mun keca sun damai yana, sun nong deiki men kupkamsere.
11 Kange mun kange douna keca yatua peda, sun nong deiki men kupkamsere, pepmasenada, tali tep men pepsene. Deiyoda, Allahdi er amutara im deiki pel don neng sun malaikat weika di dopra deiprepa, sun damai tupa yana melipra kalengkamsenge.
Tonda, sun kunkamrum mutu cap, embankamrumai yuma capda, sun malaikatdi melimsengedi, “Ukuprume,” pesengepa, sun amutarapu kunkamrume.
12 Amalaikatdi, sun tep melipra kalengkamseng taru yumada, malaikatdi sun buru cap, yan cap, yuma talepra kusengepa, sun yan gel giso ton men dukamsere.
13 Malaikatdi sun tep konum melimsenge pangeda, bura tara ila yu pus er sida singa pus inipra kuramreyai bemumnya peda, si topra men popkamsere.
Tonda, nimi pon bal inipra kuramruryai bemumnya peda, si topra men popkamsere. Atep nengeda, nimi si toprepa derameng bal cap, ila yu singa pus cap, tali lupra yanipkamruma peda, men popkamsenga tep pepsene.
14 Allah er si Yahwehdi pepu. Tek sisi ne wepra deiamsi ngebodi, ne tepapu kange derinerura tep, nedi er angebo lyemdonkamne. Lyepropnepa, erda ne amutarapu kurepa, neda er damaipu pio kunkamne. Ada, er angebodi ne sipu eremnerura cadi, nedi er tep pio melipra kalengkamne.
15 Angebo er ikin keca doropredi kange mun kupre taru yumada, erdi, “Ne tep melipneo,” pepra moropneryopda, ne gekepnedi er tep pio kalekra melimkamne.
Tonda, angebo er ikin keca dororamrenge tep, lyepnedi, er dopra ereipkamne. Er angebo erepra deipnyopda, yuk nesala yumadi, er tepapu gispal donkamenge.
16 Erepra deipne dingeda, er gam kuna tep keteng tamun weika di ton cap karepnepa, er pio gam kunkamre. Er angebo pio gam kunkamre taruda, nedi er tep lyemdonkamne. Tonda, nedi nimi lyemdonun keca yumada, erdi epra kael kemkamre.