Psa 92 | XteSC | STEP | Allah er gispal dona tep seku Mazmur upu. Angeda, Sabat tumi deiki di mut penkamenga tep sekudi, karepu.

Psalms 92

“Allah erda, telepe,” pena tep, aMazmur upu mutda seku upu

1 Allah er gispal dona tep seku Mazmur upu. Angeda, Sabat ^{▼▼Sabat tumi – Sabat tumida, ada Israel yala nesaladi, Allah er si eremna tumi tepa. Hari Sabat ngeda, hari Jumat lukunda di gonga keamenganen, adinin dipra, hari Sabtu lukunda gawal dangnunge. Ataru neitamai yumada, tali pel dona pio gum di, Allah er sipu eremnung tumi kurure. Allahdi, sun Israel nesala tep, “Ukunkamrume,” pepra deipka cadi, tupa akununge.} tumi deiki di mut penkamenga tep sekudi, karepu.
2 Nun nai Allah Yahweh ^{▼▼deiyo ngebo – Ayat 2 neitamaida, Allah er pe si tep, Ibrani upu deiki di, ‘Yahweh’ pepra seki. Tonda, ayat 6, 9, 10, 14, 16 asi seki.} tep, “Kanda pio telepe,” pepra, er si eremnada pio tep kunkamepe. Angeda telepe pua.
Ada, Allah ^{▼▼Allah – Acada, Ibrani upu deiki di, Allah er si tep, ‘Yahweh’ seki. Tonda, ‘Allah Elyon’ pepra seki. Aupu ‘Elyon’ deiyoda, sundi, ‘Akeca-keca yuma talepra, pio deiki tara kuredi, Ila Puto Eremna Deiyo Ngebo kurure,’ tenena tep, ‘Elyon’ seki. Sun kael kemna tep, angeda konum jenek kupra sekmepu.} Yahweh kanda, akeca-keca yuma talepra, pio deiki tara erepra, ila puto weik Eremna Deiyo Ngebo kuruma cadi, kan si eremna tep mazmur upu mut penkamepe. Angeda telepe pua!
3 Ipna taru yumada, mazmur upu deiki di, kandi nun Israel nesala tep, “Pio ila di bicau tenepsenedi, pio tep telep kudinkamsene,” pepra, pedina upu deiki di peiamsemumnge tep, ‘Yuk neng kael kepkameng’ tenen, sun gekenai di, “Nun nai Allah, telepe,” penkamkepe.
Ange utopu, lukunda taru yumada, kandi, ‘Ukunkamsene,’ peserum upuda, ange tamna gum dipapu, tek sisi pesememtopu, ange yuma tupa-tupa kuseruma tep, “Nun nai Allah telepe,” pepra, kan si eremkamkepe.
4 Ada, amazmur upu mut penkamep taruda, lelim pen keca er sida, gambus cap, ada gitar utopunge, er tapuda 10 kwamrenge cap di, amut penkamkepe.
Tonda, mut pena tep lelim pen keca, er sida kecapi cap deiki di amut penkamkepe.
5 Amut upu penkamepa deiyoda ake. Ada, nun nai Yahweh, kandi pio telep pel dosemempa, kange deipra kunupa cadi, amutda penkamkepe.
Teka, kan pe buru deiki di, pio telep pel melipra doseruma tep, pingping kange deipra, amut penkamkepe.
6 Uo, nun nai Yahweh, kan ila puto deiki mambul pel dosemempa, epmepe dingeda, nundi ‘Uo,’ tenen, kange loserure.
Nun konum kael kepmepu. Kan kange dipru neitamai tenerum kecada, pio mambul kurura cadi, nundi pio men teneptepe. Ila mokon kaurye men kunupetepmanto kuretopu, kandi tenerum ngeda, men tenipmanto kurure.
7 Kandi tenemem keca yumada, sun walwal nengdi angeda tenepra, pio men kael keptenge.
Teka, sun walwal nengda, kandi kurum keca yumada, ‘Allahdi pel dorur deiyo kecada ake’ tenen, pio tenepra men kael keptenge.
8 Tonda, sun pio mali kun kecapu talepra, yuk neng tep yu di ponge nesalada, weik dakununge. Ukupmantoda, beteida menmena tali paramretopu, sun yu nengda, pio weika di tapangnunge.
Teka, tuai mutu neitamaida, dipru neitamai di mali tenepra kunge nesalada, pio weik tapakra kepbangedi, bung keca weika di talengedi, isomkapu kununge.
Dinino, sun dipru neitamaipu mali kunung neng cap, yuk neng tep, sun yu deiki di ponung neng capda, amenda sirya taruda, Allahdi anesala yuma wenepredi, popra sikke buktapkamre ja!
9 Dinino, nun kaele, kanda nun nai Yahweh, im deiki pio tep kunkamreme. Akeca-keca yuma pio deiki tara kumemdi, ila puto deiyo ngebo kurume.
10 Nimi yuma moupra kael kemrume! Allah Yahweh tep, ‘Erda nun songe. Tonda, ‘Er tep nun dabale,’ tenenung neng yumada, amenda taruda depkamenge!
Teka nun nai Yahweh, kan tep yanikengedi, ‘Nun songe,’ tenekenung nesala yumada, amenda taru kandi sun tep wenepra popmemnyopda, sun yuma gum kupkamenge!
Balila kepmengedi, mali-mali kecapu kunge neng yumada, amenda taru kandi sun tep, enepra dopkotepmem pangeda, sun kange tenimtonapu kepmengedi, adipapu bura sepra bengedi, mutu yuk-yuk dana-dana tara mutu embendankamenge.
11 Teka naio, mali kunge nesala weik dakunung dinin, kandi ne tep, pio melimnememnya deiki di, puto karenerume. Ukupmantoda, ila jem sapi bisamda, er giso deiki takke kecada, puto weik kuramretopu, kandi ne tep, puto weik karenerume.
Tonda, kandi, ‘Angeboda, nimi deiyo kepra, ne nyapu sisa Israel yala nesala talepredi, sun nimi deiyo ngebo kunkamre’ tenen, konum wepra deipnemumdi, ange petenkemna tep, ne giso deiki, ukupu minyak zaitun me mokon konum dikra deipnemume.
12 Tonda, ne tep, ‘Nun songe,’ tenenenung nesalada, kandi sun popra amutara konum keipmum ngeda, ne pe asuru di konum epra kael keamsi.
Tonda, yuk nengdi, ne damai yana, ‘Kan pona tep nengda, Allahdi konum wenepra popka tep, pio engepra ngolongnunge,’ pepra, lap pepneipa, konum gekepsi.
13 Teka sun mali tupa kunung nengda, gum kupkameng dinino, kandi nun tep, “Angeda kunkamrume, angeda pio men kunkamrume,” pepra, deiamsemum upupu talengedi, dumsisi teleppu kunge nesala yumada, pio teleppu kunkamenge. Sundi kunkameng keca yumada, teleppu kunkamre ja! Ada, pio telep lyom co, er sida kurma co ^{▼▼kurma co – Acoda, Israel yala nesala kunge mutu neitamai dinin, ila laut mokon cap, ila embaramre me pirmanai cap, paramredi, ila di neramre. Atep, akayat neitamaida, aupuda, ‘kurma co’ pepkada, domon upu utopu kurure. Aupu deiyo neitamai ngeda, ada ‘Israel yala nesalada, pio telep kunkameng’ tenena tep seku.} neramretopu kunkamenge.
Ada, ukupmantoda, Libanon mutu neitamaida, ila co, er si aras coda, puto di tekredi, lyom cap, urasin telep cap kuramretopu, kandi sun dumsisi kunge nesala tep, teleppu kudimempa, pio teleppu kunkameng ja!
14 Ukupmanto ngeda, telep co yal dopra, kan si eremna ati damai koupmengepa, ila di neramre. Ukuprepa, orleramengtopu kupra, kandi melimsemempa, sun dumsisi kunge nesalada, teleppu kunkamenge.
Teka, kan si eremna ati ^{▼▼kan si eremna ati – Akayat neitamaida, aupuda, ‘kan si eremna ati damai’ pepkada, domon upu utopu kurura cadi, akati tenena tep men seku. Aupu deiyo neitamai ngeda, ada Israel yala nesala kurami tara, sun kurami mutu neitamai yuma tenena tep pepu.} damai, yambul co kouptengepa, ila di neramre utopu, sun dumsisi kunge nesalada, kandi kareamsemum mutu, Israel nesala kunup mutu neitamai kunup nesala yumada, teleppu kunupe.
15 Sun dumsisi kunge nesalada, wisi konum deipmengopda, tupa teleppu kungedi, sundi talepra dorameng pel yuma peda, nong kupbankamre ja.
Ukupmantoda, telep co koupmengepa telep kupra neramrepa, er co boda embekpu kuramretopu, aneng peda, tupa telep kuna cap, puto kuna cap kununge.
16 Ukununga deiki di, yuk nesala yuma epmengedi, ‘E, tek sisi nun nai Yahwehdi, “Angeda kunkamrume, angeda pio men kunkamrume,” pepra, peseretopu, er peda dumsisi kupra, pio teleppu kurure,’ tenepmengedi, sun moupra kael kemnunge.
Teka, ne nai Allah Yahweh, erda pio mali kunange tenpu peda pio men kuredi, dumsisi kunangepu talepra kurure. Erdi ne tep, pio melipra kalengnerure. Ukupmantoda, ila mutu bungne gel utopu kurure. Atep, er damai bena kupmepyopda, ikin keca nun damai men yakankamsere.