Psalms 93
Allah erda ila deiyo ngebo gam pio kunkamre pepu upu
1Allah er si Yahwehdi akeca-keca deiki talepra ila deiyo ngebo kurure. Ukupmantoda, tuai mutu ila nimi deiyo neng, Raja nengdi, pio urasin telep opkal kenengamengpa, nimi epmengedi, “Uo, erda telepe,” peramengtopu, Allah erda, pio telep kuredi, ila puto weik ngebo kurure.
Ukurepa, nimi ban-ban yuma kunge nesaladi, ‘Erda ila mambul ngebo’ tenen, kununge. Allah Yahwehdi akeca-keca yuma cap, tuai mutu yuma cap ketekepra deiamudi talerepa, akeca yuma pio dimpeprappu kunkamre.
2Nun nai Allah, kanda akeca-keca yuma kapul ketekepra deiamum taru di kan konum kuramume. Tonda pio tupa akunkamreme. Pumun taru dordi, amenda kunkamre taru peda, kan dipapu akeca-keca yuma talepra ila deiyo ngebo pio akunkamrume.
3Uo, nun nai Allah Yahweh, laut mokon me pirmanaida, me kait puto di weleramredi, lelim weik peramre dinin, ame putoda yambul pua. Kanda ila puto weik ngebo kurumada, puto pio weika kurume.
4Me oupredi embanmaryane, lelim weik peredi embaramrepane, nimi gekepmengedi, ‘Uo ame ounmare ngeda, puto weik kurure,’ tenenunge. Dinino, tek sisi ouramre meda puto metek pua.
Kan ila puto di kurumnge yumada, puto pio weika di kurume. Nun nai Allah Yahweh, kanpu im deiki kumemdi, akeca-keca yuma puto di talememdi, ila puto weik ngebo kurume.
5Nun nai Allah Yahweh, kandi, “Ukunkamrume, angeda pio men kunkamrume. Telep kunada ake,” pepra deiamsemum upu yumada, pio tep akunkamre.
Tonda, kan si eremnup atida, pio teleppu kurure. Mali keca tenpunge peda men kurure. Kan si eremnup ati, pio teleppu kuredi, pio tep akunkamre.
Copyright information for
XteSC